Juan 13
13
Jesusba ichi baara nibabadaurã jʉ̃rʉ jeraad̶a
1Pascua ewari bai naed̶e Jesusba kuitaa b̶uasii ichi ewari neeruu. Kuitaasii nau iujãa b̶ʉiped̶a ichi Akõremaa wãi. Jesusba joma ichid̶irã nau iujãad̶e nuree ãrea kʉ̃ria b̶uasiid̶eeba ichiba mau kʉ̃ria unubiasii ab̶a ichi biuruu ewarid̶aa.
2Ẽsabud̶aa baaruud̶e komaa panasid̶au. Mau naed̶e jʉbawãe niiba Simón warr Judas Iscariote sõd̶e kʉ̃risiabisii Jesús jidaubii baita. 3Jesusba kuitaa b̶uasii ichi Akõreba ne joma ichi juad̶e b̶usii, maud̶e kuitaa b̶uasii ichi Dachi Akõred̶ebena need̶a maud̶e waya ichimaa wãi b̶uu. 4Maamina ãchi kewaraa komaa panuud̶e jiraduped̶a ichiba anab̶ari jʉ̃barii ẽesii. Maabae kakua poabarii adauped̶a kʉrrd̶e jʉ̃sii. 5Kuurud̶e bania jui adauped̶a ichi baara nibabadaurã jʉ̃rʉ jeraasii. Ãchi ab̶aab̶aa jeraaped̶a ãchi jʉ̃rʉ maud̶e chi kakua paru poabibariiba poakuasii.
6Jesusba Simón Pedromaa neeruud̶e Pedroba jarasii:
—Mʉ Mechiu, ¿bichiba mʉ jʉ̃rʉ jeraaruka?
7Jesusba panausii:
—Mʉʉba wau b̶uu bichiba anakʉd̶e kuitaawẽebʉrã maamina jãad̶akare kuitaai.
8Maamina Pedroba jarasii:
—Mʉ jʉ̃rʉ bichiba ewari ab̶a bid̶a jeraabai.
Jesusba jarasii:
—Mʉʉba bichi jʉ̃rʉ jeraawẽebʉrã, bichi mʉʉd̶ewãe.
9Maud̶eeba Simón Pedroba jarasii:
—Maka b̶uubʉrã, mʉ Mechiu, mʉ jʉ̃rʉ́turu jeraarã́se, ¡maumaarã mʉ jua maud̶e mʉ boro sid̶a jeraase!
10Maud̶eeba Jesusba jarasii:
—Ẽbẽra kuid̶akare ichi jʉ̃rʉ waa jeraabai b̶uu ichi kakua joma biꞌia jeraasiid̶eeba. Machi joma jeraa nuree, maamina ab̶a jeraawẽa b̶uu.
11Jesusba kuitaa b̶uasii kaiba ichi jidaubii b̶uu. Maud̶eeba jarasii: «Ab̶a jeraawẽa b̶uu».
12Ãchi jʉ̃rʉ jeraakuasiid̶e Jesusba waya ichi anab̶ari jʉ̃barii jʉ̃sii. Maabae waya kobadaumare akʉ b̶eeped̶a jarasii:
—¿Kuitaasid̶aka sakãe mʉʉba machi jʉ̃rʉ jeraasii? 13Machiba mʉʉmaa “mʉ Jaradeabarii” abadau maud̶e “mʉ Mechiu abadau”. Biawãra arakʉd̶e jara panuu, mʉ maka niid̶eeba. 14Mʉ chi Mechiuba maud̶e machimaa Jaradeabariiba, machi jʉ̃rʉ jeraasiid̶eeba machia bid̶a chiya jʉ̃rʉ jeraad̶ai panuu. 15Mʉʉba jãka unubiasii machi chiya aid̶ad̶amera. 16Mʉʉba biawãra jaraaruu: Chi chibari baita bari trajabarii ab̶a bid̶a ichi chibari audeara mechiu niiwãe. Chi ichi bʉid̶a chi bʉid̶a audeara mechiu niiwãe. Bari trajabariiba waubarii kĩra mʉʉba waubariid̶eeba, machia bid̶a ara mau kĩra waud̶ai panuu. 17¿Ũrisid̶aka? Maka wauduubʉrã biawãra biꞌia panad̶ai.
18»Mʉʉba mau joma machimaa jarawẽa b̶uu, mʉʉba jʉrʉ adaud̶arã saka nuree kuitaa b̶uud̶eeba. Dachi Akõre bed̶ead̶e b̶ʉ kub̶uu kĩra biawãra makamera mʉʉba jaraaruu: “Chi mʉ baara ko b̶uad̶a mʉ kĩramaa b̶eesii”.#Salmos 41:9. 19Mʉʉba anakʉd̶e mau jaramaa b̶uu mau makai naed̶e, biawãra makaaruud̶e machiba Mʉʉd̶e ijãad̶amera.#Isaías 43:10. 20Mʉʉba biawãra jaraaruu: mʉʉba bʉiruu ab̶auba biꞌia irsibiiruubʉrã mʉ biꞌia irsibiiruu. Maud̶e mʉ biꞌia irsibiiruuba mʉ bʉid̶a biꞌia irsibiiruu».
Jesusba Judas ʉ̃rʉbena jarad̶a
Mateo 26:20-25; Marcos 14:17-21; Lucas 22:21-23
21Maka jaraped̶a Jesús ãrea kĩra nomaa b̶eesii. Maabae jarasii:
—Mʉʉba biawãra jaraaruu: ab̶a machid̶ebenaba mʉ jidaubii.
22Ichi baara nibabadaurã ãchi chiya ichia bara b̶eesii, Jesusba sãu jarad̶a adua panuud̶eeba. 23Maarãd̶ebena ab̶a chi Jesusba ãrea kʉ̃riabarii, ichi jãkaa akʉ b̶uasii.#13:23 Ichi jãkaa akʉ b̶uasii. Griego bed̶ead̶e b̶ʉ kub̶uu: Jesús pechumaa sĩu akʉ kub̶uu. Judiorã Pascua ewarid̶e maka kobachid̶au. Ab̶a chi Jesusba ãrea kʉ̃riabarii. Juanba ara ichi maka jarabachii. 24Simón Pedroba daud̶uba jara kub̶uuba, maumaa jarasii Jesusmaa kai ʉ̃rʉbena jara b̶uu id̶imera. 25Maabae chi Jesús jãkaa akʉ b̶uuba id̶isii:
—Dai Mechiu, ¿kaiba bichi jidaubiima?
26Jesusba panausii:
—Mʉʉba pan paratud̶e sũraped̶a dearuu, mau ichibʉ.
Ara makʉd̶e pan sũraped̶a Jesusba Simón Iscariote warr Judasmaa deasii. 27Judasba mau kod̶akare Satanás juad̶e b̶eesii. Maud̶e Jesusba Judasmaa jarasii:
—Bichiba waui b̶uu isa wause.
28Maamina chi komaa panuuba kuitaad̶aabasii Jesusba sakãe maka jarasii. 29Judasba ãchi chi nejarra pebadau ũabisa uru b̶uabachii. Maud̶eeba waabenarãba kʉ̃risiasid̶au Jesusba chi bari panabadau ewari baita nedobʉimera jarasii maebʉrã chi nejarr barauwãe nureerãmaa dead̶e wãmera. 30Judasba chi pan adauped̶a ara makʉd̶e awara wãsii. Mau ẽsabud̶aa ba b̶uasii.
Jesusba waubi b̶uu bed̶ea wid̶i
31Judas wãd̶akare Jesusba jarasii:
—Jãabáeburu Dachi Akõreba unubiai mʉ, chi Ẽbẽra Ba B̶uad̶a chi mechiu nii. Mau awara mʉʉd̶eeba Dachi Akõreba unubii ichi chi mechiu nii. 32Mʉ, chi Ẽbẽra Ba B̶uad̶aba Dachi Akõre chi mechiu nii unubiiruu, Dachi Akõreba mʉ arab̶aud̶e chi mechiu unubii. Ichiba kãꞌãabariwãed̶e mau unubii. 33Machi mʉ warrarãd̶eeba mʉʉba jaraaruu: mʉ machi baara kãꞌãa b̶uabai. Mʉʉba judiorã mechiurãmaa jarad̶a kĩra jãabae anakʉd̶e machimaa jaraaruu: machiba mʉ jʉrʉd̶ai, maamina mʉ wãaruumaa poyaa wãd̶aabai.#Juan 7:33; 8:21.
34»Mʉʉba waubi b̶uu bed̶ea wid̶i machimaa jaraaruu: ãrea kʉ̃ria nureásturu.#13:34 Mʉʉba waubi b̶uu bed̶ea wid̶i. Dachi Akõreba waubi b̶uu bed̶ea chi chõra unubadau: Levítico 19:18; Deuteronomio 6:5. Mʉʉba machi ãrea kʉ̃ria b̶uu kĩra machi sid̶a arab̶aud̶e chiya kʉ̃riásturu. 35Maka chiya kʉ̃ria duanuubʉrã, jomaurãba kuitaad̶ai machi mʉ baara nibabadau».
Jesusba jarad̶a Pedroba ichi unukau ai
Mateo 26:31-35; Marcos 14:27-31; Lucas 22:31-34
36Simón Pedroba Jesusmaa id̶isii:
—Dai Mechiu, ¿bichi samaa wãima?
Maud̶e Jesusba panausii:
—Anakʉd̶e mʉ wãaruumaa bichi poyaa wãabai, maamina jãad̶akare mʉ kaad̶e wãi.
37Pedroba id̶isii:
—Dai Mechiu, ¿sakãe mʉ bichi baara poyaa wãabaima? Mʉ bichi baita biui b̶uu.
38Maud̶e Jesusba jarasii:
—¿Bichi mʉ baita biawãra biui b̶uka? Mʉʉba biawãra jaraaruu: eterr birui naed̶e bichiba b̶es õbea mʉ unukau ai.
Currently Selected:
Juan 13: cmi
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
