Juan 14

Jesús chi dachi Akõremaa wãd̶ai o

1»Jirukaraa nurearã́sturu. Chi Dachi Akõreba wauruud̶e maud̶e chi mʉʉba wauruud̶e ijã́sturu. 2Mʉ Chacha b̶uumare chi b̶uai ãrea barau. Mʉ machi naa wãi machi baita biꞌia wauyua. Makawãe basirã mʉʉba jaraabai basii. 3Mʉ mau biꞌia waud̶e wãaruubʉrã, waya neei machi uad̶oi baita mʉ ome nuread̶amera. 4Machiba kuitaa panuu mʉ samaa wãaruu. Chi o sid̶a kuitaa panuu.

5Maamina Tomasba jarasii:

—Dai Mechiu, adua panuu bichi samaa wãaruu. ¿Saka mau o kuitaad̶aima?

6Maud̶e Jesusba jarasii:

—Mau o mʉʉbʉ. Mʉʉd̶eeba Dachi Akõre biawãra unu panuu maud̶e chokae b̶uai uru panuu. Mʉwãebʉrã ab̶a bid̶a mʉ Chachamaa poyaa neebai.

7Machiba mʉ biawãra unu panuubʉrã, mʉ Chacha sid̶a unu panuu.#14:7 Machiba mʉ biawãra unu panuubʉrã, mʉ Chacha sid̶a unu panuu. Griego bed̶ead̶e chi b̶ee kartad̶e b̶ʉ kub̶uu: Machiba mʉ biawãra unu panad̶a basirã, mʉ Chacha sid̶a unu panad̶ai basii. Jãabae machiba ichi kuitaa panuu unu panuud̶eeba.

8Maud̶e Felipeba ichimaa jarasii:

—Dai Mechiu, Dachi Akõre daimaa unubiáse. Mauba biꞌia b̶uaika.

9Maud̶e Jesusba jarasii:

—Felipe, mʉ ãrea baaruu machi baara b̶uu. Bichiba mʉ ¿wabid̶a unuwẽa b̶uka? Chi mʉ unubariiba mʉ Chacha sid̶a unubarii. Bichiba ¿saka jara b̶uu “Dachi Akõre daimaa unubiáse”? 10¿Bichiba ijãawẽa b̶uka mʉ, mʉ Chacha ome b̶uu maud̶e mʉ Chacha mʉ ome b̶uu? Mʉʉba berrea b̶uu ara mʉʉd̶eeba berreakau. Maumaarã mʉ Chacha mʉ ome b̶uuba mʉʉd̶eeba berrea b̶uu. Biawãra mʉʉd̶eeba ne joma waubarii. 11Ijã́sturu mʉ, mʉ Chacha ome b̶uu maud̶e mʉ Chacha mʉ ome b̶uu. Mʉʉba maka jara b̶uu machiba ijãad̶awẽa panuubʉrã, mʉʉba wau b̶uu kakua ijã́sturu. 12Mʉʉba biawãra jaraaruu: barikiuba mʉʉd̶e ijãa b̶uubʉrã, mʉʉba wau b̶uu ichiba waui. Biawãra mʉʉba wau b̶uu audeara ichiba waui, mʉ, mʉ Chachamaa b̶uad̶e wãid̶eeba. 13Maka machiba mʉʉd̶e ijãa panuud̶eeba mʉ trʉ̃d̶eeba id̶iiduu mʉʉba joma waui. Maka mʉʉd̶eeba jomaurãba mʉ Chacha jomaurã audeara mechiu nii unud̶ai. 14Biawãra machiba mʉʉd̶e ijãa panuud̶eeba joma mʉ trʉ̃d̶eeba id̶iiduu mʉʉba waui.

Jesusba Dachi Akõre Jauri deai jarad̶a

15»Machiba mʉ biawãra kʉ̃ria panuubʉrã, mʉ waubi b̶uu bed̶ea ijãa panad̶ai.#14:15 Ijãa panad̶ai. Griego bed̶ead̶e chi b̶ee kartad̶e b̶ʉ kub̶uu: ijãa panásturu. 16Maud̶eeba mʉ Chachamaa id̶ii machi Karibabarii bʉimera. Mau machi baara ewaricha b̶uai. 17Ichi Dachi Akõre Jauribʉ. Ichiba Dachi Akõre biawãra kuitaabiabarii. Nau iujãad̶ebenarãba ichi poyaa adaud̶aabai, unud̶akaud̶eeba maud̶e adua panuud̶eeba. Maud̶e machiaburu ichi kuitaa panuu, machi baara b̶uud̶eeba maud̶e machi sõd̶e b̶uud̶eeba.

18»Mʉʉba machi jẽramara kĩra b̶ʉiwẽe. Mʉ waya machimaa neei. 19Kãꞌãabariwãed̶e ẽbẽrarã nau iujãad̶ebenarãba mʉ waa unud̶aabai maamina machiba mʉ unud̶ai. Mʉʉba chokae b̶uai uru b̶uud̶eeba, machia bid̶a chokae b̶uai uru nuread̶ai. 20Mʉ neeruud̶e machiba kuitaad̶ai mʉ, mʉ Chacha ome b̶uu, machi mʉ baara panuu maud̶e mʉ machi baara b̶uu. 21Chi mʉ waubi b̶uu bed̶ea ũriped̶a wau b̶uuba mʉ kʉ̃ria b̶uu. Ab̶auba mʉ kʉ̃ria b̶uubʉrã, mʉ Chachaba mau kʉ̃ria b̶uai. Maud̶e mʉa bid̶a mau kʉ̃ria b̶uai maud̶e mʉ ichimaa unubii.

22Maabae chi ab̶abena Judas, Iscariotewãeba Jesusmaa id̶isii:

—Dai Mechiu, ¿sakãe bichi daimaa unubiaima maamina nau iujãad̶ebenarãmaa unubiabaima?

23Jesusba panausii:

—Chi mʉ kʉ̃ria b̶uuba mʉ bed̶ea wau b̶uai. Maud̶e mʉ Chachaba mau kʉ̃ria b̶uai. Maabae dai ichimaa need̶ai ichi baara panad̶ai baita. 24Chi mʉ kʉ̃riawẽa b̶uuba mʉ bed̶ea waukau. Chi machiba ũri panuu bed̶ea mʉʉd̶ewãe, maumaarã mʉ Chacha, chi mʉ bʉid̶ad̶e.

25»Mau mʉʉba machimaa jara b̶uu mʉ wabid̶a machi baara b̶uud̶eed̶e. 26Maamina mʉ Chacha mʉ trʉ̃d̶eeba ichi Jauri bʉi machi Aid̶abarii b̶uamera. Dachi Akõre Jauriba ne joma machimaa jaradeai. Ichiba mʉʉba jarad̶a machimaa joma kĩrababiai.

27»Mʉʉba machi sõd̶e jirukaraayuwãe duanubiai. Maamina mʉʉba makaabai, chi nau iujãad̶ebenarãba makabadau kĩra. Maud̶eeba ãrea jirukaraarã́sturu. Wapearã́sturu. 28Mʉʉba machimaa jarasii mʉ wãaruu maud̶e waya machi baara b̶uad̶e neei.#Juan 14:3,18. Machiba mʉ biawãra kʉ̃ria panasirã kĩrajʉʉd̶ai basii mʉ Chachamaa wãaruu kakua. Ichi mʉ audeara chi mechiu niid̶eeba mʉ waya b̶ui mʉ naed̶e b̶uad̶amaa. 29Mʉʉba mau jara b̶uu makai naed̶e, biawãra makaaruud̶e machiba ijãad̶amera.

30»Mʉ machi baara ãrea berreawẽe, nau iujãad̶ebena rey neeruud̶eeba. Mauba mʉ ome poyaakau. 31Maka mʉ Chachaba waubi b̶uu mʉʉba waui. Maka nau iujãad̶ebenarãba kuitaad̶ai mʉʉba mʉ Chacha ãrea kʉ̃ria b̶uu.

»Jiradústuru. Wãuríduru.

Currently Selected:

Juan 14: cmi

Highlight

Copy