Juanasiup Aglangit 5

Jiisusiup Aaqqiksininga Pisugunnanngittumik

1Tamatuma kinguningagut Jiisusi Jiruusalimmuaqpuq, Juutit nalliunniqsiurmata. 2Jiruusaliulli itiqtarvingani taijaujumi “Siipiit Itiqtarvinganik” qanigijaani tasikuluktaqaqpuq, tallimanik iglurusilingmik; Iipruutitut taijaujuq Pitistamik. 3Taakkunani iglurusirni inuit timimigut ajurutiliit amisut nalavut, tautunngittut, tusiattut, nukiqanngittullu. [Taakkualu utaqqivut imaup aulatitauniarninganik. 4Ataniup aingilinga tasirmuaqpangmat imanganik aulatitsijaqturluni. Nalliallu sivulliqpaulluni imaanuaqtuq aulatitaurataaqtillugu aaqqiktauvalauqput qanuittutuinnarmik qanimmasiqaraluaqpat.]#5:4 Ijjujutuqait ilanginni pitaqanngilluni ilanginni ilijausimalluni 5Tavvanili angutitaqaqpuq, arraagunik 38-nik qanimmasilingmik. 6Jiisusiup nalajuq takugamiuk, qaujimagamiuglu akunialuk qanimalluni tavvani nalangmat, uqautivaa, “Aaqqiktaujumavit?”

7Qanimajuup kiuvaa, “Ataniq, ikajuqtiksaqaqattannginnama imaanuaqtitsijiksannik imaq aulatitaujaraangat, imaanuarasuliqtillunga sivuliuqtauqattaqpunga.”

8Jiisusiup uqautivaa, “Makigit, nalaviit tigulugu, pisulirit.” 9Tavvatsainnaq angut aaqqiktauvuq, nalavvini tigulluniuk, pisuliqpuq.

Ullurli taanna Sapatiuvuq. 10Tavva Juutit angajuqqaangita angut aaqqiktaurataaqtuq uqautivaat, “Ullumi Sapatiuvuq, piqujattinnik naalanngilatit nalaviit agjaraviuk.”

11Taannali taakkununga kiuvuq, “Angutiup aaqqikkaminga uqautiqqauvaanga, ‘Nalaviit tigulugu pisulirit.’”

12Taakkua apirivaat, “Kina ilingnut taimaak uqaqpa, ‘Nalaviit tigulugu pisulirit’?”

13Aaqqiktaujuulli Jiisusi qaujimalaunngilaa kinaungmangaat, tavvani inulialuulaurmat, Jiisusi tavvanngat nuugiilaurmat.

14Kinguningagut, Jiisusiup katigamiuk tuksiarvigjuarmi, uqautivaa, “Takugit, maanna qanuinngitsialiqputit! ajuqtulikkannirunniirit, piunnginniqsamut tikitauqunak.”

15Angut tavvanngat qimaruutigami Juutit angajuqqaangit uqautivait, aaqqiksilauqtuq Jiisusiuninganik. 16Taimaimmat Juutit Jiisusi akiraqtuliqpaat, aaqqiksilaurmat Sapatiutillugu. 17Jiisusiup kiuvait, “Ataataga taimanngat maannamut pinasuaqpuq, uvangalu pinasuarivunga.”

18Taimaimmat Juutit angajuqqaangita Jiisusi tuqutauviksaqsiukkanniliqpaat, Sapatimi piqujamik naalalaunnginninga pijjutigituinnarnagu, uqaqsimaninganulli Guutimik nangminirillugu Ataataqarnirarmat, Guutimik imminik taimailluaqaqtiqarasungniraqtlunijjuk.

Irniup Pijunnarniqaqtitauninga

19Jiisusiup uqautivait, “Sulijumik uqautivassi, Irniq iminiinnaq pinasuarunnanngilaq, pinasuaqpurli Ataataup pinasuaqtanginnik takujaminik, Ataataup pinasuaqtanga Irningatattauq pinasuarivaa. 20Ataataup Irnini nagligivaa, nangminirlu piniarnilimaani qaujimajautippait taassumunga; sulilu piniarnirnik pillariuniqsanik tamakkunangat qaujitinniaqpaa, ilissilu kamaniarutiginiaqpasi. 21Suurluttauq Ataataup tuqungajut makitimmagit uummaqtillugillu, taimaaktauq Irniq uummaqtitsivuq uummaqtittumajaminik. 22Ataata iqqaqtuinngilaq kinamigluunniit, Irninili iqqaqtuijunnarnirmik tunisivigisimavaa. 23Irniq tamainnut upigijautsiaqullugu, suurlu Ataata upigijautsiarmat. Irnirmik upigusunngittuq Ataatamiktauq upigusunngilaq tilijinganik.

24“Sulijumik uqautivassi, uqausinnik tusaqtuq ukpirilugulu tilijiga, taanna inuusiqaqpuq nungusuittumik; iqqaqtuqtaujjaananilu, tuqumilli nuktiqsimaliqpuq inuusirmut. 25Sulijumik uqautivassi, ikarraq nalliutiniaqsimajuq nalliutijariiqpuq, tuqungajut Guutiup Irningata nipinganik tusarvingat, tusaqtut taakkua inuuniaqput. 26Suurlu Ataata nangminiq inuusiqarmat immikkut, taimaaktauq Irnini tunisivigivaa inuusiqaqullugu immikkut. 27Irnini tunisivigivaa pijunnarnirmik iqqaqtuijunnaqullugu, Inuup Irniringmagu. 28Tamanna kamaniarutiginasiuk; ikarraq nalliutijumaarmat tuqungajut iluvirmiittut iluunnatik nipinganik tusarumaarmata. 29Iluvirmit anilutik, piujumik inuusiqalauqtut, makittumaaqput inuunialirlutik, piunngittumigli inuusiqalauqtut, makittumaaqput iqqatuqtaunialirlutik.”

Jiisusimik Nalunaiqsiniq

30“Uvanniinnaq pijunnarninnut sunamigluunniit pinasuarunnanngilanga; Guutimit tusaqtakka maliglugit iqqaqtuivunga; taimaimmat iqqaqtuinira ajjigiiktitsivuq, nangminiq pijumajannik pinasuannginnama tilijimali pijumajanganik pinasuaqpunga.

31“Uvanga nangmininnik nalunairasuaruma, nalunaiqsinira suligajanngilaq; 32asigali uvannik nalunaiqsivuq, qaujimavungalu uqausiqarninga uvannik sulitsiarmat. 33Apirijaqtuqtitsilauqpusi Juanasimut, taanna nalunaiqsilauqpuq sulijumik. 34Nalunaiqtaunira inungmit pinngilaq; tamannali uqausirivara piulijauqullusi. 35Taanna naniruatitut ikumalluni qaumajutitut taimaippuq, ilissi sivikittumik quviasuutiqarumalauqpusi taassuma qaumaninganik. 36Uvangali nalunaiqsiniqaqpunga Juanasiup nalunaiqsininganit anginiqsamik; piniarniit piniarnirijakka, Ataatama qailauqpait uvannut pinasuaqtauqullugit, tamakkua pinasuarniit uvannik nalunaiqsivut saqqititsillutiglu Ataatamut tilijausimaninnik. 37Ataatalu tilijiga uvannik nalunaiqsivuq. Taassuma nipinga tusalauqsimanngitasi, qanuittuuningalu takulauqsimanagu; 38uqausingaluunniit ilumiutarinngilasi, taassuma tililauqtanga ukpirinnginnassiuk. 39Aglangnik qiniqpusi, inuusirmik nungusuittumik piniarasugillusi taakkunangat; taakkuali uvannik nalunaiqsivut; 40uvannulli qaijumanngilasi inuusiqtaarvigijunnaqtassinnut.

41“Inungnut niqtuqtaunasuanngilanga. 42Qaujimavungali Guutiup naglingninganik ilumiutaqannginnassi. 43Ataatama atingagut tikilauqpunga, ilissili ilaliunngilassinnga; asigali tikippat nangminiq pijunnarnirmigut, taanna ilaliurajaqpasi. 44Qanuq ukpirunnaqpisi? Inuuqatissinnut niqtuqtaujumanirmik pinasuaqattarlusi Guutimullu niqtuqtauniksatuaq qinirnagu. 45Isumaniarasi Ataataup saangani pasiksirniarasugilunga ilissinnik; Muusisiulli niriungnirmik tunngaviqarviginasuaqtassi, taassuma pasijumaaqpaasi. 46Muusisi ukpirigussiuk, uvannik ukpirajaqpusi, taanna uvannik titirausiqalaurmat. 47Taassumali titiralauqtangit ukpirinngikkussiuk, qanurli uqausirijannik ukpirusugajaqpisi?”

Currently Selected:

Juanasiup Aglangit 5: EAIBR

Highlight

Copy