ရူဝ်းမႃႉ 14
14
ယႃႇပေၸီႇယၢင်ႇတြႃးတီႈပီႈၼွင်ႉ
1ႁပ်ႉတုင်းဢဝ်ၵေႃႉဢၼ်တၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇၼၼ်ႉတႃႉ။ ၼႂ်းဝႃႈၼၼ်သေၵေႃႈ ယႃႇပေတိူင်ႇပၢင်ႇပျၢတ်ႈသၼႃႇဢၼ်လီယုမ်ႇၶိုင်ႈၼိုင်ႈ ဢမ်ႇယုမ်ႇၶိုင်ႈၼိုင်ႈၼၼ်ႉလူၺ်ႈၵၼ်တင်းမၼ်း။- 2တၢင်းၵိၼ်ၵူႈၸိူဝ်ႉၵူႈပိူင်လီၵိၼ်ဢေႃႈ ဝႃႈၼႆ ၵူၼ်းၵမ်ႈၽွင်ႈယုမ်ႇဢေႃႈ။ ၵေႃႉဢၼ်ႁႅင်းလဵၵ်ႉႁႅင်းၵေႇၼၼ်ႉၸမ်ႉ ၵိၼ်ၽၵ်းယိူဝ်ႈၽၵ်းၶဵဝ်ၵူၺ်းဢေႃႈ။- 3ယႃႇပေႁႂ်ႈၵေႃႉဢၼ်ၵိၼ်ၵူႈၸိူဝ်ႉၵူႈပိူင်ၼၼ်ႉ ႁဵတ်းဢမ်ႇပေႃးၼင်ႇႁိုဝ်တီႈၵေႃႉဢၼ်ဢမ်ႇၵိၼ်ၼၼ်ႉ။ ၵေႃႉဢၼ်ဢမ်ႇၵိၼ်ၵေႃႈ ယႃႇပေႁႂ်ႈၸႅတ်ႈထၢမ်ၸီႇယၢင်ႇၵေႃႉဢၼ်ၵိၼ်ၼၼ်ႉ။ လွင်ႈမၼ်းၸမ်ႉ ၽြႃးပဵၼ်ၸဝ်ႈႁပ်ႉတုင်းဢဝ်ၵေႃႉၼၼ်ႉယဝ်ႉ။- 4မႂ်းဢၼ်ၸႅတ်ႈထၢမ်ၸီႇယၢင်ႇတီႈၵူၼ်းဢၼ်ပိူၼ်ႈတၢင်ႇၵေႃႉဢုပ်ႉပိူင်ႇၼၼ်ႉၼႆႉ ပဵၼ်ၽူႈလႂ်။ မၼ်းၼၼ်ႉလႆႈႁွတ်ႈထိုင်တၢင်းဢၼ်လွတ်ႈဢပႅတ်ႈ၊ ဢမ်ႇၼၼ်ၵေႃႈ တၢင်းဢၼ်ၶၢမ်ႇဢပႅတ်ႈ ၵွပ်ႈပိူဝ်ႈတၢင်းဢၼ်ၸဝ်ႈမၼ်းၸီႇယၢင်ႇၼၼ်ႉၵူၺ်းဢေႃႈ။ မၼ်းတၵ်းလႆႈၶၢမ်ႇတၢင်းဢၼ်ႁႂ်ႈတႄႇယူႇဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈတၢတ်ႈၼိူင်ႇႁႂ်ႈမၼ်းတႄႇယူႇၼၼ်ႉလႆႈယူႇဢေႃႈ။
5ဝၼ်းၼိုင်ႈမျၢတ်ႈသေဝၼ်းၼိုင်ႈဝႃႈၼႆ ၵူၼ်းၵမ်ႈၽွင်ႈၸၢင်ႈထၢင်ႇဢေႃႈ။ ဝၼ်းၵူႈဝၼ်းမိူၼ်ၵၼ်ဝႃႈၼႆ ၵမ်ႈၽွင်ႈၸၢင်ႈထၢင်ႇဢေႃႈ။ ႁႂ်ႈၵူၼ်းၵူႈၵေႃႉတူၵ်းၵၢင်ၸႂ်သေၵမ်းလူၺ်ႈ။- 6ၵေႃႉဢၼ်ပႂ်ႉဝၼ်းၼၼ်ႉ ထွၵ်ႈလူၺ်ႈၸဝ်ႈၽြႃးသေလႄႈပႂ်ႉဢေႃႈ။ ၵေႃႉဢၼ်ဢမ်ႇပႂ်ႉဝၼ်းၵေႃႈ ထွၵ်ႈလူၺ်ႈၸဝ်ႈၽြႃးသေလႄႈဢမ်ႇပႂ်ႉဢေႃႈ။ ၵေႃႉဢၼ်ၵိၼ်ၼၼ်ႉပႃးတင်းၸႂ်ဢၼ်ထွၵ်ႈလူၺ်ႈၸဝ်ႈၽြႃးသေလႄႈ ၵျေးၸူးၸဝ်ႈမီးဢေႃႈဝႃႈၼႆ၊ ႁပ်ႉတုင်းဢဝ်လႄႈၵိၼ်ဢေႃႈ။ ၵေႃႉဢၼ်ဢမ်ႇၵိၼ်ၵေႃႈ ပႃးတင်းၸႂ်ဢၼ်ထွၵ်ႈလူၺ်ႈၸဝ်ႈၽြႃးသေလႄႈ ၵျေးၸူးၸဝ်ႈမီးဢေႃႈဝႃႈၼႆ ႁပ်ႉတုင်းဢဝ်လႄႈဢမ်ႇၵိၼ်ဢေႃႈ။
7ၼႂ်းႁဝ်းၼႆႉၽူႈလႂ်သေၵေႃႉသေၵူၼ်း ဢသၢၵ်ႈဢမ်ႇလိပ်းပုၼ်ႈတူဝ်ၸဝ်ႈၵဝ်ႇ။ ၽူႈလႂ်သေၵေႃႉသေၵူၼ်း ဢမ်ႇတၢႆပုၼ်ႈတူဝ်ၸဝ်ႈၵဝ်ႇ။- 8ပေႃးႁဝ်းဢသၢၵ်ႈလိပ်းၸိုင် ႁဝ်းလိပ်းပုၼ်ႈၸဝ်ႈၽြႃးဢေႃႈ။ ပေႃးႁဝ်းတၢႆၵေႃႈ ႁဝ်းတၢႆပုၼ်ႈၸဝ်ႈၽြႃးဢေႃႈ။ ပိူဝ်ႈၼႆလႄႈႁဝ်းဢသၢၵ်ႈလိပ်းသေဢမ်ႇဝႃႈ၊ ႁဝ်းတၢႆသေဢမ်ႇဝႃႈ၊ ႁဝ်းၸၢပ်ႈသႅင်ႇၵၼ်တင်းၸဝ်ႈၽြႃးဢေႃႈ။- 9လွင်ႈမၼ်းၸမ်ႉ ၸဝ်ႈၶရိၸ်ႈၼၼ်ႉၶၢမ်ႇတၢင်းတၢႆလႄႈ ဢသၢၵ်ႈသမ်ႉၶိုၼ်းလိပ်း ႁႂ်ႈလႆႈပဵၼ်ၸဝ်ႈဢၼ်ဢုပ်ႉပိူင်ႇ ၶဝ်ၸိူဝ်းဢၼ်တၢႆ ဢိၵ်ႇတင်းၶဝ်ၸိူဝ်းဢၼ်ဢသၢၵ်ႈလိပ်းဢေႃႈ။
10ႁဵတ်းသင်လႄႈ မႂ်းၸႅတ်ႈထၢမ်ၸီႇယၢင်ႇပီႈၼွင်ႉမႂ်းၼင်ႇႁိုဝ်။ ႁဵတ်းသင်လႄႈ မႂ်းႁဵတ်းဢမ်ႇပေႃးၼင်ႇႁိုဝ်တီႈပီႈၼွင်ႉမႂ်းၼင်ႇႁိုဝ်။ ႁဝ်းၵႃႈမီးတင်းသဵင်ႈတင်းလူင်တၵ်းလႆႈႁွတ်ႈထိုင်ၵႃႈတီႈၽၢႆႇၼႃႈပလၢင်ႇ ဢၼ်ၸီႇယၢင်ႇတြႃးၽြႃးပဵၼ်ၸဝ်ႈဢေႃႈ။- 11ဢၼ်မႃးၼႂ်းၵျၢမ်းလိၵ်ႈၸမ်ႉ ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊ ၵူႈၵေႃႉၵူႈၵူၼ်းတၵ်းလႆႈၶုပ်ႉၶဝ်ႇၵႃႈတီႈၽၢႆႇၼႃႈၵဝ်ဢေႃႈ။ ၵူႈၵေႃႉၵူႈၵူၼ်းတၵ်းလႆႈဢဝ်တင်းသူပ်း ၶၢမ်ႇသဵတ်ႈၸႃႇၵႃႈတီႈၽြႃးပဵၼ်ၸဝ်ႈဢေႃႈ ဝႃႈၼႆ၊ ထႃႇဝရႃႉၽြႃးမီးဢမိင်ႉဢေႃႈ။- 12ပိူဝ်ႈၼႆလႄႈႁဝ်းၵႃႈမီးတင်းသဵင်ႈတင်းလူင် တၵ်းလႆႈမွၵ်ႇလၢတ်ႈၽုၺ်ႇၼႄလွင်ႈတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
ယႃႇႁႂ်ႈပီႈၼွင်ႉလႆႈတူၵ်းလူမ်ႉၼႂ်းဢပႅတ်ႈ
13ပိူဝ်ႈၼႆလႄႈ ၸႃႉၸဵမ်တေႃႈလဵဝ်ၼႆႉလႄႈ ႁဝ်းၵေႃႉၼိုင်ႈလႄႈၵေႃႉၼိုင်ႈ ယင်းဢမ်ႇၸႅတ်ႈထၢမ်ၸီႇယၢင်ႇၵၼ်လႄႈ ယူႇတႃႉႁဝ်း။ လွင်ႈၼင်ႇႁိုဝ် တၵ်းဢမ်ႇမီးဢၶႂၢင်ႉတၢင်းဢၼ်ပီႈၼွင်ႉၵၼ် တၵ်းတိူဝ်ႉမႅၼ်ႈလႄႈလူမ်ႉ၊ ဢၶႂၢင်ႉတၢင်းဢၼ်တၵ်းၽိတ်းပိူင်ႈၼၼ်ႉၸိုင်၊ ယဵင်ႈၶႅၼ်းၸႅတ်ႈထၢမ်ၸီႇယၢင်ႇၵၼ်တႃႉႁဝ်း။- 14ၵဝ်ဢိင်ၸဝ်ႈယေႇသူႉသေလႄႈ တူၵ်းၵၢင်ၸႂ်လႄႈ ႁူႉလွင်ႈဢၼ်တၢင်းၵိၼ်ဢၼ်လႂ်သေဢမ်ႇဝႃႈ ၸွမ်းၼင်ႇပၵတီႉမၼ်းလႄႈ ဢမ်ႇၵူဝ်ႈဢမ်ႇၵိူၵ်ႇၼၼ်ႉယူႇ ဢမၢၼ်ႇၶၼ်ပဵၼ်ဢေႃႈ။ ၼႂ်းဝႃႈၼၼ်သေၵေႃႈ ပေႃးသေၵေႃႉသေၵူၼ်းထၢင်ႇလႄႈဝႃႈ၊ ၵူဝ်ႈၵိူၵ်ႇဢေႃႈ၊ ဝႃႈၼင်ႇၼႆၸိုင်၊ ၵူဝ်ႈၵိူၵ်ႇၵႃႈတီႈၵေႃႉၼၼ်ႉဢေႃႈ။- 15ပေႃးပီႈၼွင်ႉမႂ်းလႆႈၸဵပ်းၸႂ်ၵွပ်ႈပိူဝ်ႈတၢင်းၵိၼ်မႂ်းၸိုင် မႂ်းဢမ်ႇၵမ်ၵျၢင်ႉမႅတ်ႈတႃႇတြႃး။ ယႃႇပေႁႂ်ႈၵေႃႉဢၼ်ၶၢမ်ႇဢဝ်ၵျေးၸူး တၢင်းဢၼ်ၸဝ်ႈၶရိၸ်ႈၶၢမ်ႇတၢႆၼၼ်ႉလူႉ ၵွပ်ႈပိူဝ်ႈတၢင်းၵိၼ်မႂ်း။- 16ၼႂ်းလွင်ႈတၢင်းဢၼ်သူလႆႈဢၶႂၢင်ႉၼၼ်ႉ ယႃႇပေႁႂ်ႈမီးတီႈဢၼ်တၵ်းသႄႉတၵ်းသွမ်း။- 17လွင်ႈမၼ်းၸမ်ႉ မိူင်းၽြႃးပဵၼ်ၸဝ်ႈ ဢမ်ႇတႄႇယူႇၼႂ်းတၢင်းၵိၼ်တၢင်းၶူပ်း။ တႄႇယူႇၼႂ်းတၢင်းဢၼ်သိုဝ်ႈတေႃႇ၊ တၢင်းဢၼ်ၼိမ်၊ တၢင်းဢၼ်သိူဝ်းပျေႃႇ ဢၼ်လႆႈၶၢမ်ႇဢဝ် ၵွပ်ႈပိူဝ်ႈဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။- 18ၵေႃႉဢၼ်ၵမ်ၵျၢင်ႉၸိူဝ်ႉၼင်ႇၼၼ်သေလႄႈ ႁဵတ်းၶႃႈၸဝ်ႈယေႇသူႉၶရိၸ်ႈၼၼ်ႉ ပဵၼ်တီႈဢၼ်ထုၵ်ႇၸႂ်ၽြႃးပဵၼ်ၸဝ်ႈလႄႈ ၼႂ်းၵူၼ်းတင်းလၢႆၵေႃႈ ပဵၼ်တီႈဢၼ်လီယွင်ႈယေႃးဢေႃႈ။
19ပိူဝ်ႈၼႆလႄႈ ဢွၼ်ၵၼ်ၸွမ်းႁႂ်ႈၶိုတ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်း တၢင်းဢၼ်ၼိမ် ဢိၵ်ႇတင်း တၢင်းဢၼ်ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ် တႄႇႁဵတ်းတီႈၵၼ်ၼၼ်ႉတႃႉႁဝ်း။- 20ယႃႇပေႁႂ်ႈဢမူႉၽြႃးပဵၼ်ၸဝ်ႈလူႉၵွပ်ႈပိူဝ်ႈတၢင်းၵိၼ်မႂ်းၼၼ်ႉ။ တၢင်းၵိၼ်ၵူႈၸိူဝ်ႉၵူႈပိူင်ပဵၼ်ဢၼ်မူတ်းသႂ်ဢေႃႈ။ ၵူၺ်းၵႃႈ ၵေႃႉဢၼ်ၵိၼ်ႁႂ်ႈပဵၼ်တီႈဢၼ်ပိူၼ်ႈတိူဝ်ႉမႅၼ်ႈလႄႈလူမ်ႉၼၼ်ႉမီးဢပႅတ်ႈဢေႃႈ။- 21ဢမ်ႇထုၵ်ႇလီႁဵတ်းၸႃႉၸဵမ်တၢင်းဢၼ်ၵိၼ်ၼိူဝ်ႉ တၢင်းဢၼ်ၵိၼ်ၼမ်ႉၸပိတ်ႈလႄႈ၊ လွင်ႈတၢင်းဢၼ်တၵ်းႁႂ်ႈပီႈၼွင်ႉမႂ်းတိူဝ်ႉမႅၼ်ႈလႄႈလူမ်ႉ၊ လွင်ႈတၢင်းဢၼ်တၵ်းႁႂ်ႈၽိတ်းပိူင်ႈ၊ လွင်ႈတၢင်းဢၼ်တၵ်းႁႂ်ႈႁႅင်းလဵၵ်ႉႁႅင်းၵေႇၸိူဝ်းၼၼ်ႉ။- 22မႂ်းမီးတၢင်းယုမ်ႇမၢတ်ႈႁိုဝ်။ ၸွမ်းၼင်ႇဢလူဝ်ႇ ႁႂ်ႈမီးတီႈတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈတႃႉ။ ၵေႃႉဢၼ်ဢမ်ႇၸႅတ်ႈထၢမ်ၸီႇယၢင်ႇတီႈတူဝ်ၸဝ်ႈၵဝ်ႇ ၼႂ်းလွင်ႈတၢင်းဢၼ် တူဝ်ၸဝ်ႈၵဝ်ႇႁပ်ႉတုင်းဢဝ်ၼၼ်ႉမီးမင်ႇၵလႃႇဢေႃႈ။- 23ၵေႃႉဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၼၼ်ႉ၊ ပေႃးမၼ်းၵိၼ်ၸိုင်၊ လႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈ ၵွပ်ႈပိူဝ်ႈဢၼ်မၼ်းယင်းဢမ်ႇမီးၸႂ်ဢၼ်ယုမ်ႇလႄႈၵိၼ်ၼၼ်ႉဢေႃႈ။ တၢင်းၵမ်တၢင်းၵျၢင်ႉ ဢၼ်ယင်းဢမ်ႇမီးၸႂ်ဢၼ်ယုမ်ႇလႄႈ ၵမ်ၵျၢင်ႉၵႃႈမီးတင်းသဵင်ႈတင်းလူင်ၼၼ်ႉမီးဢပႅတ်ႈဢေႃႈ။
Currently Selected:
ရူဝ်းမႃႉ 14: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
