Mateos 10

Jesús tsimꞌtacsi yiriꞌtac päräꞌ jiyi jutactyiꞌ muꞌ

(Mar 3:13-19; Luc 6:12-16)

1Jesús fayacsi muꞌin yiriꞌtac päräꞌ jiyity jịꞌchiyactyiꞌ muꞌ, chat qui soꞌmacsi ferdyeꞌ paj qui tupuj meijjetyetacsi sọyoꞌ in judyeyaꞌ räj jiꞌchäĉacseban muntyiꞌ in, areꞌreijtyiꞌ in judyeyaꞌ japacjoijtyiꞌ in. 2Ọij nash tịj muꞌin yiriꞌtac päräꞌ jiyity jutactyiꞌ muꞌ. Muꞌ tashchety tsimꞌtactyiꞌ Simón, chimeꞌ tịj muꞌ Pedro, judyeyaꞌ vojity muꞌ, Andrés, judyeyaꞌ Santiago vojitytumdye muꞌ Juan, muꞌin nash in Zebedeoty ạvaꞌ muꞌ. 3Chimeꞌ muꞌ Felipe judyeyaꞌ Bartolomé, judyeyaꞌ Tomás, judyeyaꞌ Mateo, muꞌ tsimꞌtety querec̣ha, judyeyaꞌ muꞌ Santiago, Alfeoty ạvaꞌ muꞌ, judyeyaꞌ Tadeo, 4judyeyaꞌ yoctyiꞌ Simón, muꞌ nash ñuruꞌtyity in muꞌin fạ́cacsi in Romaĉantyiꞌ in, judyeyaꞌ muꞌ Judas Iscariote, muꞌ raꞌ jiꞌmincatety Jesús. Meꞌ meꞌ nash jutactyiꞌ muꞌ.

Jesús jutacsi jịꞌchiyactyiꞌ muꞌ paj qui voroꞌtacsi in

(Mar 6:7-13; Luc 9:1-6)

5Jesús jutacsi muꞌin yiriꞌtac päräꞌ jiyity in, yi muꞌ jéyacsi:

—Jam raꞌ muꞌĉan jịjcaij yútacsebi miꞌin bäꞌyedyeꞌ jam judíos muꞌin, mijam raꞌ Samariaĉansiꞌ bäꞌyedyeꞌ yútyetiñeꞌ miꞌin chimeꞌ. 6Muꞌin ramꞌ ĉọcsequi miꞌin Israeltyiꞌ vóshiꞌ in, muꞌin jeñej buꞌyity moñis oveca in. 7Muꞌin ramꞌ jéyacsequi miꞌin: "Aty c̣hẹiꞌyaꞌ ayoꞌbuꞌyi raꞌ Jenꞌ." 8Jiꞌchäcacsebajshamꞌ japacjoijtyiꞌ in, vañinjeyacsebajshamꞌ muꞌin säñity in, judyeyaꞌ jiꞌchäcacsebajshamꞌ muꞌin bayiꞌyitaquity aꞌ in, judyeyaꞌ chimeꞌ meijjetyetacsebajshamꞌ sọyoꞌ muꞌin sọyoꞌtumtyiꞌ in. Miꞌin fibiꞌyaꞌ soꞌmac ọij ferdyeꞌ, mọꞌdyes jam raꞌ cọdaqui miꞌin jiꞌchäcacsebanyaꞌ miꞌin ọijyaꞌ ferdyeꞌ.

9Jam raꞌ cạtinte querec̣ha miꞌin, 10mijam raꞌ jubij miꞌin, mijam raꞌ nabac camisa miꞌin mijam yujches miꞌin mijam raꞌ mutyudyeꞌ miꞌin, ĉaĉaij na tyi chuc carijtaquity, mọꞌyaꞌ muꞌ chimeꞌ säcsedyes raꞌ soꞌmac.

11Ventyectiñeꞌ jụijyaꞌ yiris bäꞌyedyeꞌ miꞌin, muꞌĉan raꞌ quevacsi miꞌin tyi chuc raꞌ tiĉuñinactyiꞌ in. Muꞌĉan raꞌ dyäqui miꞌin junꞌ quiꞌ chuc yạjquibajtiñeꞌ bäꞌyedyeꞌ. 12Aty raꞌ sistiñeꞌyaꞌ yiris acaꞌ, vorjeyacsi raꞌ miꞌin muꞌĉantyiꞌ in, jéyacsi raꞌ miꞌin jämꞌyedyestum p̂eyacdyeꞌ. 13Tiĉuñinac jụijyaꞌ muꞌĉantyiꞌ in, cạ̈tsiꞌ raꞌ muꞌindyes p̂eyacdyeꞌ miꞌin. Jam na raꞌ tiĉuñinac jụijyaꞌ in, jam raꞌ junꞌ cạ̈tsiꞌ muꞌindyes in mọꞌ p̂eyacdyeꞌ. 14Vatyquej raꞌ muꞌyaꞌ acaꞌĉantyiꞌ in, bäꞌyedyeꞌĉantyiꞌ in jam tiĉuñinac jụijyaꞌ in, mijam seꞌvinac jụijyaꞌ in, chischisjeyactaqui raꞌ jac yujches miꞌin, mọꞌ raꞌ jịꞌĉoyacsi miꞌin anic vaꞌcac bäꞌyi muꞌĉantyiꞌ. 15Anicdye raꞌ meꞌ aty ayijyaꞌ tupudyeꞌ Jenꞌ jịꞌcäts yụꞌtacsiyaꞌ raꞌ juchadyeꞌyaꞌ muntyiꞌ in, dadamꞌ raꞌ mujuꞌchaꞌ Jenꞌ soꞌmacsi vaꞌtacdyeꞌ muꞌin in jam seꞌvinactyiꞌ in, uyaꞌyaꞌdye soꞌmacsi raꞌ Jenꞌ muꞌin bäꞌyity Sodomaĉan jiquej in judyeyaꞌ Gomorraĉan.

Ñịbeꞌtac raꞌ in Jesucristodyes in

16Jeñej oveca buꞌyi miꞌin yụ raꞌ juteyac yóĉandyemꞌ bäꞌyiꞌ vajedyedyeꞌ o. Jemoñeꞌ ĉụiꞌ dyijyedyeꞌtum miꞌin jeñej nas, judyeyaꞌ jämꞌjitac chimeꞌ miꞌin jeñej ọꞌtoꞌ, meꞌ raꞌ miꞌin. 17Ĉujcati raꞌ miꞌin pạrej raꞌ muꞌyaꞌ jiꞌmeꞌtyinac ayoꞌyaꞌ in, judyeyaꞌ raꞌ jiꞌsiꞌbinac in vajmuꞌyadyeꞌĉan in. 18Yụ́dyesiꞌ raꞌ ñịbeꞌtac miꞌin, muꞌin raꞌ jiꞌmeꞌtyinac in bäꞌyedyeꞌĉantyiꞌyaꞌ ayoꞌ in judyeyaꞌ mujuꞌchatyyaꞌ ayoꞌ chimeꞌ in. Miꞌin raꞌ jịꞌchiqueyacsi yụ́siꞌ p̂eyacdyeꞌ muꞌin ayoꞌ in, judyeyaꞌ muꞌin jam judío in. 19Aty raꞌ jiꞌmeꞌtyinac jụijyaꞌ in, jam raꞌ dyijtutiñeꞌ junꞌ chuc raꞌ ñutsjiti p̂eyacdyeꞌyaꞌ miꞌin, Jenꞌdye raꞌ soꞌminac p̂eyacdyeꞌ jiꞌp̂eyacnacyaꞌ in. 20Miꞌin raꞌ jam ĉụiꞌsiꞌ p̂eyacdyeꞌ jiꞌshuptiñeꞌ, Ạꞌedyeꞌ Jenꞌsiꞌ muꞌ, muꞌ Ạvatunactyiꞌ miꞌin, muꞌsiꞌ raꞌ p̂eyacdyeꞌ soꞌminac.

21Pạrej raꞌ muꞌyaꞌ ĉụiꞌtyiꞌ vojity jiꞌmeꞌtaqui ayoꞌyaꞌ in paj qui ijate in, judyeyaꞌ raꞌ pạrej jiꞌmeꞌtaqui ayoꞌyaꞌ ĉụiꞌtyiꞌ ạvaꞌ muꞌin paj qui ijac in, judyeyaꞌ pạrej raꞌ jiꞌijaqui ĉụiꞌtyiꞌ jenꞌ muꞌin judyeyaꞌ tseꞌ muꞌin. 22Räj raꞌ yụ́dyes mọꞌjinac fáquiyinac in. Tyi chuc jam peñity in junꞌ quiꞌ chuc jadyic tupudyeꞌ, muꞌ raꞌ c̣hoñi in. 23Ñịbeꞌtyinac raꞌ jụijyaꞌ in yirisĉan bäꞌyedyeꞌ, yocsiꞌve raꞌ jịjcaij ĉaꞌjoij miꞌin. Yụ anic jéyac, jambiꞌ raꞌ räj socorꞌjetiñeꞌ bäꞌyedyeꞌ Israelĉansiꞌ in voroꞌtacsequi miꞌin, uyaꞌyaꞌdye raꞌ atsijban yụ Anictyity Muntyiꞌ yụ.

24Jam yirity jiꞌchäyitity mujuꞌchaꞌ, uyaꞌyaꞌ jịꞌchiyetety muꞌ, jam yirity úñity mujuꞌchaꞌ, uyaꞌyaꞌ ayoꞌ muꞌ. 25Muꞌ jịꞌchiyactyiꞌ jemoñeꞌ dyijyi paj qui cätste muꞌ jịꞌchiyetety, judyeyaꞌ muꞌ úñity jemoñeꞌ dyijyi paj qui cätste ayoꞌ muꞌ. Meꞌdye raꞌ chimeꞌ miꞌin cäc̣häꞌchutiĉaty yụ miꞌin, ĉaĉaij na muntyiꞌ jin yụ in: "Uts nash ayoꞌ sọyoty mọꞌin, tịj muꞌ Beelzebú", jin yụ in. Meꞌ ñäñin yụ in ayoꞌ miꞌin, dadamꞌ raꞌ miꞌin mujuꞌchaꞌ ñäñinac in úñity yụ.

¿Tyi buty raꞌ quijñeja tsun?

(Luc 12:2-7)

26Mọꞌdyes jam raꞌ quijnacsi muntyiꞌ miꞌin. Mọꞌin jujmus q̂uinꞌ in, räj raꞌ mọꞌ jorojĉanyiꞌ in, judyeyaꞌ mọꞌ jumve yụꞌtacsi muntyiꞌ q̂uinꞌ in, räj raꞌ chị́yac in. 27Ọij jiꞌchäyitidyeꞌ caminves jéyac yụ miꞌin, muntyisyaꞌ raꞌ vej p̂eyetiñeꞌ miꞌin, räj raꞌ jéyacsi miꞌin. 28Jam raꞌ quijnacsi muntyiꞌ miꞌin. Paj raꞌ tsanꞌ aꞌ ijabunac jụijyaꞌ in, ạꞌedyeꞌ qui na raꞌ miꞌin jam junꞌjibunac in. Muꞌdye ramꞌ quijñetinte Jenꞌ, ĉaĉaij na mumꞌ tupuj ijanac miꞌin judyeyaꞌ tŝijĉan vaꞌquicbunac ạꞌedyeꞌ miꞌin.

29Uyaꞌyaty mọmoꞌ ficha tupuj yaꞌityeꞌ päräꞌ jaijtyiꞌ. Meꞌ tsanꞌ jam yaꞌiꞌ in muntyisyaꞌ vej muꞌin, muꞌ qui namꞌ Jenꞌ Ạvatunactyiꞌ miꞌin, muꞌ räj chị́yacsi jaijtyiꞌ in, mijam yiris säñiꞌ in jam meꞌ Jenꞌ yíyaꞌ. 30Dadamꞌ miꞌin chäyibunac Jenꞌ fin miꞌin räj tsic Jenꞌyaꞌ, muꞌ chäyibunac juñucsiꞌ chuc fin miꞌin. 31Mọꞌdyes jam raꞌ noiꞌyi miꞌin, dadamꞌ mujuꞌchaꞌ otejjinac Jenꞌ, ọyaꞌyaꞌ jaijtyiꞌ in, meꞌ muꞌ anic ĉujcanac miꞌin.

Muꞌin jam ticametety Jesús in muntyisyaꞌ vej muꞌin

(Luc 12:8-9)

32Tyi chuc jịꞌchicaqui yụ́dyes in muntyisyaꞌ vej muꞌin, yi in, "Yụ nash Jesucristoty", meꞌdye raꞌ yụ chimeꞌ jịꞌchicaqui muꞌindyes in Jenꞌsiꞌyaꞌ vej yụ mạyedyeꞌchetyyaꞌ. 33Tyi chuc jam jịꞌchicaqui yụ́dyes muntyisyaꞌ vej muꞌin, yity in, "Yụ jam Jesucristoty", meꞌdye raꞌ yụ chimeꞌ jam jịꞌchicaqui muꞌindyes in yụ́tyiꞌyaꞌ Jenꞌ mạyedyeꞌchetyyaꞌ.

Muntyiꞌ jam cäts dyijyi Jesúscheꞌ in

(Luc 12:51-53; 14:26-27)

34Meꞌ buty ĉútiĉaꞌ yụ miꞌin yụ atsij paj qui jämꞌjitive jacchety muntyiꞌ in, meꞌ buty ĉútiĉaꞌ yụ miꞌin. Jam meꞌdyes atsij yụ. Yụ nash atsij paj qui jam jämꞌjiti muntyiꞌ in. 35Yụ́dyes raꞌ pạrej muntyiꞌ in jam raꞌ jämꞌjiti ĉụiꞌtyiꞌtum jenꞌ muꞌin, judyeyaꞌ raꞌ mọꞌ p̂en in jam raꞌ jämꞌjitiꞌ ĉụiꞌsiꞌtum tseꞌ in, judyeyaꞌ mọꞌ p̂en in jam raꞌ jämꞌjitiꞌ yayaꞌdyeꞌtum in. 36Pạrej fáquitidyeij in ĉụiꞌtyiꞌtum chätidyeꞌ muꞌin, meꞌdyes qui fạ́cacdyety shupqui muꞌin in.

37Tyi chuc mujuꞌchaꞌ mạꞌjeyaqui ĉụiꞌtyiꞌ jenꞌ muꞌ judyeyaꞌ tseꞌ muꞌ, uyaꞌyaꞌ mạꞌjin jụijyaꞌ yụ, muꞌ raꞌ jam tupuj cäc̣häꞌchun yụ. Tyi chuc mujuꞌchaꞌ mạꞌjeyaqui ạvaꞌ muꞌ, uyaꞌyaꞌ mạꞌjin yụ, muꞌ raꞌ jam tupuj cäc̣häꞌchun yụ. 38Tyi chuc jam vemetety crosh paj qui meꞌ buꞌyi jịjcabun ñịbedyes yụ, jam meꞌ jụijyaꞌ in, muꞌ raꞌ jam tupuj cäc̣häꞌchun yụ. 39Tyi chuc otejjiti ĉụiꞌ paj qui jam yụ́dyes säñi, muꞌ raꞌ fibidyes bäꞌyi. Tyi chuc jam otejjiti säñi yụ́dyes, muꞌ raꞌ jam fibidyes bäꞌyi, bijodyeꞌ raꞌ soꞌmac muꞌ.

Bijodyeꞌ

(Mar 9:41)

40Tyi chuc tiĉuñinac in, chimeꞌ yụ tiĉuñin yụ in, judyeyaꞌ tyi chuc tiĉuñin yụ in, Jenꞌ chimeꞌ tiĉunꞌte in, muꞌ jutintyiꞌ yụ. 41Tyi chuc tiĉunꞌte in yirity jasoꞌmitity p̂eyacdyeꞌ Jenꞌ jụijyaꞌ in, Jenꞌdyes mọmoꞌ tiĉunꞌte jụijyaꞌ in, muꞌinmun raꞌ soꞌmac bijodyedyes muꞌin. Chimeꞌdye tyi chuc tiĉunꞌte in yirity jämꞌtyiꞌ muntyiꞌ, ĉaĉaij na muꞌ jämꞌtyiꞌ, muꞌinmun raꞌ soꞌmac bijodyedyes chimeꞌ in. 42Tyi chuc ojñiꞌ soꞌmetety in muꞌin cäc̣häꞌchuntyiꞌ yụ in, meꞌ tsanꞌ muꞌ uyaꞌyaty, mọꞌyaꞌ raꞌ bijodyedyes muꞌin soꞌmetety in.

Currently Selected:

Mateos 10: CAS

Highlight

Copy