ရူဝ်းမႃႉ 13

တၢင်းဢၼ်ၶၢမ်ႇဢဝ်ဢႃႇၼႃႇၶုၼ်

1ႁႂ်ႈၵူၼ်းၵူႈၵေႃႉ ႁပ်ႉတုင်းဢဝ်ဢႃႇၼႃႇတၢင်းဢၼ်ၶုၼ်ဢုပ်ႉပိူင်ႇတႃႉ။ လွင်ႈမၼ်းၸမ်ႉ ပေႃးဢၶႂၢင်ႉၽြႃးပဵၼ်ၸဝ်ႈဢမ်ႇမီးၸိုင် ဢႃႇၼႃႇၶုၼ်ဢမ်ႇမီး။ ဢႃႇၼႃႇၵႃႈမီးတင်းသဵင်ႈတင်းလူင်ပဵၼ်တၢင်းဢၼ် ၽြႃးပဵၼ်ၸဝ်ႈၶၢၼ်းဝႆႉဢေႃႈ။- 2ပိူဝ်ႈၼႆလႄႈ ၵေႃႉဢၼ်ႁႄႉၶႅၼ်ဢႃႇၼႃႇၶုၼ်ၼၼ်ႉ ပဵၼ်ၵေႃႉဢၼ်ႁႄႉၶႅၼ်တၢင်းဢၼ်ၽြႃးပဵၼ်ၸဝ်ႈၸီႇယၢင်ႇဝႆႉဢေႃႈ။ ၶဝ်ၸိူဝ်းဢၼ်ႁႄႉၶႅၼ်ၸိူဝ်ႉၼင်ႇၼၼ်ၼၼ်ႉ တၵ်းလႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈဢေႃႈ။- 3ၶုၼ်ၸမ်ႉပဵၼ်ပုၼ်ႈၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းၼၼ်ႉ တၵ်းလႆႈၵူဝ်လႆႈႁႄဢမ်ႇၸႂ်ႈ။ ပဵၼ်ပုၼ်ႈၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၼၼ်ႉတၵ်းလႆႈၵူဝ်လႆႈႁႄဢေႃႈ။ မႂ်းၶႂ်ႈယူႇဢမ်ႇႁႂ်ႈလႆႈၵူဝ်လႆႈႁႄဢႃႇၼႃႇၶုၼ်ႁိုဝ်။ ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းတႃႉ။ ပေႃးၵမ်ၵျၢင်ႉၸိူဝ်ႉၼင်ႇၼၼ်ၸိုင်၊ မႂ်းတၵ်းလႆႈၶၢမ်ႇတၢင်းဢၼ်ယွင်ႈယေႃးတီႈဢႃႇၼႃႇၶုၼ်ၼၼ်ႉဢေႃႈ။- 4ၶုၼ်ၸမ်ႉ၊ ပဵၼ်ၵေႃႉဢၼ်ၶၢမ်ႇတၢင်းၸႂ်ႉတၢင်းသွႆၽြႃးပဵၼ်ၸဝ်ႈပုၼ်ႈဢၵျူဝ်းမႂ်းဢေႃႈ။ ပေႃးမႂ်းၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၸိုင်၊ ႁႂ်ႈမီးတၢင်းဢၼ်ၵူဝ်ဢၼ်ႁႄတႃႉ။ လွင်ႈမၼ်းၸမ်ႉ ၶုၼ်ၼၼ်ႉယိပ်းလၢပ်ႇလၢႆလၢႆလွၵ်ႇလွၵ်ႇၵူၺ်းဢမ်ႇၸႂ်ႈ။ မၼ်းပဵၼ်ၵေႃႉဢၼ်ၶၢမ်ႇတၢင်းၸႂ်ႉတၢင်းသွႆၽြႃးပဵၼ်ၸဝ်ႈဢၼ်ဝႃႈ ၵေႃႉဢၼ်ပိူင်ႇၸီႇယၢင်ႇဢပႅတ်ႈလႄႈ ၶိုၼ်းတွပ်ႇတႅၼ်းပၼ်တီႈၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၼၼ်ႉဢေႃႈ။- 5ပိူဝ်ႈၼႆလႄႈ တၵ်းလႆႈႁပ်ႉတုင်းဢဝ်ဢႃႇၼႃႇၶုၼ် ၵွပ်ႈပိူဝ်ႈတၢင်းဢၼ်ၸီႇယၢင်ႇၶိုၼ်းတွပ်ႇတႅၼ်းပၼ်ဢပႅတ်ႈၼၼ်ႉဢမ်ႇၸႂ်ႈ။ တၵ်းလႆႈႁပ်ႉတုင်းဢဝ်ၵွပ်ႈပိူဝ်ႈၸႂ်ဢၼ်ႁူႉတူဝ်ၸဝ်ႈၵဝ်ႇဢေႃႈ။

6ၵွပ်ႈပိူဝ်ႈလွင်ႈၼၼ်ႉလႄႈ သူပၼ်ၶွၼ်ႇဢေႃႈ။ ၶုၼ်တင်းလၢႆၼၼ်ႉ ပဵၼ်ၵေႃႉဢၼ်ပႂ်ႉဢမူႉၽြႃးပဵၼ်ၸဝ်ႈလႄႈ ႁၢပ်ႇဢမူႉၸဝ်ႈယူႇတႃႇသေႇဢမ်ႇထၢတ်ႇဢေႃႈ။- 7ပိူဝ်ႈၼႆလႄႈ ပၼ်ၸွမ်းၵႃႈၼင်ႇဢၼ်ၵူၼ်းၵူႈၵေႃႉထိူၵ်ႈၶၢမ်ႇၼၼ်ႉတႃႉ။ ပၼ်ၶွၼ်ႇတီႈၵေႃႉဢၼ်ထိူၵ်ႈၶၢမ်ႇဢဝ်ၶွၼ်ႇၼၼ်ႉ ဢိၵ်ႇတင်းတၢင်းဢၼ်ၵဵပ်းၵၢင်တီႈၵေႃႉဢၼ်ထိူၵ်ႈၶၢမ်ႇဢဝ်တၢင်းဢၼ်ၵဵပ်းၵၢင်ၼၼ်ႉတႃႉ။ ၵူဝ်ႁႄၵေႃႉဢၼ်ထိူၵ်ႈလီၵူဝ်လီႁႄၼၼ်ႉတႃႉ။ ၵေႃႉဢၼ်ထိူၵ်ႈရူဝ်ႇသေႇၵူဝ်ယမ်ၼၼ်ႉၵေႃႈ ရူဝ်ႇသေႇၵူဝ်ယမ်တႃႉ။

လွင်ႈတၢင်းဢၼ်သိူၵ်ႈသမ်ႇၵၼ်

8လိူဝ်သေမႅတ်ႈတႃႇတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်ၼၼ်ႉ ယႃႇပေႁႂ်ႈထုၵ်ႇၼီႈသေၸိူဝ်ႉသေပိူင်တီႈသေၵေႃႉသေၵူၼ်း။ ၵေႃႉဢၼ်ႁၵ်ႉပိူၼ်ႈၼၼ်ႉ ပျေႉၸုမ်ႇတင်းတြႃးတၢင်းၵမ်တၢင်းၵျၢင်ႉယဝ်ႉ။- 9လွင်ႈမၼ်းၸမ်ႉ ယႃႇပေၽိတ်းပိူင်ႈမေးပိူၼ်ႈ။ ယႃႇပေဢဝ်ဢသၢၵ်ႈၵူၼ်းတၢႆ။ ယႃႇပေလၵ်ႉဢုၵ်ႉၸႃႇပိူၼ်ႈ။ ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ။ ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈဢုၵ်ႉၸႃႇပိူၼ်ႈဝႃႈၼႆ ၸႃႉၸဵမ်ပိင်းၺၢပ်ႈၸိူဝ်းၼႆႉလႄႈ ပိင်းၺၢပ်ႈတၢင်ႇပႃးၵႃႈမီးတင်းသဵင်ႈတင်းလူင် ပဵၼ်ဢၼ်ၶဝ်ႈပႃးၼႂ်းပိင်းၺၢပ်ႈပႃးၼိုင်ႈဢၼ်ဝႃႈ၊ ၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉၸိုင် မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇဢေႃႈ၊ ဝႃႈၼင်ႇၼႆၼၼ်ႉဢေႃႈ။- 10တၢင်းႁၵ်ႉမႅတ်ႈတႃႇၼၼ်ႉ ဢမ်ႇၸၢင်ႈယႃႉဢၵျူဝ်းၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉ။ ပိူဝ်ႈၼႆလႄႈတၢင်းႁၵ်ႉမႅတ်ႈတႃႇၼၼ်ႉ ပဵၼ်တၢင်းဢၼ်တြႃးတၢင်းၵမ်တၢင်းၵျၢင်ႉပျေႉၸုမ်ႇဢေႃႈ။

11လိူဝ်သေၼၼ်ႉ ႁဝ်းႁူႉၶိင်ႇၵႃႇလႃႉယူႇလႄႈ ထွၵ်ႈလူၺ်ႈလွင်ႈဢၼ်ၶိင်ႇဢၼ်တၵ်းလႆႈတိုၼ်ႇမႃးသေၵႃႈၼႂ်းတၢင်းဢၼ်ႁဝ်းၼွၼ်းလပ်းတေႃႈလဵဝ်ၼႆႉယူႇၼၼ်ႉ ႁွတ်ႈမႃးယဝ်ႉၼၼ်ႉယူႇသေလႄႈ ဢွၼ်ၵၼ်ႁဵတ်းၸွမ်းၸိူဝ်ႉၼင်ႇၼၼ်တႃႉႁဝ်း။ လွင်ႈမၼ်းၸမ်ႉ ဢၼ်ၵႄႇၶျွတ်ႈဢဝ်ႁဝ်းၼၼ်ႉ တေႃႈလဵဝ်ၼႆႉ ယဵင်ႈၶႅၼ်းၸမ်မႃးၼႃႇသေ ဢၼ်ၸမ်မႃးၼႂ်းဝၼ်းဢၼ်ႁဝ်းယုမ်ႇမၢတ်ႈၼၼ်ႉဢေႃႈ။- 12ၶိင်ႇၵၢင်ၶိုၼ်းၸမ်တၵ်းသဵင်ႈလႄႈ ၶိင်ႇၵၢင်ဝၼ်းၸမ်တၵ်းႁွတ်ႈထိုင်ဢေႃႈ။ ပႄႇပႅတ်ႈတၢင်းၵမ်တၢင်းၵျၢင်ႉဢၼ်လပ်းသိင်ႇသေလႄႈ ဢွၼ်ၵၼ်ဢဝ်လၢၵ်ႈၼၢၵ်ႈဢၼ်လႅင်းဢၼ်ၸေးၸုမ်ႇၼၼ်ႉ တိုဝ်းၼုင်ႈတႃႉႁဝ်း။- 13ဝႄႈပႅတ်ႈတၢင်းဢၼ်ႁဵတ်းပွႆး တင်းတၢင်းဢၼ်ၵိၼ်လဝ်ႈပူၼ်ႉလိူဝ်၊ တၢင်းဢၼ်ဢိင်မေႇထုင်ႇဢၼ်ဢမ်ႇတြႃး၊ ၵီႉလေႇသႃႇတၢင်းဢၼ်ၵူဝ်ႈၵိူၵ်ႇ၊ တၢင်းဢၼ်ၽိတ်းၵၼ်၊ တၢင်းဢၼ်ၶေႉၶဵင်ႇၵၼ်ၸိူဝ်းၼၼ်ႉသေလႄႈ ဢွၼ်ၵၼ်ၵမ်ၵျၢင်ႉသၢင်ႈႁဵတ်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းၸိူဝ်ႉၼင်ႇၼႂ်းၶိင်ႇၵၢင်ဝၼ်းၼၼ်ႉယူႇတႃႉႁဝ်း။- 14ဢဝ်ၸဝ်ႈယေႇသူႉၶရိၸ်ႈလႄႈ ၼုင်ႈမႆတႃႉ။ ယႃႇပေၵျၢမ်ႇပေပွင် ပုၼ်ႈတူဝ်ၵႃႇယႃႉႁႂ်ႈတၢင်းဢၼ်မၼ်းၸွႆးၸပ်းၼၼ်ႉလႆႈပဵၼ်။

Currently Selected:

ရူဝ်းမႃႉ 13: CBMS

Highlight

Copy