Mateos 13
13
Jịꞌĉocdyes p̂eyacdyeꞌ jeñej buꞌyi muꞌ cätity muntyiꞌ
(Mar 4:1-9; Luc 8:4-8)
1Mọꞌdye mạyedyeꞌ muꞌ Jesús shupqui acaꞌĉan, sinve tsiqueꞌ jịjcaij muꞌ, muꞌve p̂utsquenꞌyi bäꞌyi. 2Anic shach muntyiꞌ ĉọshte in muꞌ Jesús, chat qui covambacheꞌ jịjcaij, muꞌcheꞌ qui p̂utsquenꞌyi muꞌcheꞌ buꞌyi qui, muntyiꞌ na taccheꞌ jámancheꞌ in. 3Muꞌcheꞌ buꞌyi tiyacchuti jịꞌchiyacsi muꞌ yụꞌtyeyacsi jịꞌĉocdyes p̂eyacdyeꞌ, meꞌ buꞌyi jịꞌchiyacsi. Yi muꞌ:
—Yirity muntyiꞌ quịjodyeꞌĉan jịjcaij, cätiyequi. 4Aty facajnaquiyaꞌ muꞌ, pạrej majmiĉan tŝọiꞌ vej in, mọꞌyaꞌdye jaijtyiꞌ sacyiꞌ in mọꞌ vej jebeiꞌ in. 5Pạrej na mijcheꞌ tŝọiꞌ vej in jam tyes muꞌsiꞌ jac, cavin mọꞌcheꞌ chịbiꞌ tsanꞌ ĉaĉaij na jam tyes mọꞌ mijches jac. 6Fibimꞌ meꞌ chịbiꞌ, a na areꞌyiyaꞌ muꞌ tsun, q̂uinꞌdyemꞌ sacñenꞌ tyeiꞌ mọꞌ cätidyeꞌ, ĉaĉaij na jam mochĉan ribin yiꞌ. 7Pạrej däräsyaꞌ ribin tŝọiꞌ, mọꞌtumdye chịbiꞌ däräꞌtum, mọꞌ qui jabustiꞌ, jam junꞌ p̂añiꞌ. 8Pạrej na jämꞌyaꞌ jac tŝọiꞌ, mọꞌyaꞌ jämꞌ p̂añiꞌ, jämꞌ mọꞌ väshiꞌ cätidyeꞌ, yiris vej quịcsiꞌ cien mọs vej jubanꞌ, pạrej na jäbän quiꞌtac vej jubanꞌ, judyeyaꞌ pạrej chibin quiꞌtac vej jubanꞌ. 9Tyi chuc chuntumtyiꞌ in paj jämꞌ seꞌvaqui in ọij p̂eyacdyeꞌ —yi jéyacsi Jesús.
Junꞌ buty yụꞌtyeyacsi jịꞌĉocdyes p̂eyacdyeꞌ muꞌ
(Mar 4:10-12; Luc 8:9-10)
10Jịꞌchiyactyiꞌ Jesústyiꞌ muꞌ ĉọcte in jéte in:
—¿Junꞌ buty jịꞌĉocdyes mọmoꞌ p̂eyacdyeꞌ yụꞌtyeyacsi mi?
11Jesús vorjeyacsi:
—Miꞌin mọmoꞌ soꞌminac Jenꞌ paj qui chị́yeptinte caminsis dyijyedyeꞌ muꞌ, junꞌ chuc ayoꞌbuꞌyedyeꞌ muꞌsiꞌ. Muꞌin na yoctyiꞌ muntyiꞌ in jam meꞌ soꞌmac muꞌin in paj qui chị́yepte dyijyedyeꞌ in. 12Tyi chuc chiquepte dyijyedyeꞌ jụijyaꞌ muꞌ, muꞌin raꞌ soꞌmac in paj qui dadamꞌ mujuꞌchaꞌ chị́yepte in, jam raꞌ jayej muꞌindyes in. Muꞌin na jam mạꞌjeꞌ chiqueptety in, Jenꞌ raꞌ jäctyetacseban mọꞌ damꞌ meꞌchuiꞌsiꞌ in. 13Mọꞌdyes yụ jịꞌĉocdyestumsiꞌ p̂eyacdyeꞌ jịꞌchiyacsi muntyiꞌ q̂uinꞌ in, meꞌ raꞌ shupqui in: meꞌ tsanꞌ cạvi in, jam qui namꞌ naijti in, meꞌ tsanꞌ seꞌvaqui in, jam qui namꞌ chicacsi in jätäjyiꞌ chuc mọꞌ. 14Anicdye meꞌ muꞌindyes cạ̈tsiꞌ in Isaíassiꞌ sánacdyeꞌ, yiꞌ:
"Meꞌ tsanꞌ yejĉoij seꞌvaqui miꞌin,
jam qui na ramꞌ chicacsi miꞌin,
meꞌ tsanꞌ yejĉoij cạvi miꞌin,
jam qui namꞌ naijti miꞌin,
15ĉaĉaij na anic yäjquebanꞌ dyijyedyeꞌ muꞌin,
judyeyaꞌ tyucjeꞌ chun in,
judyeyaꞌ quibanꞌjeꞌ vej muꞌin.
Jam meꞌ jụijyaꞌ muꞌin in,
a vuty tupuj naijti u in,
tupuj seꞌvaqui in judyeyaꞌ tupuj chicacsi in,
paj qui caꞌñibun yụ́yaꞌ in paj qui yụ jiꞌc̣honacsi", yiꞌ sánacdyeꞌ.
16Jesús jéyaqui jịꞌchiyactyiꞌ muꞌ:
—Miꞌin na q̂uinꞌ anic där maꞌjoij miꞌin, miꞌin chat anic naijtity miꞌin, judyeyaꞌ chicacsity miꞌin. 17Yụ anic jéyac, anic daiꞌ rụijtyity muntyiꞌ jiquej in judyeyaꞌ jasoꞌmitity p̂eyacdyeꞌ Jenꞌ jiquej in, muꞌin fer tsanꞌ mạꞌjeꞌ cạveꞌ in jedyeꞌ chuc cạvetiñes miꞌin q̂uinꞌ, jam qui namꞌ junꞌ cạveꞌ jiquej in, judyeyaꞌ chimeꞌ muꞌin fer tsanꞌ mạꞌjeꞌ seꞌveꞌ in mọꞌ seꞌvetiñes q̂uinꞌ miꞌin, jam qui namꞌ junꞌ seꞌveꞌ jiquej in —jéyacsi Jesús.
Jesús jịꞌchiqueyacsi p̂eyacdyeꞌ p̂eijte muꞌ cätity muntyiꞌ
(Mar 4:13-20; Luc 8:11-15)
18Jesús jéyacsi:
—Seꞌvitiĉamꞌ yụ, yụ raꞌ jéyac jedyeꞌ buty cạiꞌ mọꞌ p̂eyacdyeꞌ p̂eijte cätity muntyiꞌ. 19Muꞌin seꞌveꞌtyiꞌ in p̂eyacdyeꞌ yiꞌsiꞌ junꞌ chuc ayoꞌbuꞌyi Jenꞌ, jam qui namꞌ chicacsi in, muꞌin jeñej buꞌyi in majmiĉan tŝọiꞌsiꞌ vej, mọꞌyaꞌdye mọꞌ shupquiꞌ Sọyoꞌ jäctyetacsiꞌ p̂eyacdyeꞌ ĉojtyiꞌĉansiꞌ muꞌin. 20Vej mijcheꞌ tŝọiꞌsiꞌ mọꞌ cạiꞌ jeñej buꞌyiꞌ seꞌvety p̂eyacdyeꞌ in, anic tiĉuñety in mọꞌ p̂eyacdyeꞌ. 21Mijam qui namꞌ ĉojtyiꞌĉan jiꞌsiteꞌ in, jeñej buꞌyiꞌ itŝis ribin, meꞌ buꞌyiꞌ mọꞌ p̂eyacdyeꞌ, damꞌtuqui mọmoꞌ cäc̣häꞌchuiꞌ in. A na ñịbedyes jịꞌĉojtyeꞌyaꞌ in judyeyaꞌ jịꞌñibeꞌcac in p̂eyacdyedyes, chat qui farajjeꞌ in jiꞌcaꞌñibun in. 22Vej däräsyaꞌ ribin tŝọiꞌsiꞌ, mọꞌ jeñej buꞌyiꞌ seꞌvety tsanꞌ p̂eyacdyeꞌ in. Meꞌ tsanꞌ meꞌ, muꞌin qui namꞌ yejĉoij dyijtuqui in ĉụiꞌsiꞌ dyijyedyeꞌ jacches muꞌin judyeyaꞌ anic fer mạꞌjete querec̣ha in, mọꞌdyes jam p̂añiꞌ mọꞌ p̂eyacdyeꞌ ĉojtyiꞌĉan muꞌin, mijam Jenꞌdyes bäꞌyi in. 23Mọꞌ na jämꞌyaꞌ jac tŝọiꞌsiꞌ vej, mọꞌ jeñej buꞌyiꞌ seꞌvety p̂eyacdyeꞌ in, judyeyaꞌ chiqueꞌ in, meꞌdyes qui Jenꞌdyes bäꞌyi in, jeñej jämꞌsiꞌ väsh, meꞌ muꞌin in, pạrej yiris vej quịcsiꞌ, cien mọs vej jubanꞌ mọꞌ, judyeyaꞌ pạrej jäbän quiꞌtac vej jubanꞌ mọꞌ, judyeyaꞌ pạrej chibin quiꞌtac vej jubanꞌ mọꞌ, meꞌ meꞌ raꞌ carijtaqui Jenꞌdyes in.
Jịꞌĉocdyes p̂eyacdyeꞌ aꞌc̣his däräꞌ trivoĉan p̂añis
24Jesús jéyacsi yocsiꞌ jịꞌĉocdyes p̂eyacdyeꞌ, yi:
—Meꞌ buꞌyiꞌ ayoꞌbuꞌyedyeꞌ Jenꞌsiꞌ muꞌ, jeñej buꞌyiꞌ cätidyeꞌ in. Jeñej yirity muntyiꞌ cäti quịjodyeꞌĉan muꞌ, yedyej jämꞌsiꞌ trivos vej quịpte. 25Yirisĉan tsedyedyeꞌ aty räj ĉọshiyaꞌ muntyiꞌ in, atsij muꞌ jafaquitity muntyiꞌ quị́te aꞌc̣his däräꞌ trivoĉan muꞌ. 26Mọꞌ qui aꞌc̣his däräꞌ trivotum chịbiꞌ, muꞌtumdye p̂añiꞌ yiriꞌyaꞌ. Aty toptiꞌyaꞌ, q̂uinꞌdyem chị́yac mọꞌ aꞌc̣his däräꞌ. 27Chat qui úñity muꞌ atsij in jéte in: "Yoj nac yedyej jämꞌsiꞌ vej quịꞌ mi. ¿Junꞌ qui ĉaĉaij meꞌ aꞌc̣histum däräꞌ chịbiꞌ o?" 28Muꞌ qui vorjeyacsi: "Jeñej an fáquintyiꞌ muꞌyaꞌ yụ in." Úñity jéte in: "¿Tupuj buty tsun c̣hojyacseban mọꞌ aꞌc̣his däräꞌ in?" 29Vorjeyacsi muꞌ: "Jam raꞌ meꞌ miꞌin, areꞌĉa trivomun c̣hoijyi." 30Paj mọꞌyaꞌ chum mọꞌ aꞌc̣his däräꞌ, jäquiꞌvedye raꞌ c̣hoijyiꞌ aty vädacyaꞌ trivo. Yụ raꞌ jéyacsi vädaquity in paj mọꞌ chum tashcheꞌ c̣hoijjanꞌ in judyeyaꞌ c̣họcocoꞌ yụꞌtyeꞌ in paj qui jiꞌcoꞌshayeꞌ in. Chat qui raꞌ q̂uinꞌdyemꞌ vächbubun trivo yụ in, judyeyaꞌ jämꞌ yụꞌte in vädacdyedyesĉan acaꞌ yụ", yi jéyacsi muꞌ muntyiꞌ.
Jịꞌĉocdyes p̂eyacdyeꞌ miquis vej mostazas
(Mar 4:30-32; Luc 13:18-19)
31Yocsiꞌ jịꞌĉocdyes p̂eyacdyeꞌ jéyacsi Jesús, yi:
—Meꞌ buꞌyiꞌ nash ayoꞌbuꞌyedyeꞌ Jenꞌsiꞌ muꞌ, jeñej buꞌyiꞌ yirity muntyiꞌ quịjodyeꞌĉan muꞌ quịꞌtyiꞌ miquis vej mostazas. 32Vej mostazas anic miquis mọꞌ jam jeñej yocsiꞌ in, a qui namꞌ däryejoiꞌ jụijyaꞌ mọꞌ anic mọjoꞌchaꞌ därsiꞌ shupquiꞌ jeñej därsiꞌ son, mọꞌsiꞌcheꞌ dacaꞌ daiꞌ tịꞌiꞌ jaijtyiꞌ in.
Jịꞌĉocdyes p̂eyacdyeꞌ jiꞌdujraquis pan
(Luc 13:20-21)
33Jesús jéyacsi yocsiꞌ jịꞌĉocdyes p̂eyacdyeꞌ, yi:
—Meꞌ buꞌyiꞌ nash ayoꞌbuꞌyedyeꞌ Jenꞌsiꞌ muꞌ, jeñej buꞌyiꞌ mọꞌ jiꞌdujraquis pan. Yiris p̂en jämꞌteyaꞌ pan, jäcte jaꞌsha, cafonte jiꞌdujraquistum, meꞌ tsanꞌ daiꞌ jaꞌsha tas qui namꞌ sajquenꞌjete mọꞌ, jiꞌdujrete mọꞌ jiꞌdujraquis.
Jedyedyes buty jịꞌĉocdyes p̂eyacdyeꞌ in
(Mar 4:33-34)
34Jesús jịꞌchiyacsi ọij p̂eyacdyeꞌ joꞌmestum jịꞌĉocdyestum p̂eyacdyeꞌ jam yoc buꞌyi jịꞌchiyacsi. 35Meꞌ jéyacsi muꞌ paj qui cạ̈tsiꞌ muꞌsiꞌ p̂eyacdyeꞌ jasoꞌmititysiꞌ Jenꞌ jiquej, yiꞌ sánacdyeꞌ:
Yụ raꞌ yụꞌtyeyacsi jịꞌĉocdyes p̂eyacdyeꞌ jịꞌchiyacsiyaꞌ yụ,
yụ raꞌ jịꞌchiqueyacsi urucyas jiꞌchäyitidyeꞌ jam chị́yes jiquej in,
mọꞌ tạꞌcas caminve jiquej yoquiꞌdyemꞌ jämꞌtacyaꞌ ọij jac jiquej o.
Jesús jịꞌchiqueyacsi p̂eyacdyeꞌ mọꞌ aꞌc̣his däräꞌ
36Jesús farajjeyacsetaqui muntyiꞌ in, acaꞌyaꞌ jịjcaban sisan. Ĉọcte in jịꞌchiyactyiꞌ muꞌ jéte in:
—Jítiĉamꞌ ¿jedyeꞌ buty cạiꞌ mọꞌ p̂eyacdyeꞌ aꞌc̣his däräꞌ?
37Jesús vorjeyacsi:
—Muꞌ cätity yedyej jämꞌsiꞌ vej, jeñej buꞌyi yụ Anictyity Muntyiꞌ yụ. 38Mọꞌ quịjodyeꞌ yóĉandyemꞌ cäti u, mọꞌ jeñej buꞌyiꞌ ọij jac q̂uinꞌ. Mọꞌ jämꞌsiꞌ vej mọꞌ jeñej buꞌyiꞌ ayotutety Jenꞌ in, mọꞌ na aꞌc̣his däräꞌ jeñej buꞌyiꞌ Sọyoty in. 39Muꞌ fạ́quetety muntyiꞌ jeñej buꞌyi Sọyoꞌ. Vädacdyeꞌ jeñej buꞌyiꞌ raꞌ jäquiꞌve tupudyeꞌ Jenꞌsiꞌ muꞌ, judyeyaꞌ muꞌin vädaquity in jeñej buꞌyi anjer in. 40Yojdyemꞌ mọꞌ jäcac aꞌc̣his däräꞌ o judyeyaꞌ jiꞌcoꞌshayac, meꞌjeyacdye raꞌ chimeꞌ muntyiꞌ in aty ayijyaꞌ tupudyeꞌ jäquiꞌve. 41Yụ Anictyity Muntyiꞌ, yụ raꞌ jutacsi yụ́tyiꞌ anjer in paj qui pạrej yụꞌtacsi ac̣hiꞌyity in judyeyaꞌ muꞌin jiꞌjuchayacsity in. Muꞌinĉantyiꞌdye raꞌ jäcacsi ayotuntyiꞌĉan yụ in. 42Chat qui raꞌ muꞌĉan vaꞌcac in yóĉandyemꞌ yenamquevaꞌjoiꞌsiꞌĉan tŝij o, muꞌĉan raꞌ querechjeyaqui modyin in judyeyaꞌ raꞌ tári in. 43Chat qui raꞌ muꞌin rụijtyity Jenꞌyaꞌ in anic raꞌ maꞌjotac in, muꞌin raꞌ chuñem mạij buꞌyi in ayoꞌbuꞌyedyeꞌĉan Jenꞌsiꞌ muꞌ. Tyi chuc chuntumtyiꞌ in jämꞌ seꞌvaĉamꞌ ọij p̂eyacdyeꞌ.
Jịꞌĉocdyes p̂eyacdyeꞌ anic yaꞌiꞌsiꞌ jedyeꞌ jijmuꞌsacsiꞌ
44Meꞌ buꞌyiꞌ ayoꞌbuꞌyedyeꞌ Jenꞌsiꞌ muꞌ jeñej yirity muntyiꞌ dạqueꞌtyiꞌ yiris yaꞌiꞌsiꞌ jedyeꞌ jijmuꞌsacsiꞌ quịjodyeꞌĉan. Dạqueꞌ muꞌ quivij busjebanꞌ. Maꞌjodyeꞌtum jọban, räj jiꞌmincaqui ĉụiꞌsiꞌ jedyeꞌ muꞌ paj qui tupujtyeꞌ mọꞌ quịjodyeꞌ yaꞌij, chat qui caꞌñibun yaꞌiyeban mọꞌ quịjodyeꞌ.
Jịꞌĉocdyes p̂eyacdyeꞌ muꞌ yaꞌijtyiꞌ mij perla
45Chimeꞌ buꞌyiꞌdye ayoꞌbuꞌyedyeꞌ Jenꞌsiꞌ muꞌ jeñej yirity muntyiꞌ quevaqui mạꞌjeꞌ yaꞌij mujuꞌchaꞌ jämꞌtyiꞌ mij, perla tịj muꞌ. 46Dạcte dadamꞌ mujuꞌchaꞌ jämꞌtyiꞌ mij perla jụijyaꞌ muꞌ, chat qui räj jiꞌmincaqui ĉụiꞌsiꞌ jedyeꞌ muꞌ, tupujte qui yaꞌij muꞌ mujuꞌchaty mij perla.
Jịꞌĉocdyes p̂eyacdyeꞌ sạjiꞌ
47Chimeꞌ buꞌyiꞌdye ayoꞌbuꞌyedyeꞌ Jenꞌsiꞌ muꞌ jeñej buꞌyiꞌ sạjiꞌ. Tạbity muntyiꞌ in vaꞌcajquiqui ojñiꞌĉan sạjiꞌ muꞌin. Chat mọꞌ sạjiꞌ jäcacsiꞌ yịjyi tạbedyeꞌ in. 48Aty bäniꞌyaꞌ mọꞌ sạjiꞌ chat qui chanamꞌcheꞌ cạiꞌ in, chat qui muntyiꞌ in pạrej yụꞌtacsi tạbedyeꞌ in. Jụꞌñiñis chuc jäjämunsiꞌ in mọꞌin ụ́buꞌĉan yụꞌtac in, mọꞌin na jam jämꞌsiꞌ in vaꞌcac jubanꞌ in. 49Meꞌ buꞌyiꞌ raꞌ chimeꞌ aty ayijyaꞌ tupudyeꞌ jäquiꞌve. Muꞌin raꞌ anjer in pạrej yụꞌtacsi muntyiꞌ in, rụijtyityĉantyiꞌ in, muꞌĉantyiꞌ raꞌ jäcacsi in, 50chat qui raꞌ vaꞌcac in yenamquevaꞌjoiꞌsiꞌĉan tŝij in, yóĉandyemꞌ raꞌ querechjeyaqui modyin u in judyeyaꞌ raꞌ tári in.
Yaꞌiꞌsiꞌ jedyeꞌ mụiꞌmunsiꞌ in judyeyaꞌ urucyaꞌmunsiꞌ in
51Jesús jéyacsi jịꞌchiyactyiꞌ muꞌ:
—¿Chicacsi tyuꞌ u miꞌin ọij p̂eyacdyeꞌ q̂uinꞌ jedyeꞌ buty cạiꞌ mọꞌ? —yi jéyacsi.
Vorjete in:
—Chiqueꞌ u tsun, Jịꞌchiyacsity —yi in.
52Jesús jéyacsi:
—Muꞌin jịꞌchiyacsity yụꞌtacdyeꞌ jiquej in aty jụjjety jụijyaꞌ in mọꞌ jiꞌchäyitidyeꞌ Jenꞌsiꞌ muꞌ p̂eijbite ayoꞌbuꞌyedyeꞌ muꞌ, muꞌin meꞌtyity in tupuj jịꞌchiyacsi in urucyas p̂eyacdyeꞌ Jenꞌsiꞌ muꞌ, judyeyaꞌ chimeꞌ mụiꞌsis in. Muꞌin jeñej buꞌyi yirity acaꞌĉantyiꞌ muntyiꞌ, jịꞌĉoqui urucyas jedyeꞌ muꞌ judyeyaꞌ mụiꞌsis muꞌ.
Nazaretĉantyiꞌ in jam jụjyi Jesúscheꞌ in
(Mar 6:1-6; Luc 4:16-30)
53Jesús aty ijaijyaꞌ jéyacsi jịꞌĉocdyes p̂eyacdyeꞌ muꞌ, chat qui jọban muꞌ 54caꞌñibun ĉụiꞌsituban bäꞌyedyeꞌ muꞌ. Jịꞌchiyacsi muꞌ vajmuꞌyadyeꞌĉan judíos muꞌin. Seꞌveptety p̂eyacdyeꞌ in, anic äjyi in, yi in:
—¿Junasiꞌ buty därsiꞌ dyijyedyeꞌ dạqueꞌ uts? ¿Junasiꞌ buty dạqueꞌ ferdyeꞌ jịꞌcaveꞌ? 55¿Jam adac uts muꞌtyiꞌ ạvaꞌ muꞌ carijtyety son? ¿Jam buty ọij tseꞌ Maríamꞌ? Judyeyaꞌ úyaꞌ vojity muꞌ chimeꞌ uts Santiago, judyeyaꞌ José, judyeyaꞌ Simón judyeyaꞌ Judas. 56Chimeꞌdye ọ́yaꞌ vojiꞌ muꞌ, ¿junꞌ buty meꞌ q̂uinꞌ uts Jesús?
57Mọꞌdyes fạ́quete in. Mọꞌdyes Jesús yi jéyacsi:
—Paiꞌ junaꞌ ĉụiꞌ jụjyi muꞌcheꞌ in jasoꞌmititycheꞌ p̂eyacdyeꞌ Jenꞌ in, muꞌin na ĉụiꞌtyiꞌ chätidyeꞌ muꞌ judyeyaꞌ ĉụiꞌsiꞌĉantyiꞌ bäꞌyedyeꞌ in, muꞌin mọmoꞌ jam jụjyi muꞌcheꞌ in.
58Mọꞌdyes muꞌyaꞌ muꞌ Jesús jam daiꞌ quiꞌ jịꞌcaveyacsi ferdyeꞌ muꞌ ĉaĉaij na jam junꞌ anicjete in.
Currently Selected:
Mateos 13: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
