Mateos 9

Jesús jiꞌchäĉajte yirity puñichjoijtyiꞌ muntyiꞌ

(Mar 2:1-12; Luc 5:17-26)

1Chat qui muꞌ Jesús muꞌyaꞌ bijti covambacheꞌ nopjan mọꞌ tsiqueꞌ, ĉụiꞌsiꞌĉan bäꞌyedyeꞌ jijtuban muꞌ. 2Yirity tuyete in puñichjoijtyiꞌ muntyiꞌ, turacdyeꞌcheꞌ tuyete in. Jesús aty cạvacsi junꞌ chuc fer anicjete muꞌin in, chat qui jéte muꞌ puñichjoijtyiꞌ muntyiꞌ:

—Maꞌjova mi ạvaꞌ yụ, atyuꞌ u vayac juchaj mi.

3Pạrej muyayaj in jịꞌchiyacsity yụꞌtacdyeꞌ Jenꞌsiꞌ muꞌ, yi in ĉojtyiꞌĉan muꞌin: "Anic ñinacdyeꞌ Jenꞌyaꞌ shupquiꞌ ọij p̂eyacdyeꞌ muꞌ." 4Muꞌ qui namꞌ Jesús chị́yacsebi dyijyedyeꞌ muꞌin mọꞌdyes qui jéyacsi muꞌ:

—¿Junꞌ dash meꞌ ac̣hiꞌ dyijyi ĉojtyiꞌĉan miꞌin? 5¿Jụꞌñis buty raꞌ carij ĉọ́tiñeꞌ miꞌin areꞌ vayac juchaj utssiꞌ muꞌ, areꞌ chäĉän muꞌ? Areꞌ jéte yụ: "Aty vayac juchaj mi", jam jụijyaꞌ, jéte yụ: "Sacyebada miꞌebada." ¿Jätäjyi miꞌin u? 6Q̂uinꞌ raꞌ jịꞌcaveyeyac yụ junꞌ chuc ferdyeꞌ soꞌmac yụ paj qui yụ vayacjetyetacsi juchaj jacchetysiꞌ muntyiꞌ in, ĉaĉaij nash yụ Anictyity Muntyiꞌ.

Jajiti muꞌ puñichjoijtyiꞌ muntyiꞌ:

—Sacyebada, tapjebadaꞌ jubij mi, tạij acaꞌyaꞌ jịjcabada mi.

7Anicdye meꞌ, muꞌ puñichjoijtyiꞌ jiquej sacyeban judyeyaꞌ acatuban muꞌ. 8Muꞌin muntyiꞌ in, aty meꞌ cạveteyaꞌ in anic irijyi in, chat qui timaꞌquete Jenꞌ in ĉaĉaij na muꞌ soꞌmacsi därsiꞌ ferdyeꞌ muntyiꞌ in.

Jesús jafaijti muꞌ Mateo

(Mar 2:13-17; Luc 5:27-32)

9Chat qui muꞌ Jesús jọban miꞌeban muꞌ. Cạvete yirity muntyiꞌ Mateo tịj muꞌ, muꞌ tsimꞌtety querec̣ha Romaĉantyidyety ayoꞌ, acaꞌĉan bäꞌyity muꞌ tsimꞌteĉan querec̣ha. Jesús jafaijti jajiti:

—Cäc̣häꞌchutiꞌ ram.

Chat qui muꞌ Mateo sacyi cäc̣häꞌchute muꞌ Jesús.

10Yirisĉan mạyedyeꞌ muꞌ Jesús säcsequi Mateosĉan acaꞌ. Daiꞌ atsij in juchajtumtyiꞌ muntyiꞌ in judyeyaꞌ tsimꞌtety querec̣ha in, muꞌinmun chimeꞌ mesacheꞌ säcsi in. 11Fariseo pạrej cạvacsi in, mọꞌdyes qui yi in jéyacsi Jesústyiꞌ jịꞌchiyactyiꞌ muꞌ, yi in:

—¿Junꞌ dash meꞌ uts jiꞌchäyinactyiꞌ miꞌin yiriꞌyaꞌ meꞌtyitytum säcsi? Muꞌ säcsi tsimꞌtetytum querec̣ha judyeyaꞌ juchajtumtyiꞌtum in.

12Jesús seꞌvacsebi p̂eyacdyeꞌ muꞌin, chat qui jéyacsi:

—Muntyiꞌ räshtyiꞌ in jam junꞌ jemonte muꞌ pịñitucsity in, muꞌin chat japacjoijtyiꞌ muntyiꞌ in jemonte pịñitucsity in. 13Jemoñeꞌ dyijtutiñeꞌ miꞌin ọij sánacdyeꞌ Jenꞌsiꞌ muꞌ paj qui tupuj chị́yetiñeꞌ jätäjyiꞌ chuc cạiꞌ mọꞌ, yiꞌ "Yụ mujuꞌchaꞌ mạꞌjeꞌ paj qui ñịbeꞌ ĉọcsi miꞌin, uyaꞌyaꞌ mọꞌ mạꞌjeꞌ yụ mọꞌ jiꞌcoꞌshayacdyeꞌ yụ́dyes", yiꞌ sánacdyeꞌ. Yụ atsij jam rụijtyitydyety in, yụ atsij juchajtumtyidyety in ĉọshseti yụ.

Jesús p̂eyeꞌ yịñijdyeꞌ Jenꞌdyes jịꞌĉoiꞌsiꞌ táredyeꞌ

(Mar 2:18-22; Luc 5:33-39)

14Atsij muꞌin jịꞌchiyactyiꞌ Juantyiꞌ muꞌ, muꞌ chojtacsity. Muꞌin ĉọcte Jesús in, jéte in:

—Tsun judyeyaꞌ fariseo in pucmun yịñij Jenꞌdyes tsun. ¿Junꞌ dash muꞌin jịꞌchiyactyiꞌ mi mijam damꞌ yịñij Jenꞌdyes in?

15Jesús qui vorjeyacsi:

—Jeshaꞌ, muꞌin feshtaijtyiꞌ in vämitydyes in jam muꞌin tupuj táredyeꞌtum yịñij in tacaꞌdye muꞌ muꞌyaꞌ vämity jụijyaꞌ. A qui na ayijyaꞌ tupudyeꞌ jäcac muꞌ, chat q̂uinꞌdyemꞌ yịñij penꞌdyeꞌ muꞌ. Meꞌdye raꞌ yụ chimeꞌ, aty jäcacyaꞌ yụ q̂uinꞌdyemꞌ raꞌ yịñij jịꞌchiyactyiꞌ yụ.

16Jeshaꞌ muꞌ ishoijtyiꞌ quịꞌsiꞌ shẹiꞌjoij jụijyaꞌ, jam junꞌ raptac mụiꞌtyityyaꞌ quịꞌsiꞌ. Meꞌ na jụijyaꞌ mọꞌ raꞌ raptacdyeꞌ muꞌ shätimꞌ, chat qui raꞌ muꞌ ishoꞌ quịꞌsiꞌ quivij peñi shẹiꞌjoij. 17Chimeꞌdye muntyiꞌ in mijam junꞌ bijtyeꞌ in mụiꞌsis tyédyeꞌ vino urucyasĉan shoꞌpaꞌ. Meꞌ jụijyaꞌ aty pashiꞌ tyeiꞌ mọꞌ tyédyeꞌ, topjoiꞌ raꞌ mọꞌ shoꞌpaꞌ, räj raꞌ naiꞌ tŝọiꞌ mọꞌ tyédyeꞌ, mọꞌtumdye raꞌ moñiꞌ shoꞌpaꞌtum. Jemoñeꞌ bijtac mụiꞌsisĉan shoꞌpaꞌ paj qui jam vaj meꞌ moñiꞌ in.#9:17 Ọij p̂eyacdyeꞌ yiꞌsiꞌ p̂eyeꞌ raptacdyeꞌ judyeyaꞌ tyédyeꞌtumsiꞌ, meꞌ yi muꞌ Jesús jam raꞌ junꞌ päräꞌ dyijyedyeꞌ cạc, mụiꞌsis judyeyaꞌ ishoꞌ. Muꞌ yi mạꞌjeꞌ mụiꞌsis jiꞌchäyitidyeꞌ cạpte jụijyaꞌ in, mọꞌ qui namꞌ urucyas jemoñeꞌ yacchuc.

Jairos ạvaꞌ muꞌ judyeyaꞌ yocsiꞌ p̂en japacjoiꞌsiꞌ

(Mar 5:21-43; Luc 8:40-56)

18Tacaꞌ p̂eyacvaꞌjoij muꞌ Jesús, meꞌĉandye atsij yirity muntyiꞌ judío muꞌ, muꞌ tashcheꞌ buꞌyity vajmuꞌyadyeꞌĉan. Dyụtsyi Jesúsyaꞌ jéte:

—Mụiꞌdye säñiꞌ ạvaꞌ yụ. Atsiva, tocoꞌjecbivaꞌ aꞌ mọꞌsiꞌ, meꞌ jụijyaꞌ mi, tsạꞌebanꞌ raꞌ mọꞌ.

19Chat qui muꞌ Jesús sacjeꞌ jịjcate muꞌ muntyiꞌ räjtumdye jịꞌchiyactyiꞌ muꞌ. 20Ĉụiꞌdye ayij yiris p̂en japacjoiꞌsiꞌ. Aty yiriꞌtac päräꞌ jiyiꞌ yómodyeꞌ meꞌ buꞌyiꞌ chäshvaquiꞌ aꞌ mọꞌ. C̣hẹiꞌyaꞌjete Jesús murujrucheꞌ muꞌ, tocoꞌjepte ĉaptacdyeꞌve quịꞌsiꞌ muꞌ. 21Yiꞌ dyijyiꞌ tashcheꞌ ĉojtyiꞌĉan mọꞌ: "Täjyedyeꞌĉan ramꞌ quịꞌsiꞌ muꞌ, chäĉänꞌ yụ." 22Camanꞌyi muꞌ Jesús vejtuiꞌ mọꞌ p̂en, yi jeꞌ:

—Maꞌjova mi ạvaꞌ yụ, aty anicyedyeꞌyaꞌ chäĉänꞌ q̂uinꞌ mi.

P̂eyacdyeꞌĉandyemꞌ chäĉänꞌ mọꞌ p̂en.

23Aty ventyecbite acaꞌ in muꞌ tashcheꞌ buꞌyitysiꞌ vajmuꞌyadyeꞌĉan in, dạcacsequi boñity in nạcdyedyes nanasvundyesiꞌ, judyeyaꞌ uyaꞌquiꞌdyi tárevaꞌqueꞌ mọꞌ nanas in. 24Yi Jesús jéyacsi:

—Shubadac miꞌin, jam nash mọꞌ säñiꞌ nanas, ĉọshiꞌ nash mọꞌ.

Muꞌĉantyiꞌ in dyisacte in muꞌ Jesús mọꞌ seꞌvepteyaꞌ in p̂eyacdyeꞌ. 25Aty jiꞌshupcacsiyaꞌ muntyiꞌ in Jesús qui siti yóĉandyemꞌ mọꞌ nanas o. Tapjebiꞌ un mọꞌ, sacyebanꞌ vatyquej. 26Muntyiꞌ in paiꞌ jịꞌchiqueyacsi yoctyiꞌ in, räj chị́qui in junꞌ chuc jiꞌchäĉänꞌ mọꞌ nanas.

Jesús jịꞌnaijtacseban päräꞌ tofety in

27Chat qui jọban muꞌ Jesús. Päräꞌ tofety muntyiꞌ jịjcabajte in, fer p̂eyaqui in, yi in:

—Davidtyiꞌ vóshiꞌ muꞌ, ñịbeꞌjitiĉaꞌ raꞌ tsun miꞌin.

28Aty acaꞌĉan muꞌ siti Jesús, chat qui muꞌin tofety ĉọcte in. Yi jéyacsi muꞌ Jesús:

—¿Meꞌ buty anicjitiĉaꞌ yụ miꞌin paj qui meꞌ jịꞌnaijbadyeyac miꞌin?

Vorjete muꞌin in:

—Anicdye meꞌ, Jịꞌchiyacsity.

29Chat qui muꞌ Jesús tocoꞌjeyacsebi vej muꞌin, jéyacsi:

—Meꞌ raꞌ chäĉän miꞌin ĉaĉaij na anicyi miꞌin.

30Meꞌĉandye naijbun in. Jesús fercheꞌ jéyacsi:

—Jam raꞌ junꞌ jịꞌchiqueyacsi miꞌin yoctyiꞌ muntyiꞌ in.

31Aty jọbanyaꞌ in cavin jịꞌchiqueyacsi yocsiꞌve bäꞌyity in.

Jesús jiꞌp̂eijjajte yirity jepepej muntyiꞌ

32Aty jọban muꞌin tofety jiquej in, chat qui tuyete in jam p̂eyaquity muntyiꞌ, ĉaĉaij na sọyoꞌtumtyiꞌ muꞌ. 33Jesús meijjetyebajte mọꞌ sọyoꞌ, meꞌĉandye p̂eyaĉan muꞌ muntyiꞌ. Anic äjyi muntyiꞌ in, yi in:

—¡Mijam jämꞌdyeyaꞌ joꞌmes cạvejaꞌ tsunsiꞌĉan jac Israelĉan!

34Muꞌin na fariseo yi in:

—Sọyoty ayoꞌ mọꞌin jasoꞌmiti ferdyeꞌ, mọꞌdyes qui meꞌ muꞌ Jesús tupuj meijjetyetacsi sọyoꞌ in.

Jesús ñịbeꞌ ĉọcsi muntyiꞌ in

35Jesús räj socorꞌjeꞌ mọꞌĉansiꞌ bäꞌyedyeꞌ in. Muꞌĉan vajmuꞌyadyeꞌĉan judío in jịꞌchiyacsi muꞌ, judyeyaꞌ voroꞌtacsi Jenꞌsiꞌ p̂eyacdyeꞌ muꞌ, p̂eyeꞌ aty c̣hẹiꞌyaꞌ ayoꞌbuꞌyi raꞌ Jenꞌ. Chimeꞌdye muꞌ jiꞌchäcacseban muntyiꞌ, yịjyi areꞌredyeꞌ muntyis in judyeyaꞌ japacjodyeꞌtumtyiꞌ in, meꞌ meꞌ jiꞌchäcacseban. 36Jesús aty cạvacsiyaꞌ daiꞌtyiꞌ muntyiꞌ in, muꞌ ñịbeꞌ ĉọcsi ĉaĉaij na muꞌin joꞌmequeꞌqueij cajotyiti in, itŝiꞌ tyeiꞌ dyijyedyeꞌ muꞌin, jeñej oveca in jam ĉọjcacsis in, meꞌ cạvacsi muntyiꞌ in. 37Mọꞌdyes muꞌ Jesús jéyacsi jịꞌchiyactyiꞌ muꞌ:

—Anic därsiꞌ vädacdyeꞌ mọꞌyaꞌ, itŝij qui namꞌ tyi vädaquity in. 38Cọdyemac miꞌin muꞌ meꞌchuiꞌtyiꞌ vädacdyeꞌ paj qui muꞌ yụꞌtacsi vädaquity muntyiꞌ in, cạyacsity p̂eyacdyeꞌ in.

Currently Selected:

Mateos 9: CAS

Highlight

Copy