Yohani 9
9
Yesu apozya umontu wino wakwasilwe ntonko
1Ala vino Yesu akupita alola umuntu wino wakwasilwe ntonko. 2Awasambilizi wakwe awamuwuzya awati, Musambilizya, weweni wawembusile wino walesile umuntunye wee
akwatwa antonko? Wuzye amwenechonye pamwi awakwasi wakwe?
3Yesu atolelela ati, Asi amuno aluwembu lwakwe nanti aluwembu lwawakwasi wakwe achino antonko, ukuwa alyakuti imilimo yakwe Leza iloleke mweweliwe. 4Tule tuwawomba imilimo yakwe wino wantuma, pano wuchili amusanya; uwusiku wakwiza, pano wumwi atanga awombe. 5Pano nchili indi munsi nekuwalakwansi.
6Ala Yesu wavwanga wonye-woo, aswilila pansi akanda ivu namati; apaka umuntu nivu muminso, 7amunena ati, Yanga kasambe paminso mwiziwa lyakwe Siloamu. (Lino alili lyakuti Tumwa.) Achaleka umuntu aya asamba kuminso, anyoka akulola.
8Achaleka awawuye wane wamuweni akulenga akatanzi, awawuzya awati, Wuzye wee asi wekalenga wino wikalanga akulenga?
9Wamwi awati, Weliwenye, ukuwa wanji awati, Awe, asi weliwe, wakolana awowo.
Achaleka umuntunye weyo ati, Neweliwe.
10Awamuwuzichisya awati, Ngafwandi aminso yako yiyulwa wuli?
11Atolelela ati, Amuntu wino wakutanji Yesu wakanzile ivu, wapaka muminso yane, wanena wati, Yanga kwe Siloamu ukasambe kuminso. Achaleka nayile nasamba nga nalola.
12Awamuwuzichisya awati, Nga alikwi?
Atolelela ati, Ntamanyile.
AwaFalisi awavwambilizya vino intonko yapozile
13Awatwala wino walinji antonko ku waFalisi. 14Palinji apawanda wakusolezya pano Yesu wakanzile ivu ayiyula aminso yantonko. 15Ngaswinya awaFalisi nawo awamuwuzya awati, Ngawapozizwe wuli? Intonko iwanena iti, Wawisile ivu paminso yane, nasamba kuminso, kanonzi nkulola. 16AwaFalisi wamwi awati, Umuntu wino wachisile chonye-choo atafuma kwe Leza, amuno atapechela uwanda wakusolezya.
Ukuwa wanji awati, Nga umuntu umuwembu angachita imilimo mikulu ndiyoo wuli? Awantu awapawunkana. 17Achaleka swinya awaFalisi awawuzichisya intonko awati, Ngawenji ukuti ali wuli wino wiyuzile aminso yako?
Atolelela ati, Nenji nkuti amutumwa. 18Wakapanzya wawa Yuda nanti kumusuwila wati walinji antonko apochelezile icheni awowo, awasuka awita awakwasi wakwe 19awawuzya awati, Wuzye wee amwanawinu? Wuzye vwile wakwasilwe antonko; ngakanonzi akulola wuli?
20Awakwasi awatolelela awati, Chino swenji twamanya achakuti amwana witu, swinya wakwasilwe antonko. 21Ukuwa chino kanonzi akulola tutachimanyile, swinya tutamanya nawino wiyula aminso yakwe. Muwuzyani; wesongo. wandi ayivwanjile! 22Awakwasi awavwanga wonye-woo muno watinanga awaYuda, muno awaYuda wazumilizinie awati, Ndi umuntu wumwi wati Yesu we Mesaya aliwingwa mung'anda yakupepela. 23Achaleka awakwasi awati, Wesongo; muwuzyani!
24Awanyoka swinya awita wino walinji antonko impindi yachitiwili awamunena awati, Lapa pankolelo pakwe Leza usimichilenye! Chino swenji twamanya achakuti umuntu wee amuwembu.
25Umuntu atolelela ati, Nenji ntamanyile ndi amuwembu, Chonga chino manyile achakuti nenji nalinji nentonko, ukuwa kanonzi nkulola.
26Awamuwuzya awati, Ngawachisile wuli? Nga wiyuzile aminso yako wuli?
27Awatolelela ati, Mbanenile kali, ukuwa mwakana ukwivwa. Ngachinji chino mukulonda ukwivwa achani? Nche mungatela namwenye mukulonda ukuwa mwewasambilizi wakwe?
28Awamutuka awati, Wewenye awemuntu wemusambilizi wakwe; swenji pole swewasambilizi wakwe Musa. 29Tumanyile kuno Leza wavwanzile nu Musa: ukuwa ivyamuntunye wee vyeni, tutamumanya nakuno wafuma!
30Umuntu atolelela ti, Alaa, achakuzunguka wuli? Mutamumanya nakuno wafuma, naponye wampozizye aminso! 31Twamanya kuno Leza asikwivwa awawembu; akakwivwa awantu wane wakamuchindika wane wakachita ukulonda kwakwe. 32Pano insi yalile italichila tusitela twivwe ukuti wumwi wiyuzile aminso yakwe wino wakwasilwe antonko; 33ndi umuntu wee atafuma kwe Leza, atanga achite chimwi.
34Awamutolelela awati, Wakwasilwe
mbali nukukulila muluwembu-wuzye ukutusambilizya sweswe? Awamufondomola mung'anda yakupepela.
Uwutonko wamumuzimu
35Yesu ayivwa wakuti wawinzile wino walinji antonko. Aya amuzana amunena ati, Wuzye ukusuwila mu Mwanamuntu?
36Umuntu amutolelela ati, Sinena, ngaweweni tatakulu, alyakuti ndamusuwila!
37Yesu ati, Umuweni kali, awino akuvwanga nawe kanonzi.
38Umuntu ati, Mfumu, Nkusuwila! afukama pankolelo pakwe Yesu.
39Yesu ati, Munsi moo nizila kukupanzya, alyakuti intonko ziwalola, nawane wakalola watonkoke.
40AwaFalisi wamwi, wane walinji nawe awivwa vino wavwanganga awamuwuzya awati, Wuzye naswenye swentonko?
41Yesu atolelela ati, Ndi mutele mwentonko ngali musi numulandu; ukuwa vino kanonzi mukuti tukulola, muchili muluwembu.
Currently Selected:
Yohani 9: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
