Luka 2

Inkwatwa yakwe Yesu

(Mateyu 1:18-25)

1Pampindinye yo yo imfumu Agusiti wumile imbila munsi yonsi ukuti awantu wonsi wawalikwe. 2Pano ukuwalikwanye koo ukwakutalika kwachisilwe, Kwirinias awino walinji amulasi munsi ya Siria. 3Wonsinye, wayile kukuwalikwa, wilamuntu kumwawo.

4Nu Jozefu-nye wafumile mukaya kakwe Nazareti, mwe Galileya, aya munsi yakwe Yudeya, aya kukaya ka Bethlehemu, muno imfumu e Davidi wakwatizilwe. Jozefu wayile kweneko muno walinji awapachiwanza chakwe Davidi. 5Nawenye wayile kukuwalikwa apaliponga nu Mariya, wino wimalanga. Mariya watezile alinapanji, 6awala pano wali mu Bethtehemu, impindi yakupapila umwana ifichila. 7Atoteka umwanamonsi, amuvwimba nimyenda amulambalika mumusuwa—amuno mung'anda yawapitanzila mutalinji amasyo.

Awachemi nawangeli

8Awachemi wikalanga munsi yoyonye wasunganga ivikwato vyawo, uwusiku. 9Umungeli wa Mfumu e Leza awalolechela, nuwukankala wa Mfumu e Leza awuwawalila. Intete aziwalema kutaluvile, 10ukuwa umungeli awanena ati, Mutatina! Amuno niza walandila Ilandwe zima, ilyachimwemwe kuwantu wonsi. 11Amuno ilelonye lyoo e Katula wino aMfumu e Klistu, wapapilwa mwemwe mukaya kakwe Davidi! 12Ichimanyilo chinu achoo: mwandi mukazane akanya kavivilwe nimyenda kalambalisilwe mumusuwa.

13Napaponapapo iwumba kulu ilyawangeli wamwiyulu alitunka, awakwimbila nukutumvya Leza wakuti,

14Ukuchindama kwe Leza mwiyulu,

numutende munsi muwantu wane akusechela nawo!

15Awala awangeli wapita waya mwiyulu, awachemi awanenana awati, Kanonzi tuyani ku Bethlehemu tukalole chino chapona, chino Imfumu e Leza watunena.

16Achaleka awapitisya awaya awazana Mariya nu Jozefu, nakanya kalazile mumusuwa. 17Awala wakalola, awalandila Jozefu nu Mariya Ilandwe lino umungeli wawanenile. 18Wonsi wane wivwile awazunguka chino awachemi wawanenile. 19Mariya weni ayizuka vyonsinye vyoo awavyelengania mumwezo wakwe. 20Ngapano awachemi awanyoka, awalanga wakwimbila nukutumvya Leza kwevyonsi vino wivwile navino waweni; ndimuno umungeli wawanenezile.

Awita Yesu izina

21Ayala manda yasila munenulambali, awalemba umwana uwusilamo, awamwita izina awati wa Yesu, lino lyatasilwe numungeli pano wachilinji ukuwikwa munda.

Awatwala Yesu mung'anda yakwe Leza

22Impindi ifichila iyakuti e Jozefu nu Mariya wachitile ndimuno isundo lyakwe Musa lyayila ilyakuyiswefya. Achaleka awasenda umwana awaya nawe kwe Yerusalemu mukumufima ku Mfumu e Leza, 23ndimuno chawalichilwa mwisundo lya Mfumu e Leza ukuti, Wakatote wonsi awonsi wawa awimichilwe ku Mfumu e Leza. 24Awaya awafima intozi ziwili nawana wankunda wawili, ndimuno isundo lya Mfumu e Leza lyayila.

25Pampindinye yoyo mwe Yerusalemu mwikalanga umuntu wino izina lyakwe walinji we Simeoni. Umuntunye weyo walinji amuzima wino watinanga Leza, walolelanga itulwa lyakwe Israeli. Emuzimu Mwimichile walinji nawe, 26amupanichisizya ukuti utalifwa nanti kulola Mesaya wino Imfumu e Leza walayilizizye. 27Umuzimu awukolelela Simeoni, aya mung'anda yakwe Leza. Awala awakwasi watwala Yesu mung'anda yakwe Leza ukuti wakamuchitile ndimuno isundo lyayila, 28Simeoni atola umwana amufukatila, asalifya kwe Leza ati,

29We Mfumu Leza, ilelo wafisya ilayilizyo lyako;

ale fwandi leka umuwomvi wako apite umutende.

30Amuno aminso yane yalola ukutula kwako,

31kuno wayania paminso yawantu wonsi:

32Ulukozyo lwakulanjizya amakandi inzila yako,

nukuchindamika awantu wako awa Israeli.

33Eyisi nunyina awazunguka kwevino Simeoni watasile. 34Simeoni awapepa anena nyina, e Mariya ati, Umwananye wee wasolwa nu Leza kukulovya nukukomola awavule mwe Israeli. Weliwenye aliwa achimanyilo chino chafuma kwe Leza chino awantu wavule waliwavwanjila uluwi, 35nukuwumbula inkama zyamumyezo yawo. Amalanda, yano yali ngati alupanga, yakusonkontele mumwezo.

36Kwalinji umutumwa mwanachi wino izina lyakwe walinji we Ana, umwanakwe Fanueli, uwamwiko wakwe Asheri. Walinji amukote wrsile numu lume imyaka munenulambali, 37swinya wasyazile amwanachi mufwilwe umulume kumyaka amakumi kananimonsi nimyaka yini. Atafumanga mung'anda yakupepela; wapepanga Leza uwusiku numusanya, ninzala zyakwe. 38Nawenye pampindinye yoyo asalifya Leza, avwanga ivyamwana weyo kwewonsi wane walolelanga Leza ukuti akomole Yerusalemu.

A wanyochela ku Nazareti

39Awala wamala vyonsi vino isundo lya Mfumu e Leza lyataka, awanyochela ku Galileya, kukaya kawo aka Nazareti. 40Umwana akula awa namaka; ninjelu, nukupepwa kwakwe Leza kwalinji nawe.

Umulumendo e Yesu mung'anda yakwe Leza

41Awakwasi wakwe wayanga kwe Yerusalemu imyaka yonsi pampindi yachakulya chakupitililwa. 42Ala Yesu wamala imyaka ikumi nayiwili iyankulo yakwe, awaya kuchakulya ndimuno wachitilanga penye. 43Ayala amanda yachakulya yasila, awakatuka wakuwela ukuya kumwawo, ukuwa umulumendo e Yesu asyala mwe Yerusalemu. Awakwasi wakwe nanti kumanya ndi asyazile; 44weni watanji ali mumupanda wawantu, achaleka wapisile umusinzo wawanda wonga, awatalika ukumuvwamba-vwamba munko zyakwe namuwawuye. 45Ukuwa nanti kumuzana, achaleka awanyochela kwe Yerusalemu mukumuvwamba. 46Pawanda wachititatu awamuzana mung'anda yakwe Leza ayisile pakasi pawasambilizya wawa Yuda, akuwateyelezya nukuwawuzya. 47Wonsi wano wamwivwanga awazunguka kukumanya kwakwe nakukutolelelanye. 48Awakwasi wakwe awazunguka nkaninye pano walola umwana wawo, nyina asimpuka ati, Mwanane, ngamuno chani chino watuchita wonye-woo? Eso nani tukukuvwamba nuwulanda ukuti tukulole.

49Awatolelela ati, Nga mukumvwambila chani? Wuzye mutamanya kuno nala inde imbe mung'anda yakwe Tata? 50Ukuwa weni watilusile chino wawanenile.

51Achaleka Yesu apita nawo kwe Nazareti awawatontela. Ukuwa nyina asunga amazwinye yaa mumwezo wakwe. 52Yesu awakula, umuwili ninjelu, nukukundikwa nu Leza nawantu.

Currently Selected:

Luka 2: WWN82

Highlight

Copy