Luukasiup Aglangit 17

Ajurniq

Maatiusi 18:6-7,21-22; Maakusi 9:42

1Jiisusiup ilinniaqtini uqautivait, “Ajurnirmut pijumisaaqtauniq pitaqainnarniaraluaqpuq; kappiannamiigli tainna aqqutigijaujuq! 2Piuniqsaugajaqpuq tainna aqqutigijaujuq niaquujaksanik siqallisiviup ujaraktanganik qungasingagut nivingairviuluni imavingmut kivititaukpat, ukuningakuluk ajuqtulititsininganit. 3Piniarnirijassinnik qaujimanasuatiaqattarissi; qatanngutiit ajuqtulikpat iniqtiruk, qaqialiqpallu isumagijunnairvigiluguk; 4ullumik atausirmi 7-iturluni ajuqtulivigikpatit, ilingnut qaivagluni uqaraikpat ‘Qaqialiqpunga,’ isumagijunnairvigiqattataksarivat.”

Ukpirniq

5Aapuusitalit Atanirmut uqaqput, “Ukpirnivut angiglivaalliqtilauruk!”

6Ataniup uqautivait, “Ukpirniqarussi piruqsiaksait mikinniqpaangatitut mastarttitut, uumunga napaaqtumut uqarunnaqpusi, ‘Ilingnik nusuglutit, imavingmualirit,’ tavva naalangniaqpaasi.”

Pijiup Pijaksanga

7“Nallisi pijiqaruni piruqsiivingmi nunalirijumik uumajunigluunniit siipinik kamajumik, qaikpat uqautigajaqpiuk ‘Tuavirlutit nirilirit?’ 8Taimailivanngilasi, imailivakpusili pijissinnut, ‘Niriniaqtannik niqiliulirit, sailisarlutillu uvannik pijitsilirit niritillunga imiqtillungalu, kinguningagullu nirilutit imirniarivutit.’ 9Piji angajuqqaangata qujagijariaqaqpauk naalatsiarninganut? 10Ilissittauq taimaikkivusi, piqujaujjutigijassinnik pijariiraangassi uqaqtuksauvusi, ‘Pijituinnauvugut; pijariaqaqtavut pituinnarattigu.’”

Jiisusiup Aaqqiksininga Angutinik Qulinik

11Jiisusi Jiruusalimmunngautillugu, Samiariallu Galiliallu akunningaguulauqpuq. 12Nunalingnualiqtillugu, upaktauvuq angutinit qulinit, kappiagijaujumik paqtiqtunit, taakkua qaninngittumi nangiqput, 13qaigalaarlutik uqaqput, “Ataniq Jiisusi, nagligitigut.”

14Jiisusiup takugamigit uqautivait, “Tuksiarvigjuarmi tunirrusiqtitsijinut takujautitsaqtulirissi.”

Taikunga ailiqtillugit aqqutaani aaqqiktauvut. 15Ilangat aaqqiktaunirminik qaujigami, utiqpuq Guuti niqtuqpaa nipiqquqtulluni. 16Nunamut paammagluni Jiisusiup saanganut, qujagimmarikpaa. Angut taanna Samiariarmiutauvuq. 17Jiisusi uqaqpuq, “Angutit quliuqqaunngilat aaqqiktaujut? Naugli taikkua 9 taassuma asingit? 18Utiqtuqanngilat Guutimut qujalijaqturlutik nunaqatiginngitavut taanna utiqtutuuva?” 19Jiisusiup uqautivaa, “Makillutit tavvannga ailirit; ukpirusukkavit aaqqitauvutit.”

Guutiup Ataniuvingata Tikinninga

Maatiusi 24:23-28,37-41

20Paarisit ilangita Jiisusi apirivaat qanga Guutiup Ataniuvinga tikinniarmangaat, Jiisusiup kiuvait, “Guutiup Ataniuvinga nalunaikkutakkut takuksaujaqturluni tikinnianngilaq. 21Uqaqtuqarnianngilarluunniit, ‘Takugit maaniippuq!’ Uvvaluunniit, ‘Ikaniippuq!’ Guutiup Ataniuvinga ilussinniinniaqpuq.”

22Ilinniaqtini uqautivait, “Nalliutijuqalaamiijut, Inuup Irningata ullurmik saqqivviksanganik takujumallirvigisimajassinnik kisiani ullurmik takuviksaqtaqalaagittuq. 23Inungnit uqautijaujumaaqpusi, ‘Avunga takujaqtulirit!’ Uvvalu, ‘Maunga takujaqtulirit!’ Taimailiuqtunut takujaqtuqtailigissi malingniarnagillu. 24Suurlu qaummaallak qaumatitsikainnasuungungmat silakkut ingirralluni sukkajumik, taimaittumaarivuqtauq Inuup Irningata ullungani. 25Taimailauqqaaqtinnagu Inuup Irninga angijumik aanniatitaujariaqaqpuq narrugijaujariaqarlunilu maanna inuujunut. 26Suurlu Nua inuutillugu taimailaurmat, taimaittumaarivuqtauq Inuup Irningata ullungata nalliunningani. 27Taissumani Nuap nalliunningani, inuit nirilauqput imirlutiglu, nulianikput uiniglutiglu, ulluq Nuap umiarjuamut itirvinga tikillugu, ulivigjuaq tikimmat taikkualimaat tuqulauqput. 28Suurluttauq Luuti inuutillugu inuit nirilauqput, imirlutiglu, niuvirlutik, niurrutiqarlutiglu, niqiksanik piruqsiivut, igluliurlutiglu, 29ullumi taissumani Luuti Sutuumamit aullarmat, ikuma ujaraillu aumait qilangmit katakput inulimaallu tuqullugit. 30Taimaittumaarivuqtauq ullumi Inuup Irningata saqqivviani.

31“Ulluq tainna nalliutikpat, igluup qaanganiittuq igluminut itirniarani piqutiminik aiksirasugluni; taimaaktauq piruqsiivingmiittuq igluminut utiqtuksaunngilaq. 32Luutiup nulianga iqqaqsiuk. 33Inuusirminik annirusuktuup inuusini asiujijumaaqpaa; inuusirminigli asiujijuup inuusini saputijumaaqpaa. 34Uqautivassi, tamanna nalliutikpat unnuami marruuk iglirmi atausirmi sinigumaaqpuuk; aippaa aullarujjaujumaaqpuq aippangalu qimaktauluni. 35Arnaak marruuk niqiksamik siqallisiqatigiigumaaqpuuk; aippaa aullarujjaujumaaqpuq, aippangalu qimaktauluni. [ 36Angutiik marruuk piruqsiivingmi pinasuaqatigiigumaaqpuuk; aippaa aullarujjaujumaaqpuq, aippangalu qimaktauluni.]”#17:36 Ijjujutuqait ilanginni pitaqanngilluni ilanginni ilijausimalluni. Takulugu Maatiusi 24:40

37Ilinniaqtingita apirivaat, “Ataniq nani?”

Jiisusiup uqautivait, “Nanituinnaq uumajumik tuqungajuqtaqaqtillugu tingmiarjuat niqitusuut kativakput.”

Currently Selected:

Luukasiup Aglangit 17: EAIBR

Highlight

Copy