Luka 9
9
Yesu atuma awasambilizi ikumi nawawili
(Mateyu 10:5-15; Marko 6:7-13)
1Yesu awunganika awasambilizi ikumi nawawili apaliponga awapa amaka nuwukankala wakuwinjila imizimi miwipe yonsi nukupozya indwala zyonsi, 2Awatuma ukuti waye mukuwila ivya Wufumu wakwe Leza mbali nukupozya awalwale. 3Awanena ati, Mutize muwasenda akantu kamwi pamusinzo winu: nanti ansonzonye iyakusintilila, nanti achakupempela, nanti akakulya kamwi, nanti andalama, nanti akusenda amalaya yawili-yawili. 4Konsinye kuno waya wawapochelela, amwikala mung'andanye yoyo amusuka amwiza amufuma mukaya kaknoye. 5Konsinye kuno awantu wakana ukuwapochelela, amufuma mukayanye kako amukunkumula itukumbu lyakumatamba yinu kukuwasochela.
6Awasambilizi awafuma awapita mutwaya tonsi, awalanga wakuwizya Ilandwe Zima mbali nukupozya awantu konsinye.
Herodi awaluwaluwa
(Mateyu 14:1-12; Marko 6:14-29)
7E Herodi imfumu ya mwe Galileya, ayivwa ivintu vyonsi vino vyachitwanga; awaluwaluwa nkaninye amuno awantu wamwi watanji, Yohani kabatizya azyuIupusile! 8Nawo wanji watanji Eliya watunka, wanji nawo awati, amutumwa wawatumwa wakali wazyulupuka. 9Herodi ati, Ngavino nenenye naputuzile Yohani umutwe; ngafwandi nawe weyo wino nkumwivwa ivintunye vyoo amuntu-chi? Awalondesya nkaninye ukuti alole Yesu.
Yesu alela awantu ikumi impindi zisano (5,000)
(Mateyu 14:13-21; Marko 6:30-44; Yohani 6:1-14)
10Awasolwa awanyoka awaya kwe Yesu awamutulila vyonsi vino wayile awachita. Awasenda awongoloka awaya kukaya kano wakati Betisaida. 11Ayala amawumba yivwa ayawakonka. Awapochelela, awawalandila ivya Wufumu wakwe Leza, apozya nawano walinji awalwale.
12Alila ilanzi lyati lyakwinjila, awasambilizi ikumi nawawili awaya kwe Yesu awamunena awati, Leka awantu wasatile mutwaya namuzyampunda zino zili mupipi wakavwambe ichakulya ninde, amuno koo amumayonde.
13Ukuwa Yesu awanena ati, Mwemwenye wapani chino wangalya.
Awamutolelela awati, Swenji tuli nimisumba yisano ninswi ziwili ampela. Wuzye ukulonda tuye tukakale ichakulya chino chingakwila iwumba lyoo lyonsi? 14(Ukuvula kwawantu walinji imyanda ikumi impindi zisano awonsi watupu).
Yesu anena awasambilizi wakwe ati, Tekani awantu mumpuka zyamakumi yasano-yasano.
15Awasambilizi awachitila ndimomonye awaleka wonsi awikala pansi. 16Yesu atola imisumba yisano ninswi ziwili, apunamila mwiyulu, asalifya Leza, amenya, apa awasambilizi wakwe ukuti wankanie awantu. 17Wonsi awalya awikuta; nga awasambilizi awizuzya ichakulya chino awantu walile achisyala ivitundu ikumi naviwili.
Peter awumbula ivyakwe Yesu
(Mateyu 16:13-19; Marko 8:27-29)
18Wanda wumwi pano wapepanga wenga, awasambilizi wayile kweweliwe afika awawuzya ati, Wuzye amawumba yakuti neweni?
19Awamutolelela awati, Wamwi wakutanji we Yohani kabatizya. Wanji wakutanji we Eliya, pane wanji wakutanji wewumwi uwawatumwa wakali awino wazyulupuka!
20Awawuzya swinya ati, Ngamwenji mukutanji-neweni?
Peter atolelela ati, We Mesaya wakwe Leza.
Yesu avwanga nivyakuyimba kwakwe nimfwa yakwe
(Mateyu 16:20-28; Marko 8:30—9:1)
21Yesu awapamantizya ukuti watize wanena wumwi chonye-choo, 22ayonjelezya ati, U Mwana Muntu alele ayimbe nkaninye, akanwe nawasongo, nawasimapepo wakulu nawasambilizya wamasundo. Akomwe nukukomwa, ukuwa azyulupulwe pawanda wachititatu.
23Anena wonsi ati, Ndi wumwi akasi ankonke, ndi ayikanile, ayisendele uwuchingane awankonka amanda nuwinji. 24Amuno wensi wino akulonda ukukakatizya uwumi wakwe aliwusumba; ukuwa wensi wino wiza wasumba uwumi wakwe muno anene alilanga ali nawo. 25Ngafwandi umuntu angawotoka chani ndiwawa ninsi yonsi ukuwa ndi umwenecho wasowa wachimba nukuchimba? Nanti chongachonga! 26Ndi umuntu wafwa insoni pakwe nene nisambilizyo lyane, weyonye awino uMwana Muntu alimufwila insoni pano wiza-wiza mukuchindamikwa kwekwe nukuchindikwa kwa Monsi wakwe nawangeli wakwe awatele. 27Yizukani choo! Nkuwanena nkuti, Panyepaa pali wamwi pakwe mwemwe, wane watalifwa wasuke wize walole Uwufumu wakwe Leza.
Ukupilunkana
(Mateyu 17:1-8; Marko 9:2-8)
28Pansizi pavintunye vyoo, yekwela kwasila amanda munenulambali, Yesu asenda Peter, nu Yohani nu Jemusi awakwela umwamba mukupepa. 29Ala pane akupepa, impumi yakwe ipilunkana nivizwalo vyakwe aviswepa aviwazikimila. 30Awantu wawili walinji paponye wavwanganga nawe. E Musa nu Eliya, 31wano walolesile nukuchindamikwa kwamwiyulu awalanga wakuvwanga ivyakwe Yesu vino angafisya ukulonda kwakwe Leza afwe mwe Yerusalemu. 32Peter nawawuye waponechile, ukuwa awala wapampuka awalola uwukankala wakwe Yesu nawantu wawili wane wimilile nawe. 33Awala pano awantunye wawo wasyutuka, Peter anena Yesu ati, Mulali, achizima ukuti sweswe tulange tuli konye-koo. Twandi tuzenge imitanda yitatu, wumwi wuwe awako, wumwi awakwe Musa, nawunji wuwe awakwe Eliya. (Kweni, atamanyile nachino akuvwanga.)
34Ala achili akuvwanga, iwingo aliza aliwavwimba nichisawu; awasambilizi awatina nkaninye pano wafumpachizwa niwingo. 35Izwi laifuma mwiwingo aliti, Wee aMwanane, umusolwa wane—mwivwanji!
36Lyalile izwi lyamyalala, awiwuchila kuno Yesu aliwenga. Awasambilizi wakwe awaswima-mya kwechino waweni, nanti kunena umuntu wumwi chimwi.
Yesu apozya umulumendo wamuzimu wuwipe
(Mateyu 17:14-18; Marko 9:14-27)
37Uwacha awatantamuka umwamba, iwumba kulu alisunkania Yesu. 38Lolani, umuntu wumwi mwiwumba apunda ati, Musambilizya, nkukulambilizya ukuti ulole umwanane—amuno ali wenganye-nsu! 39Umuzimu wukamulema awumwiwuchizya apongomoka ngati we sinsa amusumba pansi, nitotofulu aliwafuma kumulomo; awumulema nkaninye achitala nukufuma mweweliwe! 40Na lambilizizye awasambilizi wako ukuti wawuwinge, ukuwa waposilwe.
41Yesu atolelela ati, Oko, mwe mintasuwila-mwe! Nga nandi ndange nawa namwe ukufika-kwi? Anena umuntu ati, Leta umwanako koo.
42Ala pano umulwale akuya, umuzimu awamuzangula pansi ichilumelume ngati ali nusinsa. Ukuwa Yesu akalipila umuzimu wuwipe, apozya umulumendo, amulemeka kweyisi. 43Awantu wonsi awazunguka uwukankala wamaka yakwe Leza.
Yesu avwanga ivyamfwa yakwe swinyanye
(Mateyu 17:22-23; Marko 9:30-32)
Awala pano awantu wachili wakuzunguka kuvintu vyonsi vino Yesu wachisile, Yesu anena awasambilizi wakwe ati, 44Mutize mwiwilile chino nkasi mbanene! UMwana Muntu wandi alemekwe mumakasa yawantu. 45Ukuwa nanti kuti wiluke chino amazwinye yaa yakusula. Chawatalizile ukwiluka muno amazwi yalinji ayankama, intete aziwalema ukumuwuzichisya umulanduye wowo.
Ngaweni wakula walusya
(Mateyu 18:1-5; Marko 9:33-37)
46Ngapano imipanzi ikatuka muwasambilizi awapanzyania ukuti wamanye wino wesongo. 47Ukuwa ala Yesu wawalola imipanzizye yamyezo yawo, asenda akana, akimilika pakwe weliwe, 48awanena ati, Wensi wino wiza wapochelela akana ndivino kanye-kaa mwizina lyane, alitela wampoche lelo nenenye; nawensi wino wiza wampochelela, alitela wapochelela wino wantuma. Amuno wino wachepesya mwakwe mwemwe weyonye awili wakula walusya.
Wino asinakasinza namwe awinu
(Marko 9:38-40)
49Yohani avwanga ati, Tatakulu, twaweni wumwi akufumizya imizimu miwipe mwizina lyako, atumulesya, amuno atalinji awitu.
50Ukuwa Yesu amunena apaliponga nawasambilizi wawuye ati, Mutize muwamulesya, amuno wensi wino asi nakasinza namwe ye awinu.
Akaya kakwe Samariya akakana ukupoehelela Yesu
51Ayala amanda yafichila ayakuti Yesu apochelelwe mwiyulu, Yesu apamvya alungama kwe Yerusalemu. 52Akolezya intumi pankolelo peweliwe, azipita aziya azyinjila mukaya ka Samariya kukumuyanizya vyonsi. 53Ukuwa awantu nanti kumupochelela, amuno weni wayanga kwe Yerusalemu. 54Awala awasambilizi wakwe, e Jemusi nu Yohani walola wowonye, awati, Mfumu, Wuzye ukasi tunene umulilo wufume mwiyulu wize wuwoche?
55Yesu apiluluka awakalipila; 56alungama kukaya kanji.
Ukuvwilika ukukonka Yesu
(Mateyu 8:19-22)
57Awala pano wali pamusinzo, umuntu wumwi amunena ati, Nandi ndakukonka konsi kuno ukuya,
58Yesu amunena ati, Wamumbwe wali nimichembo, nazyo inyunyi zyamupela zili nivisalanzo, ukuwa uMwana Muntu weni asi napakulambalika umutwe wakwe. 59Anena winji ati, Nkonka nene.
Ukuwa umuntunye weyo ati, Tatakulu, leka ntele nkazike tata.
60Yesu amutolelela ati, Leka awafwe wazikana nawafwe wawuye, Wenji pitanga kawizyange Uwufumu wakwe Leza.
61Umuntu winji anena Yesu ati, Mfumu, Nandi ndakukonka; ukuwa pakutalika uleke ntele nkalaye inko zyane.
62Ukuwa Yesu amunena ati, Wensi wino akula watalika ukulima anyoka awalola kunsizi atazipila mu Wufumu wakwe Leza.
Currently Selected:
Luka 9: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
