Juan 16

1Jesús jéyacsi:

—Ọij jäꞌmij q̂uinꞌ jéyac ọij p̂eyacdyeꞌ paj qui jam peñi miꞌin aty cạ̈tsiꞌyaꞌ p̂eyacdyeꞌ. 2Muꞌin raꞌ vaꞌquicnac in paj qui jam penꞌdyetucsive miꞌin vajmuꞌyaijĉan muꞌin in. Ayij raꞌ tupudyeꞌ meꞌ raꞌ dyijyi in, ujanac jụijyaꞌ in meꞌ raꞌ jịꞌcätsepte Jenꞌsiꞌ dyijyedyeꞌ in, meꞌ buꞌyi raꞌ dyijyi in. 3Meꞌ raꞌ meꞌtyinac in ĉaĉaij na jam damꞌ chäyin yụ in, mijam Jenꞌ yụ chäyibun chimeꞌ yụ in. 4Jäꞌmij q̂uinꞌ jéyac p̂eyacdyeꞌ paj qui chịj miꞌin judyeyaꞌ paj qui chimeꞌ dyijtubutiĉaꞌ miꞌin p̂eyacdyeꞌ yụ aty ayijyaꞌ tupudyeꞌ.

Meꞌ raꞌ nọ́taquiꞌ Jenꞌsiꞌ Ạꞌedyeꞌ muꞌ

Tashcheꞌ jiquej jambiꞌ jéyac miꞌin ọij, ĉaĉaij na yụ tacaꞌ penꞌdyetuyac miꞌin. 5Q̂uinꞌ chat raꞌ aty yạjquibadyeyac miꞌin, Jenꞌyaꞌ qui raꞌ jịjcaban yụ, muꞌ jutintyiꞌyaꞌ yụ. Miꞌin na jam méquiꞌ jítiĉaꞌ yụ miꞌin junaꞌ chuc raꞌ yụ jịjcaij. 6Q̂uinꞌ chat aty jéyac yụ junꞌ chuc raꞌ yạjquibadyeyac, mọꞌdyes qui q̂uinꞌ miꞌin där tári ĉojtyiꞌĉan miꞌin. 7Anic rụijsis ọij p̂eyacdyeꞌ yụ: Damꞌdye jämꞌ miꞌindyes atyuꞌ u raꞌ yạjquibadyeyac, mọꞌ qui raꞌ ayij Nọ́taquis Jenꞌsiꞌ Ạꞌedyeꞌ muꞌ. Jam raꞌ yạjquibadyeyac jụijyaꞌ yụ, mijam ramꞌ jedyetuiꞌ ayij. Jọban na raꞌ jụijyaꞌ yụ, yụ qui raꞌ meij mọꞌ juteꞌ Jenꞌsiꞌ Ạꞌedyeꞌ. 8A raꞌ ọ́cheꞌ buꞌyiꞌ jụijyaꞌ mọꞌ, jịꞌchiqueyacsiꞌ raꞌ muntyiꞌ in jedyeꞌ chuc mọꞌ juchaj, judyeyaꞌ tyi chuc rụijtyity, judyeyaꞌ jedyeꞌ chuc vaꞌtacdyeꞌ soꞌmac raꞌ in, meꞌ meꞌ raꞌ jịꞌchiqueyacsiꞌ mọꞌ Jenꞌsiꞌ Ạꞌedyeꞌ muꞌ. 9Muꞌin jam anicjin yụ in, mọꞌ nash juchaj muꞌin. 10Mọꞌ caꞌñitidyeꞌ Jenꞌyaꞌ yụ, mọꞌ raꞌ jịꞌchiqueyacsiꞌ anic rụijtyity yụ, meꞌquiꞌdye raꞌ cavitiĉaꞌ yụ miꞌin. 11Chimeꞌdye raꞌ jịꞌchiqueyacsiꞌ junꞌ chuc vaꞌtacdyeꞌ muntyis muꞌin, yojdyemꞌ aty vaꞌtacdyety yụꞌtac o mọꞌ Sọyoꞌ, mọꞌ ayoꞌbuꞌyis q̂uinꞌ úcheꞌ jaccheꞌ, meꞌ meꞌ raꞌ jịꞌchiqueyacsiꞌ Jenꞌsiꞌ Ạꞌedyeꞌ muꞌ.

12Daiꞌ tsanꞌ mọꞌyaꞌ jiꞌchäyitidyeꞌ Jenꞌsiꞌ muꞌ miꞌindyes, yụ mạꞌjeꞌ tsanꞌ jéyac, jambiꞌ qui na ramꞌ jämꞌ chiquetiñeꞌ miꞌin q̂uinꞌ jätäjyiꞌ chuc mọꞌ. 13A raꞌ ọ́cheꞌ jụijyaꞌ jijtuiꞌ Jenꞌsiꞌ Ạꞌedyeꞌ muꞌ, mọꞌ raꞌ rụijsis p̂eyacdyeꞌ tuiꞌsiꞌ, mọꞌ raꞌ räj jínac rụijsis p̂eyacdyeꞌ. Mọꞌ raꞌ jam jiꞌchäyinac ĉụiꞌsiꞌ dyijyedyeꞌ mọꞌ, jätäjjajitiꞌ chuc muꞌ Jenꞌ, mọꞌdye raꞌ jiꞌshupquiyinac. Mọꞌdye raꞌ jínac chimeꞌ junꞌ chuc raꞌ jábiyaꞌ. 14Chimeꞌ raꞌ mọꞌ jorojĉanjibun fer buꞌyedyeꞌ yụ, yụ́siꞌ raꞌ jiꞌchäyitidyeꞌ yụ, mọꞌ raꞌ soꞌmeꞌ yụ, mọꞌ qui raꞌ jiꞌjiyiyinac. 15Muꞌ Jenꞌ yụ räj soꞌmin yụ junꞌ junꞌ chuc muꞌ meꞌchuiꞌ p̂eyacdyeꞌ muꞌ, meꞌ meꞌ qui meꞌ yi yụ, yụ raꞌ soꞌmeꞌ Jenꞌsiꞌ Ạꞌedyeꞌ muꞌ jiꞌchäyitidyeꞌ yụ, mọꞌ qui raꞌ jiꞌchäquiyinac miꞌin.

16Damꞌdyety raꞌ cavitiĉaꞌ yụ miꞌin, chat qui raꞌ aty jam cavitiĉaꞌ yụ miꞌin, jam qui na ramꞌ men quivij cavibudyiĉaꞌ yụ miꞌin —jéyacsi Jesús.

Jiyiꞌ raꞌ táredyeꞌ muꞌin

17Pạrej jịꞌchiyactyiꞌ muꞌ, aty mọꞌ seꞌveꞌ in yi jítidyeij in:

—¿Jätäjyiꞌ buty cạiꞌ p̂eyacdyeꞌ muꞌ? Yi muꞌ: "Damꞌdyety raꞌ cavitiĉaꞌ yụ miꞌin, chat qui raꞌ aty jam cavitiĉaꞌ yụ miꞌin, jam qui na ramꞌ men quivij cavibudyiĉaꞌ yụ miꞌin", yi muꞌ jísinꞌ. Chimeꞌdye yi muꞌ: "Jenꞌyaꞌ raꞌ jịjcaban yụ", yi muꞌ jísinꞌ tsun. 18¿Jätäjyiꞌ buty cạiꞌ p̂eyacdyeꞌ muꞌ? Jam chiquebija: "damꞌdyety raꞌ", yi muꞌ. Mijam méquiꞌ chiquejaꞌ tsun jätäjyiꞌ buty mọꞌ p̂eyacdyeꞌ muꞌ —yi jítidyeij in jịꞌchiyactyiꞌ muꞌ.

19Muꞌ qui namꞌ chịj Jesús ĉojtyiꞌĉan muꞌ mạꞌjeꞌ tsanꞌ jéte in jätäjyiꞌ chuc mọꞌ p̂eyacdyeꞌ. Mọꞌdyes qui jéyacsi muꞌ:

—Yụ nash jéyac jiquej: "Damꞌdyety raꞌ cavitiĉaꞌ yụ miꞌin, chat qui raꞌ aty jam cavitiĉaꞌ yụ miꞌin, jam qui na ramꞌ men quivij cavibudyiĉaꞌ yụ miꞌin", yi yụ jiquej. ¿Ọij buty p̂eijvaꞌtiñeꞌ vaj meij jíti miꞌin jätäjyiꞌ chuc mọꞌ? 20Yụ q̂uinꞌ jéyac: där raꞌ táritiĉaꞌ yụ miꞌin dyijtuvaꞌtiĉaꞌ miꞌin, muꞌin na raꞌ jacchety muntyiꞌ in maꞌjoij raꞌ muꞌin in. Jábiyaꞌ qui na ramꞌ jiyiꞌ táredyeꞌ miꞌin, maꞌjoban qui raꞌ miꞌin. 21Jeshaꞌ yiris p̂en basdyis anic fer táriꞌ mọꞌ, ĉaĉaij na ayij tupudyeꞌ mọꞌ. A qui namꞌ basdyiꞌyaꞌ, meꞌquiꞌdye pacaj areꞌredyeꞌ jịꞌĉojtyeꞌ, aty jam mọꞌ dyijtubanꞌ, maꞌjotaquiꞌ qui muꞌ naꞌity ạvaꞌ mọꞌ. 22Meꞌdye chimeꞌ miꞌin q̂uinꞌ tári miꞌin, jábiyaꞌ raꞌ yụ cạvebadyeyac quivij, quivij raꞌ maꞌjoban ĉojtyiꞌĉan miꞌin, mọꞌ raꞌ jam räꞌis maꞌjodyeꞌ, mijam raꞌ tyi jictyinac ĉojtyiꞌĉan miꞌin.

23Aty ayijyaꞌ tupudyeꞌ jam raꞌ cudyitiĉaꞌ yụ miꞌin, muꞌ qui raꞌ Jenꞌ yụ cudyityibutiĉaꞌ miꞌin, muꞌ raꞌ jụjbunac cọdacdyeꞌ miꞌin, jedyeꞌ chuc cọdyetinteyaꞌ miꞌin yụ́siꞌcheꞌ tịj jụijyaꞌ. 24Tacaꞌdye q̂uinꞌ jambiꞌ meꞌ yụ́siꞌcheꞌ tịj cọdaqui miꞌin, q̂uinꞌ chat cọdyemac muꞌ, muꞌ raꞌ jụjbunac cọdacdyeꞌ miꞌin, chat qui raꞌ meꞌ maꞌjodyeꞌtum bäꞌyi miꞌin, mọꞌ raꞌ chat cätssis maꞌjodyeꞌ miꞌin —jéyacsi Jesús.

Jesús jiꞌpenacsi muꞌin jacches dyijyedyeꞌ cạiꞌtyiꞌ in

25Yụ q̂uinꞌ jịꞌĉocdyesyamꞌ p̂eyacdyeꞌ jịꞌchiyeyac miꞌin. A qui na ramꞌ ayijyaꞌ tupudyeꞌ aty qui raꞌ jam jịꞌĉocdyesyaꞌ p̂eyacdyeꞌ jịꞌchiyeyac, chap qui raꞌ jéyac junꞌ chuc muꞌ Jenꞌ yụ. 26Aty raꞌ meꞌsiꞌ yụ́siꞌcheꞌ qui raꞌ tịj cudyibutiĉaꞌ yụty Jenꞌ miꞌin, aty qui raꞌ yụ jam cọdyetyete miꞌindyes, 27ĉaĉaij na muꞌdye Jenꞌ mạꞌjinac miꞌin. Muꞌ nash mạꞌjinac miꞌin ĉaĉaij na yụ mạꞌjitiĉaꞌ miꞌin judyeyaꞌ anicjitiĉaꞌ yụ miꞌin junꞌ chuc yụ Jenꞌyaty atsij. 28Anicdye meꞌ, muꞌyaty atsij yụ Jenꞌyaty yụ, úcheꞌ jaccheꞌ jijtuij yụ. Q̂uinꞌ qui na ramꞌ yạjquibanꞌ ọij jac yụ, Jenꞌyaꞌ qui raꞌ jịjcaban yụ —jéyacsi Jesús.

29Chat qui yi muꞌin in jịꞌchiyactyiꞌ muꞌ vorjete in:

—Q̂uinꞌ chat anic chap jítiĉaꞌ tsun miꞌin, aty jam jịꞌĉocdyesyaꞌ p̂eyacdyeꞌ jítiĉaꞌ tsun miꞌin. 30Q̂uinꞌ chat tsun aty chị́yeyac, mi nash räj chị́yeꞌ jedyeꞌ, aty jam jemonac jéyac cọdacdyes p̂eyacdyeꞌ, mi na tạꞌcaty chịj, meꞌdyes qui meꞌ anicjeyac mi rụijdye meꞌ Jenꞌyaty atsij mi —jéte in jịꞌchiyactyiꞌ muꞌ.

31Jesús vorjeyacsi:

—¿Aty anicjibutiĉaꞌ p̂eyacdyeꞌ u miꞌin? 32Q̂uinꞌ aty ayij tupudyeꞌ, q̂uinꞌdye raꞌ paiꞌti miꞌin, ĉụiꞌsituban raꞌ acaꞌ miꞌin, farajjitacdyiĉaꞌ raꞌ yụ yiritydyety miꞌin. Muꞌ qui na ramꞌ Jenꞌ yụ jam farajjin yụ, muꞌ raꞌ räjĉan penꞌdyetun yụ 33Yụ jéyac ọij paj qui maꞌjodyeꞌtum bäꞌyi miꞌin, yụ́tum jụijyaꞌ bäꞌyi miꞌin. Úcheꞌdyemꞌ taccheꞌ jụijyaꞌ miꞌin, jịꞌñibeꞌcac raꞌ miꞌin. Meꞌ raꞌ tsanꞌ meꞌ miꞌin, sóñiꞌyedyeꞌtum bäꞌjamꞌ, ĉaĉaij na yụ aty jiꞌpenbiꞌ jacches dyijyedyeꞌ mọꞌ —jéyacsi Jesús jịꞌchiyactyiꞌ muꞌ.

Currently Selected:

Juan 16: CAS

Highlight

Copy