ရူဝ်းမႃႉ 3
3
1ပေႃးပဵၼ်ၸိူဝ်ႉၼင်ႇၼႆၸိုင်၊ ၵူၼ်းယူႉတႃႉတွၼ်းလိူဝ်ၸိူဝ်ႉၼင်ႇႁိုဝ်။ ၵွပ်ႈပိူဝ်ႈတၢင်းဢၼ်ထိူဝ်ႁိမ်းလႄႈ မီးဢၵျူဝ်းၵႃႈသင်။- 2မီးဢၵျူဝ်းၵူႈၸိူဝ်ႉၵူႈပိူင်ၼမ်ၼႃႇဢေႃႈ။ ဢၵျူဝ်းဢၼ်မျၢတ်ႈတွၼ်းလိူဝ်ၸမ်ႉ၊ ၶဝ်လႆႈၶၢမ်ႇဢဝ်ပျႃႇတိၵ်ႈၵႃႈတီႈၽြႃးပဵၼ်ၸဝ်ႈဢေႃႈ။- 3ပိၵ်ႉသမ်ႉၼႂ်းၶဝ်ၵမ်ႈၽွင်ႈဢမ်ႇယုမ်ႇသေၵေႃႈ တၵ်းမီးတီႈဝႃႈၵႃႈသင်။ တၢင်းဢၼ်ၶဝ်ဢမ်ႇယုမ်ႇလႄႈယူႇၼၼ်ႉ တၵ်းယႃႉသဵတ်ႈၸႃႇၽြႃးပဵၼ်ၸဝ်ႈလႆႈႁိုဝ်။- 4ဢမ်ႇပဵၼ်ၸိူဝ်ႉၼင်ႇၼၼ်။ ၵွပ်ႈႁွႆးၼႆႉလႄႈ၊ ပိၵ်ႉသမ်ႉၵူၼ်းတင်းသဵင်ႈတင်းလူင်သဵတ်ႈၸႃႇလူႉသေၵေႃႈ ႁႂ်ႈသဵတ်ႈၸႃႇၽြႃးပဵၼ်ၸဝ်ႈ တႄႇယူႇၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ ၵႂၢမ်းဢၼ်ၸဝ်ႈႁဝ်းမီးဢမိင်ႉၼၼ်ႉသိုဝ်ႈတေႃႇတီႈၶႃႈဢေႃႈ။ မိူဝ်ႈဢၼ်ၸီႇယၢင်ႇတြႃးၼၼ်ႉၸိုင်၊ ၸဝ်ႈႁဝ်းပႄႉၼႅင်ႇတီႈၶႃႈဢေႃႈ၊ ဝႃႈၼင်ႇၼႆၼၼ်ႉသေၵမ်း။
5ပေႃးဢမူႉဢၼ်ဢမ်ႇတြႃးႁဝ်းၼႆႉ ႁႂ်ႈတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈထၢင်ႇသႃးမႃးၸိုင်၊ တၵ်းလႆႈဝႃႈၸိူဝ်ႉၼင်ႇႁိုဝ်။ ပေႃးၽြႃးပဵၼ်ၸဝ်ႈပၼ်တၢမ်ႇၸိုင်၊ မၼ်းၸဝ်ႈႁဵတ်းဢမူႉဢၼ်ဢမ်ႇတြႃးႁိုဝ်။ ဢၼ်ၵဝ်ဝႃႈၸိူဝ်ႉၼင်ႇၼႆၼႆႉၸိုင် ၵဝ်ဝႃႈၸွမ်းၼင်ႇသၽေႃးၵူၼ်းဢေႃႈ။- 6ဢမ်ႇပဵၼ်ၸိူဝ်ႉၼင်ႇၼၼ်။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၽြႃးပဵၼ်ၸဝ်ႈတၵ်းၸႅတ်ႈထၢမ်ၸီႇယၢင်ႇၵူၼ်းလေႃးၵႃႉတင်းလၢႆၸိူဝ်ႉၼင်ႇႁိုဝ်။- 7လိူဝ်သေၼၼ်ႉ၊ ပေႃးသဵတ်ႈၸႃႇၽြႃးပဵၼ်ၸဝ်ႈႁႂ်ႈမုၼ်ၵုင်ႇသရေႇမၼ်းၸဝ်ႈယႂ်ႇမႃးယူႇ ၵွပ်ႈပိူဝ်ႈဢၼ်သဵတ်ႈၸႃႇၵဝ်လူႉၼၼ်ႉၸိုင်၊ ႁဵတ်းသင်လႄႈ ယင်းၸီႇယၢင်ႇၵဝ်ၸိူဝ်ႉၼင်ႇၵူၼ်းဢၼ်မီးဢပႅတ်ႈၼၼ်ႉယူႇၼင်ႇႁိုဝ်။- 8ႁဵတ်းသင်လႄႈဢမ်ႇဝႃႈ၊ ၸွမ်းၼင်ႇဢၼ်ၵူၼ်းၵမ်ႈၽွင်ႈသႄႉသွမ်းႁဝ်းယူႇသေလႄႈဝႃႈ ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီ ႁႂ်ႈမီးဢၵျူဝ်းဢၼ်လီတႃႉႁဝ်း၊ ဝႃႈၼင်ႇၼႆၼၼ်ႉၼင်ႇႁိုဝ်။ ၵူၺ်းၵႃႈၶဝ်ၸိူဝ်းဢၼ်ဝႃႈၸိူဝ်ႉၼင်ႇၼႆၼၼ်ႉ ထိူၵ်ႈၶၢမ်ႇတၢမ်ႇဢပႅတ်ႈဢေႃႈ။
ၽူႈလႂ်ၵေႃႈဢမ်ႇသိုဝ်ႈတေႃႇ
9ပေႃးပဵၼ်ၸိူဝ်ႉၼင်ႇၼႆၸိုင်၊ တၵ်းပဵၼ်ၸိူဝ်ႉၼင်ႇႁိုဝ်။ ႁဝ်းၼႆႉယဵင်ႈၶႅၼ်းမျၢတ်ႈႁိုဝ်။ ဢမ်ႇမျၢတ်ႈသေဢိတ်း။ လွင်ႈမၼ်းၸမ်ႉ ၵဝ်ၼႄပျႃးလွင်ႈဢၼ်ၵူၼ်းယူႉတႃႉဢိၵ်ႇတင်း ၵူၼ်းႁေႇလသႃႉတင်းသဵင်ႈတင်းလူင်မီးဢပႅတ်ႈၼၼ်ႉမႃး မိူဝ်ႈဢွၼ်တၢင်းၼၼ်ႉယဝ်ႉ။- 10ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၵေႃႉဢၼ်သိုဝ်ႈတေႃႇဢမ်ႇမီး သေၵေႃႉၵေႃႈဢမ်ႇမီး။- 11ၵေႃႉဢၼ်ႁူႉဢမ်ႇမီး။ ၵေႃႉဢၼ်ႁႃၽြႃးပဵၼ်ၸဝ်ႈဢမ်ႇမီး။- 12ၵူၼ်းတင်းသဵင်ႈတင်းလူင်ၽိတ်းတၢင်းယဝ်ႉ။ ပဵၼ်ၵေႃႉဢၼ်ဢမ်ႇလႆႈလွင်ႈမိူၼ်မိူၼ်ၵၼ်ယဝ်ႉ။ ၵေႃႉဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢမ်ႇမီး။ သေၵေႃႉၵေႃႈဢမ်ႇမီး။- 13ၵူင်ၶေႃးၶဝ်ၼၼ်ႉပဵၼ်ၶုမ်ပႃႇႁဵဝ်ႈဢၼ်ၽုၺ်ႇဝႆႉဢေႃႈ။ ၶဝ်ၼၼ်ႉဢဝ်လိၼ်ႉၶဝ် ၸၢင်ႈပႅတ်ႉၸၢင်ႈလႅၼ်ဢေႃႈ။ ၼႂ်းသီႇသူပ်းၶဝ်ၼၼ်ႉ မီးၵွင်ႉမီးယၢင်ငူးႁၢႆႉဢေႃႈ။- 14သူပ်းၶဝ်ၼၼ်ႉတဵမ်ဝႆႉတင်းၵႂၢမ်းဢၼ်ၵိၼ်ႇလႃႇ ဢိၵ်ႇတင်းၵႂၢမ်းဢၼ်ႁၢႆႉၵျၢမ်းၼႃႇဢေႃႈ။- 15တိၼ်ၶဝ်ၼၼ်ႉၸၢင်ႈၶၼ်ၸၢင်ႈၽႂ်း ႁႂ်ႈလႆႈဢဝ်ဢသၢၵ်ႈၵူၼ်းတၢႆဢေႃႈ။- 16ၼႂ်းသဵၼ်ႈတၢင်းဢၼ်ၶဝ်ၵႂႃႇတင်းလၢႆၼၼ်ႉ မီးတၢင်းလူႉတၢင်းလႅဝ်ဢိၵ်ႇတင်းတုၵ်ႉၶႃႉတၢင်းၽၢၼ်ဢေႃႈ။- 17သဵၼ်ႈတၢင်းဢၼ်ၵတ်းယဵၼ်ၶျၢမ်းသႃႇၸိုင် ၶဝ်ဢမ်ႇႁူႉဢမ်ႇၸႅင်ႈ။- 18လွင်ႈဢၼ်တၵ်းလႆႈၵူဝ်ၽြႃးပဵၼ်ၸဝ်ႈၼၼ်ႉ ဢမ်ႇမီးသိုဝ်ႈၼႃႈတႂ်ႈတႃၶဝ်၊ ဝႃႈၼင်ႇၼႆဢေႃႈ။
19လွင်ႈဢၼ်ၵႂၢမ်းၵႃႈဢၼ်ပႃးၼႂ်းပိင်းၺၢပ်ႈတြႃးတင်းသဵင်ႈတင်းလူင်ၼၼ်ႉ ၸၢပ်ႈသႅင်ႇၵၼ်တင်းၶဝ်ၸိူဝ်းဢၼ်ၶၢမ်ႇဢဝ်ပိင်းၺၢပ်ႈတြႃးၼၼ်ႉၸိုင်၊ ႁဝ်းႁူႉယူႇဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ၊ သူပ်းၵူၼ်းတင်းသဵင်ႈတင်းလူင် တၵ်းလႆႈမီးတၢင်းဢၼ်ဢိုတ်းဝႆႉယူႇလႄႈ ၵူၼ်းလေႃးၵီႇတင်းသဵင်ႈတင်းလူင် တၵ်းပဵၼ်ၵေႃႉဢၼ်ထုၵ်ႇဢပႅတ်ႈ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။- 20ပိူဝ်ႈဢၼ်ပိင်းၺၢပ်ႈတြႃး ပဵၼ်လွင်ႈဢၼ်ႁႂ်ႈဢပႅတ်ႈတူႉၸရိူၵ်ႈတင်းလၢႆထၢင်ႇသႃးလႄႈ၊ ၽူႈလႂ်တၵ်းဢမ်ႇႁွတ်ႈထိုင်တၢင်းသိုဝ်ႈတေႃႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးၼၼ်ႉ။
ၽြႃးပဵၼ်ၸဝ်ႈႁဵတ်းၸိူဝ်ႉႁိုဝ်ႁႂ်ႈၵူၼ်းသိုဝ်ႈတေႃႇ
21တေႃႈလဵဝ်ၼႆႉၸမ်ႉ၊ မႅၼ်ႈၼင်ႇဢၼ်ၵျၢမ်းပိင်းၺၢပ်ႈတီႉ၊ တင်းၵျၢမ်းဢၼႃႇၵၢတ်ႈတီႉတင်းလၢႆၶၢမ်ႇသၢၵ်ႈသေႇဝႆႉၼၼ်ႉ၊ တြႃးတၢင်းသိုဝ်ႈတေႃႇၽြႃးပဵၼ်ၸဝ်ႈ ဢၼ်ဢမ်ႇၸၢပ်ႈသႅင်ႇၵၼ်တင်းပိင်းၺၢပ်ႈတြႃး၊- 22ဢၼ်ဝႃႈတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈယေႇသူႉၶရိၸ်ႈ ဢၼ်ပဵၼ်ပုၼ်ႈၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၼၼ်ႉလႄႈ ႁွတ်ႈထိုင်ၵႃႈၼိူဝ်ၶဝ်တင်းသဵင်ႈတင်းလူင်ၼၼ်ႉၸိုင် ထၢင်ႇသႃးမႃးယဝ်ႉ၊ တၢင်းဢၼ်ပႅၵ်ႇပိူင်ႈၵၼ်ဢမ်ႇမီးသေဢိတ်း။- 23ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵူၼ်းတင်းသဵင်ႈတင်းလူင်ႁဵတ်းတူႉၸရိူၵ်ႈဢပႅတ်ႈလႄႈ သရေႇလူႉၵႃႈတီႈၽၢႆႇၼႃႈၽြႃးပဵၼ်ၸဝ်ႈယဝ်ႉ။- 24ယင်းဢမ်ႇပၼ်ၵႃႈမၼ်းၶၼ်မၼ်းလႄႈ လႆႈႁွတ်ႈထိုင်တၢင်းသိုဝ်ႈတေႃႇၵွပ်ႈပိူဝ်ႈၵျေးၸူးၽြႃးပဵၼ်ၸဝ်ႈ ၼႂ်းတၢင်းဢၼ် ယေႇသူႉၶရိၸ်ႈ ထုတ်ႇဢဝ်ၼၼ်ႉဢေႃႈ။- 25မၼ်းၸဝ်ႈၼၼ်ႉၸိုင် ၽြႃးပဵၼ်ၸဝ်ႈၶၢၼ်းဝႆႉ ႁႂ်ႈလႆႈပဵၼ်လွင်ႈဢၼ်ၽေႇဢပႅတ်ႈ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၼႂ်းလိူတ်ႈမၼ်းၸဝ်ႈ လွင်ႈၼင်ႇႁိုဝ်တၵ်းလႆႈႁႂ်ႈ တြႃးတၢင်းသိုဝ်ႈတေႃႇၸဝ်ႈထၢင်ႇသႃးၵွပ်ႈပိူဝ်ႈတၢင်းဢၼ်ယိူၼ်ႉၶၢမ်ႇလႄႈ ဢမ်ႇမၢတ်ႈတူႉၸရိူၵ်ႈဢပႅတ်ႈဢၼ်ပူၼ်ႉမႃးယဝ်ႉၼၼ်ႉ၊- 26ဢၼ်ဝႃႈလွင်ႈၼင်ႇႁိုဝ်တၵ်းႁႂ်ႈတြႃးတၢင်းသိုဝ်ႈတေႃႇၸဝ်ႈထၢင်ႇသႃးၼႂ်းၶိင်ႇၵႃႇလႃႉတေႃႇမိူဝ်ႈလဵဝ်ၼႆႉ ႁႂ်ႈလႆႈပဵၼ်ၵေႃႉဢၼ် ပိၵ်ႉသမ်ႉပွႆႇလွတ်ႈဢပႅတ်ႈ ၶဝ်ၸိူဝ်းဢၼ်ယုမ်ႇမၢတ်ႈယေႇသူႉၼၼ်ႉသေၵေႃႈ ႁဵတ်းၸွမ်းၼင်ႇတြႃးယူႇၼၼ်ႉဢေႃႈ။
27ပေႃးပဵၼ်ၸိူဝ်ႉၼင်ႇၼႆၸိုင်၊ လွင်ႈဢၼ်တၵ်းလႆႈဢုပ်ႇဝၢဝ်းၸမ်ႉ၊ ပဵၼ်ၸိူဝ်ႉၼင်ႇႁိုဝ်။ လွင်ႈဢၼ်တၵ်းလႆႈဢုပ်ႇဝၢဝ်းၼၼ်ႉပႄႇပႅတ်ႈဝႆႉယဝ်ႉ၊ ပႄႇပႅတ်ႈဝႆႉၵွပ်ႈပိူဝ်ႈတြႃးဢၼ်လႂ်၊ ပႄႇပႅတ်ႈဝႆႉၵွပ်ႈပိူဝ်ႈတြႃးတၢင်းၵမ်တၢင်းၵျၢင်ႉႁိုဝ်။ ပႄႇပႅတ်ႈဝႆႉၵွပ်ႈပိူဝ်ႈတြႃးတၢင်းၵမ်တၢင်းၵျၢင်ႉဢမ်ႇၸႂ်ႈ၊ ပႄႇပႅတ်ႈဝႆႉၵွပ်ႈပိူဝ်ႈတြႃးတၢင်းဢၼ်ယုမ်ႇမၢတ်ႈဢေႃႈ။- 28ပိူဝ်ႈၼႆလႄႈၵူၼ်းႁဝ်းၼႆႉ၊ ယင်းဢမ်ႇမီးတၢင်းၵမ်တၢင်းၵျၢင်ႉပိင်းၺၢပ်ႈတြႃးလႄႈ ႁွတ်ႈထိုင်တၢင်းသိုဝ်ႈတေႃႇ ၵွပ်ႈပိူဝ်ႈတၢင်းယုမ်ႇမၢတ်ႈဢေႃႈဝႃႈၼႆ၊ လႆႈဢဝ်ၼင်ႇၼႆဢေႃႈ။- 29ၽြႃးပဵၼ်ၸဝ်ႈပဵၼ်ၽြႃးၵူၼ်းယူႉတႃႉတင်းလၢႆၵူၺ်းႁိုဝ်။ ပဵၼ်ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇ ဢမ်ႇၸႂ်ႈႁိုဝ်။ ၸႂ်ႈတႄႉ၊ ပဵၼ်ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇဢေႃႈ။- 30လွင်ႈမၼ်းၸမ်ႉ မီးၽြႃးပဵၼ်ၸဝ်ႈသူႇလဵဝ်ၵူၺ်း ဢၼ်ၵွပ်ႈပိူဝ်ႈတၢင်းယုမ်ႇမၢတ်ႈလႄႈ၊ ႁႂ်ႈၵေႃႉဢၼ်ၶၢမ်ႇတၢင်းဢၼ်ထိူဝ်ႁိမ်း ဢိၵ်ႇတင်းၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းသွင်ၸိူဝ်ႉသွင်ပိူင် တႄႇယူႇၼႂ်းတၢင်းဢၼ်သိုဝ်ႈတေႃႇဢေႃႈ။- 31ပေႃးပဵၼ်ၸိူဝ်ႉၼင်ႇၼႆၸိုင်၊ ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ႁဝ်းပႄႇပႅတ်ႈပိင်းၺၢပ်ႈတြႃးႁိုဝ်။ ဢမ်ႇပႄႇပႅတ်ႈလႃးလႃး၊ ယဵင်ႈၶႅၼ်းႁႂ်ႈတႄႇယူႇဢေႃႈ။
Currently Selected:
ရူဝ်းမႃႉ 3: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
