Juanasiup Aglangit 4

Jiisusiup Uqaqatiqarninga Arnamik Samiariarmiutarmik

1Jiisusili qaujiliqpuq Paarisit tusaumalirmata Jiisusiup ilinniaqtitaaqattalirninganik paaptitsiqattaninganiglu unurniqsanik Juanasimit. 2Jiisusili nangminiq paaptitsilaunngittuugaluaq, ilinniaqtingilli kisimi paaptitsiqattalauqput, 3tavva Jiisusi Juutiamit aullaqpuq Galiliamullu utilirluni. 4Aqqutaanili aqqusaaqsijariaqaqpuq Samiariamik.

5Nunalingnut Samiariamiittumut Saikarimik atilingmut tikippuq, piruqsiivingmut Jaikuup irnirminut Juusipimut tunilauqtangata qanigijanganiittumut. 6Jaikuup imiqtarvinga tavvaniippuq, Jiisusi pisungnirminut mirnguqturami, imiqtarviup sanianut ingippuq. Ulluq qitiraliqtillugu.

7Samiariamiutaq arnaq tavvunngaqpuq imiqtarluni. Jiisusiup uqautivaa, “Imiqtilaunnga.” 8Ilinniaqtingilli nunalingnut niqiksanik niuviriaqsimavut.

9Arnaup kiuvaa, “Juutiugavit, Samiariarmiutaugama sungmat uvannut imiqtitaujumavit?” Juutit Samiariarmiunik inuuqatiqarumanngimmata.#4:9 Uvvaluunniit tukiqarmijuq Juutit qallutimik puugutarmiglu taassumingatsainnaq aturunnanngimmata Samiariarmiut atuqtavinirikpagu

10Jiisusiup kiuvaa, “Qaujimaguvit Guutiup tunirrutaanik, kinaungmangaallu ilingnut imiqtitaujumajuq, tunisiviujumagajaqputit taassumunga, taassumalu tunisivigigajaqpaatit imirmik inuusiqarnaqtumik.”

11Arnaup uqautivaa, “Qallutiqanngilatilluunniit, una imiqtarvik unungaaluungangmat; nakilli imirmik inuusiqarnaqtumik pigajaravit? 12Anginiqsauvit sivulittinnit Jaikumit? Jaikuup una imiqtarvik tunilaurmagu uvattinnut, nangminirlu qiturngangillu uumajuqutingillu tavvanngat imiqattalauqput.”

13Jiisusiup uqautivaa, “Nalliat tavvanngat imirmit imiqtuq imirulirniarivuq, 14nallialli imirmik tunijannik imirniaqtuq imirulikkannirnianngilaq; imiq tuniniaqtara taassumunga iluanit kuulirniaqpuq inuusiqarnaqtumik nungusuittumik.”

15Arnaup uqautivaa, “Imirmik tamatuminga tunisiviginnga, imirukkannirniarunniirama, imiqtarvingmullu uvunga imiqtariaqaqattarniarunniirama.”

16Jiisusiup uqautivaa, “Angirralirit uit qaiqujaqturlugu, uvunga utirniarmigavit.”

17Arnaup kiuvaa, “Uiqanngilanga.”

Jiisusiup kiuvaa, “Sulivutit uqaravit, ‘Uiqanngilanga’; 18uiniqattaqsimagavit tallimaiqturlutit, maannalu angut najuqtigijait uigillarinnginnaviuk; sulillutit tamatuminga uqaqputit.”

19Arnaup uqautivaa, “Qaujivunga nalauttaijuugavit. 20Sivulivut uvani qaqqami Guutimut tuksiaqattalauqput; ilissili Juutiujusi uqaqpusi Jiruusalimmi kisiani Guutimut inuit tuksiariaqarnirarlugit.”

21Jiisusiup uqautivaa, “Arnaaq ukpirinnga, nalliutijumaaqpuq inuit tavvani qaqqami Jiruusalimmiluunniit Ataatamut tuksiaqattarunniirviksangat. 22Tuksiarvigijasi qaujimannginnasiuk; uvagulli qaujimavugut tuksiarvigijattinnik, Juutinit piulijauniq pingmat. 23Nalliutijumaaqpurli, maannalu nalliutisimaliqpuq, Ataatamut tuksiaqtut sulitsiaqtumik tuksiaqattalirviksanngat, Anirnikkuurlutik sulitsiaqtumik, Ataata taimanna tuksiaqattarunnaqtunik qinirmat. 24Guuti Anirniungmat, taassumunga tuksiaqtut Anirnikkuurlutik sulitsiaqtumik tuksiaqattaqtuksaungmata.”

25Tavva arnaup uqautivaa, “Qaujimavunga Misaia, Christuusimik taijaujuq, tikittumaarmat; tikikkunilu, taassuma tukisitittumaaqpaatigut sunalimaanik.”

26Jiisusiup kiuvaa, “Taannauvunga uqaqatigijait.”

27Taimaak suli uqaqtillugu ilinniaqtingita tikippaat. Kamammarikpullu Jiisusiup arnamik uqaqatiqarninganik, nalliannigluunniit apirijuqanngilaq arnamut “Sunamik pijumavit?” Uvvalu, Jiisusimut apirijuqanngilaq, “Sungmanuna arnaq uqaqatigiviuk?”

28Tavva arnaup imiqtautini qimagluniuk, nunalingnut utiqpuq, inuit tavvaniittut uqautivait, 29“Qailusi angut takujaqtuqsiuk pinialauqsimajalimaannik uqaujjijigijara. Christuusiunngimmangaat.” 30Tavva inuit nunalingnit pillutik Jiisusiup najuqtanganuaqput.

31Tikilauqtinnagilli Jiisusi ilinniaqtingita uqautivaat, “Ajuriqtuiji, nirikainnarit.”

32Jiisusiulli kiuvait, “Nirijaksaqaqpunga qaujimanngitassinnik.”

33Tavva ilinniaqtingit immingnut uqaqattautiliqput, “Unaa niriniaqtanganik tunisiviujuviniq?”

34Jiisusiup uqautivait, “Nirijaksakka tavva tilijima pijumajanganik naalaglunga, pinasuaqtauqusimajangalu pijariirlugu. 35Uqaqpanngilasi, ‘Taqqiit suli sitamauvut, taakkua naakpata katiqsuiviqalaarniaqpuq?’ Uqautivassili, piruqsiivik takutsialauqsiuk; piruqtut piruriiqput qakuqsillutik katiqsuqtautuinnariaqaliqput. 36Nakatirijurli akiliqtauniaqpuq, katiqsuilluni piruqtunik inuusirmut nungusuittumut; tavva kanngaqsuijuq katiqsuijurlu taimaak quviasuqatigiingniaqpuk. 37Uqausiuvaktuq sulivuq imailijuq; ‘Inuk kanngaqsuivuq, asiali katiqsuivuq.’ 38Tililauqpassi piruqsiivingmi katiqsuiqullusi piruriiqtunik pinasualaunngitassinnit; asisi aksururlutik pinasualauqput, ilissilu pinasuaqsimajanginnik pinasualiqpusi.”

39Samiariarmiulli amisut nunaliit tavvani Jiisusimik ukpirusukput arnaup uqalauninga pillugu, “Pinialauqsimajalimaannik uqaujjijigijara.” 40Taimaimmat taakkua Samiariarmiut Jiisusimut tikiutigamik, ajuinnaariliqpaat siniktarviujumallutik; Jiisusi ulluungnik marruungnik tavvani ullivuq.

41Unurniqsailli ukpiliqput uqausingit pijjutigillugit. 42Arnamut uqaqput, “Maanna ukpiliqpugut uqausiqtit pijjutigituinnarnagit, uvagulli nangminiq tusarattigu, tukisillutalu ilaak taanna sulijumik piulijiungmat silarjuarmiunut.”

Jiisusiup Aaqqiksininga Angajuqqaap Irninganik

43Ulluuk marruk anigurmatik Galiliamut aullaqpuq. 44Jiisusi nangminiq uqalaurmat, “Nalauttaijuq nunatuqarmini upigijaunngimmat.” 45Galiliamulli tikimmat, Galiliamiut tunngasuktippaat, takulauramik Jiruusalimmi nalliunniqsiuqtillugit Jiisusi pinasuaqtillugu, taakkuattauq tavvaniilauramik.

46Kinguningagut Jiisusi Kainamut Galiliamiittumut tikikkivuq, imirmik uaininnguqtitsivigilauqtaminut. Kapiirniamilu angajuqqaap ilangatta irninga qanimavuq. 47Taanna tusarami Jiisusi Juutiaminngaarluni Galiliamut tikimmat, upakpaa ajuinnarlunilu Kapiirniamuaquvaa irninganik aaqqiksiqullugu, tuqutuinnariaqarluni qanimangmat. 48Jiisusiup uqautivaa, “Nalunaikkutarnik kamanaqtuniglu takunngikkussi ukpirumanngilasi.”

49Angajuqqaap uqautivaa, “Uvattinnualaurluk qiturngara tuqunnginningani.”

50Jiisusiup uqautivaa, “Angirralirit; irniit inuuniaqpuq.”

Angut Jiisusiup uqausinganik ukpirusukkami angirrasivuq. 51Angirauliqtillugu pijingita paaqpaat uqautillugu, “Irniit qanuittunniiqpuq.”

52Tavva apirivait qatsinnguqtillugu irninga piusivalliasilaurmangaat, taakkua kiuvaat, “Ippaksaq 1-muaqtillugu uutirnarunniilauqpuq.” 53Ataatangata qaujivaa tavvani ikarrami Jiisusiup uqautilaurmagu, “Irniit inuuniaqpuq”; imminiglu iglumiuqatilimaangillu ukpiliqput.

54Tamanna tavva Jiisusiup nalunaikkutangata aippanga Juutiaminngaarluni Galiliamuaqsimaningata kinguningani.

Currently Selected:

Juanasiup Aglangit 4: EAIBR

Highlight

Copy