Mateos 14

Jiꞌijate in muꞌ Juan chojtacsity

(Mar 6:14-29; Luc 9:7-9)

1Aty meꞌsiꞌ muꞌ Herodes,#14:1 Uts Herodes Antipas, ạvaꞌ muꞌ jétety in Tashchety Herodes, muꞌ jiꞌijacsity miquiꞌmuntyiꞌ in. P̂eyevaꞌ Mateos 2:1 Galileaĉantyiꞌ ayoꞌ muꞌin muꞌ seꞌvaqui junꞌ chuc carijtaqui muꞌ Jesús. 2Yi muꞌ Herodes jéyacsi úñity muꞌ:

—Uts Jesús q̂uinꞌ muꞌ nash Juanvun chojtacsity jiquej, a nash vañinyeban muꞌ, mọꞌdyes q̂uinꞌ ferdyeꞌ meꞌchuiꞌ muꞌ —jéyacsi muꞌ Herodes.

3-4Meꞌ yi ĉaĉaij na muꞌdye Herodes jiꞌtapte muꞌ Juanvun jiquej judyeyaꞌ c̣họcoꞌ buꞌyi jiꞌĉärꞌte. Tashcheꞌ jiquej muꞌ Herodes vämi vojitysiꞌcheꞌ p̂en muꞌ, Felipe tịj vojitysiꞌ muꞌ. Muꞌ Juan fạraꞌjeĉunꞌte yejĉoij jéte:

—Jam tupuj meꞌchuiꞌ mi ọij p̂en Erodías ĉaĉaij na vojitysiꞌ p̂en mi.

5Mọꞌdyes muꞌ Herodes mạꞌjeꞌ tsanꞌ jiꞌijate muꞌ Juan, jam qui namꞌ junꞌte ĉaĉaij na quijnacsi muntyiꞌ in, ĉaĉaij na muꞌin irijyi Juancheꞌ in, chị́yete in muꞌ jasoꞌmitity p̂eyacdyeꞌ Jenꞌ. 6Aty chaꞌsheꞌ naꞌedyeꞌ Herodessiꞌ, chat Erodíassiꞌ ạvaꞌ mọꞌ roꞌyaquiꞌ muꞌinsiꞌyaꞌ vej in muꞌin fayactyiꞌyaꞌ in Herodestyiꞌ. Anic maꞌjotyeꞌ muꞌ mọꞌ nanas. 7Mọꞌdyes qui yụꞌtyeyeꞌ p̂eyacdyeꞌ, jeꞌ:

—Yụ q̂uinꞌ jéye Jenꞌsiꞌyaꞌ vej muꞌ, räj jedyeꞌ ĉụiꞌ mạꞌjeꞌ jụijyam, yụ raꞌ mọꞌ soꞌmeye —jeꞌ.

8Mọꞌ Erodías tseꞌ mọꞌ nanassiꞌ cavin jéyaquiꞌ ạvaꞌ mọꞌ paj qui mọꞌ cọdyetyete paj qui Herodes jiꞌijate muꞌ Juan. Yiꞌ mọꞌ nanas jéte muꞌ Herodes:

—Yụ mạꞌjepte Juansiꞌ joꞌnomꞌ, pijiꞌĉan raꞌ soꞌmitim.

9Muꞌ ayoꞌ Herodes aty seꞌvebiꞌ p̂eyacdyeꞌ mọꞌsiꞌ, där muꞌ tári. Jam qui namꞌ mạꞌjeꞌ ticameꞌ ĉaĉaij na muꞌ aty yụꞌtyeꞌ p̂eyacdyeꞌ muꞌinsiꞌyaꞌ vej muꞌin fayactyiꞌ muꞌ. Mọꞌdyes qui muꞌ chiquebiꞌ p̂eyacdyeꞌ mọꞌ nanassiꞌ. 10Chat qui muꞌ jutacsi paj qui ĉärꞌtaquisĉan jịjcaij in tätsecbite in joꞌnoꞌ Juansiꞌ muꞌ. 11Chat qui pijiꞌĉan tupte in joꞌnoꞌ muꞌ Juansiꞌ soꞌmeꞌ in mọꞌ nanas, mọꞌ qui jiꞌjiyeyaquiꞌ tseꞌ mọꞌ.

12Chat qui atsij in Juantyiꞌ jịꞌchiyactyiꞌ muꞌ cạbite aꞌ in, rudyuꞌjepte in chat qui ĉọcte in muꞌ Jesús jéte in junꞌ chuc muꞌ Juanvun.

Jesús jiꞌsäcsacsi ĉanamꞌ mir muntyiꞌ in

(Mar 6:30-44; Luc 9:10-17; Juan 6:1-14)

13Aty chị́quiyaꞌ muꞌ Jesús junꞌ chuc muꞌ Juan, yirity quimꞌ muꞌ jọban covambacheꞌ cäjyasĉan jac jịjcaij. Chị́qui muꞌin muntyiꞌ in paiꞌ bäꞌyedyeꞌĉantyiꞌ in sacti in, baquits tyeij majmicheꞌ in cäc̣häꞌchute in, tashi muꞌin venjoij in. 14Aty p̂aiꞌjoijyaꞌ muꞌ Jesús covambachety anic shach cạvacsi muntyiꞌ in. Anic ñịbeꞌ ĉọcsi mọꞌdyes qui jiꞌchäcacseban japacjoijtyiꞌ in. 15Aty shocamyejoiꞌ ĉọcte in jịꞌchiyactyiꞌ muꞌ, jéte in:

—A tyuꞌ u yómoꞌyejojaꞌ tsun, cäjyaꞌ tyuꞌ u úyaꞌ tsun. Jéyacseva uts muntyiꞌ in paj qui bäꞌyedyeꞌĉan jịjcaij in paj qui yaꞌiyequi mọꞌĉan säcsedyeꞌ in.

16Jesús jéyacsi:

—Jam jemoñeꞌ muꞌĉan jịjcaij in, miꞌindye raꞌ jiꞌsäcsacsi.

17Vorjete in:

—Itŝiꞌ toꞌ o méquis tsunsiꞌ säcsedyeꞌ, meꞌdye ĉanamꞌ mọmoꞌ pan muꞌyaꞌ tsun judyeyaꞌ päräꞌ miquiꞌmunsiꞌ tạbedyeꞌ tsun.

18Jesús jéyacsi:

—Ọ́yaꞌ tuvac yụ́yaꞌ.

19Chat qui muꞌ jéyacsi shachtyity muntyiꞌ in paj qui bäꞌyi biruruccheꞌ in. Aty meꞌsiꞌ q̂uinꞌdyemꞌ muꞌ tapjete ĉanamꞌtyity pan judyeyaꞌ päräꞌsis tạbedyeꞌ in. Chat qui mạyedyeꞌcheꞌ cạvi yoshoropaij jéte Jenꞌ. Chat qui q̂uemiꞌvete pan soꞌmacsi jịꞌchiyactyiꞌ muꞌ, muꞌin qui jiꞌcheteyacsi muntyiꞌ in. 20Räjdye muꞌin säcsi in c̣hụcmun yuꞌti in jam yirity jayej in. Chat qui muꞌin jịꞌchiyactyiꞌ muꞌ tsimjanꞌ in mọꞌ jiꞌshucdyidyeꞌ muꞌin, yiriꞌtac päräꞌ jiyiꞌ ụ́buꞌ, meꞌquiꞌ jubanꞌ jiꞌshucdyidyeꞌ muꞌin. 21Anic muꞌin shachtyity säcsi in, ĉanamꞌ mir rụiꞌcuꞌ in yedyety sonꞌ in, mọꞌin qui namꞌ p̂en in jam tsic mọꞌin in mijam miquity in.

Jesús fajcheꞌ tyeij ojñiꞌ miꞌi

(Mar 6:45-52; Juan 6:16-21)

22Chat qui muꞌ Jesús jéyacsi jịꞌchiyactyiꞌ muꞌ paj qui muꞌin tashi nopej jịjcaij in covambacheꞌ in, Jesús na tacyaꞌ chum jutacseban muntyiꞌ in. 23Aty tas jéyacsi muꞌ, chat yirity qui mụcuꞌyaꞌ jịjcaij muꞌ, muꞌcheꞌ cọdaqui Jenꞌcheꞌ. Taccheꞌdye yómoij yirity muꞌ Jesús. 24Muꞌ na covamba aty moch tyiti. Anic därsiꞌ vacamꞌquedyeꞌ chidac játubun covamba, fertyiꞌ tyiꞌmu rébete. 25Aty nạijjoquiꞌve ĉụiꞌdye muꞌ atsij Jesús fajcheꞌ tyeij ojñiꞌ miꞌi. 26Jịꞌĉojtuyeĉunꞌte in jịꞌchiyactyiꞌ muꞌ, anic tyumꞌ tyeij ĉojtyiꞌ muꞌin, shavyi in, yi in:

—¡Onojnodyeꞌ o!

27Meꞌĉandye Jesús vorjeyacsi:

—Sóñiꞌyi raꞌ miꞌin, yụ́dye nashuꞌ, jam raꞌ noiꞌyi miꞌin.

28Chat qui muꞌ Pedro p̂eyete jéte:

—Jịꞌchiyacsity, mídye mọmoꞌ jụijyaꞌ, fayitiꞌ yụ paj qui yụ ĉọcye, yụ raꞌ chimeꞌ fajcheꞌ tyeij ojñiꞌ miꞌi.

29Jesús vorjajiti:

—Atsiva yụ́yaꞌ.

Chat qui muꞌ Pedro p̂aiꞌjoij covambachety fajcheꞌ tyeij ojñiꞌ miꞌi, Jesúsyaꞌ tsanꞌ jịjcaij. 30Aty cạveteyaꞌ fer fujqui tyiꞌmu, noiꞌyi muꞌ Pedro meꞌĉandye pepechjoij. Yi:

—¡Jịꞌchiyacsity, jiꞌc̣hondyiꞌ!

31Chat qui muꞌ Jesús tapjajibuti un muꞌ, jajiti:

—Damꞌ mọmoꞌ anicyi mi ¿junꞌ caꞌ meꞌ yocve dyijyi mi?

32Aty pärenꞌdye p̂aiꞌjobanyaꞌ covambacheꞌ in, meꞌĉandye dyäqui muꞌ tyiꞌmu. 33Jịꞌchiyactyiꞌ muꞌ aty meꞌ cạveteyaꞌ in meꞌĉandye covambacheꞌ dyụtsyi in Jesúsyaꞌ, jéte in:

—Mi nash anic Jenꞌtyiꞌ Ạvaꞌ mi.

Jesús jiꞌchäcacseban Genesaretĉantyiꞌ areꞌreijtyiꞌ in.

(Mar 6:53-56)

34Nopej venjoij in Genesaretyaꞌ sojquiti in. 35Chị́yeĉunꞌte in muꞌ Jesús muꞌin muntyiꞌ in. Aty chị́quiyaꞌ in muꞌyaꞌ muꞌ Jesús, chat qui muꞌin paiꞌ bäꞌyity muntyiꞌ in tuyete Jesús in muꞌin japacjoijtyiꞌ muntyiꞌ in. 36Cọdyetyete in yi in: "Tupuj buty tocoꞌbiyac ĉaptacdyeꞌve quịꞌsiꞌ mi." Yósiꞌdyemꞌ muꞌin u in tocoꞌjeptety quịꞌsiꞌ in meꞌsiꞌdye chäĉän in.

Currently Selected:

Mateos 14: CAS

Highlight

Copy