ရူဝ်းမႃႉ 12

တၢင်းၵမ်ၵျၢင်ႉႁႂ်ႈလႆႈပွင်ၵၢၼ်ၽြႃးပဵၼ်ၸဝ်ႈ

1ပီႈၼွင်ႉၶဝ်ဢိူၺ်း၊ ၼင်ႇႁိုဝ်သူတၵ်းႁဵတ်းတၢင်းဢၼ် ဢဝ်တူဝ်ၶၼ်ႇထႃႇသူသၢၵ်ႈၵၢပ်ႈ ၵႃႈတီႈၽြႃးပဵၼ်ၸဝ်ႈလႄႈ ပုၵ်ႈၸေႃႇႁႂ်ႈပဵၼ်ယိတ်ႈဢၼ်ဢသၢၵ်ႈလိပ်းမူတ်းၸၢင်ႇလႄႈ ထုၵ်ႇၸႂ်ၽြႃးပဵၼ်ၸဝ်ႈဢၼ်ဝႃႈ ဝၢတ်ႈဢၼ်သူထုၵ်ႇလီႁဵတ်းၼၼ်ႉၸိုင်၊ ၵဝ်ထွၵ်ႈလူၺ်ႈၵရူႉၼႃႇၽြႃးပဵၼ်ၸဝ်ႈလႄႈ တိုၵ်းယူင်းၸူဝ်းဢဝ်သူဢေႃႈ။- 2သူယႃႇပေႁဵတ်း ပုင်ႇႁၢင်ႈလေႃးၵီႇသေၵမ်း။ ၼင်ႇႁိုဝ်သူတၵ်းၸၢမ်းတူၺ်းလႄႈ ႁူႉလွင်ႈဢၼ်တၢင်းဢၼ်လီဢၼ်မျၢတ်ႈ၊ တၢင်းဢၼ်ထုၵ်ႇၸႂ်၊ တၢင်းဢၼ်ၸေးၸုမ်ႇ ဢၼ်ဝႃႈဢလူဝ်ႇၽြႃးပဵၼ်ၸဝ်ႈ ပဵၼ်လွင်ႈတၢင်းၸိူဝ်ႉၼင်ႇႁိုဝ်ၼၼ်ႉၸိုင် မႄးႁဵတ်းႁူဝ်ၸႂ်ဢၼ်မႂ်ႇလႄႈ ႁွတ်ႈပုင်ႇႁၢင်ႈတၢင်းဢၼ်ၶၢႆႉပုတ်ႈသေတႃႉ။

3ၼင်ႇႁိုဝ်သူတၵ်းဢမ်ႇထၢင်ႇလွင်ႈတူဝ်ၸဝ်ႈၵဝ်ႇ လိူဝ်တွၼ်းသေဢၼ်တူဝ်ၸဝ်ႈၵဝ်ႇထုၵ်ႇလီထၢင်ႇၼၼ်ႉလႄႈ တူဝ်ၸဝ်ႈၵဝ်ႇတၵ်းထၢင်ႇသေႇၶျႃႇလီငၢမ်းၸွမ်းၵႃႈၼင်ႇဢၼ် ၽြႃးပဵၼ်ၸဝ်ႈမႅင်ႇပၼ်တၢင်းဢၼ်ယုမ်ႇမၢတ်ႈ တီႈၵူၼ်းၵူႈၵေႃႉၵူႈၽူႈႁင်းၽႂ်ႁင်းမၼ်းၼၼ်ႉၸိုင် ၵဝ်ဢိင်ၵျေးၸူးၸဝ်ႈဢၼ်ၵဝ်လႆႈၶၢမ်ႇဢဝ်ၼၼ်ႉသေလႄႈ သင်ႇလၢတ်ႈဝႆႉတီႈၶဝ်ၸိူဝ်းဢၼ်မီးယူႇၵႃႈၼႂ်းသူ ၵႃႈမီးတင်းသဵင်ႈတင်းလူင်ဢေႃႈ။- 4ဢူႉပမႃႇၸမ်ႉ၊ ၸိူဝ်ႉၼင်ႇဢၼ်ၼႂ်းတူဝ်ဢၼ်ၼိုင်ႈ ႁဝ်းမီးဢၢင်ႇၵႃႇၼမ်ၼႃႇလႄႈ၊ ဢၢင်ႇၵႃႇၸိူဝ်းၼၼ်ႉဢမ်ႇမီးတၢင်းဢၼ် ႁဵတ်းလွင်ႈတၢင်းဢၼ်ၼိုင်ႈၵူၺ်းၼၼ်ႉ။- 5မိူၼ်ၼင်ႇၼၼ် ႁဝ်းဢၼ်ပဵၼ်ၵူၼ်းၼမ်ၼႃႇၼႆႉ ပဵၼ်တူဝ်ဢၼ်လဵဝ်ၼႂ်းၸဝ်ႈၶရိၸ်ႈလႄႈ ပဵၼ်ဢၢင်ႇၵႃႇၼင်ႇၵၼ်ၵၼ်ဢေႃႈ။- 6ပိူဝ်ႈဢၼ်ႁဝ်းလႆႈၶၢမ်ႇဢဝ်သူးဢၼ်ပႅၵ်ႇပိူင်ႈၵၼ်ႁင်းၽႂ်ႁင်းမၼ်း ၸွမ်းၼင်ႇၵျေးၸူးဢၼ်မၼ်းၸဝ်ႈပၼ်ၼၼ်ႉလႄႈ၊ ပေႃးမီးဢရႃႇပရေႃးၽႅတ်ႈၸိုင် ႁဵတ်းပရေႃးၽႅတ်ႈၸွမ်းၵႃႈၼင်ႇဢၼ်ပမႃႇၼႃႉတၢင်းဢၼ်ယုမ်ႇမၢတ်ႈၼၼ်ႉတႃႉႁဝ်း။- 7ပေႃးမီးဢရႃႇထမ်ႇမႃႉသြႃႇၸိုင် ႁဵတ်းဢမူႉထမ်ႇမႃႉသြႃႇၼၼ်ႉတႃႉႁဝ်း။ ၵေႃႉဢၼ်ၸၢင်ႈသင်ႇသွၼ်သုင်းမႃႉပၼ်ၼၼ်ႉၸိုင် ႁႂ်ႈႁဵတ်းဢမူႉၼၼ်ႉတႃႉ။- 8ၵေႃႉဢၼ်ၸၢင်ႈတိုၵ်းယူင်းၸူဝ်းဢဝ်ၼၼ်ႉၸိုင် ႁႂ်ႈႁဵတ်းဢမူႉၼၼ်ႉတႃႉ။ ၵေႃႉဢၼ်ၸၢင်ႈၽႄၸွၼ်းယိုၼ်ႈမႅင်ႇၼၼ်ႉၸိုင် ႁႂ်ႈမီးတၢင်းၸႂ်ဢၼ်ၼိမ်လီသေလႄႈပၼ်တႃႉ။ ၵေႃႉဢၼ်ဢုပ်ႉၼိူဝ်ၵူၼ်းၼၼ်ႉၸိုင် ႁႂ်ႈမီးတၢင်းၸႂ်ဢၼ်လုမ်းလႃးဝီႉရီႉယႃႉသေလႄႈဢုပ်ႉတႃႉ။ ၵေႃႉဢၼ်ႁဵတ်းတၢင်းဢၼ်ဢဵတ်းလူၸွႆႈထႅမ်မႃႉၸႃႉၼၼ်ႉၸိုင် ႁႂ်ႈမီးတင်းၸႂ်ၸေႇတၼႃႇသေလႄႈႁဵတ်းတႃႉ။

9ႁႂ်ႈၸႂ်မႅတ်ႈတႃႇၵၢင်းလွတ်ႈတင်း တၢင်းဢၼ်ၸၢင်ႈထိမ်ႇၸၢင်ႈမႅပ်းတႃႉ။ လီႁင်ႈတၢင်းဢၼ်ႁၢႆႉမိူၵ်ႈတႃႉ။ ဢိင်တၢင်းဢၼ်လီဢၼ်ငၢမ်းလႄႈ ၸပ်းၸွမ်းတႃႉ။- 10ၼႂ်းတၢင်းဢၼ်ပီႈၼွင်ႉႁၵ်ႉၵၼ်ၼၼ်ႉၸိုင် မၢတ်ႈပဵၼ်ၸိူဝ်ႉၼင်ႇၵေႃႉသေႈပၵတီႉသေလႄႈ ၵေႃႉၼိုင်ႈလႄႈၵေႃႉၼိုင်ႈၸူမ်းပႅင်းၵၼ်တႃႉ။ ၼႂ်းတၢင်းဢၼ်ယွင်ႈယေႃးၼၼ်ႉၸိုင်၊ ယွင်ႈယေႃးပိူၼ်ႈတၢင်ႇၵေႃႉၼႃႇသေတူဝ်ၸဝ်ႈၵဝ်ႇတႃႉ။- 11ၼႂ်းတၢင်းဢၼ်ဢဝ်ႁႅင်းႁဵတ်းၼၼ်ႉၸိုင် ယႃႇႁႂ်ႈမီးတၢင်းဢၼ်ၶၢၼ်ႉဢၼ်ဢိူၼ်။ ၼႂ်းလႂ်ၵေႃႈ ၵႆႉၶၵ်းလႄႈ ၸွမ်းဢလူဝ်ႇၽြႃးပဵၼ်ၸဝ်ႈတႃႉ။- 12ၼႂ်းတၢင်းဢၼ်မုင်ႈထႃႈမွင်းထႃႈၼၼ်ႉၸိုင်သိူဝ်းပျေႃႇတႃႉ။ ၼႂ်းတုၵ်ႉၶႃႉတၢင်းၽၢၼ်ၼၼ်ႉၸိုင် ယိူၼ်ႉၶၢမ်ႇတႃႉ။ ၼႂ်းတၢင်းဢၼ်ႁဵတ်းသူးတွင်းပထၼႃႇၼၼ်ႉၸိုင် ႁဵတ်းတႃႇသေႇဢမ်ႇထၢတ်ႇတႃႉ။- 13မိူဝ်ႈဢၼ်ၵူၼ်းမူတ်းၸၢင်ႇတင်းလၢႆ ယၢၵ်ႈၽၢၼ်ၼၼ်ႉၸိုင် ၽႄၸွၼ်းယိုၼ်ႈမႅင်ႇတႃႉ။ ၵျူဝ်းၸႃးလႄႈ ႁဵတ်းဝၢတ်ႈၶႅၵ်ႇတႃႉ။- 14တီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉၸိုင် သူင်ႇပၼ်မႅတ်ႈတႃႇတႃႉ။ ယင်းဢမ်ႇၵိၼ်ႇဢမ်ႇလႃႇလႄႈ သူင်ႇပၼ်မႅတ်ႈတႃႇတႃႉ။- 15သိူဝ်းပျေႃႇလူၺ်ႈၵၼ် တင်းၶဝ်ၸိူဝ်းဢၼ်သိူဝ်းပျေႃႇၼၼ်ႉတႃႉ။ ႁႆႈႁွင်ႉလူၺ်ႈၵၼ်တင်းၶဝ်ၸိူဝ်းဢၼ်ႁႆႈႁွင်ႉၼၼ်ႉတႃႉ။- 16ၵေႃႉၼိုင်ႈလႄႈၵေႃႉၼိုင်ႈမီးၸႂ်သၽေႃးဢၼ်လဵဝ်ၵၼ်တႃႉ။ ယႃႇႁႂ်ႈမီးၸႂ်ဢၼ်ၸပ်းၸွႆးတၢင်းဢၼ်သုင်တင်းလၢႆ။ ႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ်ၸိူဝ်းဢၼ်ၶျႃးတႅမ်ႇၼၼ်ႉတႃႉ။ ၵဝ်မီးပိင်ႇၺႃႇဝႃႈၼႆ ယႃႇပေထၢင်ႇပေထိူမ်တီႈတူဝ်ၸဝ်ႈၵဝ်ႇ။- 17ပုၼ်ႈတၢင်းဢၼ်ဢမ်ႇလီၸိုင် ယႃႇပေၶိုၼ်းတႅၼ်းပၼ်တၢင်းဢၼ်ဢမ်ႇလီတီႈၽူႈလႂ်။ ၵျၢမ်ႇပွင်တၢင်းၵမ်တၢင်းၵျၢင်ႉဢၼ်လီဢၼ်ထုၵ်ႇ ၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်တႃႉ။- 18ပေႃးသူႁဵတ်းလႆႈၸိုင် ၵႃႈၼင်ႇဢၼ်တၢတ်ႈၼိူင်ႇလႆႈၼၼ်ႉ ယူႇထုၵ်ႇမေႃၵၼ်တင်းၵူၼ်းတင်းသဵင်ႈတင်းလူင်တႃႉ။- 19ၵေႃႉႁၵ်ႉၶဝ်ဢိူၺ်း၊ ပေႃးပိူၼ်ႈၽိတ်းပိူင်ႈသူၸိုင် သူယႃႇပေၶိုၼ်းတွပ်ႇပၼ်ဢၶႂၢင်ႉတီႈတၢင်းၸႂ်မႆႈၶႆႈၸႃႉၸဝ်ႈတႃႉ။ ၵျၢမ်းလိၵ်ႈမႃးၸမ်ႉ ၵဝ်ပိူင်ႇၸီႇယၢင်ႇဢပႅတ်ႈတြႃးဢေႃႈ။ ၵဝ်တၵ်းၶိုၼ်းတွပ်ႇတႅၼ်းပၼ်ၵႃႈၼင်ႇဢၼ်ဢပႅတ်ႈမီးၼၼ်ႉဢေႃႈ ဝႃႈၼႆ၊ ထႃႇဝရႃႉၽြႃးမီးဢမိင်ႉဢေႃႈ။- 20ပိူဝ်ႈၼႆလႄႈ ပေႃးရၢၼ်ႇသူႇမႂ်းဢိုပ်းယၢၵ်ႈၸိုင် ႁဵတ်းလဵင်ႉႁဵတ်းလူတီႈမၼ်းတႃႉ။ ပေႃးမၼ်းတွင်ႉမႆႈၼမ်ႉၸိုင် ပၼ်ပုၼ်ႈဢၼ်မၼ်းတၵ်းၵိၼ်တႃႉ။ ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင် မႂ်းတၵ်းၵွင်ထၢၼ်ႇၽႆးဝႆႉၵႃႈၼိူဝ်ႁူဝ်မၼ်းဢေႃႈ။- 21ယႃႇပေၶၢမ်ႇတၢင်းဢၼ်ႁၢႆႉဢၼ်ႁုၵ်းပႄႉၼႅင်ႇ။ ဢဝ်တၢင်းဢၼ်လီဢၼ်ငၢမ်းပႄႉၼႅင်ႇတၢင်းဢၼ်ႁၢႆႉဢၼ်ႁုၵ်းတႃႉ။

Currently Selected:

ရူဝ်းမႃႉ 12: CBMS

Highlight

Copy