Luukasiup Aglangit 19

Jiisusilu Sakiasilu

1Jiisusi Jirikuumut tikinnami aqqusaatuinnaqpaa. 2Tavvani Ruumamiut kiinaujaiqtitsijiqutingatta angajuqqaangat tavvaniippuq, Sakiasimik atilik, taanna ajuqsanngittuuvuq. 3Taassuma Jiisusi takunasuaqpaa qanuittuungmangaat, inugiaktunulli takujunnanngilaq mikijuugami. 4Tavva sivuningannut ullakpuq napaaqtumut sikamuamik taijaujumut majuraqpuq Jiisusimik takuttiarumatluni, tamauna aqqusaarniarmat. 5Jiisusi tavvunngarami, qummut takusaqpuq uqautillugu, “Sakiasi tuavirlutit aqqarit; ullumi iglungniigiaqarama.”

6Sakiasi tuavirluni aqqaqpuq, Jiisusi quviasugluni igluminut tunngasuktippaa. 7Inuit takugamik uqamajautigiliqpaat uqarlutik, “Una angut ajuqtulijuup iglunganut tujurmijaqtuqtuq!”

8Sakiasi nikuvilluni Atanirmut uqaqpuq, “Takugit Ataniq, piqutima avvangit#19:8 Nappangit tuniniaqpakka aktlujunut; sagluqitsisimannirumalu nalliannituinnaq utiqtitsiviginiaqpara sitamaiqsulluaqtumik.”#19:8 Sitamavilluaqtumik

9Jiisusiup uqautivaa, “Ullumi piulijauniq iglumut uvunga tikippuq, unattauq Aiprahaam kinguvaaringmagu. 10Inuup Irninga tikisimangmat asiusimajut qiniriarlugit piulijaqturlugillu.”

Ajjiujuq Kiinaujait Guuluit

Maatiusi 25:14-30

11Inuit tamatuminga naalaktillugit, Jiisusiup unikkautivait ajjiujumik, Jiruusalimmut qagligamik, inuit isumangmata Guutiup Ataniuvinga maannakkut saqqitsautiginiarasugilirlugu. 12Taimaimmat uqaqpuq, “Angutitaqalauqpuq angajuqqaamik nunamut ungasiktumut aullalauqtumi angajuqqaarjuannguqtitaujaqturluni pijariiruni angirraminut utilaarluni. 13Aullalaunnginnirmini pijini qulit qaiquvait, kiinaujamik guulumi atausirmik atunit tunisivigivait uqautillugit, ‘Ukua niurrutigisiuk kiinaujaqtaakkannirutiginasuarlugit utilaunnginninni.’ 14Nunaqatingita taanna angajuqqaaq uumigigamijjuk, tilisivut uqariaqtuqtunik, ‘Una angajuqqaarjuaqtaarijumanngitavut.’

15“Taanna angajuqqaarjuannguqtitaugami angirraminut utiqpuq. Pijini kiinaujanik aittulauqtani qaiquvait, qaujijumalluni qatsinik ilakkannirnirmangaajjuk. 16Sivulliqpaaq qaigami uqaqpuq, ‘Angajuqqaak, kiinaujait atausiq qailauqtait, qulinik ilakkannilauqpuq.’ 17Angajuqqaangata uqautivaa, ‘Pinasuatsiaqtutit, pijitsiavaullutit! Kamatsialauravit mikijunik, angajuqqaangunialiqputit nunalingnut qulinut.’ 18Aippanga qaigivuq, uqarluni ‘Angajuqqaak, kiinaujait atausiq qailauqtait tallimanik ilakkannilauqpuq!’ 19Angajuqqaangata uqautivaa, ‘Ivvittauq aulatsijiunialiqputit nunalingnut tallimanut.’ 20Suli pijingata ilangat qaigivuq uqarluni, ‘Angajuqqaak uvvauna kiinaujait kakkiutiksajamut immusilauqtara ijiqsimallugu. 21Ilingnik ilirasulaurama, nikagusuqannginnavit; ililaunngitarnik tigusisuungugavit, kanngaqsulaunngitatillu katiqsuqpatit.’ 22Angajuqqaangata kiuvaa, ‘Iqqaqturniaqpagit uqausiqtit maliglugit, pijitsiavaunngittutit! Qaujimagavit nikagusuqanngittunga, ililaunngitakkalu tigugakkit, kanngaqsuutigilaunngitakkalu katiqsurakkit. 23Sungmalli kiinaujara kiinaujakkuvingmualaunngippiuk? Utiruma ilakkanniqsimaliqtillugu pigajalauqpara.’ 24Tavvaniittut uqautivait, ‘Kiinaujaq guulu taassumangat tigusiuk, tunilugu qulinik kiinaujalingmut.’ 25Taakkua uqautivaat, ‘Angajuqqaaq, taanna qulinik kiinaujaqaliriiqpuq!’ 26Taassuma kiuvait, ‘Uqautivassi, piqaqtulimaat tunisiviukkannirniaqput; piqanngittulli mikijumik piqaraluaqpata aqsaaqtauniaqput. 27Taikkua uvannik akiraqtuqtut, uvannik angajuqqaarjuanguqujinngittut, qaitisiuk takunnaqtillunga tuqullugit.’”

Jiisusiup Jiruusalimmuarninga Kingulliqpaamik

Maatiusi 21:1-11; Maakusi 11:1-11; Juanasi 12:12-19

28Jiisusi taimaak uqariirami, sivulliqpaulluni Jiruusalimmut ailiqpuq. 29Pitpaigi Pitanilu qagligamigik, qaqqaq napaaqtulik uqsuksaujunnaqtunik paurngaqasuuq tikinnamiuk, ilinniaqtiminik marruungnik tilisivuq, 30uqautillugik, “Sivunittinniittunut nunalingnut aigissik, taikunngarussik takuniaqpusik siutiqquqtujuup nurranganik pituksimajumik, suli ikimaviulauqsimanngittumik; taanna pituijjaarlugu qaijjutisikkuk. 31Apirijaugussik ‘Sungmat pituijjaaqpisiuk?’ Kiuniaqpusik, ‘Ataniup aturumangmagu.’”

32Tilijaujuuk taikunngaramik Jiisusiup uqausiriqqaujangit taimaatsiaq nalautsivut. 33Siutiqquqtujuup nurranganik piiqsinasuliqtillugik, inuata apirivaak, “Sungmanuna pituijjaarasuaqpisiuk?”

34Taakkuak kiuvuuk, “Ataniup aturumangmagu.” 35Siutiqquqtujuup nurranga Jiisusimuarutivaak, annuraatik siutiqqutujuup nurrangata qaanganut ilivait, Jiisusi ikitippaat. 36Jiisusilu ikimalluni ingirraliqtillugu, inuit annuraatik aqqutiginiaqtanganut isivitiqpait.

37Jiruusalimmut qagligamik, qaqqaq napaaqtulik uqsuksaujunnaqtunik paurngaqasuup aqqutaanuaqput, maliktingit unuqtualuit quviasummariliqput Guuti niqtuqpaat nipiqquqtullutik; Jiisusiup kamanaqtuliningit takusimajatik pijjutigillugit. 38Uqarlutik, “Guutiup saimmarliuk, angajuqqaarjuaq Ataniup atingani tikittuq! Qilangmi quvianaqtuqarli quttingniqpaangujurlu niqtuqtauli!” 39Paarisilli ilangit inugiaktut akurnganniittut Jiisusimut uqaqput, “Ajuriqtuiji, ilinniaqtitit nipanngiqulaukkit.”

40Jiisusiup kiuvait, “Uqautivassi, taakkua nipanngiraluaqpata, makkua ujarait qaigalaalirniaqput.”

Jiisusiup Quvviurutiqarninga Jiruusalimmik

41Jiruusalim qaglillugu takunnaliramiuk quvviurutigivaa, 42uqarluni, “Qaujilauqsiuktuq akiraqtuutinngijjutiksaq! Maannali kisiani tukisijunnanngilasi! 43Ulluq nalliutijumaaqpuq, akiraqtuqtissinnit ilumajauviksasi avatilimaassinnit, ilujaulusi tikitaujumaarviksasi. 44Asiruqtaujumaaqpusi avalurjuat iluaniittulimaat nungutaulusi qiturngalimaasilu, ujaraillu sanasimajut atausirmigluunniit qaliriiktuqarunniirumaaqput; Guutiup sapujjijaqturninga ilissinnik kamagilaunnginnassiuk.”

Jiisusiup Tuksiarvigjuamuarninga

Maatiusi 21:12-17; Maakusi 11:15-19; Juanasi 2:13-22

45Jiisusi tuksiarvigjuarmuarami niuviqtitsijut tavvaniittut anitiliqpait; 46uqautillugit, “Titiraqsimavuq, ‘Igluga tuksiarviujumaaqpuq’; ilissili tigliktinut inigijautiliqpasi.”

47Qautamaat Jiisusi ajuriqtuiqattaqpuq tuksiarvigjuarmi. Tunirrusiqtitsijit angajuqqaangit piqujaniglu ilisaijit inuillu aulatsijingita tuquttumagaluaqpaat; 48tuquttivigigajaqtamingnili nanisijunnalaunngilat, inungnut piviksaqaqtitaulaunginnamik, inuit tusaajumavigjualaurmata uqausirijanginnik.

Currently Selected:

Luukasiup Aglangit 19: EAIBR

Highlight

Copy