Yohani 8

Umwanachi wino walemilwe akuzeleluka

1[Wonsi awaya kumwawo, ukuwa Yesu weni aya kumwamba wamingungu. 2Awucha mwepwi alawila mung'anda yakwe Leza swinya. Awantu wonsi awaya kweweliwe, ayikala awawasambilizya. 3Awasambilizya wamasundo na waFalisi awamutwalila umwanachi wino wazanile akuzeleluka, awafika awamwimilika pakasi. 4Awanena Yesu awati, Musambilizya, umwanachinye wee wamuzanichizya akuzeleluka. 5Mumasundo yitu Musa watusunzile ati, umwanachi wamwata wonyewoo amumupola namawe afwa. Ale papo, wenji ukuti wuli? 6Wavwanganga chonye-choo ukuti wamuteye, alyakuti wakamwambe. Ukuwa Yesu ayinama pansi awawalika pansi numunwe wakwe. 7Awala walindila ukumuwuzya, ayinuka awanena ati, Ndiwensi mwakwe mwemwe wino asitela awembuke ndi atalichile amupole. 8Swinya anyoka ayinama awawalika pansi. 9Awala wivwa wowonye, wonsi awapita, wengawenga, ukutalichila kwewasongo; ukufika nakuwatichi. Awasya Yesu wenga, numwanachi ayimilile paponye. 10Yesu ayinuka anena umwanachi ati, Wemwanachi-we, ngawalikwi? Sipatasyazile nanti wumwi uwakuti akusinile?

11Umwanachiatolelela ati, Nawumwi Mfumu.

Nawe Yesu ati, Nanti anenenye nsinakukusinila. Pitanga, ukuwa utize uyize akawifye swinya.]

E Yesu wekuwala kwansi

12Yesu avwanga swinya ati, nekuwala kwansi. Wensi wino akunkonka aliwa nukuwala kwawumi nanti kwiza pita mumfinzi nawanda.

13AwaFalisi awamunena awati, Kanonzi ukuyipanichisizya wemwenecho; chino ukuvwanga achavye.

14Yesu atolelela ati, Ng'o, chingatenga nkuyipanichisizya nemwenecho, chino nkuvwanga achakusimichila, amuno namanya kuno nafumile nakuno nkuya. Mwenji mutamanya kuno nafuma nakuno nkuyanye mutakumanyile. 15Mwenji ipanzyo linu alyawuntu; nenji nsinakupanzya wumwi. 16Ukuwa ndachino nkupanzya, ipanzyo lyane lingawa alyakusimichila, amuno nsinenga: ukuwa e Tata wino wantuma alinani. 17Mumasundo yinu chawalikwa ukuti ndi wakalola wawili wazumilizyania, yewakusimichila. 18Nkuyipanichizya nemwenecho, nu Tatanye wino wantuma akumpanichisizya.

19Awamuwuzya awati, Nga esonye we yo alikwi?

Yesu atolelela ati, Nant' anenenye nu Tata mutatumanya. Amuno ndi mute le mwamanya nene ngali nu Tatanye mwamumanya.

20Yesu wavwanzile amazwinye yaa pane wasambilizyanga mung'anda yakwe Leza, mung'anda yino wawikanga imbokosi zyavifimwa. Pasi umuntu wumwi wino wamulemile, amuno impindi yakwe yachilinji ukufichila.

Kuno nkuya mutanga mwize kweneko

21Yesu awanena swinya ati, Nandi mpite; mwize muwamvwamba, ukuwa mulifwila muluwembu lwinu. Mutanga mwize kuno nkuya.

22Achaleka wakapanzya wawa Yuda awati, Akuvwanga akuti, Mutanga mwize kuno nkuya. Wuzye chonyechoo chikusula kuno akulonda ukuyinyonga?

23Yesu atolelela ati, Mwenji mwafuma munsinye moo, ukuwa nenji nafuma mupela, Mwe wamunsinye moo, ukuwa nenji ntafuma munsi yoo. 24Achaleka nawanenezile inti mulifwila muluwembu lwinunye. Swinya ndi mwakana ukusuwila nenenye nalwane mulifwila muluwembu lwinunye,

25Awamuwuzya awati, Ngaweweni? Yesu awatolella ati, Ndimuno mbanenezile pakutalika. 26Indi nivintu vivule ivyakuvwanga nivyakuwapanzya. Ukuwa kweni wino wantuma, awakusimichila, achaleka nkanena insi vino nivwa ukufuma kweweliwe ampela.

27Watamanyile kuno wavwanganga kwewoliwo ivya Mukwasi. 28Achaleka Yesu awanena ati, Mulila pano mwatumpula Umwana Muntu apano mulimanya kuno anenenye nalwane; apano mulimanya kuno nsichita chimwi nenga, ukuwa nkavwanga vino Tata wansambilizya ampela. 29Wino wantuma alinani; atansya nenga, amuno nkuchitanga vino wakunda.

30Awavule wane wivwile Yesu akuvwanga ivintunye vyoo awamusuwila.

Awanangwa nawazya

31Achaleka Yesu anena awaYuda wano wamusuwizile ati, Ndachino mukutontela vino nkuwasambilizya ye, nachawuzimanye mwewasambilizi wane; 32mulimanya ukusimichila, ukusimichilanye koko kulileka mukululwe. mukululwe.

33Awatolela awati, Swelikwata lyakwe Abrahamu, tusitela tuwe swewazya kumuntu wumwi. Ngafwandi ukusula chani pano ukuti, Mulikululwa?

34Yesu awanena ati, Awenche nkuwanena nkuti, Wensi wino akawembuka amuzya waluwembu. 35Penye umuzya asiwa awapachiwanza, nkandi umwana. 36Achaleka ndi Umwana waleka mwakululwa, amutela mwakululwa molimonye. 37Manyile kuno mwe likwata lyakwe Abrahamu. Ukuwa mukulonda ukunkoma, amuno mwakana ukupochelela amazwi yano nkasambilizya. 38Nenji nkavwanga ivintu vino Tata wandanjizya, namwe mukachita ivintu vino eso wawanena.

39Awamutolelela awati, Etata we Abrahamu.

Yesu awatolelela ati, Ndi nachawuzimanye mwewanakwe Abrahamu, ngali mukachita imilimo yino Abrahamu wachisile. 40Nenji nawanena ukusimichila konsi kuno nivwa kwe Tata. Ukuwa naponye mukulonda ukunkoma. Abrahamu atatela achite ichamwata ndiwoo! 41Mwenji mukuchita imilimo yakwe'so.

Awatolelela awati e Leza wenganyensu awili Tata. Swewanakwenye awakusimichila.

42Yesu atolelela ati, Ndinachawuzimanye e Leza weso ngali mwankunda, amuno nafuma kwe Leza kanonzi newaa. Ntayizila nenga, ukuwa weliwe wantuma. 43Ngamuno chani chino musinakwivwa chino nkutaka? Amuno mutanga mwivwe amazwi yane. 44Mwewanakwe eso, e Satana, swinya mukalonda ukuchita ukulonda kwakwe. Walinji wechikoma napakutalikanye. Atalinji awakusimichila, muno mweweliwe musi ukusimichila kumwi. Weni ndi wavwanga uwufi achitela chamuyana amuno uwufinye awuli wakwe, wechawufinye umwenecho, echanyina wawufi. 45Muno nkavwanga ivyakusimichila, mwakana ukunsuwila. 46Ngaweweni uwakwe mwemwe wino angansinila ati nawifya chimwi? Ukuwa ndi nkavwanga ivyakusimichila ngamuno chani chino mwakanila ukunsuwila? 47Wino wafuma kwe Leza akakwivwa amazwi yakwe Leza. Ukuwa naponye mwenji, mutafuma kwe Leza, chochonye achino mwakana ukwivwa.

E Yesu nu Abrahamu

48Awa Yuda awatolelela Yesu awati, Wuzye tusinakusimichila pano twatili we muSamariya uli navyamuzimu?

49Yesu atolelela ati, Nsinavyo. Nenji nkachindika Tata ukuwa mwenji mukunsalula. 50Nsinakulonda ukuyichindika. Pali wenga wino akasi anchindike wino akampanzizya ichete. 51Awenche nkuwanena nkuti, Wensi wino akutontela amazwi yane atalitela afwe.

52AwaYuda awamunena awati, Kanonzi twakumanyanye kuno awenche ulinavya muzimu! Abrahamu wafwa, nawatumwanye wafwa, ukuwa naponye ukuti, Wensi wino akutontela amazwi yane atalitela afwe. 53Etata e Abrahamu wafwa; wuzye wenji ukuyilola kuno wakula wamulusya vwile? Nawatumwanye wafwa. Ngafwandi wenji ukuti weweni?

54Yesu atolelela ati, Ndinkuyichindika, ukuchindama kwane akwavye, wino akunchindika we Tata—wino mwemwenye mukuti we Leza winu. 55Mutamumanya, nanti akumumanya, ukuwa nenji namumanya. Ndi inkuti ntamumanya, yenechawufi, ngatiamwemwenye. Ukuwa nenji namumanya, natontela amazwi yakwe. 56Eso Abrahamu wasechelanga kuno angiza alole uwanda wane; wawuweni asechela.

57Awa Yuda awamunena awati, Utani ufike nakumyaka amakumi yasano—nga ukuti walola Abrahamu wuli? 58Yesu atolelela ati, Awenche nkuwanena nkuti, Pano Abrahamu atani akwatwe ye ndipo.

59Awasola amawe ukuti wamupole nayo; ukuwa Yesu avwama afuma mung'anda yakwe Leza.

Currently Selected:

Yohani 8: WWN82

Highlight

Copy