Génesis 12
12
Jenꞌ jafaijti Abram
1Yirisĉan mạyedyeꞌ muꞌ Ayoꞌ jajiti Abram:
—Yacchuvaꞌ ọij jac mi, judyeyaꞌ chätidyeꞌ mi judyeyaꞌ jenꞌvunsiꞌ acaꞌ mi chimeꞌ, yocsiꞌve raꞌ jac jịjcaij mi, mọꞌ raꞌ jịꞌĉoyeyes. 2Yụ raꞌ jiꞌdaijbiye muꞌĉan vóshiꞌ mi, anic raꞌ fer buꞌyi in. Yụ raꞌ ñịbeꞌjeye mi, muntyiꞌ raꞌ in anic raꞌ chäyin in, mi raꞌ nọ́tacsity shupqui muꞌindyes in. 3Tyi chuc ñịbeꞌjintyiꞌ in, muꞌin raꞌ ñịbeꞌjeyacsi yụ, chimeꞌdye tyi chuc ñịbeꞌtyintyiꞌ in, muꞌin raꞌ ñịbeꞌtacsi yụ. Míyaꞌdye raꞌ, yụ raꞌ ñịbeꞌjeyacsi räj jacchety muntyiꞌ in —jajiti Jenꞌ.
4Meꞌdye qui muꞌ Abram sacti yacchuiꞌ mọꞌ jac Harán, Canaánĉan qui jịjcaij, ĉaĉaij na meꞌ jajiti muꞌ Ayoꞌ. Abram aty yävätidyeꞌ quiꞌtac ĉanamꞌ jiyiꞌ yómodyeꞌ tyiti muꞌ, chat qui sacti, yacchuiꞌ mọꞌ bäꞌyedyeꞌ, 5p̂en muꞌ, Sarai, judyeyaꞌ Lot, ataj muꞌ, judyeyaꞌ räj jedyeꞌ muꞌin, judyeyaꞌ úñity muꞌin Haránĉan yaꞌijtyiꞌ jiquej in. Roiꞌjeꞌ in Canaánĉan jịjcaij in, 6soquem muñi in Siquemve venjoij in, yóĉandyemꞌ bäꞌyi Cananeo jiquej u in. Mọꞌĉan mọꞌ son dyijtuiꞌsiꞌ muntyiꞌ in, "Moréyaꞌ" jeꞌ in. 7Muꞌyaꞌ muꞌ Ayoꞌ jiꞌcaviti Abramdyes jajiti:
—Yụ raꞌ soꞌmacsi mítyiꞌ vóshiꞌ in ọij q̂uinꞌ jac —jajiti Jenꞌ.
Chat qui muꞌ Abram jämꞌtyeꞌ jiꞌcoꞌshayacdyeꞌ Ayodyes ĉaĉaij na muꞌĉan muꞌ Jenꞌ jiꞌcaviti muꞌyaꞌ. 8Quivij sacjeꞌ muꞌ Abram, miquitycheꞌ mụcuꞌ jịjcaij in. Muꞌin mụcuꞌ in shupquive buꞌyi tsun in, mọꞌ na bäꞌyedyeꞌ Betel jịjcaijcheꞌ mọꞌ tsun. Abram cäjyaꞌ dyäqueban ovemun mọꞌin bäꞌyedyeꞌ in Betel judyeyaꞌ Hai. Mọꞌĉan chimeꞌ jämꞌtyeꞌ jiꞌcoꞌshayacdyeꞌ Ayodyes, judyeyaꞌ cọdaqui Ayoꞌcheꞌ. 9Yocve qui jịjcaij Neguevve, jäjämꞌtum miꞌi in.
Abram Egiptoĉan jịjcaij
10Chat qui chiqueꞌ dáquis in räj mọꞌ jac jayej säcsedyeꞌ. Mọꞌdyes muꞌ Abram Egiptoĉan jịjcaij, muꞌĉan qui bäꞌyi ĉaĉaij na itŝiꞌ säcsedyeꞌ ĉụiꞌsiꞌĉan bäꞌyedyeꞌ muꞌ. 11Aty raꞌ shupquequi Egiptoĉan in, Abram jäꞌmij jéyaqui p̂en muꞌ Sarai:
—Yụ cạveye mi anic jämꞌsiꞌ p̂en. 12Muꞌin raꞌ Egiptoĉantyiꞌ muntyiꞌ in cavin raꞌ jụijyaꞌ in muꞌin raꞌ ạꞌniiꞌtyis ĉun in, vátyequej raꞌ yi in: "Tupuj ijabijaꞌ vämtyiꞌ mọꞌ," yi raꞌ in, vátyequej raꞌ can in. 13Mi raꞌ jéyacsiꞌ: "Útsi Abram vojity nash yụ," yiꞌ raꞌ jéyacsim, paj qui jam jedyeij yụ junꞌjin ĉụiꞌ yụ in paj qui jämꞌjiĉuñin mọmoꞌ yụ in —jéyaqui jäꞌmij p̂en muꞌ.
14Anicdye meꞌ, aty shupquequi Egiptoĉan in, muꞌin Egiptoĉantyiꞌ muntyiꞌ in cạvepte p̂en in, anic jämꞌsiꞌ ĉọpte in. 15Chimeꞌdye muꞌin nọ́taquity Egiptoĉantyiꞌyaꞌ ayoꞌ in chịcaveꞌdye muꞌin in, judyeyaꞌ jéte ayoꞌ in: "Anic där jämꞌsiꞌ Sarai." Mọꞌdyes qui cạiꞌ in ayosĉan acaꞌ muꞌ.
16Egiptoĉantyiꞌ ayoꞌ anic jañutyiti Abram Saraidyes jeñety meꞌ vojiꞌ ĉọpte. Daiꞌ ñịbeꞌjajiti cuꞌdyeꞌ, oveca judyeyaꞌ vaca, bórico judyeyaꞌ cameyo. Chimeꞌdye muꞌ ñịbeꞌjajiti úñity in judyeyaꞌ úñis in. 17Muꞌ na Ayoꞌ jasoꞌmiti ayoꞌ fersiꞌ japacjodyeꞌ räjenꞌdye acaꞌĉantyiꞌ muntyiꞌ muꞌ, räj jiꞌmeꞌtacsiꞌ Sarai. 18Chat qui muꞌ ayoꞌ cavin jiꞌvorvete Abram jéte:
—¿Junꞌ dash meꞌ ac̣hiꞌtim? ¿Junꞌ dash jam jítim: "Ọij nash ĉụiꞌsiꞌ p̂en yụ? ¿Junꞌ caꞌ jam yim? 19¿Junꞌ dash meꞌ yi jítim: "Ĉụiꞌsiꞌ nash vojiꞌ yụ", yi jítim? Jämꞌ araj chutyeye p̂en mi. Mosh tyuꞌ ọij p̂en mi, tạij cạĉada judyeyaꞌ jọbada —jajiti ayoꞌ.
20Chat qui ayoꞌ jéyacsi úñity muꞌ paj qui jiꞌshupjajte Egiptoĉantyiꞌ in muꞌ Abram, p̂en muꞌ judyeyaꞌ räj jedyeꞌ muꞌ, yocve jịjijcayete in.
Currently Selected:
Génesis 12: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
