Mateos 5

Jesús jịꞌchiyacsi mụcuꞌcheꞌ

(Luc 6:20-23)

1Aty cạvacsiyaꞌ shach muntyiꞌ cäc̣häꞌchute in, muꞌ Jesús mụcuꞌcheꞌ bojvi, muꞌcheꞌ p̂utsquenꞌyi, judyeyaꞌ jịꞌchiyactyiꞌ muꞌ ĉọcte in. 2Tiyacchuiꞌ jịꞌchiyacsi muntyiꞌ in.

Anicsis maꞌjodyeꞌ

3Muꞌ jéyacsi:

—Anic maꞌjoij muꞌin uyaꞌyaꞌ yuꞌtity ĉojtyiꞌĉan in,

ĉaĉaij na muꞌĉan raꞌ bäꞌyi in ayoꞌbuꞌyedyeꞌĉan Jenꞌsiꞌ muꞌ.

4Anic maꞌjoij muꞌin in meꞌ tsanꞌ tárity q̂uinꞌ in,

ĉaĉaij na Jenꞌ raꞌ jiĉun yụꞌtacsi.

5Anic maꞌjoij muꞌin in uyaꞌyaꞌjety dyijyedyeꞌ in,

ĉaĉaij na soꞌmac raꞌ Jenꞌyaꞌ in,

muꞌ raꞌ jịꞌcätseyacsi muꞌsiꞌ p̂eyacdyeꞌ muꞌ.

6Anic maꞌjoij muꞌin in, mạꞌjeꞌ mujuꞌchaꞌ chiquetety Jenꞌ in,

muꞌ raꞌ räj soꞌmacsi.

7Anic maꞌjoij muꞌin in ñịbeꞌ ĉọcsity in,

Jenꞌ raꞌ ñịbeꞌ ĉọcsi chimeꞌ muꞌin in.

8Anic maꞌjoij muꞌin in dyijtutety Jenꞌ ĉojtyiꞌĉan muꞌin,

muꞌin raꞌ cạvete in.

9Anic maꞌjoij muꞌin in jiꞌjämꞌ yụꞌtacsity in muꞌin fáquitity jiquej in,

ĉaĉaij na Jenꞌ raꞌ jéyacsi: "Miꞌin nash yụ́tyiꞌ ạvaꞌ."

10Maꞌjoij muꞌin in jịꞌñibeꞌcactyiꞌ in cäc̣häꞌchucdyeꞌyaꞌ Jenꞌ,

muꞌĉan raꞌ bäꞌyi in ayoꞌbuꞌyedyeꞌĉan Jenꞌsiꞌ muꞌ.

11Maꞌjoij raꞌ miꞌin meꞌ tsanꞌ ñäñinac jụijyaꞌ in,

judyeyaꞌ ñịbeꞌtyinac jụijyaꞌ in judyeyaꞌ väñädyeꞌyaꞌ p̂iijnac jụijyaꞌ in yụ́dyesiꞌ chimeꞌ.

12Meꞌ jụijyaꞌ miꞌin anic raꞌ maꞌjoij bäꞌyi miꞌin ĉaĉaij na därsiꞌ raꞌ bijodyeꞌ mạyedyeꞌches soꞌmac raꞌ miꞌin.

Meꞌdye chimeꞌ muꞌin ñịbeꞌtacsi jiquej in urucyaty jasoꞌmitity p̂eyacdyeꞌ Jenꞌ jiquej in.

Jicoj jacsiꞌ judyeyaꞌ mạijquedyeꞌ jacsiꞌ chimeꞌ

(Mar 9:50; Luc 14:34-35)

13Miꞌin jeñej buꞌyi jacsiꞌ jicoj, meꞌ buꞌyi miꞌin. Mọꞌ qui namꞌ jicoj aty jam jesec jụijyaꞌ, jam raꞌ cuvij jesecjobanꞌ. Aty jam jedyedyes, vaꞌcacdyes qui mọmoꞌ, chat qui muntyiꞌ yútyeꞌ in.

14Miꞌin jeñej buꞌyi jacsiꞌ mạijquedyeꞌ mọꞌ. Jeshaꞌ, mọꞌ mụcuꞌches bäꞌyedyeꞌ jam junꞌ jumĉan, nạijyiꞌ mọmoꞌ. 15Chimeꞌdye muntyiꞌ in aty jiꞌjäꞌñeꞌyaꞌ mạijyis in, jam junꞌ änꞌjeꞌ in jedyeꞌyaꞌ, fajchemꞌ yụꞌtyeꞌ in paj qui mạijchucsiꞌ räj acaꞌĉantyiꞌ in. 16Meꞌdye raꞌ miꞌin chimeꞌ, mạijchucsi raꞌ muntyiꞌ miꞌin paj qui räj cavinactyiꞌ in junꞌ chuc rụij bäꞌyi miꞌin, chat qui raꞌ chimeꞌ timaꞌquibunac Jenꞌ in, muꞌ mạyedyeꞌchety.

Jesucristo jịꞌchiyacsi junꞌ chuc Jenꞌsiꞌ yụꞌtacdyeꞌ muꞌ

17Jam raꞌ ĉútiĉaꞌ yụ miꞌin atsij yụ úcheꞌ jam jịꞌmotseteꞌ yụ Jenꞌsiꞌ yụꞌtacdyeꞌ muꞌ judyeyaꞌ mọꞌ jiꞌchäyitidyeꞌ muꞌin jasoꞌmititysiꞌ Jenꞌ jiquej in, jam raꞌ meꞌ ĉútiĉaꞌ yụ miꞌin. Yụ atsij jam raꞌ jịꞌmotseteꞌ yụ, atsij yụ jịꞌcätseteꞌ ramꞌ yụ. 18Yụ rụij jéyac, jam raꞌ jụꞌñisĉan mạyedyeꞌ mọtsiꞌ mọꞌ Jenꞌsiꞌ yụꞌtacdyeꞌ muꞌ, meꞌ tsanꞌ miquis jiꞌchäyitidyeꞌ räj raꞌ mọꞌ cạ̈tsiꞌ. 19Mọꞌdyes tyi chuc vaꞌquecbitety in yiris yụꞌtacdyeꞌ Jenꞌsiꞌ muꞌ, meꞌ tsanꞌ miquis mọꞌ jiꞌchäyitidyeꞌ, judyeyaꞌ chimeꞌ jéyacsity muntyiꞌ in paj qui vaꞌquequeꞌ in, muꞌin meꞌtyity in, uyaꞌyaꞌ raꞌ muꞌin in ayoꞌbuꞌyedyeꞌĉan Jenꞌsiꞌ muꞌ. Chiqueꞌtyiꞌ na jụijyaꞌ in judyeyaꞌ jéyacsity muntyiꞌ in paj qui chiqueꞌ chimeꞌ in, muꞌin raꞌ mujuꞌchaꞌ in ayoꞌbuꞌyedyeꞌĉan Jenꞌsiꞌ muꞌ. 20Fariseo in judyeyaꞌ muꞌin jịꞌchiyacsity yụꞌtacdyeꞌ in anic chiquete Jenꞌ ĉúti in. Jéyac: jam mujuꞌchaꞌ chiquetinte Jenꞌ jụijyaꞌ miꞌin, jam raꞌ junꞌ ayoꞌbuꞌyedyeꞌĉan Jenꞌsiꞌ muꞌ siti miꞌin.

Muntyis fạ́codyeꞌ muꞌin

(Luc 12:57-59)

21Aty seꞌvetiñeꞌ miꞌin urucyas jiꞌchäyitidyeꞌ jiquej, yiꞌ: "Jam raꞌ ijatinte muntyiꞌ,#5:21 Exodo 20:13 tyi chuc meꞌtyity in muꞌ raꞌ jiꞌmeꞌtac ayoꞌyaꞌ", yiꞌ. 22Yụ jéyac: tyi chuc fạ́coij chätidyeꞌtum, muꞌ raꞌ jiꞌmeꞌtac ayoꞌyaꞌ. Tyi chuc ñiñete chätidyeꞌ muꞌ, "Muꞌ nash itŝity dyijyedyeꞌ", jéte, muꞌ raꞌ jiꞌmeꞌtac mujuꞌchatyyaꞌ ayoꞌ. Tyi chuc ac̣hiꞌ ñiñete chätidyeꞌ muꞌ, "Muꞌ anic där ac̣hiꞌyity" jéte, muꞌ raꞌ tŝijĉandyety shupqui.

23Mọꞌdyes aty raꞌ soꞌmete Jenꞌ dyimacdyeꞌ jụijyaꞌ mi, vatyquej dyijyeban mi jam jämꞌjiti chätidyeꞌtum mi, meꞌ jụijyaꞌ mi, jambiꞌ chum raꞌ soꞌmetem Jenꞌ. 24Tashcheꞌ chum raꞌ ĉọcte chätidyeꞌ mi, jämꞌjibun raꞌ yuꞌbun mi chat raꞌ q̂uinꞌdyemꞌ tupuj soꞌmete Jenꞌ dyimacdyeꞌ mi.

25Yirity jiꞌmeꞌtyin jụijyaꞌ ayoꞌyaꞌ, damꞌdye jämꞌ tashcheꞌ chum jämꞌjibun muꞌtum mi, jambiꞌ chum raꞌ ayoꞌyaꞌ jiꞌcavibun mi. Vatyquej ayoꞌ jéyacsi jụijyaꞌ muꞌin väc̣häꞌtyity in vatyquej ĉärꞌtyin jụijyaꞌ in. 26Yụ rụij jéye: jam raꞌ junꞌ shuban mi junꞌ quiꞌ chuc tas jiyaꞌdyeyem.

Shapudyeꞌ muntyis

27Aty seꞌvetiñeꞌ urucyas jiꞌchäyitidyeꞌ jiquej, yiꞌ: "Jam raꞌ voꞌvoij miꞌin."#5:27 Exodo 20:14 28Yụ jéyac: tyi chuc dyijtubiꞌ aꞌ p̂ensiꞌ jụijyaꞌ cạveꞌyaꞌ mọꞌ, jeñej aty shapuij mọꞌtum, meꞌ buꞌyi shupqui.

29Tacves vej mi jiꞌjuchayin jụijyaꞌ mi, jemoñeꞌ fonꞌjeyaqui vej mi vaꞌcajquiqui mi. Jam jụijyam, dadamꞌ raꞌ tsäquiꞌ tŝijĉan vaꞌcac mi mundyemꞌ aꞌ mi, uyaꞌyaꞌdye itŝiꞌ yiris aꞌsiꞌ jedyeꞌ bäꞌyi mi. 30Chimeꞌdye tacves un mi jiꞌjuchayin jụijyaꞌ, jemoñeꞌ tätstaqui un mi vaꞌcajquiqui mi. Jam jụijyaꞌ meꞌ mi, dadamꞌ raꞌ tsäquiꞌ tŝijĉan vaꞌcac mi mundyemꞌ aꞌ mi, uyaꞌyaꞌdye itŝiꞌ yiris aꞌsiꞌ jedyeꞌ bäꞌyi mi.

Yacchucdyeꞌ p̂en

(Mat 19:9; Mar 10:11-12; Luc 16:18)

31Urucyas jiꞌchäyitidyeꞌ yiꞌ: "Tyi chuc mạꞌjeꞌ yacchuqui p̂en muꞌ, jemoñeꞌ muꞌ muntyiꞌ soꞌmaqui p̂en muꞌ yiris yacchutidyes sánacdyeꞌ, paj qui jọbanꞌ mọꞌ. 32Yụ jéyac: tyi chuc yacchuqui ĉụiꞌsiꞌ p̂en jụijyaꞌ muꞌ, jam voꞌvoiꞌsiꞌ jụijyaꞌ mọꞌ, muꞌdye jiꞌjuchayaqui p̂envun muꞌ, yoctyiꞌtum muntyiꞌ bäꞌyiꞌ jụijyaꞌ mọꞌ. Tyi chuc vämi yacchucsiꞌcheꞌ p̂en, muꞌmun juchaj cạiꞌ chimeꞌ.

Tsäquiꞌsistumsiꞌ p̂eyacdyeꞌ tsun

33Aty seꞌvetiñeꞌ miꞌin urucyaꞌmuntyis jiꞌchäyitidyeꞌ muꞌin, yiꞌ: "Yụꞌtaqui tsäquiꞌsistumsiꞌ p̂eyacdyeꞌ jụijyaꞌ mi, jam raꞌ junꞌ farajjeyaqui miꞌin, jemoñeꞌ jịꞌcätsetiñeꞌ miꞌin Jenꞌsiꞌyaꞌ vej muꞌ." 34Yụ jéyac: jam raꞌ junꞌ meꞌ yụꞌtaqui tsäquiꞌsistumsiꞌ p̂eyacdyeꞌ miꞌin, mijam raꞌ junꞌ jiꞌjäctiñeꞌ mạyedyeꞌcheꞌ paj qui chịj in anicsis mọꞌ p̂eyacdyeꞌ miꞌin, ĉaĉaij na muꞌcheꞌ ayoꞌbuꞌyi muꞌ Jenꞌ. 35Chimeꞌdye jam raꞌ jiꞌjäctiñeꞌ jac jịꞌĉocdyes anicsis mọꞌ p̂eyacdyeꞌ miꞌin, ĉaĉaij na jac Jenꞌsiꞌ yụꞌtaquis yuj muꞌ, meꞌ shupquiꞌ. Chimeꞌdye jam raꞌ jiꞌjäctiñeꞌ Jerusalén ĉaĉaij na mọꞌ Jenꞌsiꞌ bäꞌyedyeꞌ muꞌ, muꞌ Ayoꞌ tsun. 36Chimeꞌdye jam raꞌ ĉụiꞌsiꞌ joꞌnoꞌ jiꞌjäcaqui miꞌin, ĉaĉaij na miꞌin jam ĉụiꞌ bächäqui joꞌnoꞌ miꞌin, mijam junꞌ tupuj yụꞌtaqui miꞌin paj qui yiris fin miꞌin tsinꞌcus shupquiꞌ, vatyquej jaiꞌbas jụijyaꞌ. 37Rụij raꞌ p̂eyaqui miꞌin räjĉan. Tupuj yi miꞌin: "Anic meꞌ." Jam na meꞌ jụijyaꞌ, yi raꞌ miꞌin: "Jam meꞌ." Jam jemoñeꞌ yocsiꞌ jiꞌjäctiñeꞌ jịꞌĉocdyes anicsis p̂eyacdyeꞌ miꞌin. Meꞌ jiꞌjäctiñeꞌ jụijyaꞌ miꞌin, aꞌc̣his mọꞌ shupquiꞌ.

Jam raꞌ chimeꞌjeyacsejaꞌdye muꞌin jịꞌñibeꞌcasinꞌtyiꞌ in

(Luc 6:29-30)

38Miꞌin seꞌvetiñeꞌ urucyas jiꞌchäyitidyeꞌ yiꞌ: "Tyi chuc jäcbite muntyis vej muꞌ, chimeꞌjeptedye raꞌ muꞌsiꞌ in, judyeyaꞌ tyi chuc tocjepte modyin muꞌ, chimeꞌjeptedye raꞌ muꞌtyiꞌ in." 39Yụ jéyac: jam raꞌ chimeꞌjetintedye miꞌin muꞌ ac̣hiꞌyity. Tyi chuc ĉatjinac yirisve an, jemoñeꞌ pärenꞌvedye jiꞌĉattyeyetinte. 40Chimeꞌdye yirity muntyiꞌ jiꞌmeꞌtyin jụijyaꞌ ayoꞌyaꞌ, chutyin jụijyaꞌ camisa miꞌin, soꞌmetinte ramꞌ fajchety miꞌin chimeꞌ. 41Chimeꞌdye yirity väc̣häꞌtyity jutinac jụijyaꞌ miꞌin paj qui jịjcatem yiris quirometro meꞌquiꞌyamꞌ cạptinte jubij jụijyam, meꞌ jutinac jụijyaꞌ miꞌin, damꞌ qui ram mọjoꞌchaꞌyaiꞌ cächjetiñeꞌ päräꞌ quirometro, meꞌsiꞌ cạptinte mi jubij muꞌ. 42Tyi chuc cudyinac jedyeꞌ jụijyaꞌ miꞌin, soꞌmemac mọmoꞌ, mijam raꞌ murujrutyetinte tyi chuc cudyinac prestadyeꞌ jụijyaꞌ, soꞌmemac mọmoꞌ.

Jemoñeꞌ mạꞌjeyacsejaꞌ muꞌin fáquisinꞌtyiꞌ in

(Luc 6:27-28,32-36)

43Seꞌvetiñeꞌ miꞌin urucyas jiꞌchäyitidyeꞌ yiꞌ: "Mạꞌjeyacsejamꞌ penꞌdyeꞌ miꞌin, fạ́cacsejamꞌ muꞌ fáquinactyiꞌ in." 44Yụ jéyac: mạꞌjeyacsevac muꞌin fáquinactyiꞌ in, cọdyemac Jenꞌ muꞌindyes ñịbeꞌtyinactyiꞌ in. 45Meꞌ jụijyaꞌ miꞌin, ạvaꞌ buꞌyi Jenꞌtyiꞌ muꞌ mạyedyeꞌchety miꞌin, ĉaĉaij na muꞌ tsun yụꞌte jam muꞌin mọmoꞌ jämꞌyity mạijchucsi, chimeꞌdye ac̣hiꞌyitymun in mạijchucsi. Chimeꞌdye añej yụꞌtyeꞌ jam jämꞌyitydyes mọmoꞌ in, chimeꞌdye ac̣hiꞌyitydyesmun in. 46Miꞌin mạꞌjeyacsi jụijyaꞌ miꞌin muꞌin mạꞌjinactyiꞌ mọmoꞌ in, itŝiꞌ raꞌ soꞌmac bijodyeꞌ miꞌin, ĉaĉaij na vaj meij mạꞌjiti in muꞌin ac̣hiꞌyity tsimꞌtety querec̣ha in. 47Chimeꞌdye vorjeyaqui ĉụiꞌtyiꞌ chätidyeꞌ mọmoꞌ jụijyaꞌ miꞌin, jeñej ac̣hiꞌyity muntyiꞌ meꞌ shupqui miꞌin, meꞌ muꞌin chimeꞌ jam chị́yetety Jenꞌ in. 48Paj jam jayej mạꞌjitidyes miꞌin, junꞌ chuc muꞌ Jenꞌ, meꞌ buꞌyi raꞌ cäc̣häꞌchutinte.

Currently Selected:

Mateos 5: CAS

Highlight

Copy