Luukasiup Aglangit 18
18
Jiisusiup Ajjiutitanga Uiggarniq Iqqaqtuijilu
1Jiisusiup ilinniaqtini ajjiujumik ajuriqtuqpait, tuksianginnaqataqullugit sapiliqtailiqullugillu. 2Uqautivait, “Nunalingni iqqaqtuijitaqalauqpuq Guutimik sivuuranngittumik, inungniglu ilirasugani. 3Tavvani nunalingni uiggarniqtaqalauqpuq taassuma iqqaqtuiji upaqattaqpaa uqautiqattaqtlugu, ‘Saputilaunnga akiraqtuqtinnit!’ 4Iqqaqtuiji akuni upalaunngilaq; kinguningagulli isumaliqpuq, ‘Guutimik sivuuranngikkaluaqpunga inungniglu ilirasungnanga. 5Uumali uiggarniup pagvisainnalirmanga, pijumajanganik piniarvigilaurlagu, kamaginngikkukku qaiqattatuinnarniarmat iqianngunaqsimmarigluni.’”
6Ataniq uqaqpuq, “Tusaqpasi iqqaqtuijiup ukpinngittuup uqausingit. 7Guutiulli inuqutini, qinuinnaliqpata ullukkut unnuakullu ikajuqtaujumalutik? Pigiarnasaarajaqpa ikajuqtaujumatillugit? 8Uqautivassi, inuqutini tavvainnaq ikajurumagajaqpait. Inuup Irninga nunarjuarmut tikikkuni, ukpirniqatsiaqtunik nanisigajaqpa?”
Ajjiujuq Paarisilu Ruumamiullu Kiinaujaiqtitsijingat
9Ajjiujumiktauq Jiisusiup uqautivait inuit immingnik qanuinnasuginngittut asimingniglu narrujut: 10“Angutiingnik marruungnik tuksiarvigjuarmut tuksiariaqtuqalauqpuuk, aippanga Paarisi, aippangalu Ruumamiut kiinaujaiqtitsijinga. 11Paarisi inutuulluni nangiqpuq tuksiarluni, ‘Guuti, qujagivagit asittut taimainnginnama, pijumatujualuktitut, tiglitujualuktitulluunniit, nuliamingnik asinniaqpaktutitut, uutunaq Ruumamiut kiinaujaiqtitsijingatut. 12Pinasuarusiq marruviglugu nirittailivakpunga, kiinaujaqtaarijamalu tallimaujuqtuujjutinginnik tunisivakpunga.’ 13Ruumamiulli kiinaujaiqtitsijinga, qaninngittumi nangiqpuq, qummulluunniit aarlurumanngittuq, sagvinilu patiktarlugu uqaqpuq, ‘Guuti nikagilaunnga ajuqtulijialuugama!’ 14Uqautivassi, taanna Ruumamiut kiinaujaiqtitsijinga Guutimut naammagijauniqsaulirluni aipparijaminit igluminut angirralauqpuq; nalliat imminik angijuruqtittuq Guutiup mikiglitirniaqpaa, immingnigli mikiglitiqtuq taanna angijuruqtitauniaqpuq.”
Jiisusiup Tunngasuktauqattaqujininga Nutarakulungnik
Maatiusi 19:13-15; Maakusi 10:13-16
15Nutarakulungniktauq Jiisusimuarujjivut taassumunga patimmijauqullugit; ilinniaqtingitali takugamijjuk, taakkua iniqtiqpait. 16Jiisusiulli nutarakuluit qaiquvait uqarluni, “Nutarakuluit uvannut qaitisiuk, iniqtinngillugit; taimaittunut Guutiup Ataniuvinga pigijaungmat. 17Sulijumik uqautivassi, Guutiup Ataniuvinganik nutarakuluktitut ilaliuqsinngittuq taanna tavvunga itirnianngilaq.”
Angut Ajuqsanngiqtuq
Maatiusi 19:16-30; Maakusi 10:17-31
18Juutit angajuqqaangatta Jiisusi apirivaa, “Piujutit ajuriqtuiji, sunamik pinasuariaqaqpunga inuusirmik nungusuittumik kingurngujjiqullunga?”
19Jiisusiup uqautivaa, “Sungmat piujumik taivinga? Guutiup asianik piujuqtaqanngilaq. 20Piqujait qaujimavatit: ‘Nulialit uilillu asinniaqtuksaunngilat, pijaarilutit inuaqtuksaunngilatit, tigliktuksaunngilatit; inuuqatingnik sulinngittumik uqausiqaqtuksaunngilatit; ataatangnik anaanangniglu upigusutsiaqtuksauvutit!’”
21Taassuma kiuvaa, “Tamakkua taimanngat inuusuktuuninnit piqujait malikpakka.”
22Jiisusiup tusaramiuk, uqautivaa, “Suli atausirmik pisimanngilatit. Piqutilimaatit niurrutigijaqtukkit kiinaujataarijaatillu tuniuqautigilugit ajuqsaqtunut, qilangmi tavva piqutiqatsiarniaqputit; qailutit malinnga.” 23Angulli tamatuminga tusarami quviasugunniiqpuq; ajuqsanngittualuugami.
24Jiisusiup quviasugunniiqtuq takugamiuk uqaqpuq, “Pijarninngittuungmat ajuqsanngittunut Guutiup Ataniuvinganut itirasuarniarluni! 25Pijariakinniqsauvuq Kaamiliup#18:25 Kaamili uvvalu pikulik itirasuarajarninganit miqqutiup ijingagut#18:25 Jiruusaliup avalurjuangani ukkuaqtaqalaurmat atiqaqtumik miqqutiup ijinganik ajuqsanngittuup itirasuarajarninganit Guutiup Ataniuvinganut.”
26Inuit tusaajut apirivaat, “Kinali taima piulijaujunnarniaqpa?”
27Jiisusiup uqautivait, “Inungnut ajurnaqtut Guutimut ajurnanngilat.”
28Piitturuusi uqaqpuq, “Takugit, angirravut qimalauqpavut ilingniglu malilirluta.”
29Jiisusiup uqautivait, “Sulijumik uqautivassi, nalliat angirraminik qimaijuq nuliaminik, qatanngutiminiglu angajuqqaaminiglu qiturngaminigluunniit, Guutiup Ataniuvinga pijjutigilugu, 30anginiqsammarialungmik tunisiviulaaqpuq maanna inuutillugu, inuusiksamiglu nungusuittumi pijumaaqtumi.”
Jiisusiup Pingajungannik Uqausiqarninga Tuqutaulaarnirminik
Maatiusi 20:17-19; Maakusi 10:32-34
31Jiisusiup ilinniaqtini 12 inutuutillugit uqautivait, “Takugit Jiruusalimmualiqpugut, uqausiusimajut tamarmik nalauttaijuni Inuup Irningata miksaanut kajusititauniaqput. 32Juutiunngittunut tunijaujumaaqpuq, taakkua mitautigijumaaqpaat, kanngusuutinnaqtumik pinasuarviujumaaqpuq, tivvuluktaulunilu; 33tiigaqturumaaqpaat tuqullugu, ulluilli pingajuannik makittumaarivuq.”
34Ilinniaqtingit uqausirnik taakkuninga tukisinngilat; uqausingita tukingit ijiqsimalaurmata taakkununga, tukisilaunngilat qanuq Jiisusi uqaraluarmangaat.
Jiisusiup Tautuliqtittininga Tuksiratimik Tautunngittumik
Maatiusi 20:29-34; Maakusi 10:46-52
35Jiisusi Jirikuumut qagliliqtillugu, tautunngittumik iksivajuqaqpuq aqqutiup saniani, kiinaujanik tuksiraqtimik. 36Inugiagaaluit saniqquttut tusaagamigit, apirivuq, “Sujuqalirmat?”
37Uqaujjauvuq, “Jiisusi Naasariitimiuq aqqusaalirmat.”
38Nillialiqpuq, “Jiisusi, Taivitiup irninga, nikaginnga!”
39Sivulliujut iniqtiriliqput taassuminga nipiqaqunagu; nipiqquqtusivalliatuinnaqpurli, “Taivitiup irninga, nikaginnga!”
40Jiisusi nuqqaqpuq, tautunngittuq qaititauquvaa, qaglilirmat apirivaa, 41“Sunamik uvannut piniarviujumavit?”
Uqaqpuq, “Ataniq tautuliqtitaujumavunga.”
42Jiisusiup uqautivaa, “Tautulirit; ukpirusungnirnut aaqqiktauvutit.”
43Tavvainnaq tautuliqpuq Jiisusi malilirlugu, Guutilu niqtuqpaa; inulimaat tamatuminga takugamik, Guuti niqtuliqpaat.
Currently Selected:
Luukasiup Aglangit 18: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
