Juanasiup Aglangit 21
21
Jiisusiup Saqqinninga Ilinniaqtinut 7-nut
1Tamatuma kingurngagut Jiisusi saqqikkannilaurivuq ilinniaqtiminut Taipiuriasiup tasirjuangata saniani; imaak piniarniqarluni saqqilauqpuq. 2Katinngalauqput ukua Saimuuni Piitturuusi, Tuumasilu Marruliavinirmik taijaq, Naatanailu Kainamit Galiliamiittumit pisimajuq, Sipitiullu irningik marruuk, asingiglu marruuk Jiisusiup ilinniaqtingik. 3Saimuuni Piitturuusiup ilani uqautivait, “Iqallialirama.”
Taakkua uqautivaat, “Ilaginiaqpattigit.” Anigamiglu umiamuaqput; unnuamili tamatumani iqalulaunngilat. 4Ullaakkut qaummaliqtillugu, Jiisusi tasiup sinaani nangiqpuq; ilinniaqtit qaujimanngilat Jiisusiuninganik. 5Jiisusiup apirivait, “Qiturngait, iqalulaunngilasi?”
Taakkua kiuvaat, “Iqalulaunngilagut.”
6Tavva uqautivait, “Nuluasi ningitilauqsiuk umiap taliqpianut, tavva iqalungniaqpusi.” Tavva nuluatik ningitippait, amuarunnarunnairlugit, iqaluit unurninginnut.
7Tavva ilinniaqtiup Jiisusiup nagligijangata Piitturuusi uqautivaa, “Ataniuvuq!” Saimuunili Piitturuusi tusarami Ataniungmat, annuraani silalliq ativaa piiqsimalauramiuk pinasuarluni, imaanullu misikpuq. 8Ilinniaqtilli nunaliaqput umiakkut, nuluamingnik kalittlutik iqalungnik tatattunik, nunamut ungasinginnamik, uuktutinik 100-nik ungasingniqaramik nunamut. 9Nunamut niugamik, takuvut qijuksanik ikumajunik, iqalungniglu igajaujunik, niaquujaniglu. 10Jiisusiup uqautivait, “Iqalurataaqtassinnik tamaunngaigissi.”
11Tavva Saimuuni Piitturuusi umiamut ikilluni nuluat nunamut uniaqpait, iqalungnik angijuutinik tatattut, 153-nik; iqaluit taimaak unuqtigigaluarmata, nuluat aliktaunngilat. 12Jiisusiup uqautivait, “Qailusi nirilirissi.” Ilinniaqtillu nalliattaluunniit apirijumanngilaa, “Kinauvit” qaujimagamik Ataniungmat. 13Jiisusi qaigami niaquujaq tiguvaa taakkununga tunillugu, taimailiurivuqtauq iqalungnik.
14Tamajja Jiisusiup pingajungannik saqqinnirilauqtanga ilinniaqtiminut tuqungajunit makinningata kingurngani.
Jiisusiup Piitturuusiullu Uqaqatigiingningak
15Nirijariiramigli, Jiisusi uqaqpuq Saimuuni Piitturuusimut, “Saimuuni Juanasiup irninga, ukunangaat pinnariniqsarivinga?”
Piitturuusiup kiuvaa, “Ilaak Ataniq; qaujimavutit nagligigakkit.”
Jiisusiup uqautivaa, “Siipilaaqutikka niritinniakkit.” 16Aippanganik Jiisusiup uqautivaa, “Saimuuni Juanasiup irninga, pinnaarivinga?”
Taassuma kiuvaa, “Ilaak Ataniq, qaujimavutit nagligigakkit.”
Jiisusiup uqautivaa, “Siipiqutikka pairiniakkit.” 17Pingajuannik Jiisusiup uqautivaa, “Saimuuni, Juanasiup irninga, nagligivinga?”
Piitturuusili qiksaaliqpuq pingajuannik uqautingmagu, “Nagligivinga?” Tavva uqautiliqpaa, “Ataniq, sunalimaanik qaujimavutit; qaujimavarma nagligigakkit.”
Jiisusiup uqautivaa, “Siipiqutikka niritinniakkit. 18Sulijumik uqautivagit, inuusuktuutillutit, ilingnik tattirusirlutit aivalauqputit aivigijumajarnut; ittuuliruvilli taliikkik isagumaaqpaakkik, asivillu tattirusirumaaqpaatit aitillutit aivigijumanngitarnut.” 19Jiisusi tamatuminga uqalauqpuq, Piitturuusiup tuqutauluni Guutiup niqturnaqtitaunirilaaqtanganik uqausiqarluni. Tamatuma kingurngagut Jiisusiup uqautivaa, “Malinnga.”
Jiisusi Ilinniaqtilu
20Piitturuusili tunummut qiviarami tunuminiittumik takuvuq ilinniaqtimik Jiisusiup nagligijanganik, taanna unnuksiutimik nirillutik Jiisusimut iigangalauqtuq apirilauqturlu, “Ataniq, nalliatta pijautinniaqpaatit?” 21Piitturuusiup takugamiuk, Jiisusi uqautivaa, “Ataniq unali angut qanuilinganiaqpaa?”
22Jiisusiup uqautivaa, “Inuunginnaqugukku tikilaunnginninni, isumananngilaq ilingnut, ivvilli malinnga!”
23Tavva Jiisusiup maliktingit uqaqattautiliqput una ilinniaqti tuqunianngilaq; Jiisusi uqalaunngilaq tuquniannginnirarluniuk; uqalauqpurli, “Inuunginnaqugukku tikilaunnginninni, isumananngilaq ilingnut.”
24Taannauvuq ilinniaqti tamakkuninga uqausiqaqtuq, tamakkua titiralauqpait; qaujimavugullu uqausirijangit sulingmata.
Uqausiit Kingulliqpaat
25Asinginniktauq Jiisusi amisunik piniarniqalauqpuq; piniarnirilauqtangilli atangirlutik titiraqtaugajaqpata kinguliriiktarningit maliglugit, silarjuarmiut taakkuninga titiraqsimajunik pisimajunnarasuginngilakka.
Currently Selected:
Juanasiup Aglangit 21: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
