Juanasiup Aglangit 15

Jiisusiup Imminik Ajjiutinninga Napaaqtumut

1“Uvanga sulijumik napaaqtuuvunga uainiksalik, Ataatagalu paurngaliksanik piruqsiivilirijiuvuq. 2Avalangajulimaallu uvanniittut paurngaqarunnanngittut, piijarniaqpait, paurngaqaqattaqtulimaallu salummaqsarlungit piijaiviginiaqpait, salumatsiarlutik paurnganit pirurviukkanniqullugit. 3Ilissili salummaqsaqtaujariiqpusi ilissinnut uqausirijakka pillugit. 4Ilunniitsainnarissi, uvangalu ilussinniillunga. Suurlu napaaqtup avalangajua imminiinnaq paurngaqarunnanngimmat, napaaqtumiikkuni kisiani piruqtitsijunnaqpuq, taimaikkivusittauq uvanniillusi kisiani.

5“Uvanga napaaqtuuvunga paurngaliksaq, ilissi avalangajuuvusi. Uvanniittuq, uvangalu taassumaniillunga, paurngaqarniaqpuq amisunik, piginanga sunamigluunniit pinasuarunnannginnassi. 6Uvanniinginnanngittuq, igitauniaqpuq napaaqtuup avalangajunngititut paniqtutitut; avalangajut katitaullutik, igitauvangmata ikumamut, ikuallaktaullutik. 7Uvanniinnginarussi, uqausikkalu ilussinniinginnaqpata, pijumajassinnik sunatuinnamik tuksiarussi, tavva tunisiviuniaqpusi. 8Tamakkutiguunaq Ataataga niqturnaqtitauniaqpuq, paurngaqalirussi amisunik; ilinniaqtiunisilu uvannut nalunairluni. 9Ataataup uvannik nagligusungningatut, taimaak nagligivassi; naglingninniitsainnarissi. 10Piqujakka malikkussigit, naglinninniitsainnarniaqpusi; Ataatamattauq piqujangit malilaurakkit, naglingninganiitsainnarlungalu.

11“Tamakkuninga uqarvigivassi, quviasungnira ilissinniiqullugu, quviasungnisi naammaksitsiaqullugu. 12Una tavva piqujara, nagligiqattautiqullusi suurlu nagligigassi. 13Nagligusungniqsaujuqanngilaq imaittumik, inuusirminik tunisijumik ilannarijani pillugit. 14Ilannarivassi piqujannik malikkussi. 15Matuma kingurngani pijimik tainiarunniiqpassi, piji qaujimanngimmat angajuqqaangata piniarninginnik; ilissili ilannarijannik tailauqpassi, Ataatannit tusalauqtalimaannik nalunaiqsivigilaurassi. 16Nirualaunngilassinnga, nirualauqpassili tilillusilu paurngakariaqtuqullusi paurngaqarnisi kajusiqullugu; sunatuinnarmik Ataata tuksiarvigigussiuk atinni, tunisiniaqpuq ilissinnut. 17Matuminga piquvassi, nagligiqattautiqullusi.”

Silarjuarmiut Uumisungningat

18“Silarjuarmiut uumigikpasi, qaujimagissi uumigiqqaarmanga ilissinnit. 19Silarjuarmiutaunnginnassi, silarjuarmiut nangminirmingnik nagligusukkajaqput; silarjuarmiulli ilaginnginnassigik, silarjuarmiunit nirualauqpassi, taimaimmat silarjuarmiut uumigivaasi. 20Ilissinnut uqausirilauqtakka iqqaumasigik, ‘Piji anginiqsaunngilaq angajuqqaaminit.’ Akiraqturuninga, tavva akiraqturniarivaasi; uqausikka malikkunigit uqausisittauq malingniarivait. 21Tamakkuningalimaaq piniarvigijumaaqpaasi uvannik pijjutiqarlutik, uvannik tilisijuq qaujimannginnamijjuk. 22Tikilaunngikkuma uqautijaqturlugit, ajurniqarajanngilat; maannali pasijaksaujunniirunnanngilat ajurnirmingnut. 23Uvannik uumisuktuup Ataatagattauq uumigigivaa. 24Piniarniqalaunngikkuma piniarnirijaulauqsimanngittumik taakkununga, ajurniqarajanngilat; maannali takusimavut Ataatagalu tamannuk uumigivaatikkuk. 25Tamannali taimaippuq piqujanginni uqaqsimajut nalautsiqullugit imailijut: ‘Pijjutiksaqaratik uumigivaanga.’

26“Ikajuqtiksarli tikiguni, Ataatannit tilijumaaqtara ilissinnut, sulijuup Anirninga Ataataminngaaqtuq, taanna uvannik nalunaiqsijumaaqpuq; 27ilissilu nalunaiqsijumaarivusi, pigiarnirmit najuqsimagassinnga.”

Currently Selected:

Juanasiup Aglangit 15: EAIBR

Highlight

Copy