Luka 1
1
Amazwi yakulondolola
1Mukundwe wane Tiyofila:
Awavulenye walesya ukuwalika ivyavintu vino vyachitwa mwesweswe. 2Wawalika vino twivwa kwewano waviweni pakutalika nukuviwumbula. 3Achaleka, Mulali, muno nelelezya ivintunye vyoo ukufumilila pane vyatalichila, achaleka nelenginie ukuti mbawalichile Ilandwe lyonsi ichete-chete. 4Nachita wonye-woo alyakuti mumanye ukusimichila kwavintunye vyoo vyonsi vino mwasambilila.
Ukuwumbulika kwankwatwa yakwe Yohani kabatizya
5Pampindi yino Herodi walinji amfumu munsi ya Israeli, kwalinji esimapepo wino witwanga izina lyakwe Zakariya, wino walinji awamuchiwanza chakwe Abija esimapepo. Umuchi walinji we Elizabeth; nawenye walinji awamuchiwanza chawusimapepo. 6Wonsinye wowiliwalinji awalungamane pankolelo paminso yakwe Leza, watontelanga amasundo niviwilo vya Mfumu e Leza vyonsi. 7Watalinji nikwata limwi amuno Elizabeth walinji ang'umba, swinya wonsinye wowili watezile wakota.
8Wanda wumwi pano Zakariya wapyunganga umulimo wawusimapepo pankolelo pakwe Leza, ndimuno wachitilanga penye. 9Ndimuno umwata wawusimapepo wawela, wasozilwe muvipendo ukuti awakocha uwusule wununchile pakavuwa. Achaleka wayile mung'anda ya Mfumu e Leza, 10pano iwumba lyonsi ilyawantu lyapepanga palonde pampindi yakocha uwusule wununchile. 11Umungeli wa Mfumu amulolechela, afika ayimilila lwakwe ndilo pakavuwa kakochela uwusule wununchile. 12Ala Zakariya walola umungeli intete azimulema. 13Ukuwa umungeli amunena ati, Utatina Zakariya! Amuno Leza wivwa ukulambilizya kwako, Elizabeth ewakwako wandi akukwatile umwanamonsi. Uyize umwite izina lyakwe Yohani. 14Ye ulizewela wuli uwazevya nukuzevya, nawavulenye walizewela wuli pankwatwa yakwe! 15Amuno aliwa amukulu nkani pankolelo paminso ya Mfumu e Leza. Ataliwang'wa ipala nanti alipala lule. Alifuma wizuzwa nu Muzimu Mwimichile kuchalinye. 16Alipetulila awa Israeli wavule ku Mfumu e Leza wawo. 17Alikolela pankolelo pakwe Leza, nukukazawana namaka ndivino umutumwa Eliya. Alileka awakwasi nawana wawe apaliponga swinya; alipetula imintawela ukuti wapita munzila zyawulungamane; ukusenganizizya Imfumu e Leza awantu wakwe ukuti waye kweweliwe.
18Nga Zakariya anena umungeli ati, Ngachonye-choo ndichimanya wuli? Vino nakota woo nuwakwanenenye awuliwonga.
19Umungeli atolelela ati, Nenenye ne Gabrieli, nemuntu nkapakata Leza, wino antumile kukwiza kunena Ilandwe zima lyoo. 20Ukuwa wakana ukusuwila amazwi yane, yano yalila yale yafiswe pampindi yoyonye. Muno ukanile ukusuwila wandi uwe wewiwi; wandi ulange wewiwinye ukwizafika pawanda wuno ilayilizyo lyane lilifiswa.
21Pampindinye yoyo awantu walindililanga Zakariya, awazunguka chino wazimbila mung'anda yakwe Leza. 22Ala wafuma apotwa ukuvwanga nawo, achaleka awiluka awati walozwa mung'anda yakwe Leza. Muno chamuposile ukuvwanga, wawasinizyanga awowo.
23Yalile pano impindi yakuwomba umulimo mung'anda yakwe Leza yasila, awela kumwawo. 24Pansizi pampindinye yoyo umuchi Elizabeth awa napanji, alanga wikala mung'andanye kumyezi yisano. 25Ati, Kanonzi pakupelelechezyanye apano Imfumu e Leza wanjavwa wonye-woo. Wamfumya insoni kuwantu!
Ukuwumbulika kwankwata yakwe Yesu
26Pamwezi wachitimutanda uwawula wakwe Elizabeth Leza atuma e Gabrieli umungeli kukaya ka mu Galileya izina we Nazareti. 27Aya anena umukazyana wino wimalwanga nu Jozefu, uwapachiwanza chakwe Davidi amazwi. Izina lyamukazyana walinji we Mariya. 28Umungeli aya kweweliwe ati, Umutende wuwe nawe! Imfumu e Leza ali nawe, wakupepa walutilizya!
29Mariya atamichisya namazwi yano umungeli wamunenile awazunguka chino yasulanga. 30Umungeli amunena ati, Mariya, utatina, amuno Leza ali ninkumbu nawe. 31Wandi uwe napanji uyize ukwate umwanamonsi umwite izina uti we Yesu. 32Aliwa amukulu aliwakwitwa aMwana wawamwilewelewe e Leza. Imfumu e Leza-nye alileka awe amfumu, ndivino yisikulu e Davidi walinji, 33aliwa amfumu yikwata lyakwe Jekapu amanda nuwinji; uwufumu wakwe wutalisila nawanda!
34Mariya anene umungeli ati, Ngachonye-choo chingawa wuli, vino nemwali wino ntamanya umonsi?
35Umungeli amutolelela amunena ati, Umuzimu Mwimichile wandi wukwizile, amaka yakwe Leza yalikuwila. Muno achonyechoo umwana wino alikwatwa aliwa amwimichile awakwitwa aMwanakwe Leza. 36Yizuka uluko lwako Elizabeth. Chavwangwa chati atanga awe nikwata; ukuwa lola kanonzi ali nuwula wamyezi mutanda, chingatenga wakota awoo. 37Amuno pasi chimwi chino chingapota Leza ukuchita.
38Mariya ati, Nemuwomvi wa Mfumu e Leza, ndichiwe kwenene ndimuno wanenela. Nga umungeli afuma kwakwe weliwe.
Mariya aya asyungula Elizabeth
39Napaponapapo Mariya akatuka aya kunsi yamyamba, kukaya kamwe Yuda. 40Aya mung'anda yakwe Zakariya alamuka Elizabeth. 41Ala Elizabeth wivwa umulamu wakwe Mariya, umwana achena munda yakwe. Nga Elizabeth ayizuzwa nu Muzimu Mwimichile, 42apazamuka ati, Wemwanachi mupepwe ukulusye awanachi wonsi, numwananye wino ulikwata aliwa amupepwe! 43Nga ichintu chikulunye ndichoo chachitwa wuli kwenene, ichakuti nyina waMfumu ayize kwenene? 44Amuno pano nala nivwila umulamu wako numwana wachena nichimwemwe munda yane. 45Ye wewalongo wuli muno wasuwila kuno yano wivwa ku Mfumu e Leza yalifiswa.
Mariya ayimbila ulwimbo lwakutumvya
46Mariya ati,
Umwezo wane wukutumvya Imfumu e Leza;
47numuzimu wane wazewela muno we Leza e Katula wane,
48amuno walanguluka umulanda umuntu wakwe!
Ukufumilila kanonzi inkulo zyawantu wonsi zyandi ziwati newalongo,
49amuno avintu vikulu vino e Leza wamaka yonsi wanchitila.
Izina lyakwe alitele;
50akuwanga ninkumbu kwewano wakamutina,
awankulo nankulo.
51Watambalisile ikasa lyakwe ilyamaka
asasya awavilumba namelengania yawo yonsi.
52Wisya izyamfumu zyamaka pandulu zyawo,
wakuzya awalanda.
53Wikusya awanzala nivintu viz ima,
wawinga awachindame wapita makasavye.
54Wafisya ilayilizyo lino walayine nawatatakulu,
wavwa umuwomvi wakwe e Israeli;
55ayizuka Abrahamu nawizikulu wakwe wonsi
wawafwila inkumbu zyamuyayaya!
56Mariya ayikala nu Elizabeth imyezi yitatu, nga awela kumwawo.
Inkwatwa yakwe Yohani kabatizya
57Apano impindi yakwe Elizabeth iyakupapa ifika, apapa umwanamonsi. 58Awawuye ninko zyakwe avivwa vino Imfumu yamufwila inkumbu nkaninye, awamusamalizya.
59Walile pano umwana wamala amanda kananimonsi awaya awamulemba uwusilamo; wakasi ukuti wamwite izina lyakwe Zakariya, eyisi. 60Ukuwa nyina ati, Awe lyolyo pole! Ukuwa izina lyakwe we Yohani.
61Awamunena awati, Ukuwa paluko lwinu wumwi asikwitwa izina lyonyelyoo! 62Awasinizya yisi, awamuwuzya izina lino akasi ayite umwana.
63Zakariya alenga ekalata wakuwalichila penepo. Awalika ati, Izina we Yohani. Wonsi awazunguka! 64Ngapaponye Zakariya atalika ukuvwanga swinya, atalika ukutumvya Leza.
65Intete azilema awawuye wonsi, ivintunye vyonsi avisata munsi yamyamba yonsi iyakwe Yudeya. 66Wonsi wane wivwile awachiwika kunsingo awati, Nga umwananye-wee wandi awe wuli? Chamanyisilwe palwenzenye kuno amaka ya Mfumu e Leza yalinji nawe,
Uwutumwa wakwe Zakariya
67E Zakariya eyisi wakwe Yohani ayizuzwa nu Muzimu Mwimichile, atumwa ati,
68Ndi tuwachindika Imfumu e Leza wawa Israeli!
amuno wizile mukutula awantu wakwe wawasapula mwikoli.
69Watukatusizya Katula wamaka,
piwuvi lyakwe Davidi umuwomvi wakwe.
70Ndimuno wavwanjizile mumilomo yawatumwa wakwe awatele:
71watulayilizizye ukututula kuwalwani witu,
nukutupususya kumaka yakwe wonsi wane watupata.
72Watili alifwila watatakulu inkumbu.
nukwizuka ilayano lyakwe ilyamuzilo.
73-74Walayilizizye alapa kwe tatakulu Abrahamu,
alapa kuno alitupususya kuwalwani witu,
ukuti tuwamupakata nanti ntete;
75tuwe swewatele swinya awalungamane pakwe weliwe,
muwumi witu wonsi.
76Ukuwa, wewenye mwanane, uliwakwitwa wemutumwa
wawa mwilewelewe e Leza.
Amuno ulikolela pankolelo pa Mfumu e Leza
kukuyania inzila yakwe;
77ukunena awantu wakwe ivyakutulwa kwawo,
nukutetelwa kwaluwembu lwawo.
78E Leza witu awankumbu nichikuku.
Alileka ikomolwa lituwalile, ndivino ukucha kwamutondotondo.
79Liwalile wonsi wano wali mumfinzi
nawano wali muchizyungani chamfwa,
ukututungulula munzila yamutende.
80Umwana awakula kumuwili nakumuzimu. Wikalanga mulumpalang'ang'a isuka impindi iyiza iyakuyisokolola ku wa Israeli.
Currently Selected:
Luka 1: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
