Eksodas 8

Groma

1Aonu Lord neke cheke eghu ka mae Moses, “Tei cheke ka mae king gna Ijep, eigna iara magnahagheni mana te mala snakredi nogu naikno iara re mala pogho soru ranghi ghau iara. 2Jame te theome snakredi mana nogu naikno iara re, iara ginauna kurudi bukrei groma gre mala goigoni ni Ijep. 3Cheke faheta ranghini mae king, Khoꞌu biꞌo Nael ana ginau fodu ka groma, eghuteuna funu jare na reꞌe ginau fodu ka suga biꞌo mana na ghilei tei fodu ka chogho te mala thuru mana na. Nei na jaola tei ruma ka nodi suga hatimare nogna mae funei nei naikno teu mana re. Groma igre ginau na ruma ka nomi biti nei gobigna lepo te mala ima ghotilo are eghu. 4Groma tuare ginau na gasa haghe thoti ka thinigna mae king na, nei na jaola ka thinidi nogna mae funei nei naikno teu mana re.”

5Aonu Lord neke cheke eghui ka mae Moses, “Iagho nake cheke ranghini mae Eron mala loku haghe mana nogna khodo na ke klignadi khoꞌu biꞌo, jari, grano, nei kholo teu are mala fodu groma jare.”

6Aonu mae Eron ne leghuni chekegna Lord na ne loku haghe nogna khodo na ke kligna khoꞌu biꞌo, eghuteuna groma na ne haghe ne thafru kantri thongana na. 7Nu hatimare mae meresin re ne jaola ne loku ka nodi nolaghi te mala eꞌei kofubobhoi na. Aonu groma re ne jifla ka khoꞌu na ne kafe haghe ka namhata na.

8Mae king ne kilodi mae Moses ghe mae Eron ne cheke eghu ka phiamare, “Jame toreni Lord ghopa me atha fadelei mana groma igre ka iara nei ka nogu naikno iara gre gu meu na, iara ginau na snakredi nomi naikno ghopa gre mala tei fafara ka mana.”

9Mae Moses ne cheke eghu ka mae king, “Uve, tuana thofno keli fara, iara magnahaghei nigho iagho te lilisei kaisei narane te mala tarai di iara groma gre te mala thosei ke mei au ka sugamu iagho gne, nei sugadi hatimare nou mae funei nei naikno teu iagho gre eghu, mala tei au kolho jare ka Khoꞌu biꞌo Nael.”

10Mae king ne cheke eghu, “Eni tuana nathuꞌu.”

Mae Moses ne cheke eghu ka mana, “Uve, unha te magnahagheni iagho na eni au. Eghuteuna naikno te gnafare ginau na laseni eigna jare na theo kaisei god aheva nga te jateula Lord nomi God teu ghehati mae Hibru gre na. 11Ghotilo ginau na theome filodi groma igre aheva nga ka sugamu iagho na, ba ka sugadi hatimare nou mae funei nei naikno teu iagho are eghu, nu jare ka Khoꞌu biꞌo Nael kolho.”

12Aonu ke leghugna te jifla mae Moses ghe mae Eron ka sugagna mae king na teke pulo na, mae Moses ne tarai ka Lord eidi u groma teke kuru mei mana teke parani mae king igre mala tei reꞌe delei. 13Aonu Lord ne nomhini nogna tharai mae Moses na ne eni unha teke toreni mana na. Eghuteuna groma teke au ke lamna suga, ba kau glalaba nei kau nagare teure ne kafe lehe ne hui. 14Naiknore ne salo fodu groma te lehere, eghuteuna kantri thongana na ne funu siri ne apo. 15Nu kate filoni mae king teke la theohi kaisei groma jare teke la keli fapulohi gobigna lepore, mana neke maku fapulo nagnafagna na jateula teke chekeni Lord ia neu ne tirogna fanomho ka unha te chekedi mae Moses ghe mae Eron igre.

Khakaramahe

16Aonu Lord neke cheke eghui ka mae Moses, “Iagho tei cheke ka mae Eron mala atha haghe mana nogna khodo na mala puphuri ka glose na. Eghuteuna gaughavu glosegna Ijep gne ginau figri nake vuhai khakaramahe.” Phiamare leghuni chekegna Lord na ne eni igne. 17Mae Eron ne atha haghe nogna khodo na ne puphuri ka glose na, eghuteuna u gaughavu glosegna Ijep na ne flalo haghe kligna ka maloa na neke vuhai khakaramahe igre ne funu fodu ne kathidi naikno nei buluka teure. 18Kate filoni hatimare mae meresin gre igne na, hatimare ne jaola ne fariuriuni nodi nolaghi na, nu mare ne theome tangomana di te tughu gaughavu glose na teke vuhai khakaramahe.

Khakaramahe igre mei ne kathidi naikno nei buluka teure. 19Aonu hatimare mae meresin gre ne cheke eghu ka mae king, “Jame God thegna ngala te eni igne!” Neuba, mae king na thono maku fara nagnafagna na ne tirogna fanomho ka mae Moses ghe mae Eron.

Khare

20Lord ne cheke eghu ka mae Moses, “Hamerane nathuꞌu na iagho ginau tei thafoni mae king ka nabrou gno, eigna hamerane nathuꞌu na mae king ginau tei ka khoꞌu gno. Iagho mala cheke eghu ka mana: ‘Igne unha te chekeni Lord na, mana magnahaghei nigho iagho te snakredi nogna naiknore mala tei pogho soru ranghini mana. 21Jame te theome snakre teidi iagho nogna naikno manare, mana ginau na kuru mei kmana khare ka iagho, nei ka hatimare nou mae funei nei ka nou naikno teu iagho gre eghu. Kmana fara khare ginau mei fodu ka nomi suga ba ka vido aheva nate kegra teu ghotilo na.

22“ ‘Nu kate mei khare igre na, Lord ginau na reireghi fakelini vido Gosen, ba nohi aheva te au nogna naikno manare. Khare igre ginau na theome filodi ka vido aheva te au nogna naikno mana re. Iagho ginau na filo glanini nei laseni eghu te kaisei mana ngala Lord te edi gobigna lepo te ninhigrana ka nou kantri iagho na igre. 23Mana ginauna theome kuru tei kaisei khare ka nogna naikno mana re. Fanomho sagho, u kofubobhoi igne ginauna thoke mei nathuꞌu ngala.’ ”

24Mae king ne maku fara nagnafagna na, aonu Lord ne eni jateula teke chekeni thegna neu ne snakre mei kmana khare fara ne mei fodu ka sugagna mae king na, ba ka sugadi hatimare mae funei nei ka sugadi naiknore, nei ka vido te gnafa heva heva ke lamnagna kantri Ijep.

25Aonu mae king neke kilodi mae Moses ghe mae Eron mala tei filoni mana. Kate posa mei phiamare, mana ne cheke eghu ka phiamare, “Ghotilo filoni kaisei vido agne Ijep ngala mala fafara ka nomi God na.”

26Nu mae Moses ne cheke eghu ka mana, “Jame te eghu na, tuana ginau na theome doglo kolho, naugna naiknodi Ijep gre ginau na diꞌatadi fara nei fada falehe ghami ghehati eghu ka thina, kate filoni mare te fafara buluka ghehati ka nomi Lord God na. 27Theome tangomana! Teke chekeni Lord na ghehati mala tei ke lamnagna namono nagou na nabagna thilo narane ame fafara nga ka mana eghu neku, eghume, tuana te mala eni ghehati na eghu.”

28Aonu, mae king ne cheke eghu ka mae Moses, “Iara na snakre ghami ghotilo mala tei ghotilo mala fafara ka nomi Lord God na. Nu thosei tei fakhaba ghotilo eghu, nei thosei ghatho iho ghau iara ka nomi tharai na eghu.”

29Aonu mae Moses ne cheke eghu ka mana, “Uve, iagho mae king biꞌo, kate jifla te tei na, iara na tarai nigho iagho ka Lord, eghuteuna nathuꞌu na iagho na theome filoni kaisei khare ka sugamu iagho na baludi sugadi hatimare mae funei nei naikno teure. Nu thosei chaghi ghami ghehati nei thosei fanograni u nabrou te mala tei naiknore te mala fafara ka Lord na eghu.”

30Aonu mae Moses ne jifla mei ka sugagna mae king na ne tei tore ka Lord mala kuru teidi khare te gnafa igre. 31Eghuteuna Lord ne leghuni unha te toreni mae Moses na. Nu kate theome filoni kaisei khare ka sugagna na nei ka sugadi nogna mae funei nei naikno teure, 32mae king neke maku fapulo nagnafagna na neke theome snakredi naiknore.

Currently Selected:

Eksodas 8: mrn

Highlight

Copy