Eksodas 4

God ne tusu ranghini mae Moses u nolaghi te mala eꞌei kofubobhoi na

1Moses ne toreni Lord ne cheke eghu, “Faꞌunha eghu jame te tirodi fatutuanidi nogu cheke iara re, ba tirodi fanomho ka iara na? Eghuteuna jame te cheke eghu mare ka iara na, ‘Iagho chaghi! Lord na theome mei kolho ka iagho!’ Jame te eghu na, unha nate chekeni iara ka mare na?”

2Aonu Lord ne ghusna eghu ka Moses, “Unha site loku teu iagho ana ia?”

Eghuteuna Moses ne cheke eghu, “Kaisei khodo.”

3Lord ne cheke eghu, “Koko soru pari.”

Aonu Moses ne koko soru khodo igne pari, eghuteuna khodo igne megei nga ne vuhai mogo, eghuteuna Moses filoni mogo igne ne rikha. 4Nu Lord ne cheke eghu ka mana, “Thosei rikha, loku haghe sagho ka sekogna na.” Eghuteuna mogo igne tughu neke khodo fapulo. 5Lord ne cheke eghu ka Moses, “Jame te eni iagho glepo igne ka tathadi naiknore, mare ginauna fatutuani te mei iara ka iagho na. Eghuteuna mare mala lase ghau iara nodi God kuꞌemi ghotilo ra, iara nogna God Ebraham, Isak nei Jekop.”

6Lord neke cheke eghu ka Moses, “Iagho nhaꞌa lao khamemu na lamna ka nou pohe na.” Aonu Moses ne leghuni unha te chekeni Lord igne ne nhaꞌa lao lamna ka nogna pohe na. Eghuteuna kate atha fajifla mana khamegna na, bakua ne thafru ka khamegna na mana na, eghuteuna khame igne ne thofno diꞌa filogna na.

7Lord ne cheke eghu ka mana, “Iagho ke nhaꞌa laoi lamna pohe khamemu na.” Aonu Moses nhaꞌa lao khamegna na lamna pohe. Eghuteuna kate hata fajifla mana na, khamegna mana igne neke keli fapulo jateula keha khame na neu.

8Lord ne cheke eghu ka Moses, “Jame te theome fatutuani nigho ba theome filo glanidi teu naiknore nou kofubobhoi eigna khodo igne, nei kate fakakhana iagho kofubobhoi eigna bakua igne teuna, mare ginauna fatutuani nei figri nagnafadi eghu. 9Nu jame eni iagho fapea kofubobhoi igne, eghuteuna theome fatutuani nei theome fanomho ka nou cheke iagho re teuna, iagho ginauna hata katha khoꞌu ka Khoꞌu biꞌo Nael, eghuteuna tofa soru ka glose na. Khoꞌu igne ginauna vuhai dadara kate tofa soru iagho ka glose na.”

10Nu Moses ne cheke eghu ka Lord, “Lord, iagho thosei kuru ghau iara, naugna funu tifa te mei na, iara theome raꞌe cheke fakeli. Eghuteuna neuba iara ne chekehi balumu iagho, nogu cheke iara gre theome keli kolho. Iara cheke ghu na thoghei fara, eghuteuna iara theome laseni te cheke fakelidi chekere.”

11Lord ne cheke eghu ka mana, “Ihei teke eni foflogna naikno na? Eghuteuna ihei te mala eni naikno na te mala megli ba te mala theome lase cheke na? Ihei te mala eni naikno na te mala fifilo na, ba te mala dofu na? Iara Lord, iara ngala tangomana te edire glepo igre. 12Tei sagho! Iara ginauna togho nigho mala cheke, eghuteuna iara ginauna fagriu nigho unha te mala cheke iagho na.”

13Nu Moses ne cheke eghu, “Lord, iara tore nigho mala kuruni kaisei mae ngau!”

14Lord ne diꞌatagna fara ka Moses, ne cheke eghu ka mana, “Thabusimu Eron, mae ka vikegna Livae, mana kaisei mae keli mala cheke, mana ginauna mala togho nigho iagho. Gognarona mana mei mala thafo nigho iagho, eghuteuna mana ginauna na kelitagna te filo nigho iagho na. 15-16Iara ginauna togho ghami ghopa mala cheke, eghuteuna iara ginauna fagriu ghami unha te mala eni ghopa na. Iagho ginauna chekedi cheke igre ka mana, iagho jateula God eghu ka mana. Eghuteuna Eron ginauna mala cheke ka naiknore tughu nigho iagho, mana mala jateula foflomu eghu iagho. 17Eghuteuna iagho atha nou khodo na mala ei kofubobhoi.”

Moses neke figri Ijep

18-19Kate au teu Moses ka nohi Midian igne, Lord ne cheke eghu ka mana, “Iagho ke figri Ijep. Naugna mae te magnahaghei falehe nigho iagho ra la kafe lehehi.”

Aonu Moses neke figri ka nanghogna Jetro ne cheke eghu ka mana, “Iagho snakre ghau iara mala ke tei filodi vikegu Ijep ra. Iara magnahaghei te tei filodi te karha teu ba tela lehehi teure.”

Jetro ne cheke eghu ka mana, “Keliu kolho, iagho tangomana te tei na.” 20Aonu Moses atha khetogna na nei phei thugnare ne fasaghedi ka nogna dongki na neke figri Ijep. Eghuteuna mana jaola ne atha nogna khodo teke cheke God mala atha mana tekuna.

21Lord ne cheke eghu ka mana, “Kate figri teke posa iagho Ijep na, iagho mala kegra ke ulugna king mala edi kofubobhoi te gnafa teke tusu ari nolaghi iara mala edi iagho tekura. Nu iara ginauna farerheta nagnafagna king na, eghuteuna mana ginauna theome snakre ghami ghotilo te jifla te tei na. 22Ka narane tuana iagho na cheke eghu ka king, ‘Igne unha te chekeni Lord na: Naiknodi Israel igre jateula thugu teke kulu karha ra eghu iara. 23Eghuteuna iara neke kulu chekehi te iagho mala snakreni thugu iara na mala jifla ka namono igne, mala mei tufru soru ghau iara. Nu naugna iagho ne theome snakredi mare te mei na, iara ginauna aknu falehe thumu nalhaꞌu ululahu iagho na!’ ”

24Kaisei bongi, kate theome posa teu Ijep na, mare au ka kaisei vido mala thuru. Ka vido igne, Lord mei ne magnahaghei faleheni Moses. 25-26Nu khetogna mana Sipora igne ne atha kaisei thina fnonu ne vahe mae sitei igne, eghuteuna atha katha vido guli ne faplata lao ka ghahegna mae sitei na. Aonu naꞌa ne cheke eghu ka mana, “Dadara igne ginauna reireghi nigho mala karha iagho.” Eghuteuna naugna mae sitei la vahehi, Lord na theome faleheni Moses.

27Lord ne cheke eghu ka Eron, “Eron. Iagho tei thafoni Moses ka namono nagou gno.” Eghume, Eron tei ne thafoni mae Moses ka thogele blahi Sanai ne gnanghoni mana. 28Moses ne toutonu ka Eron gobigna lepo teke chekedi Lord ka mana re. Eghuteuna mana jaola chekedi kofubobhoi teke chekedi Lord mala edi mana tekure.

29Kate figri Moses ghe Eron Ijep, phiamare ne kilodi lida te gnafa Israel igre mala kafe mei. 30Eron kegra haghe ne chekedi gobigna lepo teke chekedi Lord ka Moses, mala jaola ke edi kofubobhoi igre ke uludi naiknore. 31Mare te gnafa na ne kafe fatutuani eigna Lord teke kuru meini Moses. Eghuteuna kate nomhini Lord te kokhonidi naiknore, nei filo glanidi nodi naꞌau papara re teuna, naiknore pogho soru ne tarai ka Lord.

Currently Selected:

Eksodas 4: mrn

Highlight

Copy