Mateos 7

Dyijtucdyeꞌ yoctyis juchaj

(Luc 6:37-38,41-42)

1Miꞌin raꞌ jam ĉojtyiꞌĉan miꞌin ac̣hiꞌ dyijtucsebi yoctyis dyijyedyeꞌ muꞌin, mijam raꞌ p̂eijtacsebi juchaj muꞌin, paj qui muꞌ Jenꞌ jam dyijtubunac juchaj miꞌin. 2Meꞌ ac̣hiꞌ dyijtucsebi yoctyis dyijyedyeꞌ jụijyaꞌ miꞌin, meꞌdye raꞌ Jenꞌ chimeꞌjinac miꞌin. Dyijtucsebiyaꞌ miꞌin juchaj muntyis muꞌin, meꞌdye raꞌ Jenꞌ chimeꞌjibunacdye dyijtubunac juchaj miꞌin. 3-4Miꞌin cavin cạvacsebi yoctyis juchaj muꞌin, ĉụiꞌsiꞌ na juchaj jam cạvaqui miꞌin. Jeñej cavin cạvetiñeꞌ miquis patsacdyeꞌ chätidyesĉansiꞌ vej miꞌin, mọꞌyaꞌ qui namꞌ meꞌchutiñeꞌ därsiꞌ son ĉụiꞌsiꞌĉan vej miꞌin, jam chị́yaqui ĉụiꞌ miꞌin. Yi jétinte chätidyeꞌ miꞌin, "Jeshaꞌ yụ raꞌ jäcbibadyeye miquis vejĉansiꞌ patsacdyeꞌ mi," yi jétinte, ĉụiꞌsiꞌĉan qui namꞌ vej miꞌin därsiꞌ son mọꞌĉan, mijam mọꞌ chị́yaqui miꞌin. 5¡Anic ac̣hiꞌ dyijyity miꞌin, jämꞌ yuꞌti tsanꞌ miꞌin! Jemoñeꞌ tashcheꞌ chum vaꞌcaqui ĉụiꞌsiꞌĉansiꞌ vej jedyeꞌ miꞌin, chat qui raꞌ q̂uinꞌdyemꞌ chuñem naijti miꞌin paj qui tupuj jäctyebajtinte chätidyes miꞌin mọꞌ vejĉansiꞌ miquis jedyeꞌ muꞌ.

6Jam raꞌ Jenꞌsiꞌ jedyeꞌ soꞌmacsi miꞌin muꞌin jeñejtyity ac̣huj in, vátyequej raꞌ roiꞌjinac in. Mijam raꞌ yaꞌijtyiꞌ mij miꞌin soꞌmacsi miꞌin muꞌin jeñejtyity cochij in, muꞌ raꞌ yútyevaꞌte mọmoꞌ muꞌin.

Cọdacdyeꞌ Jenꞌcheꞌ

(Luc 11:9-13; 6:31)

7Cọdyemac Jenꞌ, muꞌ raꞌ soꞌminac, quevvac, chat qui raꞌ dạctiñeꞌ, fayevac chụiꞌdyeꞌyaꞌ miꞌin paj qui muꞌ vanacjiyinac miꞌin. 8Tyi chuc cọdyetety, muꞌ raꞌ soꞌmac, tyi chuc queveꞌtyiꞌ muꞌ raꞌ dạqueꞌ, tyi chuc fayity chụiꞌdyeꞌyaꞌ, chat qui raꞌ vanacjeyeyac miꞌin. 9Jeshaꞌ ạvaꞌ miꞌin cudyityinac jụijyaꞌ pan ¿soꞌmaqui bu raꞌ mij miꞌin? ¡Jam junꞌ! 10Chimeꞌdye cudyityinac ạvaꞌ jụijyaꞌ miꞌin yiris tạbedyeꞌ, ¿soꞌmaqui bu raꞌ nas miꞌin? ¡Jam junꞌ! 11Meꞌ tsanꞌ ac̣hiꞌyity miꞌin, chịj qui namꞌ miꞌin soꞌmaqui ạvaꞌ miꞌin jämꞌsiꞌ jedyeꞌ, dadamꞌ muꞌ mujuꞌchaꞌ mạyedyeꞌchety Jenꞌ Ạvatunactyiꞌ miꞌin, muꞌ raꞌ soꞌmacsi jämꞌsiꞌ muꞌin cọdyetyetety in.

12Jemoñeꞌ miꞌin jämꞌyedyeꞌtum jämꞌjeyacsi räj muntyiꞌ in. Jeshaꞌ miꞌin mạꞌjetiñeꞌ paj qui muntyiꞌ in jämꞌyedyeꞌtum jämꞌjinac in, meꞌdye raꞌ miꞌin jämꞌyedyeꞌtum jämꞌjeyacsi räj muntyiꞌ in. Meꞌ jämꞌjeyacsi jụijyaꞌ miꞌin, meꞌ raꞌ chat tas chiqueptinte Jenꞌsiꞌ yụꞌtacdyeꞌ muꞌ judyeyaꞌ sánacdyeꞌ muꞌin jasoꞌmitity p̂eyacdyeꞌ Jenꞌ in.

Chụiꞌdyeꞌ Ịtsucves

(Luc 13:24)

13Sisvac ịtsuꞌquisyaꞌ chụiꞌdyeꞌ, ĉaĉaij na därves chụiꞌdyeꞌ judyeyaꞌ mọꞌ därves majmi rụij tŝijĉan jịjcaiꞌ, anic mọꞌ daiꞌ muntyiꞌ jịjcaiꞌ in. 14Mọꞌ na ịtsuꞌquiꞌves chụiꞌdyeꞌ, judyeyaꞌ ịtsuꞌquiꞌves majmi, Jenꞌyaꞌ jịjcaiꞌsiꞌ, yóĉandyemꞌ tsạꞌ buꞌyiĉan u in, mọꞌ jam daiꞌyaij jịjcaiꞌ in, anic carij jịjcaiꞌ in.

Mọꞌ cätidyeꞌ chị́yac ĉụiꞌsiꞌcheꞌ väsh mọꞌ

(Luc 6:43-44)

15Ĉujcatiĉamꞌ miꞌin ĉaĉaij na daiꞌ muꞌyaꞌ vaꞌve jịꞌchiyacsity in, jeñej buꞌyi jasoꞌmitity p̂eyacdyeꞌ Jenꞌ in. Jeñej jam tsäquiꞌyis oveca miꞌinyaꞌ in, ĉojtyiꞌĉan qui namꞌ muꞌin jeñej tsäquiꞌyis vajedyedyeꞌ meꞌ buꞌyi in. 16Tupuj miꞌin chị́yacsi meꞌtyity in cạvacsebi jụijyaꞌ miꞌin dyijyedyeꞌ muꞌin. Jeshaꞌ, mọꞌ aꞌc̣his däräꞌ jụijyaꞌ jam junꞌ mọꞌ jiꞌshupqueꞌ ova, judyeyaꞌ mọꞌ yätijtumsiꞌ däräꞌ jam junꞌ mọꞌ jiꞌshupqueꞌ higo. 17Meꞌdye chimeꞌ mọꞌ tsạꞌsiꞌ cätidyeꞌ jämꞌsiꞌ väsh jiꞌshupqueꞌ, mọꞌ na shínaꞌjoiꞌsiꞌ cätidyeꞌ aꞌc̣his väsh jiꞌshupqueꞌ. 18Mọꞌ tsạꞌsiꞌ cätidyeꞌ jam junꞌ jiꞌshupqueꞌ aꞌc̣his väsh, mọꞌ na shínaꞌjoiꞌsiꞌ cätidyeꞌ jam junꞌ jiꞌshupqueꞌ jämꞌsiꞌ väsh. 19Jụꞌñis chuc jam jämꞌsiꞌ cätidyeꞌ mọꞌ jam jämꞌsiꞌ jiꞌshupques väsh mọꞌ, mọꞌ tupuj p̂ạc judyeyaꞌ jiꞌcoꞌshayac tŝijĉan. 20Meꞌdye chimeꞌ muntyiꞌ in tupuj chị́yac in jämꞌyity in judyeyaꞌ ac̣hiꞌyity in, cạvacsiyaꞌ miꞌin junꞌ chuc bäꞌyi in, areꞌ jämꞌ bäꞌyi in areꞌ jam jämꞌ bäꞌyi in.

Anictyity cäc̣häꞌchutety Jesucristo in

(Luc 13:25-27)

21Meꞌ raꞌ tsanꞌ daiꞌtyiꞌ jin yụ in: "Ayoꞌ tsun, Ayoꞌ tsun", yi in, jam qui na ramꞌ räj siti Jenꞌyaꞌ in. Muꞌin ramꞌ chäquibuntyiꞌ dyijyedyeꞌ Jenꞌsiꞌ yụ in mạyedyeꞌchety, muꞌin ramꞌ muꞌyaꞌ jịjcaij in ayoꞌbuꞌyedyeꞌĉan muꞌsiꞌ. 22Aty raꞌ ayijyaꞌ jadyiquis tupudyeꞌ, daiꞌ raꞌ muntyiꞌ jin tsanꞌ yụ in: "Ayoꞌ tsun, mísiꞌ tịj jiꞌjäcbiyac voroꞌtacsiyaꞌ muntyiꞌ tsun judyeyaꞌ meijjetyetacsi sọyoꞌ tsun, judyeyaꞌ chimeꞌ tsun därsiꞌ ferdyeꞌ jịꞌcaveyacsi tsun míscheꞌ tịj." 23Yụ qui na ramꞌ jéyacsi: "Yụ jam chị́yeyac, meijyejamꞌ miꞌin, ac̣hiꞌyity miꞌin."

Päräꞌ acaijtyiꞌ in

(Mar 1:22; Luc 6:47-49)

24Tyi chuc seꞌvibun ọij p̂eyacdyeꞌ yụ in, judyeyaꞌ chäquibun yụ in, jeñej buꞌyi yirity acaijtyiꞌ dyijyedyeꞌtumtyiꞌ, därtyiꞌcheꞌ mij jämꞌtyeꞌ acaꞌ muꞌ. 25Meꞌ qui tsanꞌ choj tŝọiꞌ añej, judyeyaꞌ tomiꞌ jac judyeyaꞌ tyiꞌmu fertyiꞌ, jam damꞌ jedyeiꞌ acaꞌ muꞌ, ĉaĉaij na därtyiꞌcheꞌ buꞌyiꞌ mij jämiꞌ. 26Muꞌin na in meꞌ tsanꞌ seꞌvibuntyiꞌ yụ in ọij p̂eyacdyeꞌ yụ, jam qui namꞌ chäquibun jụijyaꞌ yụ in, jeñej muꞌ yirity muntyiꞌ itŝity dyijyedyeꞌ muꞌ acaijtyiꞌ, jámancheꞌ jämꞌtyeꞌ acaꞌ muꞌ. 27Ayij mọꞌ añej choj tŝọiꞌ, judyeyaꞌ tomiꞌ jac judyeyaꞌ tyiꞌmu fertyiꞌ, chat qui natsyetŝọiꞌ acaꞌ muꞌ, pịtsiꞌcac tŝọiꞌ muꞌ.

28Aty meꞌsiꞌ jịꞌchiyacsi muꞌ, muꞌin muntyiꞌ in anic äjjepte jiꞌchäyitidyeꞌ in, 29jam muyejjoij jịꞌchiyacsi, jam jeñej muꞌin jịꞌchiyacsity yụꞌtacdyeꞌ in Jenꞌsiꞌ muꞌ.

Currently Selected:

Mateos 7: CAS

Highlight

Copy