Génesis 13
13
Abram judyeyaꞌ Lot pạrejti in
1Meꞌdye muꞌ Abram shupĉan Egiptoĉantyiꞌ, p̂en muꞌ judyeyaꞌ räj jedyeꞌ muꞌ, chimuꞌĉan Neguevĉan jijtuban in, atajtumdye Lottum. 2Anic jedyeꞌtumtyiꞌ muꞌ Abram, oro meꞌchute judyeyaꞌ plata, judyeyaꞌ daiꞌ cuꞌdyeꞌ chimeꞌ muꞌ. 3Yejĉoij miꞌi in yạjquibanꞌ Neguev in jäjämꞌtum miꞌi in, chijämꞌ Betelĉan shupqueshan in. Chat qui mujuꞌveyaꞌ jịjcaban in yóĉandyemꞌ dyäqui jiquej u in cäjyas dyäquedyeꞌ muꞌin, ovemun mọꞌ bäꞌyedyeꞌ in Betel judyeyaꞌ Hai, 4yóĉandyemꞌ jämꞌtyeꞌ jiꞌcoꞌshayacdyeꞌ Ayodyes jiquej u, chat qui cuvij muꞌ cọdaqui Ayoꞌcheꞌ.
5Lot penꞌdyetute Abram chijedyeꞌtumtyiꞌdye muꞌ, daiꞌ meꞌchuiꞌ cuꞌdyeꞌ muꞌ, oveca in judyeyaꞌ vaca in daiꞌ, judyeyaꞌ chätidyeꞌ muꞌ judyeyaꞌ úñity chimeꞌ muꞌ. 6Anic daiꞌ cuꞌdyeꞌ shupquiꞌ muꞌin, däräꞌ jayejjoiꞌ chimeꞌ. 7Mọꞌdyes muꞌin Abramsiꞌ cuꞌdyeꞌ ĉọjcaptety in chutidyeij in Lottyiꞌtum muntyiꞌ muꞌ. Taĉantyiꞌ muntyiꞌ in muꞌĉan bäꞌyity in chimeꞌ, cananeo in judyeyaꞌ fereteo in. 8Meꞌdyes yi Abram jéte muꞌ Lot:
—Tsun nash anictyity chätidyeꞌ tsun, jam tupuj chutiĉaꞌ tsun, mijam tupuj chuti chimeꞌ in yụty úñity mítytum. 9Damꞌdye jämꞌ pạrerej jịjcajaꞌ tsun. Cạvevaꞌ jac jụꞌñis chuc mạꞌjem. Junaꞌ chuc mạꞌjeꞌ jịjcaijyam, yụ qui na ramꞌ yocve jịjcaij —jajiti muꞌ Abram.
10Lot jämꞌ muꞌ cạveꞌ jac mojij cojiros Jordánsiꞌ, därsiꞌ mọꞌ jac, Zoarve buꞌyiꞌ, jam jayejyiꞌ ojñiꞌ. Anic jämꞌsiꞌ dạqueꞌ jac jeñej jämꞌsiꞌ cätidyeꞌtumsiꞌ Jenꞌsiꞌ jiquej muꞌ, anic jämꞌsiꞌ jac jeñej Egipto jiquej. Jambiꞌdyemꞌ muꞌ Ayoꞌ jiꞌcoꞌshayacsi jiquej Sodoma judyeyaꞌ Gomorra. 11Lot mạꞌjeꞌ tsimꞌtyeꞌ mọꞌ jac mojij cojiros Jordánsiꞌ, mọꞌdyes qui sacti muꞌ, shupquive tsun jịjcaij muꞌ, tasenꞌdye jäqueꞌ mọꞌ mojij, muꞌĉan bäꞌyi. Meꞌdye muꞌ Lot pạrejti Abramtum, yocve qui jịjcaij muꞌĉan qui bäꞌyi. 12Taĉan muꞌ Abram Canaánĉan. Lot muꞌĉan qui bäꞌyi mojijĉansiꞌ bäꞌyedyeꞌ in, c̣hẹiꞌyaꞌdye Sodoma bäꞌyi muꞌ. 13Sodomaĉantyiꞌ in anic jiyi ac̣hiꞌyi jiquej in, räjĉan mạyedyeꞌ juchaj soꞌmete Ayoꞌ in.
Hebrónve jịjcaij Abram
14Aty muꞌ shubanyaꞌ muꞌ Lot, chat qui muꞌ Ayoꞌ jajiti muꞌ Abram:
—Paiꞌ cạvevaꞌ ọij jac jätisve judyeyaꞌ rocve judyeyaꞌ shupquive tsun judyeyaꞌ jịjcaijcheꞌ tsun cạvevaꞌ chimeꞌ. 15Yụ raꞌ soꞌmeye räj ọij jac cạveꞌsiꞌ q̂uinꞌ mi, räjenꞌdye raꞌ mídyes judyeyaꞌ vóshidyes mi, jam raꞌ jụꞌñisĉan mạyedyeꞌ mọtsiꞌ ọij p̂eyacdyeꞌ yụ yụꞌtyeyeyes q̂uinꞌ. 16Yụ raꞌ jiꞌdaijbiye vóshiꞌ mi, anic raꞌ mujuꞌchaꞌ shach in, jeñej pudujquedyeꞌ jacsiꞌ, meꞌtum raꞌ in. Ọij pudujquedyeꞌ jam tupuj chaꞌsheꞌ tsiꞌ muntyiꞌ in, meꞌtumdye raꞌ vóshiꞌ mi, jam raꞌ junꞌ tupuj chaꞌshac tsic in, anic raꞌ daiꞌ in. 17Sacyeva cạvecaꞌ tas ọij jac, räj tätscäiꞌcheꞌ sapaꞌjeꞌ ramꞌ, räj raꞌ tajaꞌve cạvem, ĉaĉaij na tas raꞌ soꞌmeye yụ —jajiti Jenꞌ.
18Chat qui muꞌ Abram sacti räj muntyiꞌtum muꞌ, muꞌve jịjcaij mọꞌ poc̣hoꞌsisyaꞌ son, Mamre tịj aꞌ mọꞌ, c̣hẹiꞌyaꞌ buꞌyiꞌ mọꞌ bäꞌyedyeꞌ Hebrón. Muꞌyaꞌ bäꞌyi muꞌ Abram, muꞌyaꞌ qui jämꞌtyeꞌ jiꞌcoꞌshayacdyeꞌ Ayodyes.
Currently Selected:
Génesis 13: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
