Mateos 15

Yicdyeꞌ muꞌin urucyaꞌmuntyis in

(Mar 7:1-23)

1Pạrej Jerusalénĉantyiꞌ fariseo in judyeyaꞌ jịꞌchiyacsity Jenꞌsiꞌ yụꞌtacdyeꞌ in atsij in ĉọshte Jesús in. Jéte in:

2—¿Junꞌ caꞌ jịꞌchiyactyiꞌ mi muyetyejcaiꞌ in mọꞌ jiꞌchäyitidyeꞌ soꞌmisinꞌsiꞌ tsun vóshiꞌvun tsun jiquej? Ĉaĉaij na aty raꞌ säcsi muꞌin in, jam junꞌ cäc̣häꞌchubusinꞌ yicdyeꞌ tsun favtiyaꞌ unyaꞌ in.

3Jesús vorjeyacsi:

—Miꞌin na ¿junꞌ caꞌ muyetyecaptinte Jenꞌsiꞌ yụꞌtacdyeꞌ muꞌ, ĉụiꞌsimꞌ yicdyeꞌ meꞌchuqui miꞌin? 4Muꞌdye Jenꞌ yi: "Jämꞌjeyaqui raꞌ ĉụiꞌtyiꞌ jenꞌ miꞌin judyeyaꞌ tseꞌ miꞌin."#15:4 Exodo 20:12 Yi muꞌ chimeꞌ: "Tyi chuc mistaqui ĉụiꞌtyiꞌ jenꞌ muꞌ judyeyaꞌ tseꞌ muꞌ, muꞌ raꞌ sänꞌdyeꞌ soꞌmac", yi muꞌ Jenꞌ. 5-6Ĉụiꞌsimꞌ jiꞌchäyitidyeꞌ yiꞌ miꞌin: "Yirity muntyiꞌ meꞌ buꞌyi yi jụijyaꞌ: "Räj ĉụiꞌsiꞌ jedyeꞌ yụ aty soꞌmete yụ muꞌ Jenꞌ." Tyi chuc meꞌ yụꞌtyety p̂eyacdyeꞌ jụijyaꞌ in, meꞌ tsanꞌ meꞌchuiꞌtyiꞌ jedyeꞌ in, aty qui namꞌ jam jemoñeꞌ nọ́taqui ĉụiꞌtyiꞌ jenꞌ muꞌ judyeyaꞌ tseꞌ muꞌ, meꞌ tsanꞌ muꞌin jayejjotaqui in, meꞌ buꞌyi yi miꞌin. Meꞌ nash miꞌin muyetyejcaptinte Jenꞌsiꞌ jiꞌchäyitidyeꞌ muꞌ, ĉụiꞌsimꞌ jiꞌchäyitidyeꞌ cạqui miꞌin. 7Anic miꞌin ac̣hiꞌ dyijyity, jämꞌ yuꞌti tsanꞌ miꞌin. Anic rụij p̂iijnac jiquej miꞌin Isaíassiꞌ sánacdyeꞌ muꞌ, yiꞌ:

8Yi muꞌ Jenꞌ: "Útsi muntyiꞌ q̂uinꞌ in p̂eyacdyeꞌyamꞌ irijyi yụ́cheꞌ in,

ĉojtyiꞌ qui namꞌ muꞌin jam úyaꞌ, jam irijyi yụ́cheꞌ in.

9Fibimꞌ timaꞌquin yụ in ĉaĉaij na muntyis yicdyeꞌ jịꞌchiyacsi jeñej aty yụs yụꞌtadyeꞌ ĉọiꞌ u in, yiꞌ sánacdyeꞌ.

Ac̣hiꞌtacsis muntyiꞌ

10Jesús qui fayacsi muntyiꞌ jéyacsi:

—Jämꞌ raꞌ seꞌvibutiĉaꞌ miꞌin ọij p̂eyacdyeꞌ yụ paj qui chicacsi miꞌin. 11Jedyeꞌ chuc jebeiꞌ yirity muntyiꞌ, jam mọꞌ junꞌ jaꞌac̣hiꞌti. Mọꞌ jiꞌshupqueꞌsiꞌ chụꞌĉan, mọꞌ chat jaꞌac̣hiꞌti.

12Jịꞌchiyactyiꞌ muꞌ muꞌin ĉọcte in muꞌ Jesús, jéte in:

—¿Jam buty chịj mi muꞌin fariseo in jam maꞌjotyibun p̂eyacdyeꞌ in?

13Vorjeyacsi muꞌ Jesús:

—Jeshaꞌ, mọꞌin cätidyeꞌ in jam quịcsis jụijyaꞌ Jenꞌ yụ mạyedyeꞌchety, räj raꞌ mọꞌin c̣hoijjeyac in. 14Paj muꞌyaꞌ muꞌin fariseo in. Muꞌin nash jeñej buꞌyi yirity tofety muntyiꞌ muꞌ tapchute yoctyiꞌ tofety muntyiꞌ, jiꞌmiꞌiti tsanꞌ in, vaj meꞌ toꞌĉan tŝọij jọꞌchaij in.

15Pedro jéte Jesús:

—¿Jedyeꞌ buty cạiꞌ mọꞌ p̂eyacdyeꞌ jaꞌac̣hiꞌtis muntyiꞌ in?

16Jesús vorjeyacsi:

—¿Tacaꞌ adac itŝiꞌ dyijyedyeꞌ miꞌin chimeꞌ? 17¿Jam adac chịj miꞌin, jedyeꞌ chuc jebeiꞌ yirity muntyiꞌ voꞌcoĉan mọmoꞌ jịꞌtŝoiꞌ, aty meꞌsiꞌ chat qui jiꞌshupjanꞌ? 18Mọꞌ na aꞌc̣his dyijyedyeꞌ jiꞌshupqueꞌsiꞌ chụꞌĉan muꞌin, mọꞌĉandye shupquiꞌ ĉojtyiꞌĉan muꞌin, mọꞌ mọmoꞌ jaꞌac̣hiꞌti muntyiꞌ in, 19ĉaĉaij na ĉojtyiꞌĉan muꞌin mọꞌĉansiꞌ shupquiꞌ aꞌc̣his dyijyedyeꞌ muꞌin, ijatidyeꞌ muꞌin judyeyaꞌ voꞌvodyeꞌ muꞌin judyeyaꞌ shapudyeꞌ muꞌin, judyeyaꞌ shuꞌadyeꞌ muꞌin judyeyaꞌ väñädyeꞌ muꞌin, judyeyaꞌ ñäñitidyeꞌ muꞌin chimeꞌ. 20Joꞌmesyaꞌ nash ĉụiꞌ ac̣hiꞌti muntyiꞌ in. Meꞌ tsanꞌ jam rụij favti unyaꞌ in, jam qui namꞌ junꞌ jaꞌac̣hiꞌti in.

Yiris p̂en jam judío anicjetes Jesús

(Mar 7:24-30)

21Jesús yocsiꞌve jịjcaij jac, yóvedyemꞌ bäꞌyedyeꞌ Tiro o judyeyaꞌ Sidón. 22Ayij yiris p̂en, vóshiꞌ muꞌin Canaánĉantyis jiquej in, ĉọshte mọꞌ Jesús jéte:

—Jịꞌchiyacsity, Davidtyiꞌ vóshiꞌ muꞌ, ñịbeꞌjitiꞌ. Ạvaꞌ yụ sọyoꞌtumsiꞌ, anic där ñịbeꞌ cạveꞌ mọꞌ.

23Jesús na c̣huꞌc̣huij jam vorjeꞌ. Jịꞌchiyactyiꞌ muꞌ ĉọcte in fercheꞌ jéte in:

—Jéva ọij p̂en paj jọbanꞌ, aty tsun shọijtyeꞌ anic shọijquejchuiꞌ jäquiꞌ.

24Chat qui yi muꞌ Jesús q̂uinꞌdyemꞌ jeꞌ:

—Jenꞌ jutin yụ paj qui muꞌin mọmoꞌ nọ́tacseti yụ Israeltyiꞌ vóshiꞌ in, muꞌin jeñej buꞌyity moñis oveca in, muꞌin mọmoꞌ voroꞌtacseti yụ.

25Mọꞌ p̂en ĉọcte Jesús, muꞌsiꞌyaꞌ vej dyụtsyiꞌ, jéte:

—Jịꞌchiyacsity, ñútyitiꞌ.

26Jesús vorjeꞌ:

—Jam yụ junꞌ rụij ĉọiꞌ chutyeyac säcsedyeꞌ ạvaꞌ in, chat qui soꞌmac ac̣huj in.#15:26 Yi judío in: "Tsun Israeltyiꞌ vóshiꞌ in tsun jeñej buꞌjaꞌ ạvaꞌ tsun, muꞌin qui na jam judío in jeñejjeyacsi ac̣huj in", yi in.

27Mọꞌ p̂en vorjete:

—Anic meꞌ, Jịꞌchiyacsity, meꞌ tsanꞌ meꞌ, ac̣huj qui namꞌ tsimjanꞌ in mọꞌ jebeiꞌ in q̂uemiꞌmiiꞌsiꞌ mesaches jọꞌchaiꞌsiꞌ.#15:27 P̂eyacdyeꞌyaꞌ mọꞌ p̂en jịꞌĉoyete anicyedyeꞌ mọꞌ.

28Jesús vorjeꞌ:

—Mi p̂en, anic fer anicjitim, junꞌ chuc cudyityitim, meꞌ raꞌ cạ̈tsiꞌ.

Yédyeꞌĉan mọmoꞌ chäĉänꞌ ạvaꞌ mọꞌ.

Jesús daiꞌ jiꞌchäĉacseban muntyiꞌ in

29Jesús Mar Galileave jịjcaij muꞌ, penꞌ tyeij mọꞌ mar. Chat qui mụcuꞌyaꞌ jịjcaij bojvi, muꞌcheꞌ p̂utsquenꞌyi bäꞌyi. 30Anic shach atsij muntyiꞌ in ĉọshte Jesús in, tuyete in areꞌreijtyiꞌ muntyiꞌ in, bureijtyiꞌ in, judyeyaꞌ tofety in, judyeyaꞌ jepepej in, judyeyaꞌ väiꞌväiꞌyity in, meꞌ meꞌ japacjodyeꞌ muꞌin. Jesússiꞌyaꞌ vej muꞌ yụꞌtacsi in, chat qui muꞌ jiꞌchäcacseban räj in. 31Anic äjyi muntyiꞌ in cạvepteyaꞌ ferdyeꞌ in, jepepejtyity jiquej in p̂eyaĉan in, judyeyaꞌ bureijtyiꞌ jiquej in chapjoban in meꞌĉandye miꞌeban in, judyeyaꞌ väiꞌväiꞌyity jiquej in chäĉän in, judyeyaꞌ tofety jiquej in naijbun in, mọꞌdyes qui muntyiꞌ in timaꞌquete Jenꞌ in, muꞌintyiꞌ Jenꞌ in Israeltyiꞌ vóshiꞌ in.

Jesús jiꞌsäcsacsi vạjpedyeꞌ mir muntyiꞌ in

(Mar 8:1-10)

32Jesús fayaqui jịꞌchiyactyiꞌ muꞌ, jéyacsi:

—Anic ñịbeꞌ ĉọcsi yụ uts muntyiꞌ q̂uinꞌ in, ĉaĉaij na aty chibin mạyedyeꞌ penꞌdyetun úyaꞌ yụ in aty itŝiꞌ säcsedyeꞌ muꞌin. Jam yụ mạꞌjeꞌ memꞌ jutacseban yịñijcheꞌ in jam säcsi in, vatyquej raꞌ yamjoban majmiyaꞌ in.

33Jịꞌchiyactyiꞌ muꞌ jéte in:

—¿Junaꞌ buty raꞌ dạcjaꞌ säcsedyeꞌ shachtyitydyes muntyiꞌ in, ĉaĉaij na úyaꞌ cäjyaꞌ tsun?

34Vorjeyacsi Jesús:

—¿Juñucsiꞌ caꞌ pan muꞌyaꞌ miꞌin?

Vorjete in:

—Yävätidyeꞌ pan muꞌyaꞌ, chimeꞌdye tạbedyeꞌ mọꞌyaꞌ juñucsiꞌ.

35Chat qui muꞌ Jesús jéyacsi muntyiꞌ in paj qui bäꞌyi mụijyaꞌ in. 36Chat qui muꞌ tapjete yävätidyeꞌtyity pan judyeyaꞌ tạbedyeꞌ in chimeꞌ, yoshoropaij jéte Jenꞌ. Muꞌ qui q̂uemiꞌvete pan, soꞌmacsi jịꞌchiyactyiꞌ muꞌ, muꞌin qui jiꞌcheteyacsi muntyiꞌ in. 37Räjdye muꞌin säcsi in c̣hụcmun yuꞌti in. Jịꞌchiyactyiꞌ muꞌ tsimjanꞌ in jiꞌshucdyidyeꞌ muꞌin, yävätidyeꞌ ụ́buꞌ därtyiꞌ, meꞌsiꞌĉan jubanꞌ. 38Anic shachtyity muntyiꞌ säcsi in, vạjpedyeꞌ mir rụiꞌcuꞌ in yedyety sonꞌ in, mọꞌin qui na p̂en in jam tsic in, mijam miquity in. 39Chat qui q̂uinꞌdyemꞌ Jesús jutacseban muntyiꞌ in. Covambacheꞌ muꞌ jịjcaij, yocsiꞌve bäꞌyedyeꞌ jịjcaij muꞌ Magadánve jịjcaij.

Currently Selected:

Mateos 15: CAS

Highlight

Copy