Luukasiup Aglangit 20
20
Jiisusi Nakit Pijunnarniqarmangaat Apiqqusiuninga
Maatiusi 21:23-27; Maakusi 11:27-33
1Ulluit ilanganni Jiisusi tuksiarvigjuarmi inungnik ilisaitillugu uqausirnik tusaruminaqtunik ajuriqsuijjutiqarluni, tunirrusiqtitsijit angajuqqaangit piqujaniglu ilisaijit, Juutillu angajuqqaangit ilagillugit tavvunngaqput. 2Uqautillugu, “Uqautilauqtigut nakit pijunnautiqarlutit taimailiurunnaqattaqpit? Kinakkunnullu pijunnautitaatitausimagavit?”
3Jiisusiup kiuvait, “Uvangattauq apirijumagivassi; uqautilauqsinnga; 4Juanasiup paaptitsijunnarninga Guutimit pilauqpaa uvvalu inungnit?”
5Taakkua immingnut uqaqatigiiliqput, uqarlutik, “Guutimit pilaurniraruttigu, tavva uqautiniaqpaatigut, ‘Sungmalli ukpirilaunngippisiuk?’ 6Uvvalu inungnit pilaurnirarlugu uqarutta, inulimaanit milluqtauniaqpugut; Juanasi nalauttaijuunasugijaungmat.” 7Tavva kiuvaat, “Nakit pijunnaqtitaungmangaat qaujimanngilagut.”
8Jiisusiup uqautivait, “Uvangattauq uqautiniannginnivassi, nakit pijunnarniqaqtitaullunga taimailiurunnarmangaarma.”
Paurnganik Uainiksaulirumaaqtunik Piruqsiivingmik Kamajiujut Ajjiutitauningit
Maatiusi 21:33-46; Maakusi 12:1-12
9Inuit ajjiujumik imaittumik uqarvigivait: “Angutitaqalauqpuq paurngaliksanik kanngaqsuijumik piruqsiivingmi, kiinaujaliurutigijumallugu atuqtautippaa kamajinut, nunaup asianut aullaqpuq akuni aullaqsimajaqturluni. 10Paurgait katitauviksangat nalliutingmat, pijiminik tilisivuq paurnganik pitaarijariaqaqtaminik tigusiqullugu piruqsiivingminit; taakkuali kamajiutitangita piji aanniqsiqpaat, naksaqtinnagu utiqtippaat. 11Angut pijiminik asianik tilisigivuq; taannattauq aanniqsirivaat iliijarillugulu, naksaqtinnagu utiqtippaat. 12Angut pijiminik pingajuannik tilisigivuq; taanna kamajinit ikiliqtauvuq aanniqsiqtaulluni aullaqtippaat. 13Piruqsiiviup inua uqaqpuq, ‘Qanurli pinialiqtunga? Irnira nagligijara tilijumaliqpara; taanna pittiaqtauniaqtuksauvuq!’ 14Kamajiujut taanna takugamijjuk, immingnut uqaliqput, ‘Una tavva piruqsiivingmik piqutiliup irninga kingurngujjijuksaq; tuqulaurlavut, kingurngutijaksangit pitaariniarattigu!’ 15Piruqsiivingmit anitippaat tuquttlugu.
“Qanurli taima piruqsiiviqaqtuup pilaliqpait taakkua tuqutsijut irninganik? 16Nangminiqaqtuq piruqsiivingmik tikikkuni taakkua kamajit tuqunniaqpait, asinginnut kamagijautilirlugu.”
Inuit tamatuminga tusaramik uqaqput, “Taimaittuqarnianngilaq!”
17Jiisusiup inuit takusarlugit, uqautivait, “Uqausit imailijut qanuq tukiqaqpat?
‘Ujarak igluliuqtinit narrugijaujuq atunnginniraqtaulluni
Taanna aturiaqarniqpaanguliqpuq tiriqquulirluni.’
18“Tavvunga ujarangmut kataktulimaat siquminniaqput; ujaraglu nalliannut katakkuni katagvigijaminik siqallisiniaqpuq.”
Gavamakkunnut Taaksiijariaqarniup Miksaanut Apiqqusiq
Maatiusi 22:15-22; Maakusi 12:13-17
19Piqujanik ilisaijit tunirrusiqtitsijillu angajuqqaangita Jiisusi tigunasukkaluaqpaat tavvaniitillugu, inunigli sivuuragamik tigunngilaat; qaujigamik ajjiujutigut taakkutiguuna uqausirijaunirmingnik. 20Tavva piviksaqsiuliqput, angutinik akiliiviqarlutik tilisivut sulijurnattiarasuaqtunik, Jiisusi apiqsurlugu kiujjutiksairujjinasuarniaqtunik, piviirujjigutik Ruumamiut aulattijinginnut pijautittumallugu. 21Taakkua qaujisaqtitaujut Jiisusimut apirivut, “Ajuriqtuiji, qaujimavugut uqaujjitsiaqpakkavit ajuriqtuitsiaqpaglutillu akaujunik, inungnik ajjigiiktitsigavit, sulitsiaqtumiglu Guutiup atuqtauqujanganik ajuriqtuiqattaravit. 22Uqautilauqtigut piqujavut taaksijaqujivaat Siisarimut? Tunisiqujinngilalluunniit?”
23Jiisusiup silairriksinasungningit qaujigamigit, uqautivait, 24“Kiinaujaq takulagu. Kinamik ajjinnguaqtaqaqpa? Kinaullu atinganik atiliusimava?”
Taakkua kiuvut, “Siisarimik.”
25Tavva uqautivait, “Taimaimmat tunisiuk Siisarimut, Siisariup pigingmagit, Guutimullu tunilugit Guutiup pingit.”
26Tilijausimajut inuit takkuani pasiksirutisaqtaarunnanngilat Jiisusiup uqausinginnit; kamaniarutiqalauqpulli kiggusinganik uqausiksairujjaugamik.
Tuqungajunit Makittumaarniup Apiqqusiuninga
Maatiusi 22:23-33; Maakusi 12:18-27
27Saajjusit ilangit Jiisusimuaqput, taakkua ukpirusunngittut tuqungajut makittumaarninginnik, 28apirivaat uqarlutik, “Ajuriqtuiji, Muusisi piqujanik titiraqsimangmat: ‘Angut nulialik tuqukpat, qiturngaqtaalauratik, nuliavininga angutiup nukangata nuliaqtaarijaksarivaa qiturngaqtaaqullugik, kinguvaanginnik angajuata qiturnganginnik taijaujuksauqullugit.’ 29Taimali qatanngutigiiktaqalauqpuq angutinik 7-nik; angajuktliqpaaq nulianilauqpuq, qiturngaqtaalaurani tuquvuq. 30Nukangata arnaq nuliaqtaarivaa, qiturngaqtaalaurani tuqugivuq, 31amma nukangata pingajuatta nuliaqtaarigivaa, tuqugivuq, kinguningagut taakkua nukariilimaat 7 arnamik taassuminga nuliaqalauqput, tuqullutik qiturngaqtaaqtuqalauratik. 32Kingulliqpaanngullunili arnaq tuqulaurivuq. 33Tuqungajut makivvinganni, nalliattali taima arnaq nuliarilaaqpauk? Taikkua qatanngutigiilimaat 7 arnamik taassumingatsainnaq nuliaqalaurmata.”
34Jiisusiup uqautivait, “Maani inuujut angutit nulianisuunguvut, arnaillu uitaaqpaglutik; 35angutiilli arnaillu tuqungajunit makittumaaqtut sivuniksattinni nulianigiaqarumaanngilat uinigiaqarumaaratiglu. 36Guutiup qiturngaringmagit, tuqumit makisimanirmingnut aingilititut taimaittumaarmata tuqujunnarunniirlutiglu. 37Muusisi nalunanngitsiaqtumik qaujititsilauqpuq tuqungajut makittumaarninginnik, unikkaangusimajumi ukpigarni ikualajumi, Atanirmik uqausiqarmat, ‘Aiprahaam Guutinga, Aisakiullu Guutinga, Jaikuullu Guutinga.’ 38Guuti inuujunut Guutiuvuq tuqungajulli Guutiginngilaat; inuujulimaat taassumunga inuungmata.”
39Piqujanik ilisaijit ilangat uqaqpuq, “Kiutsiaqputit ajuriqtuiji.” 40Kinguningagullu apirikkannirumajunniiqpaat.
Misaiasimik Apiqqusiqarningat
Maatiusi 22:41-46; Maakusi 12:35-37
41Jiisusiup uqautivait, “Qanurli Christuusi Taivitimut kinguvaarijauniraqtaujunnaqpa? 42Taiviti nangminiq uqaqsimangmat inngirutini:
‘Ataniq Ataninnut uqaqpuq, “Uvani taliqpinni iksivagit, 43akiraqtuqtingnik itigangnut ikurraliujjiqqaaqtinnanga.”’
44Taivitiup Atanirmik taigamiuk; qanurli tavva Christuusi kinguvaarijunnaqpauk?”
Jiisusiup Ilimasuqujininga Piqujanik Ilisaijinik
Maatiusi 23:1-36; Maakusi 12:38-40
45Inulimaat tusaatillugit Jiisusiup ilinniaqtini uqautivait, 46“Ilimasugissi piqujanik ilisaijinik, taakkua pisukkatagumavangmata takijunik annuraaqsimalutik, nilliujjautsiarumavaglutik niuvirvingni Juutillu ukpirnirmut katimavinginni piuniqpaani iksivajumavaglutik; nirivigjuariaqtuqtunit upigijaujut ininginni iniqarumavaglutik. 47Silairriksivaglutik uiggarnirnik tigligarvigijumallugit angirranginnit, takunnaqtaunasuarlutiglu tuksiujjiliqpaglutik takijualungnik. Taakkua sugiaqtauningit piunnginniqsallarialuujumaaqput.”
Currently Selected:
Luukasiup Aglangit 20: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
