Yohani 7

E Yesu nawanyina

1Pansizi pavintu vyonye-vyoo, Yesu apita mwe Galileya; muno atakasi ukupita mwe Yudeya, amuno wakapanzya wawa Yuda walondanga ukumukoma. 2Ichakulya chikulu icha wa Yuda ichamitanda chatezile chapalamila, 3achaleka awanyina wakwe Yesu awamunena awati, Fuma moo uye mwe Yudeya, alyakuti nawasambilizi wakonye walole imilimo yino ukuchita. 4Amuno pasi wumwi wino akafisa chino akuchita ndi akasi alumbililwe. Vino ukachita ivintu vyonyevyoo, leka insi yonsi ikumanye! 5(Nanti awanyinanye watamusuwizile.)

6Yesu awanena ati, Impindi yane itani ifichile. Mwenji impindi yinu ampindi yonsinye. 7Awamunsi watanga wawapate, ukuwa nenji wakumpata, amuno nanda nkasinila insi nkuti imilimo yawo amiwipe. 8Ale yanji kuchakulya chakuyitopwa. Ukuwa nenji nsinakuya kweneko, amuno impindi yane itanifichile, 9Ala wawanena wonye-woo, asyala ayisile mu Galileya.

E Yesu pachakulya chamitanda

10Pansizi awanyina awaya kuchakulya chikulu, nu Yesu-nye aya kweneko; ukuwa nanti kuya apatiswe, ukuwa asochelela awowo. 11Nga wakapanzya wawa Yuda awamuvwamba pachakulya chikulu. Awati, Nga alikwi?

12Akuwa ukutokotezyania kukulu nkaninye mwiwumba kuvyakwe Yesu. Wamwi watanji, Amuntu muzima, wanji awati, Awe, nawo wanji awati akusovya awantu. 13Ukuti umuntu wumwi atatela avwange ichilola amuno watinanga wakapanzya wawa Yuda.

14Pano manda yakutevya yafika pakasi Yesu aya kung'anda yakwe Leza afika awasambilizya. 15Wakapanzya wawa Yuda awazunguka wakuti, Ng'umuntunye wee wamanya wuli vino asitela aye kunsukulu?

16Yesu atolelela ati, Ukusambilizya kusi akwane ukuwa kwafuma kwe Leza, wino wantuma. 17Ndi wumwi akulonda ukuchita ukulonda kwakwe Leza alimanya ndi chino nkusambilizya chafuma kwe Leza pamwi nkuyivwanjila nenga. 18Umuntu wino akayivwanjila ivyakwe akalonda ukuchindama kwakwenye. Ukuwa wino akalonda ukuchindama kwakwe wino wamutuma, weyonye awakusimichila mwakwe weliwe musi uwufi. 19Wuzye Musa atawapile amasundo? Ukuwa pasi wumwi uwakwe mwemwe wino akayatontela. Ngafwandi mukasi munkomele chani?

20Iwumba lyawantu alitolelela aliti, Siwapena! Ngaweni akasi akukome?

21Yesu atolelela awanena ati, Nawomba umulimo wukulu wonga mwensinye mwazunguka. 22Musa wawakomelezizye ukulemba awana winu uwusilamo (ukuwa atalinji we Musa wino watalisile nkandi wasokulu), achaleka mukalembela awana winu uwusilamo pawanda wakusolezya. 23Ndi umwana walembwa uwusilamo pawanda wakusolezya alyakuti isundo lyakwe Musa litize lisulwe nga nenji amuno chani chino mwamvitilwa muno napozizye umuntu wawa ichete pawanda wakusolezya? 24Mutize muwapanzya kukulola kulonde kutupu, ukuwa mule muwapanzya ichete.

Wuzye we Mesaya?

25Ngapano awantu wamwi awa mwe Yerusalemu awati, Wuzye asi awenyewee wino wakulonda ukumukoma? 26Silolani! Ngavino akuvwanga ichilolanye, ukuwa pasi nanti wenga wino akumusumbichila! Wuzyenche wakapanzya wangatela wamanyichisya ichete ukuti we Mesaya? 27Ukuwa ndi Mesaya wiza-wiza, pasi wino alimanya nakuno wafuma. Ukuwa umuntunye wee weni, swensinye twamanya kuno wafuma.

28Achaleka ala akusambilizya mung'anda yakwe Leza avwanga nizwi kulu ati, Wuzye nachawuzimanye mwamanya, mwamanya nakuno nafumanye? Ntayizila nenga, ukuwa wino wantuma awakusimichila. Mutamumanya nanti akumumanya, 29nenji mumanyile, amuno nafuma kweweliwe, weliwenye awino wantuma.

30Ngapano awalonda ukumulema, ukuwa nanti apakuti umuntu wumwi amulemelele, amuno impindi yakwe yachilinji ukufichila. 31Ukuwa awavule mwiwumba awamusuwila, awati, Wuzye ndi Mesaya wiza-wiza aliyiza achite ivimanyilo vikulu nkani ukulusye vyoo vino umuntunye wee wachita.

Awatuma awasilikali mukulema Yesu

32AwaFalisi awivwa iwumba lyawantu likutokotezyania ivyakwe Yesu, achaleka woliwonye nawasimapepo wakulu awatuma awasilikali wamwi mukulema Yesu. 33Yesu awanena ati, Natela ndange indi namwe impindi ntichi, ngapano njize inje kwewino wantuma. 34Muliwamvwamba nanti kuti munzane, amuno kuno niza naya mutaliyiza kweneko.

35Ngapano wakapanzya wawa Yuda awavwanzyania wakuti, Ngakokonye kuno akulonda ukuya akwi, kuno tutanga tukamuzane? Wuzye aliya mutwaya twawa Giriki muno muli awaYuda, amuno akasambilizyange awa Giriki? 36Akuti, Muliwamvwamba nanti apakuti munzane, swinya akuti, Mutaliyiza kuno ndiwa. Ngachonyechoo chikusula chani?

Induzi zyaminzi yawumi

37Pawanda wakupelelechezya wachakulya chakutevya walinji awanda wukulu kutaluvile. Pawandanye wowo

Yesu ayimilila apunda ati, Wensi wino wakalilwa nulusala ndayize kwenene ang'we. 38Ndimuno Amawaliko Matele yatachila yati, Wensi wino akunsuwila, induzi zyaminzi yawumi ziliwatantala ukufuma munda yakwe. 39Yesu wavwanzile ivya Muzimu, wino wane wamuzumila wize wapochelelele awano walimupochelela. Pampindinye yoyo Muzimu wachilinji ukupwa, amuno Yesu wachilinji ukuchindamikwa.

Ukupawunkana kwawantu

40Awantu wavule awivwa akuvwanga wowonye awati, Nachawuzimanye umuntunye wee amutumwa!

41Wanji awati, We Mesaya!

Ukuwa nawo wanji awati, Mesaya atanga afume mu Galileya! 42Amawaliko Matele yavwanga yati, Mesaya alifuma mwiwuvi lyakwe Davidi, ayize akwatwe mukaya mu Bethlehemu, muno Davidi wikalanga, 43Achaleka ukupawunkana akuloleka mwiwumba muno weliwe. 44Wamwi awakwe woliwo walondanga ukumulema, ukuwa pasi wino watezile amulemelela.

Wakapanzya wawa Yuda nanti kusuwila

45Awasilikali awaya kwewasimapepo wakulu na ku waFalisi, awafika awawawuzya awati, Ngamuno chani chino mutamulesile?

46Awasilikali awati, Pasi umuntu wumwi wino akatela avwanga wamuntu wenye-wee!

47AwaFalisi awawuzya awati, Wuzye namwenye ayile wawatumpika? 48Wuzye kuli kapanzya wumwi nanti amuFalisi wino wamusuwila? 49Iwumba lyawantunye waa watamanya amasundo yakwe Musa, achaleka watipwa nu Leza!

50E Nikodemu wino wayile kwe Yesu akatanzi walinji awumwi uwakwe woliwo, wawanenile ati, 51Isundo litu lisipa umuntu umulandu pane watani wamwivwe wamanye nachino wachita,

52Awamutolelela awati, Ala sifwandi nawenye we mu Galileya? Yanga kawazichisye Amazwi Matele wandi ukazane kuno mu Galileya mutanga mufume umutumwa wumwi.

Currently Selected:

Yohani 7: WWN82

Highlight

Copy