Juanasiup Aglangit 18
18
Jiisusiup Tigujauninga
Maatiusi 26:47-56; Maakusi 14:43-50; Luukasi 22:47-53
1Jiisusi tuksiariirami, ilinniaqtini ilagillugit tavvanngat nuupput, kuuk Kitturaani#18:1 Kuugalap Atinga ikaaqpaat, tavvani piruqsiiviktaqarmat, ilinniaqtini ilagillugit tavvunngaqput. 2Juutasiulli, taassuma pijautitsijingata, taanna piruqsiivik qaujimavaa; Jiisusi ilinniaqtini ilagillugit tavvani katiqattaqsimangmata. 3Taimaimmat, Juutasi tavvunga piruqsiivingmualiqpuq, unataqtuksanik tuksiarvigjuallu qaujisaqtinginnik ilaqarluni tunirrusiqtitsijiit angajuqqaangita Paarisillu tilisimajanginnik, naniruutiqarlutik nanirualijarlutiglu sugiutsijarlutiglu. 4Jiisusili, tamainnik qaujimagami piniarviuniarnirminik, parriarlugit uqautivait, “Kinamik qiniqpisi?”
5Taakkua kiuvaat, “Jiisusi Naasariitimiuq.”
Jiisusiup uqautivait, “Taannauvunga.”
Juutasiup pijautitsijuup inuit taakkua nangiqatigivait. 6Jiisusiulli uqautingmagit, “Taannauvunga,” kinguppiaramik niviqput nunamut. 7Tavva Jiisusiup apirikkanniqpait, “Kinamik qiniqpisi?”
Taakkua uqaqput, “Jiisusi Naasariitimiuq.”
8Jiisusiup kiuvait, “Uqautijariiqpassi taannauvunga; uvangatuaq qinirussinnga, ukua ilagijakka kamaginagit aullarlit.” 9Uqausirilauqtangit nalautsiqullugit imailijut, “Uvannut tunilauqtarnik atausirmigluunniit asiujuqanngilaq.”
10Tavva Saimuuni Piitturuusi, savigjuaqarami, amulluniuk tunirrusiqtitsijiit angajuqqaangatta pijinga ulimarlugu siutingata taliqpia nakappaa. Taannalu piji atiqaqpuq Maulkasmik. 11Jiisusiup Piitturuusi uqautivaa, “Savigjuat kiinailitanganut puuliruk; tiitutiup imanga Ataatama uvannut qaitanga imiriaqanngilara?”
Jiisusiup Aanasimuarujjauninga
12Tavva unataqtuksait angajuqqaangatta Juutillu tuksiarvigjuarmi qaujisaqtingita Jiisusi tiguvaat qilaksurlugu. 13Sivullirmiglu Aanasimuarutivaat; Kaiapaasiup sakinganut, arraagumi tamatumani tunirrusiqtitsijinut angajuqqaangujuup. 14Kaiapaasi taannauvuq Juutit angajuqqaanginnik isumataaqtitsilauqtuq inuk atausiq tuqutaukpat piuniqsaugajarnirarluniuk inuuqatigiilimaat pijjutigilugit.
Piitturuusiup Misiarutiqarninga Jiisusimik
Maatiusi 26:69-70; Maakusi 14:66-68; Luukasi 22:55-57
15Saimuunili Piitturuusi ilinniaqtiuqatingalu Jiisusimik malikpuuk. Ilinniaqtilu Piitturuusiup asia qaujimajaugami tunirrusiqtitsijiit angajuqqaangannut, tunirrusiqtitsijiit angajuqqaangatta iglungata silataanut avaluliuqsimajuumut itiqatauvuq Jiisusi ilagillugu, 16Piitturuusili itiqtarviup ukkuangata silataani nangiqpuq. Ilinniaqtilu asia qaujimajaujuq tunirrusiqtitsijiit angajuqqaangannut, anigami arnamik itiqtarviup ukkuangani kamajimik uqaqatiqalaurluni, Piitturuusi itiqtippaa. 17Tavva arnaq itiqtarviup ukkuangani kamaji Piitturuusimut uqaqpuq, “Taassuma ilinniaqtinginnut ilagijaunngilatit?”
Piitturuusiup kiuvaa, “Ilagijaunngilanga.”
18Sila niglasulirmat, pijiit tuksiarvigjuarmilu qaujisaqtiit qijuksanik ikitsilauqput avataanilu nangirlutik, uqquusittirasuaqput; tavva Piitturuusi nangiqataulirivuq, ikumajuup saniani imminik uqquusittirasuarilluni.
Tunirrusiqtitsijiit Angajuqqaangatta Apiqsurninga Jiisusimik
Maatiusi 26:59-66; Maakusi 14:55-64; Luukasi 22:66-71
19Tunirrusiqtitsijiilli angajuqqaangatta Jiisusi apiqsuqpaa ilinniaqtingita miksaanut ajuriqtuiqattarninganiglu. 20Jiisusiup kiuvaa, “Taimanngat ijiqsimananga inulimaanut uqallaqattalauqpunga; ajuriqtuiqattalauqpungalu Juutit ukpirnirmut katimavinginni Tuksiarvigjuamilu, Juutilimaat kativigivaktanginni; ijiraqturlunga uqallalauqsimananga. 21Sunamik tukisivigijumavinga? Inuit apiqsulaukkit uvannik tusaaqaqtalauqtut uqausiriqattalauqtannik; qaujimangmata qanuq uqausiqaqattalaurmangaarma.”
22Jiisusi taimaak uqarmat, qaujisaqtiit ilangatta uluangagut patigluniuk uqautivaa, “Tunirrusiqtitsijiit angajuqqaangat taimaak kiumajaksariviuk?”
23Jiisusiup kiuvaa, “Naammanngittumik uqaruma, nalunaiqsijuqalaurli qanuq sulinngimmangaarma; suligumali uqausirijannik, sungmat patikpinga?”
24Tavva Aanasiup aniquliqpaa qilaktausimatillugu Kaiapaasimut aatauquva tunirrusiqtitsijiit angajuqqaangannut.
Piitturuusiup Saglutiqakkannirninga Jiisusimik
Maatiusi 26:71-75; Maakusi 14:69-72; Luukasi 22:58-62
25Saimuuni Piitturuusi suli ikualatitaujuup saniani nangiqpuq uqquusittirasuarluni. Tavva uqautivaat, “Taassuma ilinniaqtingita ilaginngilaatit?”
Piitturuusi suligani uqaqpuq, “Ilagijaunngilanga.”
26Tunirrusiqtitsijiilli angajuqqaangatta pijingita ilangat, piruqsiivingmi Piitturuusiup siutingagut nakaqqaujangata ilangat, uqaqpuq. “Takuqqaunngilagit taassuminga ilaqaqtillutit piruqsiivingmi?”
27Tavva Piitturuusi suligani kiugivuq; tavvainnarlu angutiviaq nilliqpuq.
Jiisusiup Aatauninga Pailaatuusimut
Maatiusi 27:1-2,11-14; Maakusi 15:1-5; Luukasi 23:1-5
28Tavva Jiisusi Kaiapaasiup iglunganit aataulirivuq Ruumamiut aulatsijingatta iglurjuanganut. Ullaammariuliqtillugu. Juutilli angajuqqaangit tavvunga itiqataunngilat, ukpirrusirijatik malilugit salumailitirumannginnamik, Qaangiqtauviksiurutiup nalliunnisiuqtauninganik nirijunnaqataujumagamik. 29Tavva Pailaatuusiup anivigillugit uqautivait, “Sunamik pasiksirutiqaqpisi angummut uumunga?”
30Taakkua kiuvut, “Una piunngittulijiunngippat, ilingnuarutigajanngitavut.”
31Pailaatuusiup uqautivait, “Nangminiq tiguliqsiuk iqqaqturlugu nangminiq piqujasi maliglugit.”
Tavva Juutit uqautivaat, “Tuqutsijuksaunngilagut kinamigluunniit.” 32Tamanna piniarniulauqpuq Jiisusiup uqausirilauqtangita nalautsiningit saqqititauqullugit qanuiliuqtauluni tuqutitaulaarmangaarmi.
33Pailaatuusili iglurjuarmut itirmigami Jiisusi qaiquvaa, uqautillugulu, “Juutit angajuqqaarjuarivaatit?”
34Jiisusiup kiuvaa, “Imminik taimaak tamatuminga uqaqpit uvvalu asingnit tamatuminga uqaujjaunniqpit qanuittuungmangaarma?”
35Pailaatuusiup kiuvaa, “Juutiunasugivinga? Nangminiq inuuqatingnut tunirrusiqtitsijiillu angajuqqaanginnut tigujaullutit uvannuaqtauvutit; qanuiliulauravit?”
36Jiisusi kiuvuq, “Angajuqqauviga silarjuarmit tamatumangat pinngilaq; angajuqqauviga silarjuarmit tamatumangat pikpat, maliktinnit unatarujjaugajaqpuq, tigujauqunanga Juutit angajuqqaanginnut; taimaimmat, angajuqqauviga silarjuarmit tamatumangat pinngilaq.”
37Tavva Pailaatuusiup apirivaa, “Tavvaa angajuqqaarjuanguvit?”
Jiisusiup kiuvaa, “Ivvit angajuqqaarjuanguniraqparma. Tamanna pijjutigillugu inuulauqpunga, silarjuarmullu tikillunga, sulijumik nalunaiqsijaqturlunga. Sulijumiittulimaat tusaqpaanga.”
38aTavva Pailaatuusiup uqautivaa, “Sunauvaa sulijuq?”
Jiisusiup Tuqutaksaruqtitauninga
Maatiusi 27:15-31; Maakusi 15:6-20; Luukasi 23:13-25
38bPailaatuusi taimaak uqariirami, anilluni Juutinut uqaqpuq, “Sugiaqtaujjutiksanganik taassuma nanisinngilanga. 39Piusisili maliglugit tigujausimajut ilangannik pijumajassinnik atausirmik anititsisuunguvunga Qaangiqtauvingmik nalliunniqsiuliraangassi; Juutit angajuqqaarjuangannik anititsiquvisinnga?”
40Tavva qaigalaaliqput, “Taassumingaunngittuq, Parapaasimigli!”
(Parapaasili pirajauvuq.)
Currently Selected:
Juanasiup Aglangit 18: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
