Mateos 6

Jam raꞌ muntyisyamꞌ vej carijtaĉaꞌ Jenꞌdyes

1Jam raꞌ carijtaqui Jenꞌdyes miꞌin muntyisyaꞌ vej muꞌin, paj qui jam timaꞌquinac in. Meꞌ jụijyaꞌ miꞌin itŝiꞌ raꞌ méquis bijodyeꞌ soꞌmac miꞌin Jenꞌyaꞌ mạyedyeꞌchetyyaꞌ, muꞌ Ạvatunactyiꞌ miꞌin.

2Ñịbeꞌjetinte jụijyaꞌ yirity jayejjotaquity muntyiꞌ, caminve raꞌ miꞌin. Jam raꞌ cäc̣häꞌchucsebi miꞌin muꞌinsiꞌ dyijyedyeꞌ muꞌin ac̣hiꞌyitysiꞌ in jämꞌ yuꞌti tsanꞌ in. Muntyisyaꞌ vej muꞌin vajmuꞌyadyeꞌĉan in judyeyaꞌ prasayaꞌ in muꞌyaꞌ ñịbeꞌjeyacsi muntyiꞌ in, paj qui timaꞌcacsi muntyiꞌ in. Yụ rụij jéyac: mọꞌ ramꞌ bijodyeꞌ muꞌin, mijam raꞌ soꞌmac bijodyeꞌ Jenꞌyaꞌ in. 3Jam raꞌ meꞌ miꞌin, nọ́tyetacsi jụijyaꞌ miꞌin paj jam tyi chịj in, mijam ĉụiꞌtyiꞌ chätidyeꞌ miꞌin. 4Caminve ramꞌ nọ́tyetacsi muntyiꞌ miꞌin, chat qui raꞌ muꞌ Jenꞌ soꞌminac bijodyeꞌ miꞌindyes ĉaĉaij na muꞌ cavinactyiꞌ caminve.

Cọdacdyeꞌ Jenꞌcheꞌ

(Luc 11:2-4)

5Cọdaqui jụijyaꞌ Jenꞌcheꞌ miꞌin jam raꞌ cäc̣häꞌchucsebi dyijyedyeꞌ miꞌin muꞌinsiꞌ ac̣hiꞌyitysiꞌ in jämꞌ yuꞌti tsanꞌ in. Muꞌin anic maꞌjotyety runꞌquenꞌĉan cọdaqui Jenꞌcheꞌ in vajmuꞌyadyeꞌĉan in judyeyaꞌ prasayaꞌ in, paj qui cạvacsi muntyiꞌ in. Yụ rụij jéyac, mọꞌ mọmoꞌ ramꞌ bijodyeꞌ muꞌin, aty raꞌ jam bijodyeꞌ soꞌmac Jenꞌyaꞌ in. 6Jam raꞌ miꞌin meꞌ cọdaqui Jenꞌcheꞌ jụijyaꞌ miꞌin, jemoñeꞌ pạrejyi miꞌin ĉụiꞌsiꞌĉan ĉushaquis sisvac judyeyaꞌ ĉärꞌjevac chụiꞌdyeꞌ miꞌin. Muꞌĉan raꞌ cọdyetinte Jenꞌ muꞌ Ạvatunactyiꞌ, muꞌ jam cạvetintety miꞌin. Muꞌ nash naijbunac, meꞌ tsanꞌ caminve cọdaqui miꞌin muꞌdye raꞌ soꞌminac bijodyeꞌ.

7Cọdyetinte jụijyaꞌ miꞌin muꞌ Jenꞌ jam raꞌ fibiꞌyi ĉụiꞌ miꞌin päräꞌquiquij jiꞌjäctinte, jam jeñej muꞌin jam chị́yetety Jenꞌ in. Vaꞌves mọꞌ dyijyedyeꞌ, jeñej aty Jenꞌ jụjjeyacsebi cọdacdyeꞌ ĉúti u in päräꞌquiquij jiꞌjäcte tsanꞌ in, jeñej aty meꞌ ĉọ́te u in. 8Jam raꞌ cäc̣häꞌchucsebi dyijyedyeꞌ miꞌin muꞌinsiꞌ in, ĉaĉaij na jambiꞌ cọdyetinte jụijyaꞌ miꞌin, muꞌ Jenꞌ Ạvatunactyiꞌ miꞌin, muꞌ aty chäyinac jedyeꞌ chuc jemontiñeꞌ miꞌin. 9Cọdyetinte jụijyaꞌ Jenꞌ, yi raꞌ jétinte:

Tsuntyiꞌ Jenꞌ mạyedyeꞌchety,

paj muntyiꞌ in ạ̈räjjin in.

10Chimeꞌdye tsun cọdaqui paj qui cavintum ayoꞌbuꞌyi mi,

yojdyemꞌ mạyedyeꞌcheꞌ cạiꞌ u in mísiꞌ dyijyedyeꞌ,

paj meꞌdye muꞌin chimeꞌ úchety jacchety in.

11Räjĉan mạyedyeꞌ soꞌmitiĉamꞌ säcsedyedyes tsun.

12Jam raꞌ dyijtubutiĉaꞌ juchaj tsun,

yojdyemꞌ tsun jam dyijtucsebiban juchaj muꞌin yódyetydyemꞌ juchatuntyiꞌ u tsun.

13Jam raꞌ jiꞌĉujtiĉaꞌ carijsisyaꞌ jedyeꞌ,

chimeꞌ ñutsjitiĉamꞌ paj qui jam jiꞌpeñin tsun sọyoꞌ.

14Jam dyijtucsebi juchaj muꞌin juchatunactyiꞌ jụijyaꞌ in, meꞌdye raꞌ muꞌ chimeꞌ mạyedyeꞌchety Jenꞌ Ạvatunactyiꞌ miꞌin, muꞌ raꞌ jam dyijtubunac juchaj miꞌin. 15Yejĉoij na jụijyaꞌ miꞌin dyijtucsebi juchaj muꞌin juchatunactyiꞌ in, meꞌdye raꞌ muꞌ chimeꞌ Jenꞌ muꞌ Ạvatunactyiꞌ miꞌin muꞌ raꞌ yejĉoij dyijtubunac juchaj miꞌin.

Yịñijdyeꞌ Jenꞌdyes

16Jämꞌdyeyaꞌ yịñij Jenꞌdyes jụijyaꞌ miꞌin, jam raꞌ quisbaꞌnaqui vejyaꞌ miꞌin yịñijdyes, jam raꞌ jeñej muꞌin ac̣hiꞌ dyijyity in, jämꞌ yuꞌti tsanꞌ in, ĉaĉaij na muꞌin in quisbaꞌnaquity vejyaꞌ in paj qui räj chị́yacsi in yịñij Jenꞌdyes in, meꞌ mạꞌjeꞌ muꞌin in. Yụ rụij jéyac, mọꞌ ramꞌ bijodyeꞌ muꞌin, mijam raꞌ soꞌmac Jenꞌyaꞌ in. 17-18Jam raꞌ meꞌ miꞌin, yịñij Jenꞌdyes jụijyaꞌ miꞌin jemoñeꞌ favti vejyaꞌ miꞌin, jämꞌ yuꞌti miꞌin paj qui muntyiꞌ in jam chäyinac in miꞌin yịñij Jenꞌdyes miꞌin. Muꞌ na Jenꞌ cavinactyiꞌ caminve, muꞌ raꞌ soꞌminac bijodyedyes miꞌin.

Jämꞌ yuꞌtidyes mạyedyeꞌches

(Luc 12:33-34)

19Jam raꞌ dụriꞌñetiñeꞌ jedyeꞌ jacches, mọꞌ jam men ac̣hiꞌjoiꞌsiꞌ chicäjräiꞌsiꞌ, judyeyaꞌ pạrej shuꞌaijtyiꞌ cạiꞌ in. 20Damꞌdye jämꞌ mạyedyeꞌcheꞌ dụriꞌnac, mọꞌcheꞌ chat jam jedyeiꞌ mijam chicäjräiꞌ, mijam shushuꞌaty muꞌcheꞌ in. 21Tyi chuc jaccheꞌ dụriꞌñeꞌ jedyeꞌ in, mọꞌ mọmoꞌ dyijtuvaꞌqueꞌ ĉojtyiꞌĉan muꞌin, muꞌin na mạyedyeꞌcheꞌ dụriꞌñeꞌtyiꞌ jedyeꞌ in, mọꞌ muꞌin dyijtuiꞌ in ĉojtyiꞌĉan muꞌin.

Aꞌĉansiꞌ mạijyis tsun

(Luc 11:34-36)

22Vej miꞌin jeñej buꞌyiꞌ yiris aꞌĉansiꞌ mạijyis miꞌin. Jämꞌsiꞌ vej jụijyaꞌ miꞌin, räj aꞌĉan mạij buꞌyiꞌ miꞌin. 23Aꞌc̣his na jụijyaꞌ vej miꞌin, tojmaiꞌ aꞌ miꞌin. Itŝiꞌ mạijquedyeꞌ aꞌĉansiꞌ jụijyaꞌ miꞌin, därsiꞌ raꞌ tojmadyeꞌ aꞌĉan miꞌin.

Jenꞌ judyeyaꞌ querec̣ha

(Luc 16:13)

24Úñity jam junꞌ tupuj päräꞌcheꞌ úñi, ĉaĉaij na yirity raꞌ mạꞌjete, yoctyiꞌ na jam, muꞌ mạꞌjetety muꞌ raꞌ jämꞌ carijtyeyete, yoctyiꞌ na raꞌ fạ́quete jam jämꞌ carijtyeyete. Meꞌdye miꞌin chimeꞌ, jam raꞌ junꞌ pärenꞌcheꞌ jiꞌsäsdyi miꞌin, Jenꞌcheꞌ judyeyaꞌ querec̣hacheꞌ.

Jenꞌ ĉọjcacsi ạvaꞌ muꞌ

(Luc 12:22-31)

25Mọꞌdyes yụ jéyac: Jam raꞌ cajotyetiñeꞌ miꞌin jedyeꞌ chuc raꞌ jebetiñeꞌ tsạꞌ buꞌyedyes miꞌin, mijam raꞌ dyijtutiñeꞌ miꞌin jedyeꞌĉan chuc raꞌ cofjebanꞌ miꞌin. Jam säcsedyemꞌ tsạꞌchunac miꞌin, mijam quịꞌsimꞌ jemonac aꞌcheꞌ miꞌin. 26Cạvacsejamꞌ mọꞌin jaijtyiꞌ in, jam junꞌ ĉụiꞌ cätiꞌ in mijam vädaĉanꞌ in, mijam jämꞌ yụꞌtaquiꞌ säcsedyeꞌ acaꞌĉan in, muꞌ qui namꞌ Jenꞌ mạyedyeꞌchety jiꞌsäcsacsi. ¿Jaijtyiꞌ buty mọmoꞌ mạꞌjeyacsi Jenꞌ? Jam junꞌ meꞌ, miꞌin mujuꞌchaꞌ mạꞌjinac. 27Chimeꞌdye miꞌin, meꞌ tsanꞌ fer dyijyi miꞌin, mijam qui namꞌ junꞌ ñucjeyaqui sänꞌdyeꞌ miꞌin, paj tsanꞌ yiris hora tsạꞌ buꞌyetaqui miꞌin.

28-29¿Junꞌ buty cajotyiti miꞌin quịꞌsidyes? Jeshaꞌ mọꞌ däräꞌ jámetumsiꞌ in, meꞌ tsanꞌ jam carijtaquiꞌ in mijam p̂anaquiꞌ quịꞌsiꞌ in, yụ qui namꞌ jéyac, anic mọjoꞌchaꞌ jäjämun quịꞌsiꞌ mọꞌin, mijam muꞌ meꞌ ayoꞌtyiꞌ quịꞌsiꞌ joꞌmety Salomóntyiꞌ jiquej. Meꞌ tsanꞌ mujuꞌchaꞌ jämꞌ yuꞌti yaꞌijtyiꞌĉan quịꞌsiꞌ jam cätstacsi, mọjoꞌchaꞌ jäjämun mọꞌin jáme in. 30Meꞌ muꞌ Jenꞌ jịꞌquiꞌ mọꞌ däräꞌ, mọꞌ jam men buꞌyis, cavin jiꞌcoꞌshayac, dadamꞌ raꞌ miꞌin Jenꞌ jiꞌquinac. Miꞌin anic damꞌ mọmoꞌ anicjetintety Jenꞌ. 31Mọꞌdyes jam raꞌ dyijyi ĉojtyiꞌĉan miꞌin, mijam raꞌ yi miꞌin: ¿Jedyeꞌ buty raꞌ jebejaꞌ? ¿Junatyiꞌ bu raꞌ quịꞌsiꞌ dạcja? 32Muꞌin jam chị́yetety Jenꞌ in joꞌmes mọmoꞌ dyijtuiꞌ in. Miꞌin na jam meꞌ, muꞌ Jenꞌ Ạvatunactyiꞌ miꞌin chäyinac jedyeꞌ chuc jemontiñeꞌ miꞌin. Ĉútac muꞌcheꞌ miꞌin, muꞌ raꞌ soꞌminac. 33Mọjoꞌchaꞌ raꞌ dyijtutiñeꞌ ayoꞌbuꞌyedyeꞌ Jenꞌsiꞌ muꞌ, muꞌ chiquemac chat qui raꞌ muꞌ soꞌminac räj jedyeꞌ chuc jemontiñeꞌ miꞌin. 34Mọꞌdyes jam raꞌ cajotyiti miꞌin junꞌ chuc raꞌ yocsiꞌ mạyedyeꞌ, aty raꞌ ayijyaꞌ mạyedyeꞌ tupuj raꞌ mọꞌ dyijtutiñeꞌ. Jam raꞌ cächjetiñeꞌ dyijyedyeꞌ miꞌin jambiꞌ chaꞌshes mạyedyeꞌ, q̂uinꞌsis dyijtuvac dyijyedyeꞌ miꞌin.

Currently Selected:

Mateos 6: CAS

Highlight

Copy