Juan 18
18
Tapjete Jesús in
(Mat 26:47-56; Mar 14:43-50; Luc 22:47-53)
1Jesús aty meꞌsiꞌ cọdyete Jenꞌ chat qui shupqui jịꞌchiyactyiꞌtum muꞌ, nopej jinac jịjcaij in, Cedrón tịj mọꞌ jinacsiꞌ, cätidyeꞌĉan jịjcaij muꞌve in jịꞌchiyactyiꞌtum muꞌ. 2Judas, jajiꞌmincatity Jesús, jämꞌ chị́yeꞌ muꞌ mọꞌ cätidyeꞌ ĉaĉaij na taĉantyiꞌ muꞌ Jesús vajmuꞌyaijĉan in jịꞌchiyactyiꞌtum muꞌ. 3Atsij muꞌĉan muꞌ Judas cạcsi väc̣häꞌtyity in Romaĉantyiꞌ in yirity ñuruꞌ in judyeyaꞌ muꞌin pạrej yụꞌtactyiꞌ ĉọjcaiꞌtyiꞌ in Jenꞌsiꞌ acaꞌ muꞌ, muꞌin na jutactyiꞌ muꞌin tashcheꞌ cudyitity Jenꞌcheꞌ in judyeyaꞌ fariseo in. Atsij in chutidyestum coc̣hino muꞌin judyeyaꞌ chimeꞌ mạijyis muꞌin. 4Muꞌ na Jesús ĉụiꞌ chịj räj jedyeꞌ chuc raꞌ jịꞌĉojtyeꞌ ñịbedyes muꞌ. Muꞌ jiꞌrebeĉunacsi jéyacsi:
—¿Tyi caꞌ quevtinte miꞌin?
5Vorjete muꞌin in:
—Jesús Nazaretĉantyiꞌ, muꞌ nash quevte tsun —jéte in.
Vorjeyacsi muꞌ Jesús:
—Yụ nash —jéyacsi.
Muꞌyaꞌ muꞌ chimeꞌ Judas, muꞌ jajiꞌmincatity Jesús. 6Muꞌin seꞌvepte in Jesússiꞌ p̂eyacdyeꞌ muꞌ, yi muꞌ "Yụ nash", yósiꞌdyemꞌ muꞌin u in meꞌsiꞌdye päcäꞌ miꞌeban in, meꞌtumdye päcäcäꞌ tŝọij in. 7Cuvij jéyacsi Jesús:
—¿Tyi ĉaĉaij quevtinte u?
Vorjete in:
—Jesús u Nazaretĉantyiꞌ, muꞌ u quevte tsun —jéte in.
8Vorjeyacsi Jesús:
—A bajaꞌ jéyac, yụ́dye nashuꞌ. Yụ quivdyiĉaꞌ jụijyaꞌ miꞌin, paj muꞌyaꞌ uts penꞌdyeꞌ yụ in, paj jọban muꞌin in —jéyacsi Jesús.
9Aty meꞌ yi muꞌ Jesús paj qui cạ̈tsiꞌ p̂eyacdyeꞌ muꞌ, yi muꞌ jiquej: "Yụ́tyiꞌ Jenꞌ, mijam yirity jiꞌmonacsi yụ muꞌin soꞌmitity mi", yi jiquej muꞌ. 10Muꞌ na Simón Pedro c̣havꞌ muꞌsiꞌ coc̣hino chutidyes muꞌ. Meꞌĉandye sanjeyaqui vatyquej coc̣hino, siscajcate muꞌ muntyiꞌ, jaiꞌjebite tacves chun muꞌ Malcosiꞌ, úñity muꞌ tashchety cudyitity Jenꞌcheꞌ. 11Yi jajiti Jesús muꞌ Pedro:
—C̣havꞌtaĉada coc̣hino mi, ¿jam adac chịj mi jịꞌĉojtyeꞌ nash raij mọꞌ soꞌminsiꞌ raꞌ Jenꞌ yụ? Jam raꞌ junꞌ c̣honchuiꞌ yụ —jéte Jesús.
Jiꞌmeꞌte in muꞌ Jesús Anásyaꞌ
(Mat 26:57-58; Mar 14:53-54; Luc 22:54)
12Chat qui muꞌin väc̣häꞌtyity in ayoꞌtumdye muꞌin judyeyaꞌ muꞌin yụꞌtactyiꞌ ĉọjcaiꞌtyiꞌ Jenꞌsiꞌ acaꞌ in, tapjete Jesús in judyeyaꞌ sapbite un in. 13Cạte in Anássiꞌĉan acaꞌ ishosĉan, tyúñeꞌ muꞌ Caifástyiꞌ muꞌ tashcheꞌ cudyitity Jenꞌcheꞌ mọꞌ yómodyeꞌ jiquej. Muꞌ Anás cudyitity Jenꞌcheꞌ chimeꞌ. 14Muꞌdye Caifás jéyacsity jiquej judío in: "Damꞌdye jämꞌ yirity muntyiꞌ säñi räjtumdyes muntyiꞌ tsun paj qui jam räj tsun meꞌjisinꞌ Romaĉantyiꞌ in", yi jiquej muꞌ.
Pedro ticamete Jesús
(Mat 26:69-70; Mar 14:66-68; Luc 22:55-57)
15Aty cạte in muꞌ Jesús, muꞌ Simón Pedro yoctyiꞌtum jịꞌchiyactyiꞌ Jesústyiꞌ muꞌ cäc̣häꞌchute in muꞌ Jesús. Muꞌ yoctyiꞌ jịꞌchiyactyiꞌ muꞌ, jachäyiti muꞌ tashcheꞌ cudyitity Jenꞌcheꞌ, mọꞌdyes qui jiꞌsiste in Jesústum p̂ejyaꞌ ayoꞌsiꞌyaꞌ acaꞌ muꞌ, yóĉandyemꞌ cạte u in muꞌ Jesús. 16Muꞌ na Pedro jorojyaꞌ tacyaꞌ muꞌ, jam muꞌ todocjete in. Muꞌ na yoctyiꞌ jịꞌchiyactyiꞌ muꞌ aty muꞌĉan, mọꞌ ĉọ́queꞌ ĉọjcaiꞌsiꞌ chụiꞌdyeꞌ, jeꞌ mọꞌ paj qui muꞌ siti chimeꞌ Pedro. 17Aty sitiyaꞌ muꞌ chat mọꞌ ĉọjcaiꞌsiꞌ chụiꞌdyeꞌ jéte muꞌ Pedro:
—¿Mi adac chimeꞌ jịꞌchiyactyiꞌ muꞌtyiꞌ? —jéte mọꞌ.
Vorjeꞌ muꞌ Pedro:
—Jam nash yụ —yi Pedro jeꞌ.
18Mọꞌdye tsedyedyeꞌ fer tsịvuꞌvuiꞌ, muꞌĉantyiꞌ úñity in judyeyaꞌ muꞌin yụꞌtactyiꞌ in ĉọjcaiꞌtyiꞌ in Jenꞌsiꞌ acaꞌ muꞌ, tŝiꞌi muꞌin in jufitidyes muꞌin. Cäc̣henꞌyejoij muꞌyaꞌ muꞌ Pedro, ĉaĉaij na jäti, jufiti chimeꞌ tŝijve.
Tashcheꞌ cudyitity Jenꞌcheꞌ muꞌ cọdyete p̂eyacdyeꞌ Jesús
(Mat 26:59-66; Mar 14:55-64; Luc 22:66-71)
19Muꞌ tashcheꞌ cudyitity Jenꞌcheꞌ jéte muꞌ Jesús:
—¿Tyijtyi caꞌ jịꞌchiyactyiꞌ mi? ¿Jedyeꞌ caꞌ jịꞌchiyacsi mi muntyiꞌ in? —jéte muꞌ.
20Vorjete Jesús:
—Muntyisyaꞌ vej mọmoꞌ jịꞌchiyacsi yụ muntyiꞌ in, vajmuꞌyadyeꞌĉan muntyis muꞌin, judyeyaꞌ Jenꞌsiꞌĉan acaꞌ chimeꞌ muꞌ, yóĉandyemꞌ vajmuꞌyaijĉan judío u in, muꞌĉan yụ jịꞌchiyacsi, mijam damꞌ caminve jịꞌchiyacsi yụ. 21¿Junꞌ ĉaĉaij jítiꞌ um? Jéyacseva muꞌin seꞌvibuntyiꞌ p̂eyacdyeꞌ yụ in, muꞌin raꞌ tupuj jin in mọꞌ jiꞌchäyitidyeꞌ jéyacsis yụ, muꞌin chäyibun yụ in jiꞌchäyitidyeꞌ yụ —jéte Jesús muꞌ tashcheꞌ cudyitity Jenꞌcheꞌ.
22Seꞌvepte p̂eyacdyeꞌ Jesússiꞌ muꞌ, yirity yụꞌtactyiꞌ ĉọjcaiꞌtyiꞌ Jenꞌsiꞌ acaꞌ muꞌ meꞌĉandye ĉatjete vejyaꞌ, jéte:
—¿Junꞌ dash meꞌ buꞌyim p̂eyetem uts tashcheꞌ cudyitity Jenꞌcheꞌ? —jéte.
23Jesús jéte muꞌ ĉọjcaiꞌtyiꞌ acaꞌ:
—Aꞌc̣his jụijyaꞌ p̂eyacdyeꞌ jiꞌshupqueꞌ yụ, jeshaꞌ jítiꞌ areꞌ mọꞌyaꞌ aꞌc̣his. Jam nash aꞌc̣his, ¿junꞌ ĉaĉaij meꞌjitiꞌ um ĉatjitim? —jéte Jesús.
24Chat qui muꞌ Anás jéyacsi muꞌin in paj qui Caifásyaꞌ cạte in muꞌ Jesús, yejĉoij sap buꞌyiꞌ un muꞌ. Caifás tashchety cudyitity Jenꞌcheꞌ.
Pedro cuvij ticamete Jesús
(Mat 26:71-75; Mar 14:69-72; Luc 22:58-62)
25Pedro yejĉoij muꞌ tŝijve, jufivaꞌti. Muꞌin muꞌyaty in jéte in:
—¿Mi adac chimeꞌ jịꞌchiyactyiꞌ muꞌtyimꞌ? —jéte muꞌ.
Pedro ticamete Jesús jéyacsi:
—Jam nash yụ.
26Muꞌyaꞌ chimeꞌ yirity úñity muꞌ tashchetytyiꞌ cudyitity Jenꞌcheꞌ, chätidyeꞌ muꞌ seiꞌjeptety chun Pedro. Yi chimeꞌ muꞌ jéte Pedro:
—¿Mi caꞌ chimeꞌ cätidyeꞌĉan? —jéte.
27Cuvij muꞌ Pedro ticamaqui yi: "Jam nash yụ muꞌĉan", yi. P̂eyacdyeꞌĉandye muꞌ p̂oñi ojtereꞌ.
Jesús jiꞌmeꞌte in Pilatoyaꞌ
(Mat 27:1-2,11-14; Mar 15:1-5; Luc 23:1-5)
28Pamꞌdye shupqui in Caifássiꞌĉantyiꞌ acaꞌ in, cạte in muꞌ Jesús ayosĉan acaꞌ muꞌ, muꞌ tashchety ayoꞌ Romaĉantyiꞌ. Judío in jam siti muꞌsiꞌĉan acaꞌ in, ĉaĉaij na muꞌ jam judío. Siti jụijyaꞌ in jam judíosĉan acaꞌ muꞌin, ac̣hiꞌti ĉúti in, jam qui tupuj jebeiꞌ in feshtadyes Jiꞌc̣honacdyesiꞌ in, mọꞌdyes jorojyaꞌ buꞌyi in. 29Chat qui muꞌ Pilato shupqui, jéyacsi:
—¿Jedyeꞌ caꞌ jiꞌmeꞌtacdyeꞌ utssiꞌ muntyis? —jéyacsi.
30Vorjete judío in:
—Itŝiꞌ juchaj jụijyaꞌ muꞌ, a vuty jam jiꞌmeꞌte u tsun míyaꞌ —jéte in.
31Vorjeyacsi muꞌ Pilato:
—Tạij miꞌin, cạbajmac cuvij, ĉụiꞌsiꞌyaꞌ raꞌ yụꞌtacdyeꞌ jịꞌcäts yụꞌbajtinte útsi juchadyeꞌyaꞌ muꞌ —jéyacsi Pilato.
Vorjete in:
—Tsun judío jam meꞌ yụꞌtac tsun Romaĉantyiꞌyaꞌ in paj qui sänꞌdyeꞌ soꞌmete tsun juchajtumtyiꞌ muntyiꞌ, mídye raꞌ soꞌmete sänꞌdyeꞌ.
32Meꞌ buꞌyiꞌ mọꞌ cạ̈tsiꞌ Jesússiꞌ p̂eyacdyeꞌ muꞌ, yi muꞌ junꞌ chuc raꞌ ijac muꞌ.#18:32 Meꞌ cạ̈tsiꞌ p̂eyacdyeꞌ yiꞌ: soncheꞌ raꞌ ijac muꞌ Cristo, ĉaĉaij na Romaĉantyiꞌ in croshcheꞌ jiꞌijacsi muntyiꞌ in. Judío na jam meꞌ in, muꞌin farajnacsi mijyaꞌ in, meꞌ buꞌyi muꞌin ijacsi juchajtumtyiꞌ in. 33Pilato cuvij sisan acaꞌĉan muꞌ, jiꞌvorvete muꞌ Jesús jéte:
—¿Mi caꞌ judíoty ayoꞌ muꞌin? —jéte.
34Vorjete Jesús:
—¿Ọij cudyitiꞌ mi ĉụiꞌsiꞌ dyijyedyeꞌ um, areꞌ yoctyiꞌ jin in p̂iyin yụ in?
35Vorjete Pilato:
—¿Jendaij judío u? ¿Ĉụiꞌtyiꞌdye chätidyeꞌ mi jiꞌmeꞌtyin yụ́yaꞌ in, räjtumdye tashcheꞌ cudyitity Jenꞌcheꞌ in. ¿Jedyeꞌ caꞌ juchaj mi jiꞌmeꞌtyin in? —jéte muꞌ Pilato.
36Vorjete Jesús:
—Ayoꞌbuꞌyedyeꞌ yụ jam ọ́ches, ayoꞌbuꞌyi jụijyaꞌ úcheꞌ jaccheꞌ yụ, a vuty chuti u in muꞌin cäc̣häꞌchuntyiꞌ yụ in, a vuty ñutsjityin u yụ in paj qui jam jiꞌmeꞌtyin yụ in ayoꞌyaꞌ in judíoty muꞌin. Yụ jéye jam ọ́ches jacches ayoꞌbuꞌyedyeꞌ yụ —jéte Jesús.
37Yi muꞌ Pilato jéte:
—¿Jaij meꞌ ayoꞌ mi?
Jesús vorjete:
—Meꞌ yụ yoj yidyeꞌ bu um, yụ atsij naꞌi úcheꞌ yụ, paj qui jéyacsi yụ rụijsis p̂eyacdyeꞌ. Tyi chuc mạꞌjeꞌ rụijsis p̂eyacdyeꞌ in muꞌin seꞌvin yụ in —jéte Jesús.
38Vorjete Pilato:
—¿Jụꞌñis ĉaĉaij rụijsis p̂eyacdyeꞌ o? Jeshaꞌ jítiꞌ —jéte.
Pilato yụꞌtyeyete p̂eyacdyeꞌ jiꞌijacdyes
(Mat 27:15-31; Mar 15:6-20; Luc 23:13-25)
Quivij shupqui muꞌ Pilato jéyacsi muntyiꞌ in:
—Itŝiꞌ méquiꞌ dạcbite yụ juchaj utssiꞌ muꞌ. 39Chimeꞌdye mọꞌyaꞌ yicdyeꞌ miꞌin räjĉan yómodyeꞌ chaꞌshetiñeꞌ mọꞌ feshta Jiꞌc̣honacdyedyes, yụ jiꞌc̣honte miꞌindyes yirity ĉärꞌtactyiꞌ muntyiꞌ. ¿Jụjyi tyuꞌ u miꞌin judío miꞌin paj qui yụ jiꞌc̣honbiyac uts ayoꞌ miꞌin? —jéyacsi Pilato.
40Räj äjyedyeꞌtum p̂eyaqui in yi jéte in:
—Jam raꞌ muꞌ jiꞌc̣hontem, muꞌ Barrabás muꞌ raꞌ jiꞌc̣hontem —jéte in.
Muꞌ na Barrabás ac̣hiꞌyity muntyiꞌ, fạ́cacsity ayoꞌ.
Currently Selected:
Juan 18: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
