ရူဝ်းမႃႉ 2
2
တၢင်းဢၼ်ၽြႃးပဵၼ်ၸဝ်ႈၸီႇယၢင်ႇတြႃး
1ၵေႃႉဢၼ်ၸၢင်ႈၸီႇယၢင်ႇၸႅတ်ႈထၢမ်ပိူၼ်ႈၼႆႉဢိူၺ်း မႂ်းဢမ်ႇႁူမ်ႇဢပႅတ်ႈမႂ်းဝႆႉလႆႈၵူၺ်ႉ။ လွင်ႈမၼ်းၸမ်ႉ ပိူဝ်ႈဢၼ်တူဝ်မႂ်းႁဵတ်းဢမူႉ တၢင်းဢၼ်မႂ်းၸီႇယၢင်ႇၸႅတ်ႈထၢမ်ၼၼ်ႉယူႇလႄႈ မႂ်းပဵၼ်ၵေႃႉဢၼ်ၸီႇယၢင်ႇလွင်ႈဢၼ်တူဝ်ၵဝ်ႇမီးဢပႅတ်ႈ ၼႂ်းလွင်ႈတၢင်းဢၼ်မႂ်းၸီႇယၢင်ႇၸႅတ်ႈထၢမ်ပိူၼ်ႈယူႇၼၼ်ႉဢေႃႈ။- 2ႁဝ်းႁူႉလွင်ႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇၶဝ်ၸိူဝ်းဢၼ် ႁဵတ်းၸိူဝ်ႉၼင်ႇၼႆၼၼ်ႉ မႅၼ်ႈၼင်ႇသမ်ႇမႃႇတြႃးၼၼ်ႉယူႇဢေႃႈ။- 3ၵေႃႉဢၼ်တူဝ်ၸဝ်ႈၵဝ်ႇႁဵတ်းဢမူႉၸိူဝ်ႉၼင်ႇၼႆယူႇလႄႈ ၸီႇယၢင်ႇၸႅတ်ႈထၢမ်ၶဝ်ၸိူဝ်းဢၼ်ႁဵတ်းဢမူႉၸိူဝ်ႉၼင်ႇၼႆၼၼ်ႉၼႆႉဢိူၺ်း၊ မႂ်းထၢင်ႇမႂ်းတၵ်းၵၢင်းလွတ်ႈတင်း တၢင်းဢၼ်ၽြႃးပဵၼ်ၸဝ်ႈၸီႇယၢင်ႇၼၼ်ႉႁိုဝ်။- 4မႂ်းယင်းဢမ်ႇႁူႉဢမ်ႇတွင်းလွင်ႈဢၼ် ၵျေးၸူးၽြႃးပဵၼ်ၸဝ်ႈၸူဝ်းဢဝ်မႂ်းၵႂႃႇ ၼႂ်းတၢင်းဢၼ်ၶုၵ်းၸႂ်လႆႈမႆႈၸႂ်ၼၼ်ႉယူႇသေလႄႈ ႁဵတ်းဢမ်ႇပေႃးၼင်ႇႁိုဝ် ၵႃႈတီႈတၢင်းဢၼ်မၼ်းၸဝ်ႈႁဵတ်းၵျေးၸူးယႂ်ႇၼမ်ၼႃႇ၊ တၢင်းဢၼ်မၼ်းၸဝ်ႈယိူၼ်ႉၶၢမ်ႇ၊ တၢင်းဢၼ်မၼ်းၸဝ်ႈၸႂ်ယႂ်ႇၸႂ်ယၢဝ်းၸိူဝ်းၼၼ်ႉယူႇႁိုဝ်။- 5ပေႃးႁဵတ်းၸိူဝ်ႉၼင်ႇၼၼ်ႉၸိုင်၊ မႂ်းသိမ်းပႅင်းတေႃးသႃႉတင်းၸႂ်မႆႈဝႆႉ ပုၼ်ႈဢၼ်မႂ်းတၵ်းၶၢမ်ႇၼႂ်းဝၼ်းတေႃးသႃႉတင်းၸႂ်မႆႈ ဢိၵ်ႇတင်းတၢင်းဢၼ်ၽြႃးပဵၼ်ၸဝ်ႈၸီႇယၢင်ႇၸွမ်းၼင်ႇတြႃးထၢင်ႇသႃးမႃးၼၼ်ႉ ၸွမ်းၵႃႈၼင်ႇဢၼ်ႁူဝ်ၸႂ်မႂ်းၵႅၼ်ႇၶႅင်လႄႈ ဢမ်ႇလႆႈတၢင်းဢၼ်ၶုၵ်းၸႂ်လႆႈမႆႈၸႂ်ၼၼ်ႉဢေႃႈ။- 6မၼ်းၸဝ်ႈၼၼ်ႉတၵ်းတႅၼ်းပၼ်ဢၵျူဝ်းဢပႅတ်ႈ တီႈၵူၼ်းၵူႈၵေႃႉၵူႈၵူၼ်း ၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉၶဝ်မီးၼၼ်ႉဢေႃႈ။- 7တီႈၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီသေႇသေႇလႄႈႁႃၽုင်းသရေႇ ဢိၵ်ႇတင်းၸႃႇတီႉဢၼ်ဢမ်ႇၽွၵ်ႈပျၢၼ်ႇၼၼ်ႉၸိုင်၊ မၼ်းၸဝ်ႈတၵ်းပၼ်ထႃႇဝရႃႉဢသၢၵ်ႈဢေႃႈ။- 8တီႈၶဝ်ၸိူဝ်းဢၼ်မီးသၽေႃးဢၼ်ၸၢင်ႈတွပ်ႇၸၢင်ႈထဵင်လႄႈ ဢမ်ႇထွမ်ႇဢမ်ႇဢဝ်သမ်ႇမႃႇတြႃးလႄႈ ၵမ်ၵျၢင်ႉဢၼ်ဢမ်ႇတြႃးယူႇၼၼ်ႉၸမ်ႉ၊ တေႃးသႃႉတင်းၸႂ်မႆႈၶႆႈၸႃႉၸဝ်ႈဢၼ်ႁႅင်းၼႃႇ၊- 9ဢိၵ်ႇတင်းတုၵ်ႉၶႃႉဝူၺ်ႇတၼႃႇဢၼ်ယႂ်ႇၼႃႇၼၼ်ႉ တၵ်းႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ် ႁဵတ်းလွင်ႈတၢင်းဢၼ်ႁၢႆႉမိူၵ်ႈၵႃႈမီးတင်းသဵင်ႈတင်းလူင်ၼၼ်ႉ မိူဝ်ႈဢွၼ်တၢင်းၵႃႈၼိူဝ်ၵူၼ်းယူႉတႃႉ ၵမ်းလိုၼ်းၵႃႈၼိူဝ်ၵူၼ်းႁေႇလသႃႉဢေႃႈ။- 10ၵူၺ်းၵႃႈမုၼ်ၽုင်းသရေႇ ဢိၵ်ႇတင်းၵတ်းယဵၼ်ၶျၢမ်းသႃႇ တၵ်းႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီ ၵႃႈမီးတင်းသဵင်ႈတင်းလူင်ၼၼ်ႉ မိူဝ်ႈဢွၼ်တၢင်းၵႃႈၼိူဝ်ၵူၼ်းယူႉတႃႉ ၵမ်းလိုၼ်းၵႃႈၼိူဝ်ၵူၼ်းႁေႇလသႃႉဢေႃႈ။
11လွင်ႈမၼ်းၸမ်ႉ ၽြႃးပဵၼ်ၸဝ်ႈဢမ်ႇထွၵ်ႈလူၺ်ႈၼႃႈၽူႈလႂ်ၵူၺ်ႉ။- 12ၶဝ်ၸိူဝ်းဢၼ်ဢမ်ႇမီးပိင်းၺၢပ်ႈတြႃးလႄႈၽိတ်းပိူင်ႈၼၼ်ႉ ယင်းဢမ်ႇမီးပိင်းၺၢပ်ႈတြႃးလႄႈ တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။ ၶဝ်ၸိူဝ်းဢၼ်မီးပိင်းၺၢပ်ႈတြႃးယူႇလႄႈၽိတ်းပိူင်ႈၼၼ်ႉၵေႃႈ၊ တၵ်းလႆႈၶၢမ်ႇတၢင်းၸီႇယၢင်ႇ ၸွမ်းၼင်ႇပိင်းၺၢပ်ႈတြႃးဢေႃႈ။- 13လွင်ႈမၼ်းၸမ်ႉ ၶဝ်ၸိူဝ်းဢၼ်ထွမ်ႇတြႃးၼၼ်ႉ ပဵၼ်ဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢမ်ႇၸႂ်ႈ ၶဝ်ၸိူဝ်းဢၼ်ၵမ်ၵျၢင်ႉတြႃးၼၼ်ႉၵူၺ်း တၵ်းႁွတ်ႈထိုင်တၢင်းဢၼ်သိုဝ်ႈတေႃႇဢေႃႈ။- 14မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ဢၼ်ဢမ်ႇမီးပိင်းၺၢပ်ႈတြႃးၼၼ်ႉၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇသေလႄႈၵမ်ၵျၢင်ႉပိင်းၺၢပ်ႈတြႃးၸဝ်ႈၼၼ်ႉၸိုင်၊ ၶဝ်ၸိူဝ်းဢၼ်ဢမ်ႇမီးပိင်းၺၢပ်ႈတြႃးၼၼ်ႉပဵၼ်တြႃးတီႈတူဝ်ၸဝ်ႈၵဝ်ႇဢေႃႈ။- 15လွင်ႈမၼ်းၸမ်ႉ ပိူဝ်ႈဢၼ်ၸႂ်ဢၼ်ႁူႉလွင်ႈတူဝ်ၸဝ်ႈၵဝ်ႇၼၼ်ႉ ၶၢမ်ႇသၢၵ်ႈသေႇယူႇ ဢိၵ်ႇတင်းပိူဝ်ႈဢၼ်ၵေႃႉၼိုင်ႈလႄႈၵေႃႉၼိုင်ႈ တွင်ႈထၢမ်ၵၼ်လႄႈ တၢင်ႇဢပႅတ်ႈယူႇ လွတ်ႈဢပႅတ်ႈယူႇၼၼ်ႉလႄႈ၊ ၶဝ်ၼႄပျႃးဢၵျူဝ်းတြႃးဢၼ်မၼ်းၸဝ်ႈတႅမ်ႈဝႆႉၵႃႈၼႂ်းႁူဝ်ၸႂ်ၶဝ်ၼၼ်ႉဢေႃႈ။- 16ၼႂ်းဝၼ်းဢၼ်ၽြႃးပဵၼ်ၸဝ်ႈ ဢဝ်ယေႇသူႉၶရိၸ်ႈ ၸႅတ်ႈထၢမ်ၸီႇယၢင်ႇ ဢမူႉၵူၼ်းႁဝ်း ဢၼ်ဢမ်ႇထၢင်ႇသႃးတင်းလၢႆ ၸွမ်းၼင်ႇတြႃးသတၢင်းသိူဝ်းပျေႃႇဢၼ်ၵဝ်ႁေႃးၼႆႉၼၼ်ႉ၊ မၼ်းၸဝ်ႈတၵ်းၸီႇယၢင်ႇၸိူဝ်ႉၼင်ႇၼၼ်ဢေႃႈ။
ၵူၼ်းမဵဝ်းယူႉတႃႉၶဝ်ဢိၵ်ႇတင်းပိင်းၺၢပ်ႈတြႃးၸဝ်ႈ
17ပေႃးမႂ်းပဵၼ်ၵေႃႉဢၼ် လႆႈၶၢမ်ႇတၢင်းဢၼ်ႁွင်ႉႁဵၵ်ႈ ၵူၼ်းယူႉတႃႉလႄႈ ပဵၼ်ၵေႃႉဢၼ်ဢိင်ပိုင်ႈပိင်းၺၢပ်ႈတြႃး၊ ပဵၼ်ၵေႃႉဢၼ်ဢုပ်ႇဝၢဝ်းၼႂ်းၽြႃးပဵၼ်ၸဝ်ႈ၊- 18ပဵၼ်ၵေႃႉဢၼ်ႁူႉဢလူဝ်ႇၸဝ်ႈ၊ ပဵၼ်ၵေႃႉဢၼ်ၸၢင်ႈရွတ်ႈၸၢင်ႈဢၢၼ်ႇပိင်းၺၢပ်ႈတြႃးယူႇသေလႄႈ ၸၢင်ႈႁူႉၸႅင်ႈ လွင်ႈတၢင်းဢၼ်ပႅၵ်ႇပိူင်ႈၵၼ်၊- 19ပဵၼ်ၵေႃႉဢၼ်ထၢင်ႇလွင်ႈဢၼ်တူဝ်ၸဝ်ႈၵဝ်ႇ ပဵၼ်ၵေႃႉဢၼ်ၼႄတၢင်းတီႈၶဝ်ၸိူဝ်းဢၼ်တႃမွတ်ႇ၊ ပဵၼ်ဢၼ်လႅင်းတီႈၶဝ်ၸိူဝ်းဢၼ်မီးၼႂ်းလပ်းသိင်ႇ၊- 20ပဵၼ်ၵေႃႉဢၼ်သင်ႇသွၼ်ၵူၼ်းမိူၵ်ႈတင်းလၢႆ၊ ပဵၼ်ၵေႃႉဢၼ်ႁဵတ်းၼင်ႇႁၢင်ႈမီးၺၢၼ်ႇတင်းသမ်ႇမႃႇတြႃး ၵွပ်ႈပိူဝ်ႈပိင်းၺၢပ်ႈတြႃးယူႇသေလႄႈ ပၼ်ၼႄးဢူႉပတေႇတီႈလုၵ်ႈဢွၼ်ႇတင်းလၢႆၼၼ်ႉၸိုင်၊- 21မႂ်းသင်ႇသွၼ်ပိူၼ်ႈယူႇသေၵေႃႈ၊ တူဝ်ၸဝ်ႈၵဝ်ႇဢမ်ႇသင်ႇသွၼ်တူဝ်ၸဝ်ႈၵဝ်ႇႁိုဝ် ယႃႇပေလၵ်ႉဢုၵ်ႉၸႃႇပိူၼ်ႈဝႃႈၼႆ မႂ်းႁေႃးလၢတ်ႈယူႇသေၵေႃႈ၊ တူဝ်ၸဝ်ႈၵဝ်ႇသမ်ႉလၵ်ႉႁိုဝ်။- 22ယႃႇပေၽိတ်းပိူင်ႈမေးပိူၼ်ႈဝႃႈၼႆ၊ မႂ်းဝႃႈယူႇသေၵေႃႈ၊ တူဝ်ၸဝ်ႈၵဝ်ႇသမ်ႉၽိတ်းပိူင်ႈႁိုဝ်။ မႂ်းလီႁင်ႈရုၵ်ႈထူႉယူႇသေၵေႃႈ သမ်ႉယႃႉပႅတ်ႈႁိမ်ဢဝ်ပိၵ်ႈမၢၼ်ႇၶဝ်ၼၼ်ႉႁိုဝ်။- 23မႂ်းဢိင်ပိင်းၺၢပ်ႈတြႃးသေလႄႈ ဢုပ်ႇဝၢဝ်းယူႇသေၵေႃႈ သမ်ႉပူၼ်ႉလိူဝ်တြႃးၼၼ်ႉလႄႈ ယႃႉမုၼ်သရေႇၽြႃးပဵၼ်ၸဝ်ႈႁိုဝ်။- 24လွင်ႈမၼ်းၸမ်ႉ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တူၺ်းတၢင်းၵမ်တၢင်းၵျၢင်ႉသူသေလႄႈ ၸၢင်ႈသႄႉသွမ်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈ ၵႃႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။
25ပေႃးမႂ်းၵမ်ၵျၢင်ႉပိင်းၺၢပ်ႈတြႃးၸိုင်၊ မႂ်းမီးဢၵျူဝ်းၵွပ်ႈပိူဝ်ႈတၢင်းဢၼ် မႂ်းၶၢမ်ႇတၢင်းဢၼ်ထိူဝ်ႁိမ်းၼၼ်ႉဢေႃႈ။ ပေႃးပူၼ်ႉလိူဝ်တြႃးၸိုင်၊ တၢင်းဢၼ်မႂ်းၶၢမ်ႇတၢင်းဢၼ်ထိူဝ်ႁိမ်းၼၼ်ႉၶိုၼ်းပဵၼ်တၢင်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉၵႂႃႇဢေႃႈ။- 26လိူဝ်သေၼၼ်ႉ၊ ပေႃးၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉ ပႂ်ႉပိင်းၺၢပ်ႈတင်းလၢႆဢၼ်ပႃးၼႂ်းတြႃးၸိုင်၊ တၢင်းဢၼ်မၼ်းဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉ တၵ်းလႆႈမၢတ်ႈၼင်ႇတၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းယဝ်ႉဢမ်ႇၸႂ်ႈႁိုဝ်။
27ၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်း ဢၼ်ၸၢပ်ႈသႅင်ႇၵၼ်တင်းၸႃႇတီႉၵူၼ်းၼၼ်ႉၵေႃႈ ပေႃးၵမ်ၵျၢင်ႉပိင်းၺၢပ်ႈတြႃးယူႇၸိုင်၊ တၵ်းၸီႇယၢင်ႇဢမူႉတီႈမႂ်းဢၼ်မီးၵျၢမ်းလိၵ်ႈ ဢိၵ်ႇတင်းတၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းယူႇသေလႄႈ သမ်ႉပူၼ်ႉလိူဝ်ပိင်းၺၢပ်ႈတြႃးၼၼ်ႉၼႆႉဢမ်ႇၸႂ်ႈႁိုဝ်။- 28လွင်ႈမၼ်းၸမ်ႉ ၵေႃႉဢၼ်ပဵၼ်ၵူၼ်းယူႉတႃႉၽၢႆႇၼွၵ်ႈၵူၺ်းၼၼ်ႉပဵၼ်ၵူၼ်းယူႉတႃႉဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။ တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းၵႃႈတီႈၼိူဝ်ႉတူဝ်ၵႃႇယႃႉၽၢႆႇၼွၵ်ႈၵူၺ်းၼၼ်ႉ ပဵၼ်တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်း ဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။- 29ၵေႃႉဢၼ်ပဵၼ်ၵူၼ်းယူႉတႃႉၽၢႆႇၼႂ်းၵူၺ်း၊ ပဵၼ်ၵူၼ်းယူႉတႃႉဢၼ်မၢၼ်ႇဢၼ်မႅၼ်ႈဢေႃႈ။ တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းၵေႃႈ ပဵၼ်ၵွပ်ႈပိူဝ်ႈတြႃးၵျၢမ်းၵဝ်ႇဢမ်ႇၸႂ်ႈ၊ ပဵၼ်ၵွပ်ႈပိူဝ်ႈဝီႉၺိၺ်ႇတြႃးၸဝ်ႈလႄႈ ၸၢပ်ႈသႅင်ႇၵၼ်တင်းႁူဝ်ၸႂ်ဢေႃႈ။ တၢင်းဢၼ်ယွင်ႈယေႃး ၵေႃႉဢၼ်ၶၢမ်ႇတၢင်းဢၼ်ထိူဝ်ႁိမ်းၸိူဝ်ႉၼင်ႇၼႆၼၼ်ႉ ဢမ်ႇၸၢပ်ႈသႅင်ႇၵၼ်တင်းဢလူဝ်ႇၵူၼ်း၊ ၸၢပ်ႈသႅင်ႇၵၼ်တင်းဢလူဝ်ႇၽြႃးပဵၼ်ၸဝ်ႈဢေႃႈ။
Currently Selected:
ရူဝ်းမႃႉ 2: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
