Juan 17

Jesús cọdyete Jenꞌ jịꞌchiyactyidyes muꞌ

1Jesús aty meꞌsiꞌ ijaij jéyacsi chat qui cạvi mạyedyeꞌcheꞌ yi:

—Yụ́tyiꞌ Jenꞌ, a toꞌ o ayij tupudyeꞌ, jorojĉanjibutiꞌ fer buꞌyedyeꞌ yụ Ạvaꞌ mi, paj qui chimeꞌ yụ jorojĉanjepye fer buꞌyedyeꞌ mi. 2Mi yuꞌtim paj qui yụ ayoꞌbuꞌyi räjtumdyes muntyiꞌ in, paj qui yụ yụꞌtacsi paj qui míyaꞌ bäꞌyi in räj muꞌin in soꞌmitity mi. 3Tyi chuc mi chäyintyiꞌ in judyeyaꞌ yụ chimeꞌ chäyin yụ in, muꞌin raꞌ míyaꞌ bäꞌyi in, meꞌdye mimꞌ yirity Anictyity Jenꞌ, judyeyaꞌ yụ Jesucristo jutactyiꞌ mi.

4Yụ aty jorojĉanjebiye fer buꞌyedyeꞌ mi muꞌinsiꞌyaꞌ vej in muꞌin jacchety muntyiꞌ in ĉaĉaij na aty meꞌquiꞌ ijaij yụ mọꞌ carijtacdyeꞌ soꞌmitis jiquej mi. 5Yụ́tyiꞌ Jenꞌ, q̂uinꞌ raꞌ míyaꞌ jịjcaban yụ, soꞌmitiꞌ fer buꞌyedyes yụ yojdyemꞌ meꞌchuiꞌ jiquej u yụ mísiꞌyaꞌ vej, itŝiꞌdyemꞌ jiquej ọij jac, meꞌ buꞌyi yuꞌtiꞌ quivij.

6Yụ jịꞌchiyacsi muꞌin tsimꞌtactyiꞌ mi jacchety muntyiꞌ in. Muꞌin nash ĉụiꞌdyety mi, chat qui yuꞌtyiyitim yụ qui ĉọjcacsi, muꞌin jịꞌchiqueyacsi yụ tyi buty mi, judyeyaꞌ muꞌin chäquibun p̂eyacdyeꞌ in. 7Muꞌin tsimꞌtactyiꞌ mi chịj in räj mọꞌ meꞌchuiꞌsiꞌ yụ mọꞌ soꞌmitis mi. 8Aty yụ jiꞌjiyeyacsi mọꞌ p̂eyacdyeꞌ soꞌmitis jiquej mi, muꞌin jụjbun in. Muꞌin chịj in míyaty atsij yụ judyeyaꞌ anicjin yụ in yụ jutactyiꞌ mítyiꞌ.

9Yụ cọdaqui muꞌindyes in, jam räjtumdyes jacchedyes muntyiꞌ in cọdaqui yụ, muꞌindyes mọmoꞌ in cọdaqui yụ muꞌin soꞌmitity mi, ĉaĉaij na muꞌin mídyety in. 10Räj muꞌin in tsimꞌtactyiꞌ mi muꞌin mity in, judyeyaꞌ yụ́tyiꞌ chimeꞌ in, muꞌin jorojĉanjibun fer buꞌyedyeꞌ yụ in.

11Yụ raꞌ jam taccheꞌ úcheꞌ, míyaꞌ raꞌ jịjcaban yụ, muꞌindyety raꞌ taccheꞌ úcheꞌ in. Yụ́tyiꞌ Jenꞌ, mimꞌ yirity rụijtyity, yụ cọdyeye paj qui muꞌin ñutsjetacsi mi paj qui vaj cäts dyijyi in, yojdyemꞌ tsun u vaj cäts dyijyejaꞌ. Ñutsjetacseva ĉụiꞌsiꞌyaꞌ ferdyeꞌ mi, mọꞌ ferdyeꞌ yódyesdyemꞌ soꞌmitis jiquej u mi. 12Penꞌdyetucsidyemꞌ yụ úcheꞌ jaccheꞌ jiquej in, yụ ĉọjcacsi judyeyaꞌ ñutsjetacsi yụ mọꞌyaꞌ mísiꞌyaꞌ ferdyeꞌ mọꞌ soꞌmitis jiquej mi. Jam jiꞌmonacsi yụ, yirity mọmoꞌ muꞌinĉantyiꞌ in aty moñi muꞌ, muꞌ vaꞌtacdyety muntyiꞌ, mumꞌ yirity moñi, mọꞌyaꞌ cạ̈tsiꞌ sánacdyeꞌ.

13Q̂uinꞌ chat aty míyaꞌ jịjcaban yụ. Jambiꞌdyemꞌ yạjquibanꞌ yụ ọij jac, jäꞌmij jéyacsi yụ muꞌin tsimꞌtactyiꞌ mi ọij p̂eyacdyeꞌ paj qui maꞌjodyeꞌtum bäꞌyi in, yojdyemꞌ yụ u maꞌjodyeꞌtum bäꞌyi yụ, meꞌdye raꞌ muꞌin chimeꞌ in, cätssistum maꞌjodyeꞌ maꞌjoij in. 14Yụ jịꞌchiyacsi mísiꞌ p̂eyacdyeꞌ. Jacchety qui namꞌ muntyiꞌ in fạ́cacsi in ĉaĉaij na muꞌin in aty jam jacchedyety in, yojdyemꞌ yụ u jam jacchedyety yụ. 15Yụ jam cọdyeye paj qui jetacseshan mi, mọꞌ mọmoꞌ cọdyeye paj qui ñutsjeyacsi mi Sọyoꞌyaꞌ in, paj qui jam meꞌtacsiꞌ Sọyoꞌ. 16Yojdyemꞌ yụ u jam jacches dyijyedyeꞌ cạiꞌ yụ, meꞌdye chimeꞌ muꞌin tsimꞌtactyiꞌ mi jam jacches dyijyedyeꞌ cạiꞌ in. 17Soꞌmacseva p̂eyacdyeꞌ mi ĉojtyiꞌĉan muꞌin paj qui mídyety in, anic cätssis mọꞌ p̂eyacdyeꞌ mi jam cäjsis. 18Yojdyemꞌ mi u jutitiꞌ jiquej mi paj qui yụ atsij úcheꞌ jaccheꞌ, meꞌdye yụ chimeꞌ yụ jutacsi muꞌin in paj qui voroꞌtacsi in úcheꞌ jacchety muntyiꞌ in. 19Muꞌindyes in ĉụiꞌ yuꞌti yụ paj qui mídyety yụ, paj qui meꞌdye muꞌin chimeꞌ ĉụiꞌ yuꞌti in paj qui muꞌin mídyety chimeꞌ in.

20Jam muꞌindyes mọmoꞌ cọdaqui yụ, chimeꞌdye cọdaqui yụ jäquiꞌve raꞌ anicjintyidyes yụ in. Muꞌin raꞌ anicjin yụ in ĉaĉaij na raꞌ seꞌvacsebi p̂eyacdyeꞌ muꞌinsiꞌ in tsimꞌtactyis mi, muꞌindyes chimeꞌ cọdaqui yụ. 21Yụ́tyiꞌ Jenꞌ, yụ cọdyeye paj qui vaj cäts dyijyi in räj muꞌin in yojdyemꞌ yụ u mítum vaj cäts dyijyejaꞌ. Yụ cọdyeye paj qui meꞌdye muꞌin chimeꞌ in vaj cäts dyijyi tsuntum in, chat qui raꞌ jacchety muntyiꞌ in anicjin yụ in junꞌ chuc yụ anictyity jutactyiꞌ mi. 22Mọꞌ fer buꞌyedyeꞌ soꞌmitis jiquej yụ mi, yụ qui mọꞌ jiꞌjiyeyacsi, paj qui muꞌin vaj cäts dyijyi in yojdyemꞌ yụ u mítum vaj yirity tsun. 23Meꞌ buꞌyi yụ muꞌintum in, yojdyemꞌ mi yụ́tum u, paj qui vaj cäts dyijyi in, meꞌ raꞌ jacchety muntyiꞌ in chịj raꞌ in junꞌ chuc yụ anictyity jutactyiꞌ mítyiꞌ, judyeyaꞌ raꞌ chịj chimeꞌ in mi mạꞌjeyacsi muꞌin anicjintyiꞌ yụ in, yojdyemꞌ mi u mạꞌjitim, meꞌdye chimeꞌ muꞌin in mạꞌjeyacsi mi.

24Yụ́tyiꞌ Jenꞌ, mídye soꞌmitim muꞌin anicjintyiꞌ yụ in. Yụ mạꞌjeꞌ paj qui muꞌin penꞌdyetun yụ in yócheꞌdyemꞌ raꞌ bäꞌyi u yụ, muꞌcheꞌ raꞌ cavibun yụ in fer buꞌyedyeꞌ yụ, mọꞌ soꞌmitis jiquej mi, ĉaĉaij na mi tạꞌcaty mạꞌjitim itŝiꞌdyemꞌ ọij jac jiquej. 25Yụ́tyiꞌ Jenꞌ, mimꞌ yirity rụijtyity, jacchety na muntyiꞌ in jam chäyin in, yụ na chị́yeye judyeyaꞌ muꞌin anicyity mícheꞌ in chichäyindye in junꞌ chuc yụ jutactyiꞌ mity. 26Yụ jéyacsi muꞌin in tyi buty mi, mọꞌdye raꞌ yejĉoij jịꞌchiqueyacsi yụ paj qui yụ yejĉoij muꞌintum in judyeyaꞌ chimeꞌ muꞌin in mạꞌjeyacsity bäꞌyi in, yojdyemꞌ yụ u mạꞌjitim, meꞌdye raꞌ chimeꞌ muꞌin in mạꞌjeyacsi muntyiꞌ in —yi Jesús jéte Jenꞌ muꞌ.

Currently Selected:

Juan 17: CAS

Highlight

Copy