Eksodas 5
5
Moses ghe Eron ne tei ne filoni king gna Ijep
1Moses ghe Eron tei ne filoni king gna Ijep, eghuteuna phiamare ne cheke eghu ka mana, “Lord nodi God maedi Israel ne cheke eghu, ‘Snakredi nogu naikno iara gre mala jifla ka kantri igne, mala tangomana mare ei gaghamu ka iara ke lamna namono nagou!’ ”
2Nu king igne ne cheke eghu, “Ihei Lord na mala leghuni iara mana? Iara theome laseni mana, eghume iara ginauna theome tangomana nate snakre ghami te tei ghotilo na!”
3Nu Eron ghe Moses heta ghedi fabrahu ne cheke eghu, “Nomi God ghehati mae Hibru neke chekehi balumi ghepa. Snakre ghami ghehati sagho mala tei ghehati ka namono nagou gno mala fafara ka Lord nomi God nabagna thilo narane. Jame te theome eni ghehati igne na, God ginauna falehe ghami ka fogra ba kau magra.”
4Nu king ne cheke eghu, “Moses ghe mae Eron! Naugna unha si ghopa te magnahaghei atha fajifladi naiknore ka nodi gloku grea? Ghopa jaola ke pulo loku! 5Filo si ghopa, nogu mae gloku iara igre kmana fara gognarona. Nu ghopa lhotidi mare te loku na! Theo!”
6Eghuteuna ka narane igne la, king ne cheke faheta ka mae funeidi mae sneka nei ka maedi Israel te reireghidi kheradire. Mana ne cheke eghu, 7“Gognarona ghotilo thosei snakre lao buburu moja mala eꞌei brik ka naiknore. Ghotilo mala huhurudi mare mala tei hirodi thedi buburu moja igre. 8Eghuteuna ghotilo cheke faheta ka mare, eigna mare mala edi jateula naba te sughu edi thedi mare tifa ra eghu. Mare theome mala kmoꞌe ka naba brik! Naiknore igre thodo fara! Naugna igne te mei tanhi mare ka iara igne, ‘Snakre ghami ghehati mala tei fafara ka nomi God.’ 9Ghotilo huhurudi mae igre mala loku heta fara. Jame te eghu na, mare ginauna loku mala theome fanomho ka nogna chaichaghi mae Moses are.”
10Aonu mae funei baludi mae te reireghidi igre mala tei cheke eghu ka mae sneka igre, “King ne cheke eghu, ‘Ghehati ginauna nake theome snakre ari buburu moja ka ghotilo mala eꞌei brik. 11Ghotilo mala tei hiro nomi buburu moja themi, aheva ghotilo tangomana te ludedi re. Nu ghotilo mala edi naba brik jateula teke sughu edi ghotilo tifara eghu. Ghotilo theome mala kmoꞌe ka brik!’ ” 12Aonu mare tei ne hiro buburu moja ka vido te gnafa ka kantri Ijep. 13Eghuteuna leuleghu narane na, mae funei igre huhurudi naiknore mala loku heta. Mare ne cheke eghu, “Ghotilo mala eꞌei naba brik jateula te sughu edi ghotilo tifa ra eghu, kate tufa buburu moja mare ka ghotilo na!” 14Mae funei igre ne puri fadiꞌadi mae te reireghidi mae gloku re. Eghuteuna mae funei igre ne cheke eghu ka mare, “Naugna unha site theome eꞌei naba brik ghotilo gnorai ba gognarognea, jateula te sughu edi ghotilo tifa ra teuna?”
15Aonu mae greireghi igre ne tei ka mae king, ne cheke eghu ka mana, “King! Ghehati nou mae gloku iagho. Naugna unha sagho te fakokhoana ghami fara ghehati gnea? 16Nou mae gloku iagho igre theome tufa buburu ka ghehati, nu mare huhuru ghami ghehati mala eꞌei kmana brik. Eghuteuna mare puri ghami ghehati, nu nodi najafra nou mae gloku iagho gre kolho eghu.”
17Nu king na ne cheke eghu ka mare, “Ghotilo naikno thodo! Ghotilo thodo loku kolho! Naugna igne te mei tore eghu ghotilo ka iara gne, ‘Iagho snakre ghami ghehati mala tei fafara ka Lord.’ 18Ghotilo ke pulo mala loku! Ghehati ginauna theome tufa buburu moja ka ghotilo, nu ghotilo mala eꞌei naba brik jateula te sughu edi ghotilo tifa ra eghu.”
19Kate cheke king ka mare te mala eꞌei naba brik jateula tifa ra teuna, mae greireghi igre nomhi glani te puhi biꞌo na thokedi mare. 20Kate jifla mare ka sugagna king na, mae te reireghidi mae Israel filodi Moses ghe Eron ofodi neu mare. 21Aonu mae greireghi igre ne cheke eghu ka Moses ghe Eron, “Snakreni Lord mala para ghami ghopa eidi glepo te edi ghopa igre. Ghopa eni king nei nogna funei mana igre mala theome magnahaghei ghami ghehati jateula mae ihei te theome magnahagheni glepo te siri diꞌagna fara ia neu. Ghopa ei puhi ranghidi mare mala falehe ghami ghehati!”
Moses ne diꞌa nagnafagna fara, aonu mana ne tarai eghu ka God
22Aonu Moses figri ka Lord ne cheke eghu, “Lord! Naugna unha sagho te snakreni puhi biꞌo igne te thoke ghami ghehati nou naikno iagho grea? Lord, naugna unha sagho te kuru mei ghau iara ka namono igne te hata te mei puhi biꞌo igne ia? 23Funu ka narane teke tei iara ka king teke chekedi ka mana nou cheke iagho ra, te ghilei mei posa gognarogne, king paradi fara naiknodi Israel. Eghuteuna iagho theome eni kaisei glepo te mala fakarhidi re!”
Currently Selected:
Eksodas 5: mrn
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
