Juanasiup Aglangit 3

Jiisusilu Nikutimuusilu

1Angutitaqalauqpuq Paarisiuqataujumik, Nikutimuusimik atilingmik, Juutinut angajuqqauqataujuq. 2Taanna unnuakkut Jiisusimuaqpuq uqautillugu, “Ajuriqtuiji, qaujimavugut Guutimit pisimallutit ajuriqtuijiugavit; iliktut tatannaqtunik pijuqarunnanngimmat, Guutiup najunngippagu.”

3Jiisusiup kiuvaa, “Sulitsiaqtumik uqautivagit, nutaamik irniangunngittuup, Guutiup ataniuvinga takujunnanngilaa.”

4Nikutimuusiup uqautivaa, “Qanuq inuk piruriiqsimalirluni irniangukkannirunnaqpa? Anaanami iglianganut itikkannirunnaqpa irniangukkannirlunilu?” 5Jiisusiup kiuvaa, “Sulitsiaqtumik uqautivagit, nutaamik irniangunngittuq imarmut Anirnirmullu Ijjurnaittumut, Guutiup ataniuvinganut itirunnanngilaq. 6Timimit irniangujuq inutuinnauvuq timiqarluni, anirnirmilli irniangujuq Anirnikkut inuuliqpuq. 7Kamaniarutiginagu uqautigakkit, iluunnasi irniangukkanniriaqaqpusi. 8Anuri namutuinnaq anuraarvigijumajaminut anuraaqpakpuq; suluksurninga tusaagaluaqpat, qaujimanngilatilli nakit pingmangaat namullu aingmangaat; taimaikkivuttauq Anirnirmit irniangujut.”

9Nikutimuusiup uqautivaa, “Qanurli tamanna taimaigunnaqpa?”

10Jiisusiup kiuvaa, “Isarialaitini ajuriqtuijiuvit, tamannalu qaujimanagu? 11Sulitsiaqtumik uqautivagit, qaujimajattinnik uqasuunguvugut, takulauqtattinniglu unikkaarluta; uqausirijattinnigli ukpinngilasi.

12“Nunaup pinginnik uqausiqaqtillunga ukpirusunngikkuvit; qanurli ukpirusukkajaqpit qilaup pinginnik uqautigajarukkit? 13Qilaliaqtuqalauqsimanngilaq, qilangmit aqqaqtuq kisimi, tavva Inuup Irninga.

14“Suurlu Muusisiup quglugiannguaq nappaqtilaurmagu inuqanngittumi, taimaaktauq Inuup Irninga nappaqtaujariaqaqpuq, 15kinatuinnaq ukpiqtuq taassumunga inuusiqaliqullugu nungusuittumik. 16Guutiup silarjuarmiut nagligillarikkamigit Irnituani tunilauqpaa, tamarmik taassumunga ukpiqtut asiuqunagit nungusuittumigli inuusiqaqullugit. 17Guutiup Irnini tililaunngimmagu silarjuarmut, silarjuarmiunik igitaksannguqtitsiqulugu, silarjuarmiulli piulijauqullugit taassumuuna.

18“Nalliat taassumunga ukpiqtut iqqaqtuqtaunngilat; nallialli taassumunga ukpinngittut iqqaqtuqtauliriiqput, Guutiup Irnituangata atinganut ukpinginnamik. 19Iqqaqtuqtauniq imailingavuq, qaumajuq silarjuarmut tikisimavuq, inuit taarjuaq ungaginiqsarivaat qaumajumit, piniarningit piunngittuliniungmata. 20Piunngittulijuup qaumajuq uumigivaa, qaumajumuarumananilu, piunngittuliningit saqqititauqunagit qaumajumut. 21Sulijumigli piniarniqaqtuq qaumajumuaqpuq, piniarningit saqqititautsiaqullugit qaumajumut Guutimit pisimangmata.”

Juanasi Paaptitsirijiup Nalunaiqsininga Jiisusimik

22Tamatuma kingurngagut Jiisusi ilinniaqtingillu Juutiamuaqput; tavvani pinasuaqatigivait paaptitsillunilu. 23Juanasittauq paaptitsivuq nunami Ainanimi Salimmiup qanigijanganiittumi, tavvani imaqarmat amiganngittumik; inuillu tavvunngaqput paaptitaullutiglu. 24Juanasi suli tigujaulauqtinnagu.

25Juutilli ilangat Juanasiup ilinniaqtinginnik aivaqatiqaliqpuq ukpirnikkut salummaqtaunirmik pijjutiqarlutik. 26Tavva ilinniaqtingita Juanasi upakpaat uqautillugulu, “Ajuriqtuiji, angut Juartaniup kuungata akiani ilingnualauqtuq, uqausiriqattaqtait, taanna paaptitsiqattaliqpuq, inulimaallu taassumunngaqattaliqput.”

27Juanasiup kiuvait, “Inuk nalliat imminiinnaq pitaarunnanngilaq Guutiup tunisivigikpagu kisiani piniarunnaqpuq. 28Ilissi nangminiq qaujimajigivassi uqalaurama, ‘Christuusiunngilanga, tilijausimavungali taassumanngat sivuliuqullunga.’ 29Uiksaq taannauvuq nuliaksamik nangminilik; uiksaulli piqannarijangata, saniani nangiqtuup tusaqtuullu, quviasugutigivaa uiksaup nipinganik tusarami; taimaak tavva uvanga nangminiq quviasungnira naammaksitsiaqpuq. 30Taanna angiglivalliajariaqaqpuq, uvangali mikiglivalliajariaqaqpunga.”

Taanna Tavva Qilangmit Tikittuq

31Tappaanngat tikittuq tamainnik pillariuniqpauvuq; nunamit pijuq nunamiutauvuq, nunaullu pinginnik uqausiqarluni, qilangmilli tikittuq tamainnit pillariuniqpauvuq. 32Takulauqtaminik tusalauqtaminiglu uqausiqaqpuq, nalliattaluunniilli taassuma uqausirijangit ilaliunngilait. 33Nalliat taassuma uqausinginnik ilaliuqsijuq qularnanngittumik qaujivuq, Guutiup sulitsiarninganik. 34Guutiup tilisimajanga Guutiup uqausinginnik uqausiqaqpuq, Guutiup Anirnirminik tunisivigingmagu amiganngittumik; 35Ataataup Irnini nagligivaa, tamaittalu tunilauqpait taassuma pijunnarninganut. 36Nalliat taassuma Irninganut ukpiqtuq inuusirmik nungusuittumik piqaqpuq; nallialli taassuma Irninganik ilaliuqsinngittuq inuusirmik takunianngilaq, Guutiulli ninngausingata qulangianginnaqpaa.

Currently Selected:

Juanasiup Aglangit 3: EAIBR

Highlight

Copy