Popular Bible Verses from Juanasiup Aglangit 15

Share

“Uvanga napaaqtuuvunga paurngaliksaq, ilissi avalangajuuvusi. Uvanniittuq, uvangalu taassumaniillunga, paurngaqarniaqpuq amisunik, piginanga sunamigluunniit pinasuarunnannginnassi.

Ilunniitsainnarissi, uvangalu ilussinniillunga. Suurlu napaaqtup avalangajua imminiinnaq paurngaqarunnanngimmat, napaaqtumiikkuni kisiani piruqtitsijunnaqpuq, taimaikkivusittauq uvanniillusi kisiani.

Uvanniinnginarussi, uqausikkalu ilussinniinginnaqpata, pijumajassinnik sunatuinnamik tuksiarussi, tavva tunisiviuniaqpusi.

Nirualaunngilassinnga, nirualauqpassili tilillusilu paurngakariaqtuqullusi paurngaqarnisi kajusiqullugu; sunatuinnarmik Ataata tuksiarvigigussiuk atinni, tunisiniaqpuq ilissinnut.

Nagligusungniqsaujuqanngilaq imaittumik, inuusirminik tunisijumik ilannarijani pillugit.

Avalangajulimaallu uvanniittut paurngaqarunnanngittut, piijarniaqpait, paurngaqaqattaqtulimaallu salummaqsarlungit piijaiviginiaqpait, salumatsiarlutik paurnganit pirurviukkanniqullugit.

Una tavva piqujara, nagligiqattautiqullusi suurlu nagligigassi.

Tamakkutiguunaq Ataataga niqturnaqtitauniaqpuq, paurngaqalirussi amisunik; ilinniaqtiunisilu uvannut nalunairluni.

“Uvanga sulijumik napaaqtuuvunga uainiksalik, Ataatagalu paurngaliksanik piruqsiivilirijiuvuq.

Uvanniinginnanngittuq, igitauniaqpuq napaaqtuup avalangajunngititut paniqtutitut; avalangajut katitaullutik, igitauvangmata ikumamut, ikuallaktaullutik.

“Tamakkuninga uqarvigivassi, quviasungnira ilissinniiqullugu, quviasungnisi naammaksitsiaqullugu.

Piqujakka malikkussigit, naglinninniitsainnarniaqpusi; Ataatamattauq piqujangit malilaurakkit, naglingninganiitsainnarlungalu.

Matuminga piquvassi, nagligiqattautiqullusi.”

Silarjuarmiutaunnginnassi, silarjuarmiut nangminirmingnik nagligusukkajaqput; silarjuarmiulli ilaginnginnassigik, silarjuarmiunit nirualauqpassi, taimaimmat silarjuarmiut uumigivaasi.