Génesis 11
11
Moches cäꞌchacdyeꞌ Babelĉansiꞌ
1Tashcheꞌ jiquej yiris mọmoꞌ p̂eyacdyeꞌ muntyis muꞌin, itŝiꞌ damꞌdye yocsiꞌ jiquej. 2Urucyaꞌmuntyiꞌ in nati in, shupquive tsun jịjcaij in. Dạquiqueꞌ in mojij, Sinar tịj mọꞌ jacsiꞌ, muꞌĉan taĉan bäꞌyi in. 3Yirisĉan mạyedyeꞌ dyijyi in yi jítidyeij in:
—Jeshaꞌ jämꞌtyejaꞌ faratucsiꞌ jac, jämꞌ raꞌ ferojmun jiꞌmujaꞌ —yi jítidyeij in.
Anicdye meꞌ muques faratucsiꞌ jac jämꞌtyeꞌ in, jam mij jämꞌte in, judyeyaꞌ tsinꞌcusyaꞌ qui peiꞌtaquis peiꞌquejĉoiꞌ jämꞌtyeꞌ in, mijam musactyiꞌyaꞌ mij. 4Yi jítidyeij in:
—Jụdyej jämꞌtyejaꞌ yiris bäꞌyedyeꞌ tsun, judyeyaꞌ raꞌ chimeꞌ jiꞌmocheyejaꞌ cäꞌcheꞌ cạjaꞌ acaꞌ, junꞌ quiꞌ chuc venjoiꞌ mạyedyeꞌcheꞌ paj qui meꞌquiꞌcheꞌ judyeyaꞌ paj qui jam yaquintusinꞌ muntyiꞌ in, paj qui jam paiꞌjojaꞌ úcheꞌ jaccheꞌ tsun —jítidyeij in.
5Muꞌ qui Ayoꞌ chạij cạveteꞌ bäꞌyedyeꞌ judyeyaꞌ mọꞌ cäꞌchacsiꞌ acaꞌ jämꞌtyes muꞌin muntyiꞌ in. 6Muꞌ Ayoꞌ yi: "Uts q̂uinꞌ muntyiꞌ in tupuj meꞌ carijtaqui in ĉaĉaij na yiriꞌyaꞌ bäꞌyity in judyeyaꞌ yiris mọmoꞌ p̂eyacdyeꞌ muꞌin. Mọꞌdyes jụꞌñis ĉụiꞌ mọmoꞌ dyijyedyeꞌ játŝuti jụijyaꞌ in, meꞌ ramꞌ jämꞌtaqui in, jam raꞌ tyi ñucjeyacsebi dyijyedyeꞌ muꞌin. 7Damꞌdye jämꞌ chạbajshaꞌ, yoc yoc yụꞌtyeyacsejaꞌ p̂eyacdyeꞌ muntyidyes in, paj qui jam vaj meij chäquibuti p̂eyacdyeꞌ in," yi Jenꞌ.
8Anicdye meꞌ Ayoꞌ yi meꞌdye muꞌin paiꞌ buꞌban qui úcheꞌ jaccheꞌ in, aty qui jam yiriꞌyaꞌ bäꞌyi in. Judyeꞌdye ijaij in mọꞌ bäꞌyedyeꞌ, yacchuqui in. 9Muꞌyaꞌdye muꞌ Ayoꞌ yoc yoc yụꞌtyeyacsi p̂eyacdyeꞌ räj jacchety muntyiꞌ in, muꞌdye jiꞌpaiꞌcacsi muntyiꞌ in, räj buꞌyi vatyquej jaccheꞌ in. Mọꞌdyes mọꞌ bäꞌyedyeꞌ Babel tịj mọꞌ.#11:9 Babel yiꞌ ca yiꞌ "itŝiꞌ dyijdyeꞌ muꞌin."
Semtyiꞌ vóshiꞌ muꞌ
10Ọij sánacdyeꞌ p̂eijbite Semtyiꞌ vóshiꞌ muꞌ. Aty päräꞌ yómodyeꞌ jiyiꞌ mọꞌ bänedyeꞌ, chat muꞌ Sem aty yiriꞌ cien yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Arfaxad. 11Tacaꞌ men yejĉoij bäꞌyi muꞌ ĉanamꞌ qui cien yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Sem.
12Arfaxad aty chibin quiꞌtac ĉanamꞌ jiyiꞌ yómodyeꞌ tyiti muꞌ chat q̂uinꞌdyemꞌ naꞌi ạvaꞌ muꞌ Sala. 13Tacaꞌ yejĉoij men bäꞌyi muꞌ, vạjpedyeꞌ quiꞌ cien chibin jiyiꞌ yómodyeꞌ, judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Arfaxad.
14Sala aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Eber. 15Yejĉoij tacaꞌ men bäꞌyi muꞌ vạjpedyeꞌ quiꞌ cien chibin jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Sala.
16Eber aty chibin quiꞌtac vạjpedyeꞌ jiyi yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Peleg. 17Yejĉoij tacaꞌ men bäꞌyi muꞌ vạjpedyeꞌ quiꞌ cien chibin quiꞌtac yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Eber.
18Peleg aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Reu. 19Tacaꞌ yejĉoij men bäꞌyi päräꞌ quiꞌ cien arajtac jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Peleg.
20Reu aty chibin quiꞌtac päräꞌ jiyiꞌ yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Serug. 21Tacaꞌ men yejĉoij bäꞌyi, päräꞌ quiꞌ cien yävätidyeꞌ jiyiꞌ yómodyeꞌ, judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Reu.
22Serug aty chibin quiꞌtac yómodyeꞌ tyiti muꞌ, chat q̂uinꞌdyemꞌ naꞌi ạvaꞌ muꞌ Nacor. 23Tacaꞌ yejĉoij men bäꞌyi, päräꞌ quiꞌ cien yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Serug.
24Nacor aty päräꞌ quiꞌtac arajtac jiyiꞌ yómodyeꞌ tyiti muꞌ, chat q̂uinꞌdyem naꞌi ạvaꞌ muꞌ Taré. 25Tacaꞌ yejĉoij men bäꞌyi, yiriꞌ cien yiriꞌtac arajtac jiyiꞌ yómodyeꞌ judyeyaꞌ daiꞌ tacaꞌ ạvaꞌ muꞌ naꞌi in, sonꞌ in judyeyaꞌ p̂en in, chat q̂uinꞌdyemꞌ säñi muꞌ Nacor.
26Taré aty yävätidyeꞌ quiꞌtac yómodyeꞌ tyiti muꞌ chat q̂uinꞌdyemꞌ naꞌi in ạvaꞌ muꞌ, Abram, judyeyaꞌ Nacor judyeyaꞌ Harán, meꞌ meꞌ tịj muꞌin.
Naꞌi Abram
27Ọij sánacdyeꞌ p̂eijbite Tarétyiꞌ vóshiꞌ muꞌ. Taré ạvaꞌyi naꞌi muꞌ Abram judyeyaꞌ muꞌ Nacor judyeyaꞌ muꞌ Harán. Harán qui ạvaꞌyi naꞌi muꞌ Lot. 28Tacaꞌ tsạꞌ muꞌ Taré säñi ạvaꞌ muꞌ Harán, Caldeaĉansiꞌ bäꞌyedyeꞌ, Ur, muꞌĉan säñi muꞌ, yóĉandyemꞌ naꞌi jiquej u.
29Abram vämi Saraicheꞌ, muꞌ na Nacor vämi Milcacheꞌ, mọꞌ Haránsiꞌ ạvaꞌ muꞌ, judyeyaꞌ Iscas vojiꞌ muꞌ. 30Sarai na jam junꞌ ạvaꞌyis, ĉaĉaij na säräꞌ buꞌyis.
31Taré yacchuiꞌ mọꞌ jac Caldeaĉansiꞌ, muꞌĉan bäꞌyi jiquej tịj mọꞌ bäꞌyedyeꞌ Ur, chat qui muꞌve tsanꞌ jịjcaij Canaánve. Cạqui ạvaꞌ muꞌ Abram, judyeyaꞌ vịyaꞌ muꞌ Lot, judyeyaꞌ jäp muꞌ, Sarai. Meꞌ tsanꞌ meꞌ, a qui namꞌ ventyequeꞌyaꞌ mọꞌ bäꞌyedyeꞌ Harán, muꞌĉan taĉantyiꞌ. 32Muꞌĉan qui sänjan muꞌ Taré, aty päräꞌ quiꞌ cien ĉanamꞌ jiyiꞌ yómodyeꞌ tyiti muꞌ chat qui säñi.
Currently Selected:
Génesis 11: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
