Yohani 6

Yesu alela awantu imyanda ikumi impindi zisano (5,000)

(Mateyu 14:13-21; Marko 6:30-44; Luka 9:10-17)

1Pansizi Yesu alamba sumbi waGalileya (pamwi esumbi wakwe Tiberia). 2Iwumba kulu ilyawantu alimukonka, amuno waweni imilimo mikulu yino wapozizye awalwale. 3Yesu akwela umwamba aya ayikala nawasambilizi wakwe penepo, 4Ichakulya chakupitililwa icha waYuda achipalamila. 5Yesu atalangania alola iwumba kulu ilyawantu likuya kweweliwe, achaleka anena Filipu ati, Nga twaya tukakale ichakulya-kwi ichakulela waa wonsi? 6(Wavwanzile chonye-choo kukwelezya Filipu awowo; amuno umwenecho wamanyile chino angachita.)

7Filipu atolelela ati, Ukuti wonsi walye katichi-katichi chikulondwa indalama imyanda yiwili izyakukala ichakulya.

8Wenga uwawasambilizi wakwe e Andreya, umunyina Simoni Peter avwanga ati, 9Panye-paa pali umulumendo wino ali nawabuledi wasano ninswi ziwili. Ngavyeni vyonye-vyoo avyachani kuwantu wonsi awavula waa?

10Yesu ati, Lekani awantu wikale pansi. (Paponye palinji isote vule.) Achaleka awantu wonsi awikala pansi; ukuvula kwawo walinji kwela imyanda ikumi impindi zisano (5,000) awonsi watupu. 11Yesu atola buledi, asalifya kwe Leza, ayankania wane wisile paponye. Ninswinye achita wowonye. 12Awala wikuta anena awasambilizi wakwe ati, Solani imvongonyo zino zyasyala; katize kamwi kononeke. 13Achaleka awakonganika vyonsi, awizuzya ivitundu ikumi na viwili ivyakwe wabuledi wane awantu walile asyala.

14Awantu awala walola imilimo mikulu yino Yesu wachisile awati, Nawuzyenye wee amutumwa wino wiza munsi! 15Ala Yesu wamanya kuno awantu wakulonda ukumusenda, ukuti wamupatichizye wamuwike pawufumu; ayongoloka aya kumyamba wenganye.

Yesu apita paminzi

(Mateyu 14:22-33; Marko 6:45-52)

16Akula kwila awasambilizi wakwe awaya kwesumbi, 17awinjila muwato, awalamba sumbi awalungama ku Kapemahumi. Akufita, Yesu nanti kuloleka kwewoliwo. 18Paponye ichimuza chikulu chapupanga chikuvundula aminzi. 19Awasambilizi watezile wasika uwato kwela amayilosi yatatu pamwi yani awalola Yesu akupita paminzi papela, akuya akupalamila kuwato, intete aziwalema nkaninye. 20Yesu awanena ati, Anene! Mutatina. 21Apano awalondesya ukumupochelela muwato; uwato awuti nukufika kunsi yino wayanga.

Awantu awavwamba Yesu

22Awucha iwumba lino lyasyazile mumbalama zinji izyakwe sumbi awalola kuno kwasyazile uwato wonganyensu. Swinya awamanya kuno Yesu atapisile nawasambilizi wakwe muwato, ukuwa awasambilizi wapisile wonga. 23Ukuwa amato ayafuma kwe Tiberia, ayafika kuchituntu kupipi nakuno iwumba lyalile ichakulya, pane Imfumu e Yesu wasalifizye. 24Ayala amawumba, yalola kuno Yesu atalinji-po, nanti awasambilizi wakwenye, awinjila muma to awaya ku Kapemahumi kukumuvwamba.

Yesu achakulya chawumi

25Awala wazana Yesu mumbalama zinji izyakwe sumbi awati, Musambilizya, nga koo wizile mpindi chi?

26Yesu atolelela ati, Awenche nkuwanena nkuti, Musinakumvwambila muno mwasuwila imilimo yane imikalambane, ukuwa amuno mwalile ichakulya mwikuta mwensi. 27Mutize muwawombela ichakulya chino chikakononeka; ukuwa; wombelanji ichakulya chino chikalimuka achifika nakuwumi wamuyayaya. Ichakulya chamwatanye wowo achino Umwana Muntu aliwapa, amuno awino e Leza Umukwasi wamupa ichimanyilo.

28Achaleka awamuwuzya awati, Nga uchite chani nga tuwombe imilimo yakwe Leza?

29Yesu awatolelela ati, Umulimo wuno Leza akalonda muwombe awoo: ukuti musuwile wino Leza watuma.

30Awatolelela awati, Nga achimanyilochi chino wandi uchite nga tulole apano tukusuwile? Nga wandi uchite chani? 31Watatakulu walile amana mulumpalang'ang'a, ndimuno Amawaliko Matele yavwanjila ukuti, Wawapile ichakulya ukufuma mwiyulu.

32Yesu awanena ati, Awenche nkuwanena nkuti; chino Musa wawapile chitalinji achakulya chenecho chamwiyulu ukuwa we Tata awino akuwapanga ichakulya chenecho chamwiyulu. 33Ichakulya chino Leza akapa awino wafuma mwiyulu akapa uwumi kuwamunsi.

34Awamulambilizya awati, Tatakulu, uwatupa ichakulya chonyechoo pe.

35Yesu awanena ati, Nechakulya chawumi. Wino akwiza kwenene atalitela alumwe ninzala; nawino akunsuwila atalitela alumwe nulusala. 36Paponye, nawanenile inti mwandola nanti kusuwila. 37Wensi wino Tata wampa aliyiza kwenene. Nawensi wino wizawiza kwenene ntalitela muwinge nawanda, 38amuno nafuma mwiyulu niza mukuwomba umulimo wakwe wino wantuma, ukulonda kwane pole. 39Wino wantuma akalonda ukuti nchite woo: ukuti ntize nsovye wumwi wino wampa, ukuwa ukuti njize mbazyulupule pawanda wakupelelechezya. 40Ukulonda kwakwe Tata kuli wonyewoo; ukuti wensi wino akulola Umwana nukuwika insingo mweweliwe aliwa nuwumi wamuyayaya; swinya ndiwazyulupula pawanda wakupelelechezya.

41AwaYuda awatalika ukumukwina, muno watili, Nechakulya chino chafuma mwiyulu. 42Achaleka awati, Wuzye wenye-wee asi we Yesu umwanakwe Jozefu? Twamanya yisi nunyina. Ngafwandi akuvwanjila chani, vino akuti nafuma mwiyulu?

43Yesu awatolelela ati, Mutize muwakwinuluka. 44Pasi wumwi wino angiza kwenene suka ndi we Tata wino wantuma awino wamuleta; ndimuzyulupula pawanda wakupelelechezya. 45Awatumwa wawalika wati, Wonsi walisambilizwa nu Leza. Wensi wino wivwa Tata wasambilila nukusambilila kwakwe weliwe akakwiza kwenene. 46Choo chisinakusula ukuti umuntu wumwi akatela alola Tata; suka wino wafuma kwe Leza awino walola Tata. 47Awenche nkuwanena nkuti, wino akusuwila aliwa nuwumi wamuyayaya. 48Nechakulya chawumi. 49Wasokulu walile amana mulumpalang'ang'a, ukuwa awafwa. 50Ukuwa ichakulya chino chafuma mwiyulu achino ndi umuntu walya atanga ayize afwe. 51Nechakulya chino chafumile mwiyulu swinya chili nuwumi. Ndi umuntu walya ichakulya chonyechoo alilandila umuyayaya. Ichakulya chino ndimupa amuwili wane, wuno nkupanga alyakuti insi iwe nuwumi.

52Chonye-choo achileka awa Yuda awapanzyania wakuti, Nga umuntunye wee angatupa umuwili wakwe wuli ukuti awuno tulye?

53Yesu awanena ati, Awenche nkuwanena nkuti, Ndi mutalile umuwili wa Mwana Muntu nukung'wa uwazi wakwe ye musi nuwumi wumwi. 54Wino akulya umuwili wane nukung'wa uwazi wane ali nuwumi wamuyayaya ndimuzyulupula pawanda wakupelelechezya. 55Amuno umuwili wane achakulya chakusimichila nawo uwazi wane achakung'wa chakusimichila. 56Wensi wino akulya umuwili wane nukung'wa uwazi wane atela akwikala mwakwe nene nani mwakwe weliwe. 57We Tata wawumi awino wantuma, achaleka muno weliwe nani ndinuwumi. Avino nawensi wino akundya aliwa nuwumi amuno anene, 58Chonye-choo, achakulya chino chafuma mwiyulu; chisi ndivino chino wasokulu walile, napoliye awafwa. Wino akulya ichakulyanye choo aliwa nuwumi wamuyayaya.

59ivintu vyonye-vyoo Yesu wavwanzile mung'anda yakupepela mu Kapemahumi.

Amazwi yawumi wamuyayaya

60Awasambilizi wakwe awavule awivwa wonye-woo awati, Amazwinye yaa amatale. Ngaweni angayiluka?

61Ukuwa chingatenga wumwi atanenile Yesu vino awasambilizi wakwe wakwinulukanga kwechonye-choo, wamanyile awanena ati, Wuzye chonyechoo achino chawazunga? 62Ngafwandi chingawa wuli ndi mwalola Umwana Muntu wanyochela kuno walinji kali? 63Wino akapa uwumi aMuzimu wakwe

Leza; amaka yawuntu yasifungula chimwi. Amazwi yano nawanena awuli Muzimu swinya awumi. 64Ukuwa naponye wamwi awakwe mwemwe wasinakusuwila. (Yesu wamanyile lyankaninye wane watasuwilanga, nawino wanga amukutililenye.) 65Achaleka ayonjelezya avwanga ati, Chochonye achino nawanenezile inti pasi wino angiza kwenene suka ndi Tata awino waleka wiza.

66Amuno achonye-choo, awasambilizi wakwe awavule awatozoka awanyochela kunsizi watatela wapite nawe swinya. 67Achaleka Yesu anena awasambilizi ikumi nawawili ati, Wuzye namwenye—mukasi mupite?

68Simoni Peter amutolelela ati, Mfumu, nganaswe twandi tuye kweweni? Vino wewenye awemuntu uli namazwi yano yakapa uwumi wamuyayaya. 69Kanonzi twasuwila swinya twamanyichisya kuno we Mutele wino wafuma kwe Leza.

70Yesu atolelela ati, Wuzye ntawasozile ikumi nawawili? Ukuwa naponye wenga uwakwe mwemwe Wechiwa! 71Watakanga Yuda, umwanakwe Simoni Iskarioti. Amuno chingatenga e Yuda-nye walinji awumwi uwasambilizi ikumi nawawili, awino wanga amukutilile.

Currently Selected:

Yohani 6: WWN82

Highlight

Copy