Juanasiup Aglangit 19
19
1Tavva Pailaatuusiup Jiisusi tigujauquvaa, tiigaqtuqtauqullugulu. 2Unataqtuksait niaquutiksaliuqput kakillautilingnik uqpiujaaqtunik pirraillutik, Jiisusiullu niaquanut ilivaat, annuraamiglu aupallariktumik atitillugu; 3upaglugulu uqautivaat, “Niqtuqtauli, Juutit angajuqqaarjuangat!” Kiinangagullu patikpaat.
4Pailaatuusi aningmigami, inugasagjuanut uqaqpuq, “Takugit, una anitippara, takuqullusi taassuma sugiaqtaujjutiksanganik nanisinnginnama.” 5Tavva Jiisusi anivuq, niaquusijarluni kakillautilingnik uligjuaqarlunilu aupallariktumik. Pailaatuusi inungnut uqaqpuq, “Takuliqsiuk angut una!”
6Tunirrusiqtitsijiilli angajuqqaangit tuksiarvigjuallu qaujisaqtingit takugamik Jiisusimik qaigalaaliqput, “Kikiaktuqtauli! Kikiaktuqtauli!”
Tavva Pailaatuusiup uqautivait, “Nangminiq piliqsiuk, kikiakturlugulu, uvangali sugiaqtaujjutiksanganik nanisinngilanga.”
7Tavva Juutit kiuvaat, “Piqujaqaqpugut, piqujait maliglugit taanna tuqutaujuksauvuq, imminik Irniutimmat Guutimut.”
8Pailaatuusiulli uqausiit tamakkua tusaramigit, sivuuraniqsauliqpuq. 9Iglurjuarmullu itirmigami Jiisusi apirivaa, “Nakinngaaqsimavit?”
Jiisusili kiunngilaq. 10Tavva Pailaatuusiup uqautivaa, “Uvannut kiuttailimavit? Qaujimanngilatit pijunnarniqarama anitittunnarlutit, kikiaktuqtautillutilluunniit?”
11Jiisusiup kiuvaa, “Uvannut pijunnarniqarajanngilatit tunisiviunngikkuvit tappaanngat; taimaimmat uvannik pijautitsijuq ilingnut ajurniqarniqsauvuq ilingnit.”
12Pailaatuusili qinirasuaraluaqpuq Jiisusiup anititaujjutiksanganik, Juutilli qaigalaaliqput, “Una anitinniaruviuk, angajuqqaarjuap Siisariup ilannaarinianngilaatit; imminik angajuqqaarjuanguniraqtuq akiraqturmat angajuqqaajuarmik Siisarimik.”
13Pailaatuusiulli uqausiit tamakkua tusaramigit, Jiisusi anitippaa ingilluni iqqaqtuiviup iksivautanganut taijaujumut Ujarangnik Natiliuqsimajumik, Iipruutitut atiqaqtumut Gapatamik. 14Taimailiuqtillugit tavvani ulluq qitiralikasaliqpuq; Qaangiqtauvingmik nalliunniqsiurviup upalungaijarvinga nalliutitillugu. Tavva Juutinut uqaqpuq, “Takugit tavva angajuqqaarjuasi!”
15Qaigalaaliqpulli, “Tamaaniinani, tamaaniinani, kikiaktuqtauli!”
Pailaatuusiup uqautivait, “Angajuqqaarjuasi kikiaktugaksarivara?”
Tavva tunirrusiqtitsijiit angajuqqaangit kiuvut, “Angajuqqaarjuaqanngilagut Siisariup asianik!”
16aTavva Pailaatuusiup Jiisusi aittuutigiliqpaa taakkununga kikiaktuqtauqullugu.
Jiisusiup Kikiaktuqtauninga
Maatiusi 27:32-44; Maakusi 15:21-32; Luukasi 23:26-43
16bJiisusi tavva tiguvaat, 17Jiisusi anivuq, sanningajuliksanilu iqsukpaa, Niaquviniqtalingmut, Iipruutitut atiqaqtumut Guulgaatamik. 18Tavvani Jiisusi kikiaktuqpaat sanningajulingmut, asingingniktauq marruungnik kikiaktuigivut, avataanuarlugik saumianut taliqpianullu, Jiisusili akulliqpaullugu. 19Pailaatuusi titiqqanik niaquata qulaaniittuksanik titiraqpuq ilillugillu sanningajulingmut; imaak uqaqsimajunik: “Jiisusi Naasariitimiuq, Juutit angajuqqaarjuangat.” 20Juutit amisut taakkua titiraqsimajut uqalimaaqpait, Jiisusiup kikiaktuqtauvigijanga ungasingimmat iglugasangnit; taakkua titiraqsimavut Iipruutitut, Laatinititullu, Guriikititullu. 21Tavva tunirrusiqtitsijiit angajuqqaangit Pailaatuusimut uqaqput, “Titiraqsimajariaqanngilaq ‘Juutit angajuqqaarjuangannik,’ imaagli: ‘Angut una uqalauqtuq, Juutit angajuqqaarjuarivaanga.’”
22Pailaatuusiup kiuvait, “Titiraqtakka taimaak titiraqsimainnarniaqput.”
23Unataqtuksait Jiisusimik kikiaktuijariiramik annuraanginnik agguivut sitamaulillugit, atunit atausirmik pitaarlutik; uligjuangali tigugivaat, taanna kiluqarani sanasimalauqpuq. 24Tavva unataqtuksait immingnut uqaqattautivut, “Taanna avigunnairlavut; nalautsaarlutali makitsigiaqattaliqta nalliatta piniarmangaagu.” Tamanna atuqtaulauqpuq aglait nalautsiqullugit imailijut,
“Annuraakka immingnut atunit aggulauqpait,
Uligjuaralu nalautsaarutigilauqpaat.”
Tavva unataqtuksait taimailiulauqput.
25Jiisusiup sanningajulingata qanigijaani ukua nangilauqput, Jiisusiup Anaananga, Anaanangatalu qatanngutaa, Miarilu Klupaasiup nulianga, Miarilu Maaktaliini. 26Jiisusiulli Anaanani takugamiuk, ilinniaqtilu nagligijani tavvani nangiqataujuq; Anaanaminut uqaqpuq, “Arnaq, takugit, tavva Irniit!”
27Tavva ilinniaqti uqautivaa, “Takugit, tavva Anaanait!” Ullumit tavvanngat pigiarluni ilinniaqtiup najuqtigiliqpaa angirramini.
Jiisusiup Tuquninga
Maatiusi 27:45-56; Maakusi 15:33-41; Luukasi 23:44-49
28Jiisusi qaujimalirami sunalimaat pijariirmata, aglait nalautsiqullugit, uqaqpuq, “Qiiliqpunga.”
29Tavvani imiqautitaqaqpuq qasilinaqtumik imalingmik; taakkuali puvaujamik qasilinaqtumut misuqqaarlugu piruqtuvinirlu hisapmik atiliit kapummitaarlugu Jiisusiup qaninganut manivaat. 30Jiisusi qasilinaqtumik imirami uqaqpuq, “Pijariiqpuq”; ukullunilu anirnangiqpuq.
Jiisusiup Kapijauninga Sanirangagut
31Ulluq upalungaijarviungmat, Sapatiutillugu timinik nivingaqujinatik sanningajulingmi, ulluq taanna ijjurnaimmat, Juutit angajuqqaangit Pailaatuusimut apirijaqtuqput kikiaktuqtausimajut niungit nakatiqtauqullugit, sanningajulingmit piiqtaujunnaqsiqullugit. 32Tavva unataqtuksait tavvunngaramik sanningajulingmiittuup sivulliqpaangatta niungik nagguqpait, aippangatalu niungik naggurivait. 33Jiisusimulli tikinnamik takugamik tuqujariirmat, niungik naggunngilaak. 34Unataqtuksailli ilangatta qalugiarjuarmut Jiisusi sanirangagut kapivaa, tavvainnarlu auk imirlu kuviliqpuuk. 35Jiisusi taimailijautillugu takunnaalauqtuup taanna uqautigivaa, uqausirijangalu sulivuq, qaujimallunilu sulijumik uqarami, ilissittauq ukpiliqullusi. 36Tamakkua piniarniulauqput aglait nalautsiqullugit imailijut, “Taassuma sauningit nagguqtaujuksaunngilat.” 37Aglaittauq asingit uqaqsimakkannirivut, “Takujumaaqput kapilauqtamingnik.”
Jiisusiup Iluviqtauninga
Maatiusi 27:57-61; Maakusi 15:42-47; Luukasi 23:50-56
38Tamatumali kingurngagut Juusipi Arimatiamiuq, Jiisusimut ilinniaqtiugami qaujijauttaililluni, Juutinik sivuuragami, Pailaatuusimut apirijaqtuqpuq Jiisusiup timinganik pijunnaqtitaujumalluni, Pailaatuusiup pijunnaqtippaa. Tavva Juusipiup Jiisusiup timinga upaglugu aqqaqtippaa. 39Nikutimuusittauq, tavvunngarivuq unnuangutillugu Jiisusimualauqsimajuq, naksarluni tipitsiariktumik marmik aalusmiglu katisimajumik, uqumainniqaqtumik 100-paun qanigijaani. 40Tavva Jiisusiup timinga tiguvaak, immusirlugulu qallunaaqtamik saattumik immutiksajamik tipitsiariktumullu minguaqpaak, Juutit iluviqsillutik piusirivaktangatut. 41Jiisusiup kikiaktuqtauvigijangani piruqsiiviktaqaqpuq, tavvani piruqsiivingmi iluviksaqtaqaqpuq nutaamik ilisiviulauqsimanngittumik suli. 42Ulluq Juutit upalungaijarvigingmagu, tavvani qanittumi iluviksaqtaqarmat, tavvunga Jiisusiup timinga ilivaat.
Currently Selected:
Juanasiup Aglangit 19: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
