Juanasiup Aglangit 16

1“Tamakkuninga uqautivassi paallaqunasi. 2Juutit ukpirnirmut katimavinginnit anititaujumaaqpusi; nalliutijumaaqpuq nalliat ilissinnik tuqutsilutik Guutimik pijitsirasugijumaarningat. 3Taimailiurviujumaaqpusi Ataatagalu uvaguk qaujimannginnamitikkuk. 4aTamakkuningali uqautilauqpassi, tamanna piviksangat nalliutikpat iqqailiqullusi taakkuninga uqausiqalaurninnik ilissinnut.”

Anirniup Ijjurnaittuup Pinasuarninga

4b“Tamakkuninga pigiarninganit uqautilaunngilassi, najulaurassi. 5Maannali tilijinnut ainiaqpunga; apirijuqanngilasili namungarniarmangaarma. 6Tamakkuningali uqautigassi, uummatissigut qiksaaliqpusi. 7Sulijumik uqautivassi: ilissinnut pivallirnarniqsauvuq aullaruma, aullanngikkuma, ikajuqtiup tikinnianngimmasi; aullarumali, ilissinnut tililaaqpara. 8Tikigunilu, silarjuarmiut tukisitilaaqpait ajurnirmik nalaaguurnirmiglu iqqaqtuqtaunirmiglu. 9Ajurniq pijjutigillugu, uvannut ukpinngimmata; 10nalaaguurniq pijjutigillugu, Ataatamuarniaqpunga, takuniarunniiqpassinngalu; 11iqqaqtuiniq pijjutigillugu, silarjuap matuma aulatsijinga iqqaqtuqtaungmat.

12“Suli amisunik uqausiksaqaraluaqpunga ilissinnut, maannali tusarussiuk nalunaluaqput ilissinnut. 13Sulijuulli Anirninga tikikkuni, sulinirnut tamainnut tasiulaaqpaasi; nangminiq pijunnarnini maliglugu uqallalaanngimmat, tusaqtaminigli uqaujjijumaaqpuq, nalliutijumaaqtuniglu uqautijumaaqpaasi. 14Taassuma niqturnaqtittumaaqpaanga, taanna uqausinnik uqausiqarniarmat ilissinnut. 15Ataatama pingit pigivakka; taimaimmat uqaqpunga taanna uqausinnik uqausiqarumaaqpuq ilissinnut.”

Qiksaaktitauniq Quviasuktitaunirlu

16“Akuniunngittuq takuqattarniarunniiqpassinnga; akuniunngitturlu takuniarivassinnga.”

17Tavva ilinniaqtingita ilangit immingnut uqaqattautiliqput, “Qanurnguna tukilingnik uqallaliqtuq, uqautingmatigut, ‘Akuniunngittuq takuqattarniarunniiqpassinnga akuniunngitturlu takuniarivassinnga’; uqarillunilu, ‘Ataatamut ainiarama.’ 18Qanurnguna tukilik ‘Akuniunngittuq’? Qanuq uqarasuarmangaat tukisinngilavut.”

19Jiisusiulli qaujimagamigit apiqsurumaningit; uqautivait, “Uqarama, ‘Akuniunngittuq takuqattarniarunniiqpassinnga, akuniunngitturlu takuniarivassinnga’ tamanna tavva ilissinnut apiqsuutigijasi? 20Sulijumik uqautivassi, qialusilu uggualaaqpusi, silarjuarmiulli quviasulaaqput; ilissili qiksaagumaaqpusi, qiksaangnisili quviasuninguqtitaulaarivuq. 21Arnaq nutaraqtaarasukkuni qiksaaliqpuq, nalliunninga nalliutingmat; nutarakulugli irniarijariiruniuk, ilungiqsurniriqqaujani puiguqpaa, quviasuliqpuq nutarakuluk irniangungmat silarjuarmut. 22Taimainnivusittauq maanna qiksaakpusi, takulaarivassili uummatissigut quviasummarililaaqpusi, quviasungnirijasilu kinamulluunniit piiqtaunianngilaq ilissinnit.

23“Ulluq nalliutikpat uvannik apiqsuurunniirumaaqpusi. Sulijumik uqautivassi, Ataata tuksiarvigigussiuk sunatuinnarmik, taassuma tunisiviginiaqpaasi Atinni. 24Maannamut tikillugu tuksialaunngilasi sunatuinnarmik Atinni; tuksiarissi, tunisiviuniaqpusi tavva, quviasungnisi naammaksitsiaqullugu.”

Silarjuarmik Saalaqarniq

25“Ajjiujunik aturlunga tamakkuninga uqautiqattalauqpassi; nalliutijumaaqpurli ajjiujunik aturlunga ilissinnut uqaqattarunniirviksara tukisinatsiaqtunigli uqarvigiqattalaaqpassi Ataatamik. 26Tamanna ulluq nalliutikpat tuksiarumaaqpusi atinni; uqanngilangali Ataata tuksiarvigijumanirarlugu pijjutigilusi; 27Ataataup nangminiq nagligingmasi, nagligigassinnga ukpirlusilu Guutimit pilaurama. 28Ataatamit pisimavunga silarjuarmuarlungalu; maannali silarjuaq qimangniaqpara Ataatamut ailunga.”

29Ilinniaqtingita uqautivaat, “Maanna tukisinatsiaqtunik uqausiqaliqputit, ajjiujuniglu uqausiqarnatit. 30Maanna tukisivugut sunalimaat qaujimagavigit, apirijaujariaqanngilatillu; tamanna pijjutigillugu ukpirusukpugut Guutimit pisimanirnik.”

31Jiisusiup kiuvait, “Maannaa ukpiliqpisi? 32Nalliuttuksaq nalliutijumaaqpuq, maannalu atuliqpavut, namutuinnaq siammaqtitauviksasi, atunit angirrassinnuarlusi, uvangalu inutuutillunga qimaktaulaaqpunga; kisianili inutuunngilanga, Ataataup najurmanga. 33Tamakkuninga uqautilauqpassi, uvanniillusi isumajaaqunasi. Silarjuarmi uqumaiksarnaqtumiippusi; sivuuranasili, silarjuaq saalagisimagakku.”

Currently Selected:

Juanasiup Aglangit 16: EAIBR

Highlight

Copy