Luukasiup Aglangit 16

Piji Isumaksaqsiuqsaraittuq

1Jiisusiup ilinniaqtini uqautivait, “Angummik ajuqsanngittuqtaqalauqpuq piqutiminut kamajiqutiqaqtumik, angajuqqaanga uqaujjauvuq piqutiminik pimajiqutinga kiinaujanginnik nungusaituinnarniraqtaulluni. 2Angajuqqaangata qaiquvaa uqautillugu, ‘Tusaqtara tamanna suliva? Kamagijatik piqutikka nalunaitsiarlugit qailikkit, piqutinnik kamajiujariaqarunniiravit.’ 3Tavva kamaji isumaliqpuq, ‘Qanurli pinialiqtunga? Angajuqqaama piqutiminik kamajiuqujunniirmanga, sanngiiluarama nunamik qalurarasugiaksaq, qinunasuariaksarlu inungnit kanngusuktlunga. 4Imaak pijumaliqpunga, iqqanaijaaksaqarunniiruma inuit angirranginnut tunngasuktitauqattarniarama!’ 5Taassuma angajuqqaaminut akiliksalit qaiquliqpait atausiunaaqtirlugit, sivulliqpaaq apirivaa, ‘Angajuqqaara qatsinik akiliksaqarvigiviuk?’ 6Taassuma kiuvaa, ‘Napaaqtuup piruqtungita uqsunginnik qattaujanik 100-nik,’ uqautivaa, ‘Uvvauna akiliksaqautiit inngillutit titiralirit 50-nik,’ 7amma asianik apirigivuq, ‘Ivvilli qatsinik akiliksaqaqpit?’ Taanna kiuvuq, ‘Niaquujaksanik puuqsimajunik 100-nik.’ Kamajiup uqautivaa, ‘Uvvauna akiliksaqautiit titiralirit 80-nik.’ 8Angajuqqaangata quviagililauqpaa taimaak silatujumik pinasuarmat; matuma silarjuap inungit silatuaqinasuarunnarniqsaungmata#16:8 Sanatuungugasuarniqsausuungungmata qaumajumiutanit, pijariaqaqtamingni pinasuaqtillugit.

9“Uqautivassi, ilannaaqarasuarissi silarjuarmiut ajuqsangijjutingit aturlugit, ajuqsalirussi tunngasuktitauqullusi angirraksassinut isuqanngittumut. 10Mikijukulungmik kamatsiaqtuq, angijunik kamatsiarunnaqpuq; mikijukulungnik kamatsianngittuq angijunik kamatsiarunnannginnivuq. 11Kamatsiaqsimanngikkuvit silarjuarmiut ajuqsanngijjutinginnik, qanurli taima ukpirijaujunnarajaqpit pillariuniqsanik pilirijunnarmangaaqpit? 12Piginngitarnik kamatitaulutit kamattiaqsimanninngikkuvit, qanurli nangminirijaksarnik pitaaqtitaujunnarajaqpit?

13“Piji angajuqqaangnik marruungni pijitsirunnanngimmat; aippanga uumigigajaqpaa aippangalu nagligilugu; uvvalu aippanga tunisimavigittiarlugu aippangalu narrugilugu. Atautsikkut pijitsiviqarunnanngilasi Guutimik kiinaujaniglu!”

Jiisusiup Ajuriqtuiningit

Maatiusi 11:12-13; 5:31-32; Maakusi 10:11-12

14Paarisit kiinaujanik pillariqutiqarami, tamatuminga tusaramik, Jiisusi mitautigivaat. 15Jiisusiup uqautivait, “Ilissi tavva inungnut naammagijautsiarasuaqpusi, Guutiulli uummatisi qaujimavait; inungnut niqtuqtaujut Guutimut atuutiqanngimmata.

16“Muusisiup piqujangit, nalauttaijullu aglangit atulauqput Juanasi Paaptitsiriji tikillugu; kinguningagut uqausit tusaruminaqtut Guutiup Ataniuvinganik uqausiqaqtut uqausiuliqput, unuqtualuit ajuinnarlutik itirasulirmata. 17Pijariakinniqsauvuq qilaglu nunarjuarlu nunguppatik, piqujani naanikuluulluunniit atausiup atuqtitaugajannginninganit.

18“Angut nuliaminik avitsillarikpat asianik nulianigluni, taassuma nuliarilauqtaniq asinniaqpaa, angullu arnamik avitaullariksimajumik nulianikpat taanna asinniarivu.”

Angut Ajuqsanngittuq Laasaruusilu

19“Ajuqsanngittungmik angutitaqalauqpuq annuraasimavaktumik annuraanik akituniqpaanik aupallariktunik, qautamaat nirivigjuaqtitsiinnaqtumik. 20Ajuqsatualuktaqalaurivuq Laasaruusimik atilingmik, taassuma timilimaanga ajuaqtualuk, taanna aatauqattaqpuq ajusanngittualuup iglungata isiriarvingata sanianut. 21Isumaqattalauraluaqpuq nirijumalluni ajuqsanngittuup nirivinganit kataktunik; aglaat qimminit ajuangit alukturiatuqtauvaglutik. 22Ajuqsaqtualuk tuqungmat aingilinit agjaqtauvuq Aiprahaam sanianut. Kinguningagut ajuqsanngittualuktauq tuqugivuq iluviqtaullunilu. 23Tuqungajut iningani aanniajualuulluni qaujiliqpuq, qummut takusarami Aiprahaam takuvaa ungasiktumiittuq, Laasaruusilu sanianiittuq. 24Qaigalaaliqpuq, ‘Ataataak Aiprahaam, nikagilaunnga, Laasaruusi tililauruk tikini misuglugu imirmut, uqannik niglitiriqulugu; aanniajualuugama uvani ikumaalungmi.’ 25Aiprahaam uqautivaa, ‘Irniik, iqqaumagit inuutillutit piujunik piqalauravit, Laasaruusili piunngittunik pititauqattalauqpuq; maanna maani quviasuliqpuq, ivvillu aanniaqtitauvutit. 26Suli akunnattinni itiqsaaluktaqarmat, maanngat ilissinnut ikaarumajut ajuqput, taimaaktauq ilissinnit ikaarumajut maunga ajurivut.’ 27Taanna uqaqpuq, ‘Tavvali ataataak Aiprahaam qinuvigivagit, Laasaruusi tililauruk ataatama iglunganut. 28Tallimanik qatanngutiqarama, taassuma uqautiniarmagit, uvunga aannianaqtumuaqunagittauq.’ 29Aiprahaam uqautivaa, ‘Qatanngutitit Muusisiup nalauttaijullu aglanginnik piqaqput taikkunanngat uqaujjaulirlit.’ 30Taassuma kiuvaa, ‘Aakka ataataak Aiprahaam; tuqungajumigli makittuqarluni uqaujjaujaqturutik qaqialirajaqput.’ 31Aiprahaam kiuvaa, ‘Muusisiup nalauttaijullu aglanginnik naalanngikkutik, ukpirusukkajannginnivut tuqungajumik makittuqaraluaqpat.’”

Currently Selected:

Luukasiup Aglangit 16: EAIBR

Highlight

Copy