Mateos 12

Shorjete trivo in jịꞌjutyitidyesĉan mạyedyeꞌ

(Mar 2:23-28; Luc 6:1-5)

1Jịꞌjutyitidyes mạyedyeꞌ muꞌ Jesús jịꞌchiyactyiꞌtum muꞌ miꞌi in, cätidyeꞌĉan trivo muꞌĉan tyeij in. Dáqui in jịꞌchiyactyiꞌ muꞌ, shorjepte in trivos väsh muꞌ judyeyaꞌ jebepte in. 2Muꞌin fariseo in aty cạvacsiyaꞌ in chat qui jéte in muꞌ Jesús:

—¿Junꞌ dash meꞌ in jịꞌchiyactyiꞌ mi? Muꞌin jam ạ̈räjjeꞌ in mọꞌ jịꞌjutyitidyes mạyedyeꞌ, carijtaqui mọmoꞌ in.

3Jesús vorjeyacsi:

—¿Jam adac p̂eyetiñeꞌ miꞌin sánacdyeꞌ p̂eijtes muꞌ David jiquej, yoquiꞌdyemꞌ dáquiyaꞌ jiquej u in penꞌdyeꞌtum muꞌ? 4Siti penꞌdyeꞌtum muꞌ Jenꞌsiꞌĉan acaꞌ muꞌ, jebete muꞌ pan yụꞌtactyiꞌ Jenꞌyaꞌ. Yiꞌ yụꞌtacdyeꞌ uts pan cudyititydyety mọmoꞌ Jenꞌcheꞌ in, muꞌin mọmoꞌ tupuj jebete in, yiꞌ, mijam yoctyidyety in. 5Chimeꞌdye ¿jam adac p̂eyeptinte Jenꞌsiꞌ yụꞌtacdyeꞌ muꞌ? Mọꞌ yiꞌ junꞌ chuc cudyitity Jenꞌcheꞌ in muꞌindye mọmoꞌ jam ạ̈räjjeꞌ in mọꞌ jịꞌjutyitidyes mạyedyeꞌ. Meꞌ tsanꞌ mọꞌ mạyedyeꞌ jịꞌjutyitidyes, muꞌin carijtaqui in Jenꞌsiꞌĉan acaꞌ muꞌ. Meꞌ tsanꞌ meꞌ, jam qui namꞌ juchaj shupquiꞌ mọꞌ. 6Yụ jéyac, aty q̂uinꞌ tuiꞌ yụ yocsiꞌ yụꞌtacdyeꞌ, mọꞌ mọjoꞌchas, ọyaꞌyaꞌ Jenꞌsiꞌ acaꞌ muꞌ. 7Yiꞌ sánacdyeꞌ: "Yụ mujuꞌchaꞌ mạꞌjeꞌ paj qui ñịbeꞌ ĉọcsi miꞌin, uyaꞌyaꞌ mọꞌ mạꞌjeꞌ yụ mọꞌ jiꞌcoꞌshayacdyeꞌ yụ́dyes", yiꞌ. Chị́yetiñeꞌ jụijyaꞌ miꞌin jedyeꞌ buty cạiꞌ ọij sánacdyeꞌ, a vuty jam jiꞌmeꞌtacsi u miꞌin muꞌin itŝity juchaj in. 8Yụ Anictyity Muntyiꞌ yụ, bächäiꞌtyiꞌ yụ ọij jịꞌjutyitidyes mạyedyeꞌ.

Muntyiꞌ putyuijtyiꞌ un

(Mar 3:1-6; Luc 6:6-11)

9Jesús muꞌve jịjcaij vajmuꞌyadyeꞌĉan muꞌin muꞌĉan sitacsi. 10Muꞌĉan chimeꞌdye yirity muntyiꞌ putyuijtyiꞌ un. Pạrej muꞌyaꞌ muntyiꞌ in mạꞌjeꞌ dạcbite juchaj Jesússiꞌ in, paj qui tupuj jiꞌmeꞌte ayoꞌyaꞌ in. Mọꞌdyes jéte in:

—¿Tupuj buty jịꞌjutyitidyesĉan mạyedyeꞌ jiꞌchäĉacseban mi, jätäjyiꞌ buty yụꞌtacdyeꞌ tsunsiꞌ?

11Jesús vorjeyacsi:

—Jeshaꞌ yiris oveca miꞌin jọꞌchaiꞌ jụijyaꞌ toꞌĉan jịꞌjutyitidyesĉan mạyedyeꞌ ¿jätäjyi buty miꞌin? ¿Jam buty jäĉajtiñeꞌ miꞌin, meꞌ tsanꞌ jịꞌjutyitidyes mạyedyeꞌ? 12Dadamꞌ muꞌin muntyiꞌ in mujuꞌchaꞌ otejjeyac in, ọyaꞌyaꞌ oveca in. Mọꞌdyes jorojĉanyiꞌ mọꞌ yụꞌtacdyeꞌ tsun yiꞌ tupuj jịꞌjutyitidyesĉan mạyedyeꞌ nọ́tacsejaꞌ muntyiꞌ in.

13Chat qui muꞌ Jesús jajiti muꞌ putyuijtyiꞌ muntyiꞌ:

—Chụiꞌjebadaꞌ un mi.

Meꞌdye qui muꞌ chụiꞌjeyeĉan un muꞌ, meꞌĉandye jämꞌjobanꞌ un muꞌ, yojdyemꞌ yocves umꞌ, meꞌ shubanꞌ muꞌ. 14Fariseo shuban in tiyacchuiꞌ dyijyi in junꞌ buꞌyi chuc raꞌ jiꞌijate in muꞌ Jesús.

Jesús tsimꞌtactyiꞌ Jenꞌtyiꞌ muꞌ

15Jesús chị́qui p̂eyacdyeꞌ ijate raꞌ in, mọꞌdyes qui yocve jịjcaij muꞌ. Anic shach cäc̣häꞌchute muntyiꞌ in. Räj jiꞌchäcacseban japacjoijtyiꞌ in, 16judyeyaꞌ fercheꞌ jéyacsi paj qui jam jịꞌchiqueyacsi yoctyiꞌ in. 17Ọij meꞌ jiyiꞌ paj qui jịꞌcätsepte Jenꞌsiꞌ p̂eyacdyeꞌ muꞌ, jasoꞌmitis Isaías jiquej. Yiꞌ sánacdyeꞌ:

18"Mush tyuꞌ uts úñity yụ, muꞌ nash tsimꞌtactyiꞌ yụ anic mạꞌjete yụ judyeyaꞌ maꞌjotyete chimeꞌ yụ.

Yụ raꞌ juteꞌ Ạꞌedyeꞌ yụ, paj qui mọꞌ játŝutyiti.

Chat qui raꞌ muꞌ jịꞌchiqueyacsi yụ́siꞌ dyijyedyeꞌ muntyiꞌ in,

paiꞌ jaccheꞌ bäꞌyity in, jéyacsi raꞌ muꞌ.

19Muꞌ raꞌ jam chuti p̂eyacdyeꞌyaꞌ,

mijam raꞌ sac jaꞌyacsi muntyiꞌ in mijam raꞌ muꞌ äjnaqui cayeyaꞌ.

20Muꞌ raꞌ jam jiꞌpente muꞌ peñiyejoijtyiꞌ,

mijam raꞌ jịvaꞌchate muꞌ itŝity ferdyeꞌ.

Muꞌ raꞌ yejĉoij jịꞌchiqueyacsi junꞌ quiꞌ chuc muntyiꞌ chiquepte in Jenꞌsiꞌ yụꞌtacdyeꞌ muꞌ.

21Paiꞌ raꞌ jaccheꞌ bäꞌyity in ĉúti raꞌ muꞌcheꞌ in."

Ñäñitidyeꞌ muꞌin, "Sọyoꞌ soꞌmete ferdyeꞌ", yi in

(Mar 3:20-30; Luc 11:14-23; 12:10)

22Aty meꞌsiꞌ tuyete in yirity jepepej muntyiꞌ tofety muꞌ, ĉaĉaij na sọyoꞌtumtyiꞌ. Jesús jiꞌchäĉajte muꞌ muntyiꞌ, aty naijbun muꞌ judyeyaꞌ p̂eyaĉan chimeꞌ. 23Anic där äjjepte in Jesússiꞌ ferdyeꞌ muꞌ.

—¿Jam buty Davidtyiꞌ vóshiꞌ muꞌ, muꞌ bisjaty tsun? —yi in.

24Muꞌin na fariseo aty seꞌvacsebiyaꞌ p̂eyacdyeꞌ muntyis in, yi in:

—Muꞌdye Beelzebú sọyoty ayoꞌ mọꞌin,#12:24 Satanás jiquej jéte in: Beelzebú, jéte in. muꞌdye mọmoꞌ jasoꞌmiti Jesús ferdyeꞌ paj qui tupuj meijjetyetacsi sọyoꞌ in.

25Jesús chị́yacsebi dyijyedyeꞌ muꞌin, jéyacsi:

—Jeshaꞌ bäꞌyedyeꞌĉantyiꞌ chuti ayoꞌtum jụijyaꞌ muꞌin, mijam raꞌ men meꞌ buꞌyiꞌ mọꞌ bäꞌyedyeꞌ. Chimeꞌdye vaj chätidyeꞌ jụijyaꞌ in vaj meij chuvaꞌtidyeij jụijyaꞌ in, cavin raꞌ mọtsi in. 26Meꞌdye raꞌ chimeꞌ, Satanás vaj meij chutidyeiꞌ sọyoꞌ in, jam raꞌ men meꞌ buꞌyiꞌ ayoꞌbuꞌyedyeꞌ muꞌ Satanás, cavin raꞌ mọtsimꞌ. 27Anic cäj p̂iijtiĉaꞌ yụ miꞌin, yi miꞌin: "Uts Jesús Beelzebúsiꞌyaꞌ ferdyeꞌ meijjetyetacsi sọyoꞌ", yi miꞌin. Anic vaꞌve yi miꞌin, ĉaĉaij na mọꞌ Sọyoꞌ jam tupuj meijjetyetacseban sọyoꞌ. Chimeꞌdye chịj muꞌin ĉụiꞌtyiꞌ chätidyeꞌ miꞌin jam Satanássiꞌyaꞌ ferdyemꞌ meijjetyetacsi sọyoꞌ in, muꞌindye chịj in anic cäj cạtiñeꞌ dyijyedyeꞌ miꞌin. 28Jenꞌsiꞌ Ạꞌedyeꞌ muꞌ mọꞌ soꞌmin ferdyedyes yụ paj qui meijjetyetacseban yụ sọyoꞌ in. Ọij jiꞌĉuyinac miꞌin Jenꞌ aty ayoꞌbuꞌyi miꞌindyes.

29Jeshaꞌ, jam tyi tupuj sisbite acaꞌ ferdyeꞌtumtyis muntyiꞌ paj qui shiꞌatute jedyeꞌ muꞌ. Jemoñeꞌ tashcheꞌ chum saptac muꞌ ferdyeꞌtumtyiꞌ muntyiꞌ, chat q̂uinꞌdyemꞌ tupuj räj cạpte acaꞌĉansiꞌ jedyeꞌ muꞌ. Meꞌdye yụ chimeꞌ aty jiꞌpente yụ Satanás, tupuj qui yụ meijjetyetacsi sọyoꞌ muꞌin.

30Tyi chuc jam ñútyintyiꞌ yụ in, muꞌin fáquin yụ in, judyeyaꞌ tyi chuc jam ñútyintyiꞌ yụ in ĉujcabuntyiꞌ oveca yụ in, muꞌin cavꞌcacsity mọmoꞌ in.

31Mọꞌdyes yụ jéyac, Jenꞌ tupuj vayacjeyacsebi jụꞌñis ĉụiꞌ juchaj muntyis muꞌin, judyeyaꞌ jụꞌñis ĉụiꞌ ñäñitidyeꞌ muꞌin, muꞌin na ac̣hiꞌ p̂eijbitety in Jenꞌsiꞌ Ạꞌedyeꞌ muꞌ, muꞌin meꞌtyity in, Jenꞌ raꞌ jam tupuj vayacjetyetacsi juchaj muꞌin. 32Tyi chuc ac̣hiꞌ p̂iyin yụ in yụ Anictyity Muntyiꞌ, Jenꞌ tupuj vayacjeyacsebi juchaj muꞌin, muꞌin na ac̣hiꞌ p̂eijbitety in Jenꞌsiꞌ Ạꞌedyeꞌ muꞌ, Jenꞌ raꞌ jam tupuj vayacjetyetacsi mijam raꞌ q̂uinꞌ mijam raꞌ jụꞌñisĉan mạyedyeꞌ vayacjetyetacsi mọꞌ juchaj muꞌin.

Mọꞌ cätidyeꞌ chị́yac ĉụiꞌsiꞌcheꞌ väsh mọꞌ

(Luc 6:43-45)

33Jeshaꞌ, tsạꞌsiꞌ jụijyaꞌ mọꞌ cätidyeꞌ, anic jämꞌ väshiꞌ, shínaꞌjoiꞌsiꞌ na jụijyaꞌ mọꞌ cätidyeꞌ, jam jämꞌ väshiꞌ, ĉaĉaij na mọꞌ cätidyeꞌ chị́yac ĉụiꞌsiꞌcheꞌ väsh mọꞌ. 34¡Miꞌin jeñej nas! Jam junꞌ rụij p̂eyaqui miꞌin ĉaĉaij na anic ac̣hiꞌyacñity miꞌin. Jụꞌñis chuc meꞌchutiñeꞌ ĉojtyiꞌĉan miꞌin, mọꞌdyemꞌ jiꞌshuptiñeꞌ p̂eyacdyeꞌ miꞌin. 35Rụijtyity muntyiꞌ rụijsisdyeꞌ p̂eyacdyeꞌ jiꞌshupqueꞌ, ĉaĉaij na rụijsis meꞌchuiꞌ ĉojtyiꞌĉan muꞌ. Muꞌ na ac̣hiꞌyity muntyiꞌ aꞌc̣hisdye p̂eyacdyeꞌ jiꞌshupqueꞌ, ĉaĉaij na aꞌc̣his meꞌchuiꞌ ĉojtyiꞌĉan muꞌ. 36Yụ nash jéyac, aty ayijyaꞌ tupudyeꞌ Jenꞌ jịꞌcäts yụꞌtacsiyaꞌ raꞌ juchadyeꞌyaꞌ muntyiꞌ in, muꞌ raꞌ cäts yirity jịjcaij cọdyetacsi p̂eyacdyeꞌ muꞌin, jätäjyi chuc jiquej in fibisyaꞌ p̂eyacdyeꞌ muꞌin. 37Räj p̂eyacdyeꞌ miꞌin jiquej meꞌ meꞌ raꞌ cudyityibunac Jenꞌ, mọꞌ raꞌ p̂eyacdyeꞌ miꞌin jiꞌmeꞌtyinac, mọꞌ raꞌ jiꞌĉubunac areꞌ mọꞌyaꞌ juchaj miꞌin, areꞌ itŝiꞌ.

Fariseo cọdyetyete in jịꞌcaveyeyacsi ferdyeꞌ muꞌ

(Mar 8:12; Luc 11:29-32)

38Chat qui pạrej muꞌin jịꞌchiyacsity yụꞌtacdyeꞌ in judyeyaꞌ muꞌin fariseo in muꞌin p̂eyaqui in jéte Jesús in:

—Mi Jịꞌchiyacsity, tsun mạꞌjeꞌ cạvebiyac ferdyeꞌ mi.

39Jesús vorjeyacsi:

—Anic ac̣hiꞌyity q̂uinꞌtyity miꞌin, anic yacchutintety Jenꞌ. Meꞌ tsanꞌ cudyityitiĉaꞌ ferdyeꞌ miꞌin, jam qui na ramꞌ junꞌ meꞌ jịꞌcaveyeyac. Aty yiriꞌ quimꞌ jịꞌcaveyeyac ferdyeꞌ yụ, junꞌ chuc jiꞌcaviti Jonás jiquej, meꞌdye yụ chimeꞌ. 40Jonás jiquej chibin mạyedyeꞌ meꞌ buꞌyi tạbedyesĉan voꞌco, meꞌdye raꞌ yụ chimeꞌ Anictyity Muntyiꞌ yụ, chibin raꞌ mạyedyeꞌ jacĉan meꞌ buꞌyi yụ. 41Aty ayijyaꞌ tupudyeꞌ Jenꞌ jịꞌcäts yụꞌtacsi raꞌ juchadyeꞌyaꞌ muntyiꞌ in, muꞌin raꞌ Níniveĉantyiꞌ jiquej in muꞌin raꞌ sacyi atsij in, jiꞌjäcbunac raꞌ miꞌinsiꞌ juchaj miꞌin, ĉaĉaij na muꞌin aty seꞌvebitety in Jonássiꞌ voroꞌyedyeꞌ jiquej muꞌ, muꞌin dyijyi juchajcheꞌ in. Q̂uinꞌ na meꞌ tsanꞌ yụ́siꞌ p̂eyacdyeꞌ anic mọjoꞌchas, ọyaꞌyas jiquej Jonássiꞌ, miꞌin qui namꞌ jam damꞌ seꞌvibutiĉaꞌ yụs p̂eyacdyeꞌ miꞌin. 42Chimeꞌdye mọꞌ ayoꞌ jätisve bäꞌyis, aty ayijyaꞌ tupudyeꞌ Jenꞌ jịꞌcäts yụꞌtacsi raꞌ juchadyes muntyiꞌ in, mọꞌ raꞌ ayoꞌ sacyiꞌ jiꞌjäcbunac raꞌ juchaj miꞌin, ĉaĉaij na moch dyụ́tsedyeꞌve jijtuiꞌ mọꞌ paj qui seꞌvepte rụijsis jiꞌchäyitidyeꞌ Salomónsiꞌ jiquej. Q̂uinꞌ na meꞌ tsanꞌ yụ́siꞌ p̂eyacdyeꞌ anic mọjoꞌchas, ọyaꞌyas Salomónsiꞌ jiquej muꞌ, miꞌin qui namꞌ jam junꞌ seꞌvibutiĉaꞌ yụs p̂eyacdyeꞌ miꞌin.

Sọyoꞌ caꞌñibunꞌ

(Luc 11:24-26)

43Yiris sọyoꞌ meijyebanꞌ muntyiꞌĉansiꞌ jụijyaꞌ, jọbanꞌ chañesve jac tyebanꞌ, quevaquiꞌ junaꞌ chuc mạꞌjeꞌ bäꞌyiꞌ tsanꞌ. Jam na dạcaqui janaꞌ jụijyaꞌ dyijyiꞌ yiꞌ: 44"Damꞌdye jämꞌ acatubanꞌ yụ, yóĉansiꞌdyemꞌ shupquiꞌ jiquej ọij." Anicdye meꞌ, caꞌñibunꞌ mọꞌ dạquishajte muntyiꞌ jeñej buꞌyity acaꞌ, jeñej jämꞌ coyacsiꞌ jämꞌ yụꞌtacsiꞌ, meꞌ buꞌyi dạquishajte. 45Mọꞌdyes qui mọꞌ sọyoꞌ quevacseĉanꞌ yocsiꞌ sọyoꞌ in, yävätidyeꞌ in, anic mọꞌin mọjoꞌchas aꞌc̣his in, mọꞌĉandye mọꞌin sitiꞌ muntyiꞌĉan in. Chat qui jäquiꞌve dadamꞌ qui mujuꞌchaꞌ ñịbeꞌ cạveꞌ muꞌ muntyiꞌ, jam jeñej tashcheꞌ jiquej, yirisdyemꞌ sọyoꞌ jameꞌchuti jiquej. Meꞌdye raꞌ chimeꞌ q̂uinꞌtyity muntyiꞌ in där raꞌ ñịbeꞌ cạveꞌ in.

Jesússiꞌ tseꞌ muꞌ judyeyaꞌ vojity muꞌ

(Mar 3:31-35; Luc 8:19-21)

46Jesús p̂eyacvaꞌjoij muntyiꞌtum muꞌ, ĉụiꞌdye shupquetiꞌ tseꞌ muꞌ, judyeyaꞌ vojity muꞌ. Muꞌin jorojyaꞌ dyäqui in cọdaqui in mạꞌjeꞌ p̂eyaqui Jesústum in. 47Yirity muntyiꞌ jéte Jesús:

—Mosh tyuꞌ jorojyaꞌ tseꞌ mi judyeyaꞌ chimeꞌ vojity mi, muꞌin nash mạꞌjeꞌ p̂eyaqui mítum in.

48Jesús vorjete:

—¿Mọꞌyaꞌ adac ĉaĉaij tseꞌ yụ? ¿Muꞌyaꞌ adac ĉaĉaij vojity yụ in?

49Meꞌĉandye c̣họcoꞌjeyacsi jịꞌchiyactyiꞌ muꞌ, yi muꞌ:

—Uts q̂uinꞌ jịꞌchiyactyiꞌ yụ muꞌin nash tseꞌtucsi yụ judyeyaꞌ vojitytucsi yụ. 50Tyi chuc chiqueꞌ in junꞌ chuc mạꞌjeꞌ Jenꞌ yụ, muꞌ mạyedyeꞌchety, muꞌindye vojitytucsi yụ, judyeyaꞌ tseꞌtucsi yụ.

Currently Selected:

Mateos 12: CAS

Highlight

Copy