Juanasiup Aglangit 6
6
Jiisusiup Nirititsininga 5,000-nik
Maatiusi 14:13-21; Maakusi 6:30-44; Luukasi 9:10-17
1Tamatuma kingurngagut Jiisusi ikaaqpuq Tasiup Galiliap akianut (taijaujumut, Taipiuriasiup Imanganik). 2Inugasagjuat malikpaat, nalunaikkutarnik takulauramik qanimajunik aaqqiksitillugu. 3Jiisusili qaqqamut majurarami, qaanganut ingippuq ilinniaqtini ilagillugit. 4Juutilli Qaangiqtauvingmik Nalliunniqsiurvingat qagliliqpuq. 5Jiisusi takusarami, takuvuq inugasagjuanik qailiqtunik imminut, Pilippuusimut uqaqpuq, “Qanurli niuvirunnarniaqpita ukua nirijaksanginnik?” 6Jiisusi taimaak uqaqpuq Pilippuusi qaujisarluniuk, qaujimagaluarluni qanuiliurunnarnirminik.
7Pilippuusiup kiuvaa, “Siulvirinik 200 ungataaniittunik aturiaqarajaqpugut taakkuninga nirititsinasukkutta mikijukulungmigluunniit atunit pigaluaqpata.”
8Ilinniaqtingita ilangat, Aanturuu Saimuuniup Piitturuusiup nukanga, uqaqpuq, 9“Uvani nukappiaqtaqaqpuq niaquujanik tallimanik iqalungniglu marruungnik taquaqaqtumik; kisianili inugiaraalungnut taakkua sunaunngilat.”
10Jiisusiup uqautivait, “Inuit ingiqulauqsiuk,” tamanna najuqtangat nuna iviksugajaangungmat; tavva inulimaat ingipput, taakkua 5,000 qanigijaaniipput. 11Jiisusiup niaquujait tiguvait, qujalijjutigijariiramigillu, iksivajunut tuniuqaqtauquvait; taimaaktauq iqaluit qujalijjutigillugit tunigivait, naammaksillutik nirivut. 12Aqiattuqtuinnaungmata, ilinniaqtini uqautivait, “Amiakkugijaujut katiqsuqsiuk, mikijumigluunniit tamaungatuinnaatuqaqunagu.” 13Tavva amiakulimaanik katitsigamik iviujanik 12-nik tataivut amiakkugijaujunik niaquujanit tallimanit, inuit nirilauqtanginnit.
14Inuilli nalunaikkutarmik takugamik, Jiisusiup pinasuaqtanganik uqaqput, “Taanna qularnarunniiqpuq Nalauttaijungmat silarjuarmut tikiniaqsimajuq!” 15Jiisusi qaujigami inuit qanuiliurumaninginnik, tigulugu angajuqqaarjuannguqtitsinasuarumalirmata pijumanngigaluaqpat, taakkunanngat qimaruutilluni qaqqamut majuraqpuq inutuulluni.
Jiisusiup Pisungninga Imaup Qaangagut
Maatiusi 14:22-33; Maakusi 6:45-52
16Unnungmalli, Jiisusiup ilinniaqtingit tasirmuaqput, 17umiamut ikillutik, utirasualiqput Kapiirniamut. Taaqsingmat, Jiisusiup suli upalaunngimmagit. 18Anuraaliqtualuungmat imaq malliliqpuq. 19Ilinniaqtit iputtlutik ingirraliraluaqtillugit immaqaa pingasunik sitamanigluunniit mailinik, takuliqput Jiisusimik imaup qaangagut pisuktumik umiamut qagliliqtumik. Kappiasuliqput, 20Jiisusiup uqautivait, “Uvangauvunga kappiasungnasi!” 21Tavva umiamut ikiquliqpaat, akuniunngittuq nunamut tikipput upagasuaqtamingnut.
Inuit Qinirningat Jiisusimik
22Qautillugu inugasagjuat tasiup akianiittut takuliqput umiaq atausiungmat, qaujilaurlutiglu Jiisusi umiamut ilinniaqtiminut ikiqataulaunngimmat, ilinniaqtingilli umiaqtusilaurmata taakkutuullutik. 23Umialli asingit, Taipiriasimit pijut nunamut tulagiaqtuliqput, Ataniup niaquujanik qujalijjutiqalaurluni nirititsivigilauqtangata qanigijaanut. 24Inugasagjualli qaujigamik Jiisusi tavvaniinngimmat, ilinniaqtingillu tavvaniimminatik, umiamut ikivut Kapiirniamullu umiaqtuliqput, Jiisusimik qinirlutik.
Jiisusiup Niaquujaunirarninga Inuusiqtalik
25Inuit Jiisusimik nanisigamik tasiup akiani, uqautivaat, “Ajuriqtuiji, qanga tamaunngaqpit?”
26Jiisusiup kiuvait, “Sulijumik uqautivassi; qiniqpassinnga nalunaikkutait takulauqtasi pijjutiginagit, nirilaurassili niaquujanik aqiatturlusi pijjutiqaqpusi. 27Niqiksamik nungusaraittumik pinasuarniarnasi, niqiksamigli pinasualirissi inuusiqtaarnaqtumik nungusuittumut, Inuup Irningata tuniniaqtanganik ilissinnut; taanna Guutiup Ataataup nalunaikkusiqsimangmagu naammaksarnirminik.”
28Tavva apirivaat, “Qanuq pinasuaqtuksauvita? Guutiup pinasuaqtauqujanganik pinasuarunnaqulluta?”
29Jiisusiup kiuvait, “Tavva Guutiup imaak piquvaasi; ukpiqullusi tilijanganut.”
30Taakkua kiuvaat, “Tavva qanuittumik nalunaikkutaqarniaqpit uvagut takuluta, ilingnut ukpiliqulluta? Qanuiliurniaqpit? 31Sivulivut maanamik niqiksamik nirilauqput inuqanngittumi; aglangni uqaqsimangmat, ‘Niaquujamik qilangmit pijumik niritilauqpait.’”
32Tavva Jiisusiup uqautivait, “Sulijumik uqautivassi, Muusisiup niaquujamik qilangmit pijumik tunisivigilaunngilaasi; Ataatamali niaquujamik niqiksallaringmik tunisivigivaasi qilangmit pijumik. 33Tavva Guutiup niaquujaqutinga taannauvuq qilangmit tikittuq, inuusirmiglu tunisijuq silarjuarmiunut.”
34Taakkua uqautivaat, “Ataniq, niaquujamik taassuminga tunisivigitigut piqattainarniaqtattinnik.”
35Jiisusiup uqautivait, “Uvanga niaquujauvunga inuusiqarnaqtuq; uvannut qaijuq kaalirnianngilaq, uvannullu ukpiqtuq imirulauqsimanianngilaq. 36Maannali uqautigaluarassi uvanniglu takusimalirlusi ukpirinngilassinnga. 37Ataatama tunijjutigijalimaangit uvannuarniaqput, uvannuaqtuniglu qujanaaqsinianngilanga. 38Qilangmit tikilaurama, pijumajannik pinasuariaqturnanga, taassumali tilijima pijumajanganik pinasuariaqturlunga. 39Taassuma tilijima pijumajanga tamajja, uvannut tunisimajanginnik asiujiqunanga, uummaqtitsiqullungali ulluit kingulliqpaanganni. 40Tamajja Ataatama pijumajanga, Irninganik takujulimaat ukpilirlutiglu taassumunga inuusirmik nungusuittumik piqaqullugit; uvangalu uummaqtittumaaqpara ulluit kingulliqpaanganni.”
41Juutilli akauksarunniiqput taassuminga, uqarninga pillugu, “Uvanga niaquujauvunga qilangmit tikisimajuq.” 42Tavva uqaqput, “Una Jiisusiunngilaq Juusipiup irninga, ataatanga anaanangalu qaujimanngilavut? Qanuimmalliuna uqaliriva ‘Qilangmit tikisimavunga’?”
43Jiisusiup kiuvait, “Akauksanngillusi ilissinnut uqaqattautinngilaurissi. 44Uvannut qaijuqarunnanngilaq Ataataup tilijima uvannuaqtingippagu; uvangalu uummaqtittumaaqpara ulluit kingulliqpaanganni. 45Nalauttaijutigut titiraqsimavut, ‘Tamarmik ajuriqtuqtaujumaaqput Guutimut.’ Nalliat Ataatamik tusaqtuq, taassumanngallu ilinniarluni taanna uvannut qaivuq. 46Ataatamik takulauqsimajuqanngilaq; Guutimilli pijuup kisimi Ataata takusimavaa. 47Sulijumik, sulijumik uqautivassi; uvannut ukpiqtuq inuusiqaqpuq nungusuittumik. 48Uvanga inuusiup niaquujarivaanga. 49Sivulisi maanamik nirilauqput inuqanngittumi, kisianili tuqulauqput. 50Niaquujarli taannauvuq qilangmit tikittuq; nalliat tavvannga nirijuq tuququnagu. 51Uvanga niaquujauvunga uumajuq qilangmit pisimajuq; kinatuinnaq tavvanngat niaquujatuqtuq, inuusiqalirniaqpuq isuqanngittumut; niaquujarlu tuniniaqtara inuusiqaliqtitsijunnaqpuq silarjuarmiunik, taanna tavva timiga.”
52Tavva Juutit immingnut akiraqtuutiliqput, uqarlutik, “Qanuq uuma timiminik niritittumavaatigut?”
53Tavva Jiisusiup uqautivait, “Sulijumik uqautivassi, Inuup Irningata timinganik nirinngikkussi aunganiglu iminngikkussi, inuusiqarunnanngilasi ilussinniittumik. 54Timinnik nirijuq aunniglu imiqtuq nungusuittumik inuusiqaqpuq, uvangalu uummaqtittumaaqpara ulluit kingulliqpaanganni. 55Timiga niqiksallariuvuq, augalu imiksallariulluni. 56Nalliat timinnik nirijuq, aunniglu imirluni taanna uvanniippuq, uvangalu taassumaniillunga. 57Ataataup uumajup tilisimangmanga, uvangalu inuuvunga Ataataga pillugu, taimaaktauq uvannik nirijuq inuuniaqpuq uvanga pillunga. 58Taanna niaquujaq qilangmit tikittuq, sivulisili nirilauqtangatituunngilaq nirigaluaramik tuqulauqtutitut; niaquujamigli taassuminga nirijuq inuuniaqpuq isuqanngittumut.”
59Jiisusi tamakkuninga uqausiqalauqpuq Juutit ukpirnirmut katimavinganni, Kapiirniamiittumi ajuriqtuilluni.
Uqausit Inuusirmik Nungusuittumik
60Jiisusiup ilinniaqtingit amisut, tamakkuninga tusaajut uqaqput, “Uqausit taakkua nalunaluaqput, kiali tukisijunnaqpait?”
61Jiisusi qaujimagami ilinniaqtingit uqausirnut tamakkununga akauksarunniirmata, uqautivait, “Tamakkununga uqausirnut sapiliqpisi? 62Qanurli isumavisi Inuup Irninga takugajarussiuk qummualiqtillugu sivurngani inigilauqtaminut? 63Anirniq Inuusiqtaaqtitsivuq; timiup pijunnarninga ikajurunnanngilaq tamatumunga; ilissinnut uqausirijakka anirniuvut inuusiullutiglu. 64Akunnassinniittuqaqpurli ilagijassinnik ukpirusungniqanngittumik.” Jiisusi pigiarninganit qaujimatsialaurmat nalliangungmangaat ukpirusunngittuq, nalliattalu pijaukkarumaarmangaagu. 65Jiisusi uqaqpuq, “Tamanna pijjutigillugu uqautilauqpassi uvannuaqtuqarunnanngilaq Ataatamut pijumaniqtaaqtitaunngikkuni.”
66Tamanna pijjutigillugu Jiisusiup maliktingit amisut Jiisusi qujanaaqpaat ingirraqatigijumairlugu. 67Tavva Jiisusiup ilinniaqtini 12 apirivait, “Ilissittauq uvannik qimaijumavisi?”
68Saimuuni Piitturuusiup kiuvaa, “Ataniq, kinamigli maligaksaqarniaratta? Uqausiqarunnaqtututillutit inuusiqarnaqtunik isuqanngittumut. 69Ukpilirlutalu qaujivugut Guutiup Ijjurnaittuqutigingmatit.”
70Jiisusiup kiuvait, “Ilissi 12-ngulusi nirualaunngilassi? Ilassili ilangat Saataanasiuvuq.” 71Juutasimik uqausiqalauqpuq Saimuuni Iskariatiup irninganik, Juutasi Jiisusiup ilinniaqtinginnut 12-nut ilagijaugaluarluni, kinguningagut Jiisusimik pijautitsijumaarmat.
Currently Selected:
Juanasiup Aglangit 6: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
