Eksodas 7

1Aonu Lord ne cheke eghu ka Moses, “Fanomho ka igne. Kate tei iagho ka king na, iara ginauna tusu ari nolaghi ka iagho mala jateula God eghu ka mana. Eghuteuna thabusimu iagho Eron ginauna jateula kaisei profet eghu mala chekedi nou cheke iaghore ka king. 2Iagho cheke ka Eron gobigna lepo teke chekedi iara ka iagho ra, mala cheke lao mana ka king, mala snakredi mana naiknodi Israel igre mala jifla ka nogna kantri na. 3Neuba iara ginauna edi kmana kofubobhoi biꞌo agne Ijep mala filo mana, iara ginauna eni king igne mala patugama, nei theome fanomho eghu ka gho. 4Eghume iara ginauna thofno paradi fara naiknodi Ijep ka nogu nolaghi na, eghuteuna ke leghu na, iara ginauna batu ghami ghotilo vikegna Israel nogu naikno iara ra mala jifla ka namono igne. 5Eghuteuna naugna te loku iara ka nogu nolaghi biꞌo na ranghini Ijep eghuteuna batu fajifladi naiknodi Israel, naiknodi Ijep igre ginauna laseni te iara Lord.”

6Aonu, Moses ghe Eron ne eni unha Lord teke chekeni mala eni phiamare teku na. 7Ka narane te cheke phiamare ka king igre, Moses neke nhanasalei finogha gna, eghuteuna Eron nhanasalei thilo finogha gna.

Nogna khodo Eron neke vuhai mogo

8Lord ne cheke eghu ka mae Moses ghe Eron, 9“Moses, jame king tore ghami ghopa mala eni kaisei kofubobhoi, iagho cheke ka Eron mala koko soru nogna khodo na ke ulugna mae king, eghuteuna khodo igne ginauna nake vuhai mogo.”

10Aonu Moses ghe Eron tei ka king baludi nogna mae biꞌo mana re, ne edi unha teke chekedi Lord ka phiamare. Eron ne koko soru nogna khodo pari ke uludi mare, eghuteuna khodo igne neke vuhai mogo. 11Nu king ne chekedi nogna mae glalase teure mala edi kastom te lasedi mare re, eghuteuna maedi Ijep igre ne edi jateula te edi Eron igre neu. Hatimare mae glalase nei hatimare mae meresin nei mae khodo teudi Ijep re mala eni la ngau nafnata te eni mae Eron igne. 12Uve, hatimare mae igre ne jaola ne koko soru pari nodi khodore neke vuhai mogo. Nu nogna khodo mae Eron na ne tomno soru nodi mare re. 13Mae king filoni igne ne famamhaku u nagnafa gna na jateula teke chekeni Lord ia neu ne tirogna fanomho ka mae Moses ghe mae Eron.

Khoꞌu na neke vuhai dadara

14Aonu Lord ne cheke eghu ka mae Moses, “Mae king na thofno maku fara tutuani nagnafagna na, mana na theome tangomana te snakredi naiknodi Israel gre te jifla agne Ijep na. 15Hamerane nathuꞌu na mae king ginau tei ka Khoꞌu biꞌo Nael, eghume iara magnahaghei nigho iagho te tei thafoni mana jare. Iagho atha mei balumu nou khodo teke vuhai mogo ia. 16Iagho cheke eghu ka mae king, ‘Nomi Lord God ghehati mae Hibru gre na ne kuru mei ghau iara mala cheke ka iagho mala snakredi iagho nogna naiknore mala tei pogho soruni mana ka namono nagou gno. Nu iagho gne theome fanomho la ghilei posa ka narane gognaro gne eghu. 17Igne unha te chekeni Lord na: Iagho ginau na filodi unha nate edi iara re, aonu iagho ginau na laseni te iara ngala Lord na. Filo sagho, iara ginau na puphuri Khoꞌu biꞌo Nael gne ka khodo te louloku teu iara ao, eghuteuna u khoꞌu igne ginau na nake figri nake vuhai dadara. 18Sasa te au ke lamna khoꞌu igre ginau na kafe lehe, eghuteuna u khoꞌu gne ginau na siri diꞌagna fara eghu. Aonu naiknore ginau na theome tangomana te koꞌu ka khoꞌu igne na eghu.’ ”

19Aonu, Lord na neke cheke eghui ka mae Moses, “Iagho nake cheke ka mae Eron mala loku haghe mana nogna khodo na ke kligna khoꞌu. Eghuteuna khoꞌu biꞌo te gnafa, jari te gnafa, grano te gnafa nei kholo te gnafa teu te au heva te heva ke lamnagna kantri Ijep na te ghilei posa ka baket nei botol teure ne kafe vuhai dadara.”

20Aonu mae Moses ghe Eron ne leghudi unha teke chekeni Lord na ne edi glepo igre ke ulugna mae king nei hatimare mae biꞌo. Mae Eron atha khodo na ne puphuri ka Khoꞌu biꞌo Nael na, eghuteuna u khoꞌu na ne figri neke vuhai dadara. 21Sasa te gnafa te au ke lamna khoꞌu re ne kafe lehe ne siri ne apo. Eghuteuna naiknore ne theome tangomana te koꞌu ka khoꞌu na. Eigna u dadara na ikotongana heva heva Ijep.

22Nu hatimare mae meresin ka kantri Ijep mare ne jaola ne edi unha teke edi mae Moses ghe mae Eron re. Aonu mae king ne tirogna fanomho ka mae Moses ghe mae Eron. Mana ne maku fara nagnafagna na ne horoghoto fara ngala ka unha teke chekeni Lord na. 23Mae king neke pulo ka suga na ne tirogna nangadi unha glepo teke edi mae Moses ghe mae Eron re. 24Hatimare mae Ijep ne dokha seu rhegna Khoꞌu biꞌo Nael te mala hiro khoꞌu te mala koꞌu na, naugna u khoꞌu na theome naba te mala koꞌu na.

25Khoꞌu biꞌo Nael igne Lord neke eni mala dadara, eghume khoꞌu na ne thono diꞌa fara nabagna fitu narane.

Currently Selected:

Eksodas 7: mrn

Highlight

Copy