Eksodas 6

1Aonu Lord ne cheke eghu ka Moses, “Theome raugha iagho ginauna filoni unha nate eni iara ka king gna Ijep. Iara ginauna loku ka nogu nolaghi biꞌo na ranghini mana, mala snakredi mana nogu naikno iara gre mala jifla tei mare. Uve, mana ginauna huhurudi mala jifla mare ka nogna kantri na.”

God neke fapea kiloni mae Moses

2God ne cheke eghu ka Moses, “Iara Lord. 3Tifa na, iara neke thakle ka Ebraham, ka Isak, nei ka Jekop, eghuteuna mare lase ghau iara te iara ‘God mae ihei te au nolaghi fateote'o.’ Nu iara neke theome falalase ghau thegu ka mare te iara Lord. 4Iara neke famamhaku nogu nhaꞌa cheke na ka mare gnafa, eigna iara ginauna snakre lao ka mare kantri Kenan. Namono igne teke au jateula naikno posa teku kolho mare tifa na. 5Gognarona iara nomhidi nodi natanhi naiknodi Israel naugna naiknodi Ijep igre huhurudi mare mala loku heta jateula sneka eghu ka nodi namono na, eghuteuna iara ke ghathoni nhaꞌa cheke teke eni iara tifa ia.

6“Eghume, iagho tei cheke eghu ka naiknodi Israel ra, ‘Iara Lord. Iara ginauna fakarhi ghami ka gloku biꞌo naiknodi Ijep te huhuru ghami mala edi ghotilo teu are. Iara ginauna fasnagli ghami mala theome sneka ghotilo ka naiknodi Ijep. Iara ginauna paradi mare, eghuteuna iara ginauna hata fajifla ghami mala snagla tei ghotilo ka nogu nolaghi biꞌo iara. 7Ka puhi igne, iara ginauna hata ghami ghotilo mala jateula nogu naikno eghu iara, eghuteuna iara nomi God ghotilo. Eghuteuna ghotilo ginauna laseni te iara Lord, nomi God ghotilo, eigna iara ginauna fakarhi ghami ghotilo ka gloku biꞌo naiknodi Ijep te huhuru ghami mala edi ghotilo teu are. 8Iara ginauna batu ghami tei ka namono teke nhaꞌa cheke iara ka kuꞌemi ghotilo tifa ra, Ebraham, Isak nei Jekop. Iara ginauna snakre ari ka ghotilo namono igne, eghuteuna ghotilo ginauna khotogna namono igne tifa tifa. Iara Lord, ginauna eni glepo igne.’ ”

9Aonu Moses ne chekedi cheke igre ka naiknodi Israel, nu mare theome fanomho ka mana. Naugna gaoghathodire theome rheta ka gloku biꞌo naiknodi Ijep te huhuru te mala edi mare igre.

10Lord neke cheke eghu ka Moses, 11“Iagho tei cheke ka king mala snakredi mana naiknodi Israel igre mala jifla ka nogna kantri mana igne.”

12Nu Moses ne kegra ke ulugna Lord ne cheke eghu, “Nu iara theome lase cheke fakeli. Jame te tirodi fanomho naiknodi Israel igre ka iara na, faꞌunha eghu king igne fanomho ka iara? Eigna iara gne theome lase cheke!”

13Aonu Lord ne cheke ka Moses ghe Eron eidi naiknodi Israel nei mana cheke ranghini king gna Ijep. Eghuteuna Lord cheke ka Moses ghe Eron mala batu fajifladi naiknodi Israel igre Ijep.

Vikedi Moses ghe Eron

14Igre nanghadi mae biꞌo ka thilo vikedi Israel:

Thugna ululahu Jekop na Ruben, eghuteuna mana au fati thugna nalhaꞌu. Nanghadi fati mae igre, Hanok, nei Palu, nei Hesron nei Kami. Eghuteuna tharakna ka vikegna Ruben igre au nanghadi fati igre.

15Eghuteuna fapea thugna Jekop na Simion, mana au namno thugna nalhaꞌu. Nanghadi namno mae igre, Jemuel, nei Jamin, nei Ohat, nei Jakin, nei Soha, nei Sol idogna mana na kaisei gaꞌase ka tharaknagna Kenan. Eghuteuna tharakna ka vikegna Simion igre au nanghadi namnoi igre.

16Fatilo thugna mana na Livae, eghuteuna mana au thilo thugna, Geson, nei Kohat, nei Merari. Eghuteuna tharakna teke karha mei ke leghudi thiloi igre au nanghadi thiloi igre. Livae neke au nabagna kaisei gobi tolufulu fitu finogha. 17Mae Geson gne au phei thugna nalhaꞌu, Lipni ghe Simei. Eghuteuna phei tharakna te mei ke leghudi igre, au nanghadi phei igre. 18Eghuteuna Kohat au fati thugna nalhaꞌu, Amram, Isa, Hebron nei Usiel. Kohat karha ne posani kaisei gobi tolufulu thilo finogha neke lehe nga. 19Eghuteuna Merari ne au phei thugna nalhaꞌu, Mali ghe Musi.

Igre nanghadi tharakna ka vikegna Livae.

20Amram neke tolaghi ka Jokebed, greghagna kmagna mana. Repa au phei thudi nalhaꞌu, Eron ghe mae Moses. Amram karha ne posani kaisei gobi tolufulu fitu finogha neke lehe nga.

21Isaha au thilo thugna nalhaꞌu, Kora, Nefeg nei Sikri.

22Usiel au thilo thugna nalhaꞌu, Misael, Elsafan nei Sitri.

23Eron neke tolaghi ka Eliseba thugna gaꞌase Aminadab greghagna Nason. Eghuteuna Eron ghe Eliseba ne au fati thudi nalhaꞌu, Nadab, Abihu, Eleasa, nei Itama. 24Kora ne au thilo thugna nalhaꞌu, Asia, Elikana, nei Abiasaf. Eghuteuna thilo tharakna te mei ke leghudi igre, au nanghadi thiloi igre.

25Eleasa, thugna nalhaꞌu Eron igne neke tolaghi ka thugna gaꞌase Putel, eghuteuna repa igre au kaisei thudi nalhaꞌu, Finihas.

Igre nanghadi mae biꞌo ka tharakna ka vikegna Livae.

26Eron ghe Moses igre Lord neke cheke eghu ka phiamare, “Ghopa mala batudi naiknodi Israel igre mala jifla agne Ijep.” 27Eghuteuna phia mae igre tei ne cheke ka king gna Ijep mala snakredi naiknodi Israel mala jifla tei ka nasnagla.

Lord neke cheke ka Moses

28Kate au teu Moses Ijep igne, Lord ne cheke eghu ka mana, 29“Iara Lord. Iagho tei ka king gna Ijep, mala chekedi ka mana gobigna lepo teke chekedi iara ka iagho ra.”

30Nu Moses kegra ke ulugna Lord ne cheke eghu, “Iara theome tangomana te eni igne! Iara theome lase cheke fakeli. Faꞌunha eghu king igne fanomho ka iara?”

Currently Selected:

Eksodas 6: mrn

Highlight

Copy