Juanasiup Aglangit 17

Jiisusiup Tuksiujjininga Ilinniaqtiminik

1Jiisusi tamakkuninga uqariirami, qilangmut takusarluni uqaqpuq, “Ataatak, ikarraq nalliutivuq; Irniit niqturnaqsitiliruk, niqturnaqtitauqullutittauq Irnirnut. 2Irniit tunisivigisimagaviuk pijunnarnirmik inulimaanut, inuusirmik nungusuittumik tunisiqullugu tunisimajalimaarnut taassumunga. 3Inuusiq nungusuittuq imailingavuq, ilingnik qaujiluni nalaagut sulijumik Guutituangunirnik, tililauqtarniglu Jiisusi Christuusimik. 4Niqturnaqtilauqpagit nunarjuarmi, piniarniillu pinasuaqtauqulauqtalimaatit uvannut pijariilauqpakka; 5maanna, Ataatak niqturnaqtilaunnga nangminiq najuutinirnut pigilauqtannut ilingni najuutitillunga silarjuaq sanajaulauqaaqtinnagu.

6“Qaujijautilauqpagit inungnut uvannut tunilauqtarnut silarjuarmiunit; taakkua pigilauravigit, uvannut tunilauqpatit, uqausiqtit naalalauqpait. 7Maannalu qaujivut uvannut tunilauqtalimaatit ilingnit pisimangmata; 8uqausiit tunilauqtatit uvannut taakkununga uqausirilauqpakka, taakkualu ilaliulauqpait sulijumik qaujillutik ilingnit pisimaninnik; ukpilirlutiglu tililauravinga.

9“Taakkua tuksiutivakka; silarjuarmiut tuksiutinnagit taakkuali kisimi tunilauqtatit uvannut tuksiutivakka, taakkua pigigavigit. 10Pigijalimaakka pigivatit, pigijatillu pigivakka, niqturnaqsititauvungalu tamakkutiguunaq. 11Silarjuarmiittunniiqpunga, taakkuali suli silarjuarmiipput, maanna ilingnut qaivunga. Ataatak Ijjurnaittutit, saputisimalaukkit pijunnarnirnut, taakkua tunilauqtatit uvannut atausiuqullugit, suurlu uvaguk atausiugannuk. 12Taakkunani najuutininni, saputisimalauqpakka pijunnarnirnut, taakkua tunilauqtatit uvannut; saputisimalauqpakka, atausirmigluunniit asiujuqanngilaq taanna kisimi asiujuksausimajuq asiujutuuvuq, aglait nalautsiqullugit. 13Maannali ilingnut qaivunga; taimaaglu uqaqpunga silarjuarmiitillunga, quviasungnira taakkunanngat ilumiutarijauluni naammaksitsiaqullugu. 14Uqausiqtit tusaqtautilauqpakka taakkununga; silarjuarmiunit uumigijauvut silarjuarmiunit pigijaunnginnamik, uvangattauq silarjuarmiut piginngimmanga. 15Tuksianngilanga taakkuninga silarjuarmit piiqtauqujilunga, sapujjisimaqullutilli taakkuninga piunngittumit Saataanasimit. 16Silarjuarmiut taakkua piginngimmagit, uvangattauq silarjuarmiut piginngimmanga. 17Ijjurnaitikkit sulinirnut; uqausiqtit sulingmata. 18Silarjuarmut tililauravinga, taimaaktauq silarjuarmut tilivakka. 19Taakkua pijjutigillugit ilingnut tunivunga, taakkuattauq sulijumik tuniqullugit ilingnut.

20“Taakkuatuarli tuksiutinngilakka, taikkualittauq uqausinginnut ukpilirumaaqtut uvannut tuksiutivakka. 21Tuksiaqpunga taakkualimaat atausiuqullugit; ivvittauq Ataatak, ilunniinnavit, uvangalu ilungniinnama, taakkuattauq iluttinniiqullugit, silarjuarmiut ukpiliqullugit tililauravinga. 22Niqturnarniq uvannut tunilauqtait tunilauqpara taakkununga, taakkua atausiuqullugit uvattitut, 23taakkunaniillunga ivvillu uvanniillutit, atausillariuliqullugit, silarjuarmiut qaujiliqullugit tililauravinga nagligigavigillu uvannik nagligusungniqtut.

24“Ataatak, pijumavunga taakkua uvannut tunilauqtatit, uvanniiqullugit najuqtanni, niqturnarnirmiglu uvannut tunilauqtarnik takuqullugit; uvannik nagligusungnirnut silarjuaq pinnguqtitaulauqqaaqtinnagu. 25Naalaaguuqtutit Ataatak, silarjuarmiut qaujimanngimmata ilingnik, uvangali qaujimavagit; taakkualu qaujivut tililauravinga. 26Taakkununga qaujijautippagit, suli qaujitippalliajumavakka, naglingniq naglingnirijait uvannut ilunginniiqullugu, uvangalu ilunginniillunga.”

Currently Selected:

Juanasiup Aglangit 17: EAIBR

Highlight

Copy